Böyük Qayıdışın böyük başlanğıcı

Əli Həsənov: “14 iyun azad olunmuş torpaqlarımızın Qurtuluş günü kimi tarixə düşdü”

2017-ci ilin tarixdə Azərbaycan üçün hansı hadisələrlə xatırlanacağını, necə proseslərlə əlamətdar olacağını indidən söyləmək çətindir. Çünki tarix dövrlərə dəyər verərkən tələskənliyi qəbul etmir. Ancaq bu günün kontekstində ictimai mənzərəni təhlil edərkən, əsas gündəmi müəyyənləşdirərkən ən mühüm mövzu dəyişməzdir: Cocuq Mərcanlı...

Əlbəttə, müasir Azərbaycan reallığında bir kəndin qısa müddətdə bərpa edilməsi, ən yüksək standartlara uyğun quruculuğu ilə heç kəsi heyrətləndirmək mümkün deyil. Həmçinin son 15 ildə qaçqın və məcburi köçkünlər üçün tikilən 95 şəhərciyin timsalında yeni bir qəsəbənin istifadəyə verilməsi də xüsusi əlamətdar görünmür.

Amma söhbət Cocuq Mərcanlıdan gedəndə münasibət də dəyişir, onun nəticələri də...

Şuşaya uzanan magistralın ilk duracağı

Cocuq Mərcanlıda üst-üstə qoyulan kərpicin də, qəlpə və minalardan təmizlənən 1 kv.m-lik sahənin də, çınqıl yola salınan asfaltın hər qarışı da əhəmiyyətlidir, fövqəl hadisədir...

Çünki ucalan hər kərpic əsgərimizin qanı bahasına geri aldığı torpaqlara Böyük Qayıdışın ilk bünövrəsidir.

Partladıcı vasitələrdən təmizlənən sahələr azad ediləcək yeni ərazilərin müjdəçisidir.

Hər gün daha da uzanan asfalt yol isə Şuşaya uzanan magistralın ilk duracağıdır...

Cocuq Mərcanlı 50 milyonluq azərbaycanlının qürurunu artıran, sevincini yüksəldən, ən əsası isə azad Qarabağa inamını möhkəmləndirən rəmzdir...

Cocuq Mərcanlı İlham Əliyevin öz xalqını vahid amal ətrafında səfərbər edərək bir yumruğa döndərdiyi mənəvi gücdür...

Cocuq Mərcanlı Prezidentin bir kəndin bərpa və quruculuğunu ümummilli hərəkata çevirdiyi qüdrətli fəaliyyət mənbəyidir...

Cocuq Mərcanlı Azərbaycanın, azərbaycanlıların, Baş Sərkərdənin, ordumuzun işğalçıya göz dağıdır...

Cocuq Mərcanlı Lələtəpədir, Azərbaycan əsgərinin qalibiyyət zirvəsidir...

Cocuq Mərcanlı bərpasında hər bir vətəndaşımızın kiçik də olsa xidmət göstərmək istədiyi, ziyarətinə çalışdığı birləşdirici qüdrətdir...

Cocuq Mərcanlı dünyaya artıq effektiv yayılan Azərbaycan həqiqətlərinin baş mövzusudur...

Cocuq Mərcanlı nikbinlik vüsətidir, zəfər simvoludur, milli enerjidir...

Cocuq Mərcanlı mübaliğəsiz olaraq Ağdamdır, Xocalıdır, Xankəndidir - Böyük Qayıdışın böyük başlanğıcıdır!..

Prezidentin Lələtəpədə verdiyi xeyir-dua

Ermənistanın məlum aprel təxribatlarından sonra əks-hücuma keçən ordumuz düşmənə sarsıdıcı zərbələr vuraraq Füzuli, Cəbrayıl və Ağdərə rayonlarındakı 2000 hektardan çox ərazini işğalçılardan azad etdi. Qəhrəmanlıqla qazanılan bu yüksəkliklər nəticəsində əlavə olaraq minlərlə hektar torpaq bu gün Azərbaycan Ordusunun tam nəzarətindədir. Cocuq Mərcanlı kimi yurd yerlərimizin də təhlükəsizliyi təmin olundu. Ötən ilin noyabrında Ali Baş Komandan İlham Əliyevin cəbhə xəttinin ən öndə yerləşən məntəqəsinə - Lələtəpəyə gəlişi ilə Cocuq Mərcanlının bərpa-quruculuq işlərinin başlanmasına xeyir-dua verildi. Və proses başladı...

Prezidentin səfərindən dərhal sonra Baş nazirin müavini, Qaçqınların və Məcburi Köçkünlərin İşləri üzrə Dövlət Komitəsinin sədri Əli Həsənov Cocuq Mərcanlı kəndinə gedərək, vəziyyətlə yerində tanış oldu. Kənddə ilk mərhələdə həyata keçiriləcək bərpa-quruculuq işləri müəyyənləşdi, sakinlərin dönüşü üçün lazımi infrastrukturun yaradılmasının detalları dəqiqləşdirildi.

Nəticə isə özünü çox gözlətmədi. “İşğaldan azad edilmiş Cəbrayıl rayonunun Cocuq Mərcanlı kəndinin bərpası ilə bağlı tədbirlər haqqında” Azərbaycan Respublikası Prezidentinin sərəncamının ardınca bu qəbildən ardıcıl olaraq yeni qərarlar verildi, sərəncamlar imzalandı.

Mart ayında başlanan tikinti işləri artıq ötən ay bitib. İyunun 14-də isə Prezidentin iştirakı ilə Cocuq Mərcanlıda quruculuq prosesinin ilk mərhələsinə məntiqi yekun vuruldu.

96-cı qəsəbənin təhvilinin qüruru

Başdan-başa xarabalığa çevrilən, hər qarışı qəlpə və minalarla dolu olan bir ərazinin hər cür infrastrukturu olan müasir kəndə çevrilməsi prosesi cəmi iki ay çəkdi.

Bu, rekorddur!

Fəqət bu rekordun zəmini heç də ayrılan vəsait, çalışan texnika, işçi qüvvəsi deyildi. Bu rekordu təmin edən əsas amil Prezidentin tapşırığı, müəyyənləşdirdiyi öhdəliklər və davamlı olaraq Cocuq Mərcanlını yenidən quran insanların fəaliyyətinə göstərdiyi mənəvi dəstək, verdiyi ruh yüksəkliyi idi.

Prezidentin rəhbərlik etdiyi bu qrupu hamı tanıyır - sadə vətəndaşa, xüsusən də məcburi köçkünlərə qədər hər kəs onların fəaliyyətini artıq 13 ildir görür və təqdir edir. İndi onlar tikdikləri 96-cı qəsəbənin təhvilinin qürurunu yaşayırlar.

96 qəsəbə - 3,2 milyon kvadratmetr sahəsi olan, bütün sosial-texniki infrastruktura malik yeni yaşayış kompleksləri deməkdir...

50 min ailə və ya 250 min nəfər insanın məskunlaşmasıdır...

151 məktəb, 58 mədəniyyət, 59 səhiyyə müəssisəsi, 60 uşaq bağçası, 2 olimpiya idman kompleksidir...

730 kilometr yol, 965 kilometr su, 1625 kilometr hava elektrik, 465 kilometr qaz xəttidir...

Bunlar statistikadır (şübhəsiz, qürurdoğurucu rəqəmlərdir). Fəqət bu faktların ən canlı və əzəmətli təcəssümü çadırlardan, yataqxanalardan, vaqonlardan qurtulan 250 min insana verilən yeni həyatdır, bəxş edilən sevincdir, inamdır. Yeni qəsəbələrdə qurulan toy mağarları, doğulan körpələr, məktəbə gedən şagirdlər, ali məktəbə qəbul olunan tələbələr və bəlkə də, ən əsası, ağsaqqal-ağbirçəklərin Ağdama, Şuşaya, Xankəndinə doğru uzanan baxışlarından artıq məyusluğun yağmamasıdır...

Xarabalıqda iki aya cənnət yaradanlar...

İlham Əliyevin şəxsi nəzarəti altında aparılan Cocuq Mərcanlının bərpa-quruculuq prosesinin baş icraçısı, yəni bu komandanın koordinatoru - Baş nazirin müavini, Qaçqınların və Məcburi Köçkünlərin İşləri üzrə Dövlət Komitəsinin sədri Əli Həsənovun qəbul otağındayıq...

Həftənin şənbə günüdür, səhər saat 9-dur. Dövlət müəssisələrində qeyri-iş günüdür. Amma burada qələbəlikdir. Köməkçilərin otağında 30 nəfərədək şəxs qəbul növbəsini gözləyir. Məlum olur ki, onlar kollektiv görüşəcəklər. Məcburi köçkünlər üçün salınan yeni qəsəbənin tikintisinin layihə rəhbərləri, iş icraçıları, infrastrukturu inşa edəcək şirkətlərin, müəssisələrin təmsilçiləri gördükləri işlərin hesabatını vermək və yeni tövsiyələr almaq üçün “Cocuq Mərcanlı qrupunun” qəbuldan çıxmasını gözləyirlər. Bəli, burada hər qrupu müvafiq qəsəbəyə uyğun adlandırırlar.

Bu kabineti qərargah adlandırmaq daha düzgün olar. Çünki artıq 20 ildir ki, Prezident iqamətgahından qaçqın-köçkünlərlə bağlı gələn minlərlə tapşırığın, göstərişin icrası yolları burada müəyyənləşir, planlar, layihələr öyrənilir, hazırlanır, gərgin müzakirələr gedir, ən nəhayət, 96 qəsəbənin açılış vaxtı dəqiqləşdirilir...

Əli Həsənov gəlişimizi bilən kimi bizi kabinetinə dəvət edir. O qədər də geniş olmayan, çox sadə tərtibatlı və köhnə mebelli (sonradan Əli müəllim deyəcəkdi ki, iş otağıma dəbdəbəni əsla yaxın buraxmıram, hətta xarici qonaqlar da bu barədə zarafatla soruşanda ciddi cavab verirəm: mən hələ də yataqxanada yaşayan qaçqın-köçkünlərin rəhbəriyəm, mənə bu kifayətdir) kabinetdə 20-dən artıq adam var. Hamının üzündən yorğunluq, amma ifadə edilməsi mümkün olmayan fərəh, qürur duyulur.

Əli müəllim onları bizə təqdim edir: “Bu kişilər Cocuq Mərcanlının qəhrəmanlarıdır, əsl fədakarlarıdır. Xarabalıqda iki aya cənnət yaradan insanlardır. İki ay bunlar normal yatmaqdan da, yeməkdən də məhrum idilər. Amma bütün əziyyətlərə Prezident son qoydu. Bildirdiyi razılıq və təşəkkür hamımızın yorğunluğunu bir anda çıxartdı.

İndi isə yeni layihənin icrasına başlamışıq. Görürsünüz də, istirahət və fasilə yoxdur, ola da bilməz!

Çünki hörmətli İlham Əliyev qarşımızda yeni vəzifə qoyub: 100 ev tikilməlidir, infrastruktur genişlənməlidir. Prezident Bakıya qayıdan kimi kəndin və yolların bərpa-quruculuq işlərinə üst-üstə 12 milyon manat ayırdı. Bunlara da deyirəm, Prezident Cocuq Mərcanlı istiqamətindəki işlərinə fasilə verdimi? Yox! Demək, biz də həmişə olduğu kimi, nümunəmizi bu KİŞİdən - liderimizdən götürməliyik. İstirahəti, fasiləni də Cocuq Mərcanlı tam təhvil verəndə edəcəyik. Əslində, nə istirahət ey...

Şuşa məscidini bərpa etməmiş durmaq, dayanmaq yox!”

Hamı razıdır...

Prezidentin əsas tələbi: kiçik Cocuq Mərcanlını böyük Azərbaycanın inkişaf və müasirlik rəmzinə çevirmək

Əli müəllim əslən Cəbrayıl rayonundandır, bu torpaqda böyüyüb. Bakıya doğru uzanan çətin və şərəfli ömür yolu Cocuq Mərcanlının “böyük qardaşından” - Böyük Mərcanlıdan başlayıb.

Bu torpaqları qarış-qarış tanıyır. Ona görə də ərazi barədə ona məlumatlandırıcı informasiya verməyə ehtiyac yoxdur. Əksinə, Baş nazirin müavini özü onlara ehtiyat su mənbəyi və əlavə yol çəkilişi barədə koordinatları deyir, əkin yerlərinin istifadəsində qarşıya çıxacaq müəyyən təbii problemləri əvvəlcədən söyləyir və onları aradan qaldırmaq yollarını göstərir.

“Özünüz bilirsiniz, Prezident dövlət büdcəsindən xərclənən hər bir qəpiyin də şəffaf hesabatını aparır, daim qənaət tələb edir, israfçılıq onun gözünün düşmənidir. Amma dövlət başçısının da dediyi kimi, Cocuq Mərcanlının tam bərpasında bütün qüvvələr, o cümlədən maliyyə mənbələri fəal səfərbər olunacaq. Əsas keyfiyyətli işdir. Prezident əvvəlki layihəni də təsdiq edəndə tapşırıq verdi ki, evlər geniş olsun, insanların rahatlığının təmini üçün daha yeni inşaat metodlarından istifadə edək.

Cənab İlham Əliyev daim deyir, elə 14 iyunda da söylədi: Cocuq Mərcanlı Azərbaycanın simvolu kimi qurulmalıdır. Ölkəmizdə hansı nailiyyət varsa, hansı yenilik tətbiq olunursa, mütləq Cocuq Mərcanlıda da tətbiq edilməlidir. Hörmətli İlham Əliyev kiçik Cocuq Mərcanlını böyük Azərbaycanın inkişaf və müasirlik rəmzi kimi görür və bu məqsədi də həyata keçirir!

Bu məram yeni tikiləcək 100 ev üçün də aktualdır. Su, enerji, suvarma-meliorasiya, əkin, heyvandarlıq kimi sahələrdə ən kiçik çatışmazlığı, riski də indidən bilməliyik, indidən də həll etməliyik” - Əli Həsənovun bu tövsiyələrini mütəxəssislərin əlavələri kəsir. Hər rəy ətrafında qızğın diskussiya gedir.

İşgüzar müzakirələrə mane olmaq istəmirik. Çünki hər bir detalla bağlı mütəxəssislər danışır, hər kəsin münasibəti öyrənilir. Ümumiyyətlə isə Prezidentə təqdim olunacaq layihədə heç bir əyər-əskiklik olmamalıdır - ortaq rəy budur!

Müzakirələrin bir müddət onsuz aparılmasını istəyən Əli Həsənovla otağın bir küncünə çəkilirik. Əslində, Baş nazirin müavininə ünvanlanacaq konkret sual da yoxdur. Müsahibəmiz də elə söhbət formatında keçdi...

Hər şey Heydər Əliyevdən başladı...

Əli Həsənov Cocuq Mərcanlı barədə danışarkən mövzuya nə 14 iyundan, nə iki aylıq quruculuq işlərindən, nə də ötən ilin aprel zəfərindən başladı. Onun fikrincə, bu mövzunun başlanğıcı Heydər Əliyev şəxsiyyəti, onun fitri qabiliyyəti, misilsiz fəaliyyətidir:

“Danılmaz həqiqətdir: Heydər Əliyev 1993-cü ildə xalqın tələbi ilə ölkəyə rəhbərliyə başlamasından və Prezident seçilməsindən sonra əsl müstəqilliyimiz təmin olundu. Dövlət quruculuğunun şanlı səhifələrindən biri də nizami və vahid komandanlığa əsaslanan ordunun yaradılması idi. Ulu öndərin ali baş komandanlığı ilə Azərbaycan Ordusunun 1994-cü ildə həyata keçirdiyi uğurlu hərbi əməliyyatlar nəticəsində Horadiz qəsəbəsi daxil olmaqla Arazboyu ərazilərimizin bir hissəsi, 22 yaşayış məntəqəsi, 10 min hektar ərazi işğaldan azad edildi. Həmin vaxt, daha dəqiq desək, 1994-cü il yanvarın 6-da Cəbrayıl rayonunun Cocuq Mərcanlı kəndi də işğaldan azad olundu.

Beləliklə, Cocuq Mərcanlı kəndi 1994-cü ildə ulu öndər Heydər Əliyevin Ali Baş Komandan kimi rəhbərliyi ilə aparılan uğurlu Horadiz əməliyyatı zamanı işğaldan azad edildi. Ulu öndərin döyüş bölgəsinə şəxsən getməsi isə ordudakı ruh yüksəkliyini daha da artırdı.

Sonrakı dövrdə Füzulinin işğaldan azad olunan kəndlərində abadlıq-quruculuq işləri aparıldı, dağılmış evlər bərpa olundu, zəruri infrastruktur yaradıldı. Lakin Cocuq Mərcanlı kəndində əhalinin təhlükəsiz yaşayışı mümkün deyildi. Çünki yaxınlıqda olan strateji əhəmiyyət daşıyan Lələtəpə yüksəkliyi işğal altında qalmışdı. Erməni hərbi birləşmələri Cocuq Mərcanlı kəndinin ərazisini atəş altında saxlayır və yaşayış üçün təhlükəli vəziyyət yaradırdılar. Ona görə də bu kəndin bərpası, burada həyatın əvvəlki axarına qaytarılması mümkün deyildi.

Ötən ilin aprel ayında isə bu ərazilərdən keçən cəbhə xəttində vəziyyət kökündən dəyişdi. Erməni hərbi bölmələrinin təxribatının qarşısını almaq məqsədilə Azərbaycan Ordusunun Ali Baş Komandan İlham Əliyevin rəhbərliyi altında keçirdiyi uğurlu əməliyyat nəticəsində Lələtəpə yüksəkliyi və min hektarlarla torpaqlarımız işğaldan azad edildi. Ermənilər xeyli geriyə çəkilməli oldular. Bundan sonra vaxtilə ermənilərin atəş altında saxladığı Cocuq Mərcanlı kəndi və digər ərazilərdə yaşayış üçün tam təhlükəsiz vəziyyət yarandı”.

Böyük Qayıdışın Cocuq Mərcanlı mərhələsi

Lələtəpə yüksəkliyi azad ediləndən sonra vəziyyətin kompleks araşdırıldığını söyləyən Əli Həsənov Prezident İlham Əliyevin ötən ilin noyabrında bu təmas xəttinə səfərini xatırladır. Baş nazirin müavininin fikrincə, dövlət başçısının yüksəkliyə səfəri həm ordumuzun qüdrətini göstərdi, həm də torpaqlarımızın azad edilmə prosesinin davamlı olacağının mesajını verdi:

“İşğal təhlükəsinin aradan qaldırıldığını nəzərə alaraq Prezident İlham Əliyev bu il yanvarın 24-də Cocuq Mərcanlı kəndinin bərpası ilə bağlı sərəncam imzaladı. Bununla da Böyük Qayıdışın ilk addımlarından biri atıldı. Cocuq Mərcanlı məcburi köçkünlər üçün inşa olunan sayca 96-cı yaşayış məntəqəsi və işğaldan azad edilən ərazilərdə bərpa olunan ilk kənddir.

Əslində, Azərbaycan Böyük Qayıdışa ulu öndərin vaxtından hazırlaşır. İndiyə qədər tikilib istifadəyə verilən 95 müasir qəsəbə böyük qayıdış prosesinə hazırlıqdır. İndi isə Böyük Qayıdışa işğaldan azad olunan ərazilərdən başlayırıq. Bu, Böyük Qayıdışın tarixi başlanğıcıdır. İnanırıq ki, bunun ardı gələcək. Böyük Qayıdışın Cocuq Mərcanlı mərhələsi bütün dünyaya səs saldı. Ermənistana isə nəinki səs saldı, hətta bu işğalçı dövləti lərzəyə gətirdi. Ermənilər başlarını itirdilər və hələ də özlərinə gəlməyiblər. Ali Baş Komandan

İlham Əliyevin rəhbərliyi altında Azərbaycan Ordusunun tarixi qələbəsindən sonra Ermənistan hələ də çalxalanmaqda davam edir. Çünki Azərbaycan Ermənistanın özü barədə uydurduğu bütün mifləri alt-üst etdi. Elə bir vəziyyət yarandı ki, məğlubiyyətin səbəblərini araşdıraraq ermənilər özləri özlərinə qarşı çıxmağa başladılar. Hakimiyyətə qarşı sərt ittihamlar səsləndirdilər. Biz bu prosesdə ermənilərin ikiləşdiyini, onların vahid hədəflərindən yayındığını gördük. Yəni sanki onların genetikasında köklü dəyişikliklər oldu”.

Qaçqınların və Məcburi Köçkünlərin İşləri üzrə Dövlət Komitəsinin sədri Əli Həsənov hesab edir ki, erməni psixologiyasını, genetikasını öyrənmək üçün ayrıca araşdırma mərkəzinin yaradılması vacibdir. Burada mütəxəssislər ermənilərlə bağlı olan əsrlər öncəki tarixi prosesləri daha dərindən öyrənərək, onların genetikasını, milli xislətlərini elmi şəkildə tədqiq edərək “erməni milləti nədir?”, “ermənilərlə mübarizəni necə effektiv etmək olar?” kimi suallara konseptual, fundamental cavablar axtarmalıdırlar. Elmi nəticələr çıxarılmalıdır ki, gələcək nəsillər bugünkü problemlərlə qarşılaşmasın, bizim vəziyyətimizə düşməsinlər.

Baş nazirin müavini ermənilərin aprel döyüşlərində mülki əhaliyə də atəş açdığını, evlərin dağılmasını, təsərrüfatlara ziyan dəyməsini, dinc sakinlərin həlak olmasını yada salır və bu faktların erməni vəhşiliyini, vandalizmini bir daha dünyaya nümayiş etdirdiyini söyləyir: “Lakin Azərbaycan bütün bunların əvəzini, intiqamını aldı. Aprel döyüşləri Azərbaycan Ordusunun böyük tarixi qələbəsidir. Bu, Ali Baş Komandan, Prezident İlham Əliyevin zəhmətinin bəhrəsidir. Uzun illər öncə ulu öndər Heydər Əliyevin başlatdığı prosesin davamıdır. Bu proses fədakarlıqla, vətənpərvərliklə, böyük bacarıqla indi də davam edir”.

İlham Əliyev Cocuq Mərcanlını beynəlxalq gündəmin əsas mövzularından birinə çevirdi

Cocuq Mərcanlının bərpası ilə bağlı sərəncamdan dərhal sonra Prezident İlham Əliyev fevralın 10-da “Cəbrayıl rayonunun Cocuq Mərcanlı kəndinə gedən avtomobil yolunun tikintisi ilə bağlı əlavə tədbirlər haqqında” sərəncam imzaladı. Horadizdən Cocuq Mərcanlı kəndinə gedən, ümumi uzunluğu 9 kilometr olan avtomobil yolunun tikintisi məqsədilə 4,3 milyon manat vəsait ayrıldı.

Bu sərəncamlardan sonra Prezidentin müvafiq tapşırıqlarından bəhs edən Əli Həsənov Azərbaycanda akkreditə olunmuş xarici KİV nümayəndələrinin Cocuq Mərcanlı kəndinə səfərini xüsusi qeyd edir:

“Bu səfərin təşəbbüskarı cənab İlham Əliyev idi. Onun uzaqgörənliyinin nəticəsi olaraq Cocuq Mərcanlı ilə bağlı xəbərlər, həqiqətlər bir gün ərzində bütün dünyaya yayıldı. Bilməyənlər də bildi ki, erməni faşizmi, vandalizmi nə deməkdir. Xarici KİV nümayəndələrinin Cocuq Mərcanlıya səfəri mühüm ideoloji tədbir idi. Çünki bir var eşitmək, bir də var canlı görmək. Ora səfər edən xarici KİV təmsilçisinin hər biri ermənilərin nə qədər vəhşi və dağıdıcı olduğunu, azərbaycanlıların kəndini nə günə qoyduqlarını öz gözləri ilə gördülər, bunu yaydılar.

Cənab Prezidentin digər tapşırığı ölkədə fəaliyyət göstərən diplomatik korpusun, səfirlərin, beynəlxalq təşkilatların nümayəndələrinin Cocuq Mərcanlıya səfərinin təşkil olunması idi. Qaçqınların və Məcburi Köçkünlərin İşləri üzrə Dövlət Komitəsi və Xarici İşlər Nazirliyi tərəfindən təşkil edilən bu səfərdə xarici diplomatlar Cocuq Mərcanlıda törədilən erməni vəhşiliyini öz gözləri ilə gördülər. Orada Rusiya Federasiyasının Azərbaycandakı səfiri Vladimir Doroxin maraqlı bir çıxışı ilə yadda qaldı. Dedi ki, biz oturduğumuz otaqda fərqli informasiyalar eşidirik, amma burada isə tamam başqa mənzərənin şahidi olduq. Başqa ölkələrin səfirləri də eyni fikirləri səsləndirdilər”.

Cocuq Mərcanlının bərpası - ümummilli hərəkat

Prezidentin Cocuq Mərcanlının bərpası və yolun çəkilisi ilə bağlı sərəncamlarının əsas mahiyyətindən söz açan Əli Həsənov bu qərarların böyük tarixi əhəmiyyəti olduğunu qeyd edir: “Sərəncam imzalanan kimi layihəçiləri, inşaatçıları dəvət etdim və cənab Prezidentin tapşırığını müzakirə etdik. Sərəncamın əsl mahiyyətini onların diqqətinə çatdırdım. Çünki söhbət işğaldan azad edilmiş ərazilərdə yeni kəndin salınmasından getdiyi üçün bütün dünyanın gözü buradadır. Bu, Azərbaycan Prezidentinin, vətəndaşlarının, dünya azərbaycanlılarının işğaldan azad olunan doğma torpağımıza qayıdışa münasibətindən irəli gələn bir məsələdir.

İnsanlarımızın Cocuq Mərcanlı kəndinin azad olunmasına münasibətinə dair cild-cild kitablar yazmaq olar. Nəinki işğal altında olan rayonların camaatı, digər bölgələrdən olanlar da gəlib Cocuq Mərcanlıya baş çəkir, süfrə açıb yaşıl otun üstündə çörək yeyirdilər. Təsəvvür edin, insanlar hər yerdən gəlirdilər, bura ziyarətgaha çevrilmişdi. Bax, vətənpərvərlik, səmərəli ideoloji fəaliyyət budur. Bunu ulu öndər başlatmışdı. Prezident İlham Əliyev isə atdığı addımlarla ideoloji uğurlarımızı çox yüksək səviyyədə dünya miqyasında təmin edib. Cənab Prezidentin bu istiqamətdəki fəaliyyətinin dünyada analoqu yoxdur. Dünyanın heç bir ölkəsində belə yüksək ideoloji fəaliyyət prinsiplərinə malik dövlət başçısının olduğuna inanmıram.

Bir məqamı da diqqətə çatdırmaq istərdim. Hələ yanvar ayında qarşıya vəzifə qoyuldu ki, işlər qısa müddətdə və yüksək keyfiyyətdə başa çatdırılsın. Bir məqamı unutmuram. İnşaatçılar dedilər ki, bu məsələdə bizi vəsait maraqlandırmır. Əsas odur ki, kəndi vaxtında bərpa edək. Bu da inşaatçılarımızın belə prinsipial məsələyə əsl vətənpərvərlik nöqteyi-nəzərindən yanaşmasını göstərdi. Cəbhə xəttinə yaxın olduğuna görə, tikintiyə başlamazdan əvvəl hərbçilərlə də söhbət etdik. Bizə dedilər ki, narahat olmayın, təhlükəsizliyiniz ən yüksək səviyyədə təmin olunacaq.

Bundan sonra tikinti sahəsini müəyyənləşdirdik. 50 evi 10 sot sahədən hesabladıq və tikintiyə başladıq. ANAMA-nı da minatəmizləmə əməliyyatına cəlb etdik. Onlar öz işlərini sürətlə və fədakarlıqla gördülər. Hətta qarlı havada da böyük səylə çalışdılar. Böyük ərazi minadan təmizləndi. Diplomatlarla Cocuq Mərcanlıya səfər edərkən bir yol açmışdıq ki, gedək dağıntılara baxaq. Səfirlər əvvəlcə ehtiyatlanır, çəkinirdilər. Onlara qorxmamağı tövsiyə etdim və qabağa düşdüm ki, gedək. Avtobusdan düşərkən addım atmaq belə istəmirdilər.

Cənab Prezident şəxsi təşəbbüsü ilə tapşırıq verdi ki, Cocuq Mərcanlıda Şuşa məscidinin oxşarı tikilsin. Daha sonra göstərişi oldu ki, aidiyyəti orqanlar orada öz yerli idarələrini tiksinlər.

Daxili İşlər Nazirliyi polis məntəqəsini, “Azəravtoyol” isə öz idarəsini yaratdı. Nəqliyyat, Rabitə və Yüksək Texnologiyalar Nazirliyi 50 evin hamısında internet şəbəkəsini qurdu. “Azərişıq” böyük bir yarımstansiya tikərək istifadəyə verdi”.

İlham Əliyev nümunəsi

Baş nazirin müavini kəndin bərpadan sonra açılış gününü Prezidentin özünün seçdiyini söyləyir. Və əlavə edir ki, ulu öndər Heydər Əliyevin 15 iyun 1993-cü il tarixində xalqın təkidli tələbi ilə hakimiyyətə qayıdışı Azərbaycanın Qurtuluş günüdürsə, 14 iyun 2017-ci il də işğaldan azad olunmuş torpağımızın Qurtuluş günüdür.

Əli Həsənov maraqlı bir məqamı xüsusilə vurğulayır: “Mən cənab Prezidenti sevinən çox görmüşəm. Hər bir qəsəbənin açılışında dövlət başçısı sevinc içərisində olur. Cocuq Mərcanlıda isə cənab Prezidentin sevinc hisləri tam başqa idi. Bunu heç nə ilə müqayisə etmək mümkün deyil! Gözləri sevincdən parlayırdı! Çünki o, Böyük Qayıdışı artıq başlatmışdı! Hesab edirəm ki, Prezidentin bu sevincini, qürurunu hər bir azərbaycanlı yaşadı.

Dövlət başçısı tikiti işlərinə yüksək qiymət verdi. Qısa müddət ərzində belə bir tikinti-quruculuq işini başa vurmağın yüksək peşəkarlıq tələb etdiyini diqqətə çatdırdı. Biz də qaçqın və məcburi köçkünlər adından cənab Prezidentə təşəkkür etdik ki, görülən işləri bu cür yüksək qiymətləndirir. Biz iş icraçılarına da əlavə güc verən budur. Görürsünüz, biz burada müsahibə aparırıq, amma o masa arxasında onlar necə qızğınlıqla, həvəslə, canfəşanlıqla layihə üzərində işləyirlər. Əgər cənab Prezident verilən tapşırığa görə bizə təşəkkür edirsə, bu bizi daha da ruhlandırır. Prezidentin bir kəlməsi ilə bizə yenidən güc gəlir. Prezidentin bu cür vətənpərvər fəaliyyətinin qarşısında biz necə işləməyə bilərik! Necə dövlətə, xalqa xidmət etməyə bilərik! Bunun müqabilində biz daha çox çalışmalıyıq.

Orada cənab Prezident maraqlı çıxışlar etdi. Dünyaya, ermənilərə mesajlar verdi. Növbəti dəfə bəyan etdi ki, Azərbaycan torpaqlarını heç kimə güzəştə gedən deyil. Ermənistan tərəfi bundan nəticə çıxartsın. Ermənilər görsünlər ki, Azərbaycan Prezidenti işğaldan azad olunmuş bir kənd üçün nələr edir. Ona görə ağıllarını başlarına yığmalı, qonşularla mehriban yaşamalıdırlar. Əgər bunu etməsələr, günah özlərindədir. Çünki bundan da pis günə düşə bilərlər. Cocuq Mərcanlının bugünkü mənzərəsi Azərbaycanın və Prezident İlham Əliyevin nəyə qadir olduğunu konkret göstərir”.

Prezidentin dostu - əmək qəhrəmanı

Əli Həsənovun mobil telefonu zəng çalır. Ekrana baxıb, “Bu zəngi hökmən cavablandırmalıyam. Prezidentin dostuna, əmək qəhrəmanına necə cavab verməyim?” - deyə gülümsünür. Zəng edən Oqtay Həziyevdir...

Əli müəllimin xeyli çəkən telefon söhbəti zamanı davamlı olaraq salamlaşması, onun əslində, çoxsaylı insanla söhbətləşdiyindən xəbər verirdi. Zəngi yekunlaşdıran Baş nazirin müavini də elə bu məqamı vurğuladı:

“Oqtay idi, yanına Biləsuvardan xeyli kəndlisi gəlib. Hər kəsi yalnız bir şey maraqlandırır: nə vaxt qəsəbəyə köçürük? Mənə zəng etməkdə də məqsədləri odur ki, belə gözəl şəraiti olan qəsəbəni, evləri tikən Prezidentə onların minnətdarlığını çatdırım. Telefon söhbətini dinləyirdiniz, yəqin özünüz də hiss etdiniz ki, bir nəfər də olsun xahiş səsləndirmədi. Hər kəs ancaq Prezidentə minnətdarlığını bildirirdi.

Ümumiyyətlə, uzun müddətdir bu vəzifədə çalışıram və özüm üçün qəbul etdiyim bir həqiqət var. Qaçqın və məcburi köçkünlər savaş vaxtı hər şeylərini itirib, bütün həyatlarını sıfırdan başlasalar da, heç vaxt qürurlarını itirmədilər. Ən çətin dönəmlərində belə qapılara düşmədilər, yersiz xahişlər dilə gətirmədilər. Düzdür, istisnalar da var. Ancaq mən mütləq əksəriyyətdən danışıram. Prezidentlə çoxsaylı görüşlərdə bir nəfər qaçqın və məcburi köçkün hansısa problemini qaldırmadı, - baxmayaraq ki, çətinliklər az deyil, - dövlət başçısından şəxsi xahiş etmədi. Hamısı yalnız görülən işlərə görə təşəkkürünü bildirdi, etimadını ifadə etdi və Qarabağın tezliklə qayıdacağına əminliyini söylədi.

Bax bugünkü zəng də belə xahişlərdən idi. Cocuq Mərcanlılar yalnız Prezidentə təşəkkür edirlər.

Qaçqın və köçkünlər belə qürur sahibidirlər, məğrurdurlar, daim şükür edirlər, dillərində dua, ürəklərində inam var. Bunu ən yaxşı bilən də məhz Prezidentdir. 50 yaşını onlarla qeyd etməsi də təsadüfi deyildi... “

Əli Həsənov söhbəti Oqtay Həziyevlə bağlı davam etdirir. Məmləkətin ən ali mənsəbli şəxslərindən biri sadə əmək adamından ağızdolusu, ürəkdolusu danışır. Bunu sezməmək mümkünsüzdür - danışdıqca da qürurdan gözləri işıldayır...

“Cocuq Mərcanlı deyəndə ilk olaraq Həziyevlər ailəsi yada düşür. Bu ailə indi Cocuq Mərcanlının qəhrəmanlıq rəmzinə çevrilib. Doğma torpağa bağlılıqları ilə, burada yaşayışın təhlükəli olmasına baxmayaraq, kəndi tərk etməmələrinə görə bu ailə artıq vətənpərvərlik nümunəsi kimi qəbul olunur. Həziyevlər ailəsi kəndin işğalda olduğu aylarda digər məcburi köçkün ailələri kimi ciddi sıxıntılar içərisində yaşayıb. Bildiyiniz kimi həmin vaxt çətin dövr idi.

Ailənin başçısı Oqtay Həziyevi qürur hissi boğurmuş: doğma torpağım, kəndim işğaldan azad olunub, bəs niyə biz yurdumuza qayıtmamalıyıq? O ailəsi ilə birlikdə qərar qəbul edir və kənd işğaldan azad olunandan dərhal sonra - 1994-cü ilin yanvarında geri qayıdırlar. O zaman bir tərəfdə düşmənin atəşi altında ölüm təhlükəsi, digər tərəfdə isə doğulduğu yerə bağlılıq hissi var idi. Lakin vətənpərvərlik duyğusu ölüm riskinə qalib gəlir. Kənd tamamilə dağılmışdı. Həziyevlər ailəsi yaşadıqları ərazini taparaq dağılmış evinin üzərində çadır qurur. Bununla yeni həyata ilk addımlarını atmağa başlayırlar. Vətən, torpaq sevgisi ölüm və qorxu hislərini tamamilə unutdurur onlara...”

İlham Əliyevin halallığını verdiyi torpaq...

Baş nazirin müavini Həziyevlərin zəhmətkeşliyinin vətənpərvərlikdən heç də az olmadığını söyləyir. Ailə qısa müddət ərzində böyük fədakarlığı sayəsində maddi sıxıntıları geridə qoyur. Özlərinə kiçik ev tikib, sıfırdan başlayaraq kənd təsərüfatı ilə məşğul olmağa başlayıblar. Oqtay əkin-biçin, qardaşı isə heyvandarlıqla məşğul olub. Atəş təhlükəsi altında boş qalan ərazidə 70 hektar sahəni götürüb yonca, taxıl və arpa əkiblər. Borca girərək bir inək, 3-4 qoyun alıblar. İllər ötdükcə mal-qaranın sayını artırıblar. Hazırda 600 xırdabuynuzlu, 70-80 iribuynuzlu heyvanları var. Həyətyanı sahədə 20-dək arı ailəsi də saxlayırlar. Yalnız çaya, qəndə, bir də paltara pul verirlər. Yağa, pendirə, qatığa, yumurtaya, ətə pul xərcləmirlər. Əksinə, bu qidalardan başqalarına da yardım göstərirlər. Bu müddət ərzində istehsal etdikləri məhsulların

1 kq-nı belə satmayıblar. Artıq nə məhsul qalırsa, hamısını qohum-əqrəbalarına, ehtiyacı olanlara verirlər.

Əli müəllim davam edir: “Bu ailənin hər bir üzvünün üzündən nur tökülür. Çünki torpaqda işləyən adamları torpaq nurlaşdırır. Çox gözəl ailədir, hamısı da sağlamdır. Anasının 83 yaşı var, göz dəyməsin... Məhz bu ailənin nümunəsində torpağa qayıdış başlayıb. Kəndə qayıdışın əsasını Həziyevlər ailəsi qoyub. Bu gün isə Prezident İlham Əliyev bütün kənd sakinlərinin qayıdış prosesini başladıb.

Dövlət başçımızın bu ailədən, onların qəhrəmanlığından xəbəri vardı. Daim məndən bu ailəni soruşurdu, onların problemlərini həll etməyi tapşırırdı. Prezident Cocuq Mərcanlıda olarkən Həziyevlər ailəsi ilə də görüşdü. Onlara verilən evdə qonaq oldu. Baxmayaraq ki, Həziyevlər ailəsi kəndə qayıtdıqdan sonra bir ev tikmişdilər. Amma cənab Prezident kəndin yeni evlərindən birini içərisinin bütün avadanlıqları ilə Həziyevlər ailəsinə bağışladı. Həmçinin Oqtay Həziyevi bir neçə ay bundan öncə təsis etdiyi “Əmək” ordeninin birinci dərəcəsi ilə təltif etdi. Hesab edirəm ki, cənab

İlham Əliyev bu yüksək dövlət təltifi ilə Oqtay Həziyevin timsalında əslində, cəbhə bölgəsində yaşayan bütün sakinləri mükafatlandırdı, onların fədakarlığını, vətənpərvərliyini, zəhmətkeşliyini qiymətləndirdi.

Prezident elə orada tapşırıq verdi ki, Oqtay Həziyevin əkib-becərdiyi 70 hektar əraziyə toxunulmayacaq, yəni ora kəndin ümumi paylanacaq təsərrüfat sahəsinə aid edilməyəcək. Onun bundan əvvəl tikib-qurduğu ev də, torpaq sahəsi də öz istifadəsində qalacaq. Dövlət başçısının qeyd etdiyi kimi, bu, ona halaldır...”

Prezidentin fərəhi, qaranquş yuvası və Cocuq Mərcanlıdan kitab...

Əli Həsənov Prezidentin Cocuq Mərcanlı səfərinin maraqlı məqamlarından bəhs edir. Yeni tikilmiş 96 şagird yerlik məktəblə tanışlıq vaxtı baş nazirin müavini Prezidentdən ayaq saxlamağını və geriyə baxmağını xahiş edir:

“Maraqlı faktla qarşılaşdıq. Məktəbin girişində yuxarıda tavanın altında qaranquş yuva salmışdı. Biz onu bir gün öncə axşam görmüşdük. Qeyd etdim ki, cənab Prezident, qaranquş elə bir quşdur ki, təhlükəsizliyinə arxayın olmasa, orada yuva qurmaz. Bu yuvanın da rəmzi mənası var. Artıq Cocuq Mərcanlının tam təhlükəsiz yurd yeri olduğunu yalnız insan məntiqi yox, ana təbiət də qəbul edir...

Məktəbə daxil olduq. Cənab Prezident siniflərlə tanış oldu. Daha sonra kompüter otağında ulu öndərin cəbrayıllılarla görüşləri, Horadiz əməliyyatından əvvəl və sonra o əraziyə səfəri, hərbçilərlə görüşlərinin səs yazısı verildi.

Ulu öndərin 2002-ci ildə Hacıkənddə salınan qəsəbədə duyğulu anlar yaşadığının, qəhərləndiyinin şahidi olmuşam. Prezident İlham Əliyevin qəhərləndiyini isə 50 illik yubileyində Taxtakörpüdə salınan qəsəbədə məcburi köçkünlərlə görüşündə bir məcburi köçkünün çıxışı zamanı görmüşəm. Bir də burada, Cocuq Mərcanlıda Heydər Əliyevin səs yazısını eşidərkən qəhərləndiyinin şahidi oldum. Bəli, çox duyğulu anlar idi. Hesab edirəm ki, həmin vaxt ulu öndərin ölməz ruhu da Cocuq Mərcanlıda idi. Və haqlı olaraq öz davamçısı ilə fəxr edirdi...

Cəbrayıl rayonundan olan kursantlarla görüşü cənab İlham Əliyevdə çox böyük maraq doğurdu. Dörd il bundan əvvəl Prezidentin tapşırığı ilə təhlil aparmışdıq ki, məcburi köçkünlərin neçə nəfəri hərbi məktəbdə oxuyur. 2014-cü ildə cəmi 10 rayondan 20 nəfər hərbi məktəblərdə təhsil alıb. Prezidentin göstərişi ilə bu məsələnin təşviqi ilə bağlı böyük tədbir keçirdik. Bu gün artıq həmin say 276 nəfərdir. Yəni, 3 il ərzində bu rəqəm 24 dəfə artıb. Çox maraqlı bir faktdır ki, 276 nəfərin 42-si Cəbrayıl rayonundandır”.

Baş nazirin müavini Dövlət Sərhəd Xidməti Akademiyasının və Heydər Əliyev adına Azərbaycan Ali Hərbi Məktəbinin kursantlarının Ali Baş Komandana raport verərkən, İlham Əliyevin böyük fərəh hissi keçirdiyini vurğulayır. Bu cür məğrur, qalib gənclər yetişdirən Baş Sərkərdənin fərəhi də təbiidir.

Əli müəllim bərpa edilən kənd və yeni tikilən məscid ilə tanışlıq vaxtı, həmçinin hərbçilərin raportunu dinləyərkən Prezidentin dünyaya ciddi mesajlar verdiyini xatırladır: “Bu mesajlar ondan ibarətdir ki, Azərbaycan işğal olunmuş torpaqlarını mütləq işğaldan azad edəcək və bütün azad olunmuş ərazilərimiz bu cür bərpa olunacaq. Cənab Prezident həm də o çağırışı səsləndirdi ki, Azərbaycan öz milli-mənəvi dəyərlərinə, dininə, keçmişinə, adət-ənənəsinə ehtiramla yanaşır. Şuşa məscidinin oxşarını inşa etdirməklə Prezident İlham Əliyev Ermənistana mesaj verdi ki, müsəlmanların ibadət etdiyi məscidləri xarabalıqlara çevirsəniz də, onları murdarlasanız da işğaldan azad olunan ərazilərimizdə yeni və daha böyük məscidlər inşa etdirəcəyəm! Eyni zamanda, bəzi müsəlman ölkələrinə mesaj verildi ki, məscidlərdə heyvan saxlayan, dini ibadətgahları dağıdan Ermənistana yardım edirsiniz...

Sonda Prezident İlham Əliyev tapşırıq verdi ki, Cocuq Mərcanlı barədə, burada aparılan bərpa-quruculuq işlərinə dair müfəssəl kitab və film hazırlansın. Bu sahədə işə dərhal start verdik. Rəsmi dövlət qəzeti olan “Azərbaycan”ın baş redaktoru, ağdamlı məcburi köçkünlərin Milli Məclisdə təmsilçisi Bəxtiyar Sadıqovla kitab layihəsinin detallarını müəyyənləşdirdik və bu iş artıq çox böyük sürətlə gedir. Əminəm ki, Prezidentin bütün tapşırıqları kimi bunun da öhdəsindən layiqincə gələcəyik və Cocuq Mərcanlının bütün bərpa prosesini özündə əks etdirən yeni kitab tezliklə ictimaiyyətə təqdim olunacaq”.

Məcburi köçkünlərin Mehriban Əliyeva sevgisi

Cocuq Mərcanlı işğal olunarkən orada 276 təsərrüfat olub. İndi isə təsərrüfatların sayı 400-dək artıb. Kənddə bərpa işləri başlanarkən 200-dən çox ailə bura qayıtmaq üçün müraciət edib. Elə onların da sayı son günlər atraraq 300-ə çatıb.

Baş nazirin müavini Əli Həsənov vurğulayır ki, ümumi qərara görə, kim orada torpaqda işləyə bilərsə, təsərrüfatla məşğul olarsa, ilk növbədə onlar köçürüləcək. Bu zaman əsas üstünlük Bakıda məskunlaşan ailələrə verilir. Həmçinin, Cocuq Mərcanlıda sırf təsərrüfatla bağlı olmayan iş yerləri də açılacaq. Orada tikilən hər bir obyekt yeni iş yeridir.

Əli Həsənov digər bölgələrdə məskunlaşan qaçqın və məcburi köçkünlərin problemlərinin həllindən də danışır: “Hər kəs bilir, bu istiqamətdə dövlət siyasəti ümumilikdə Prezident İlham Əliyevin fəaliyyət prioritetlərindəndir. Sevinirik ki, hörmətli Birinci vitse-prezidentimiz Mehriban xanım Əliyeva da bu siyasətə ölçüyəgəlməz töhfə, fövqəladə dəstək verir.

Bir məqama nəzər salaq: Mehriban xanım ilk müşavirəsini hansı mövzuda keçirdi? Qaçqın və məcburi köçkünlərin sosial müdafiəsinin gücləndirilməsi sahəsində!

Mehriban xanım ilk böyük təməlqoyma mərasimini harada təşkil etdi? Qaradağ rayonunda məcburi köçkünlər üçün salınacaq yeni müasir yaşayış kompleksində!

Bu fakta bir daha nəzər salaq. Xanım Birinci vitse-prezident hər biri 2 bloklu, 9 mərtəbəli 11 yaşayış binasının, 1026 mənzilin, 624 şagird yerlik üçmərtəbəli məktəb binasının, 220 yerlik uşaq bağçasının, tibb məntəqəsinin təməlini qoydu. Belə qəsəbələrin sayı artıq 96-dır. Görün, Heydər Əliyevin bünövrəsini qoyduğu, açılışını etdiyi ilk qəsəbənin sayı indi az qala yüzə çatıb. Budur, İlham Əliyev fədakarlığı! Budur, Mehriban Əliyeva xidməti!

Bax, bütün bunları qaçqın və məcubri köçkünlər bilirlər, qiymətləndirirlər. Bir danılmaz fakt var: son 24 il ərzində Heydər Əliyev siyasi kursunun təmsilçilərinin qatıldığı bütün seçkilərdə - istər Prezident, istər parlament, istər bələdiyyə olsun, - ən çox dəstək məhz qaçqın və məcburi köçkün yaşayış məntəqələrindən olur. Ulu öndər Heydər Əliyevin, cənab İlham Əliyevin ən çox etimad qazandığı ərazilərin ən ön cərgəsində məhz köçkün rayonları və onların məskunlaşdığı qəsəbələrdir.

Mehriban xanım Birinci vitse-prezident təyin olunarkən bütün qaçqın və məcburi köçkünlər nə qədər fərəhlənib qürur duydularsa, sağ olsun, bu dəyərli insan qısamüddətli fəaliyyəti dövründə də bu kateqoriyalı insanları davamlı olaraq sevindirir, onların dostu, qayğıkeşi, himayədarı olduğunu sübut edir”.

Prezidentin sonuncu tapşırığı

...Artıq qonşu masada müzakirələr bitib. Əli Həsənovu - qrupun baş koordinatorunu gözləyirlər. Yekun rəyi verməli, bütün mübahisəli məqamlara son nöqtəni qoymalıdır.

Hələ qəbulda gözləyən digər kollektiv də var...

Hələ günortadan sonra Cocuq Mərcanlıya yeni səfər də var. Masa üzərində olan layihənin yerində dəyərləndirilməsi sabaha saxlanılmayacaq...

Sağollaşırıq. Kabinetdən çıxarkən Əli müəllim qəfildən bizi saxlayır: “Prezidentin bir tapşırığı da oldu. Dedi ki, Cocuq Mərcanlıdakı məktəb bu bölgənin ən yüksək təhsil verən, ən məşhur məktəbi olmalıdır. Buranı bitirən hər bir şagird tələbə adı qazanmalıdır. İnşallah, sentyabrın 15-də bu məktəbdə ilk dərs zəngi səslənəcək...”

Qaçqın qəsəbələrində doğulan cocuq mərcanlılılar artıq öz doğma yurdlarında məktəbə gedəcəklər. Bu da bir ilk oldu...

Dədə Qorqud öyüdüdür: “Torpağı qorumasan, əkib-becərməyə dəyməz, əkib-becərməyəcəksən - qorumağa dəyməz”. İlham Əliyev bu nəsihəti Cocuq Mərcanlıda əmələ çevirdi, fədakar insanların zəhmətini mübariz əsgərlərin şücaəti ilə tamamladı...

Tezliklə Cocuq Mərcanlıdan - Böyük Qayıdışın ilk məskənindən işğal altında olan torpaqlarımıza doğru azan səsi, məktəb zənginin sədası, çalışqan insanların hayqırtıları, traktorların uğultusu yayılacaq...

İki aya xarabalıqdan cənnətə dönən kənddə qaynayacaq həyat düşmənə gözdağı olacaq, bizlərə böyük inam bəxş edəcək, nisgilli Qarabağ torpağında dolaşan ruhlara isə təskinlik gətirəcək...

Hər sabah, hər gecə Cocuq Mərcanlıda yanacaq işıq əsarətdə olan torpaqlarımıza doğru nur səpələyəcək...

Prezident bunu da bacardı!..

İxtiyar HÜSEYNLİ,

Azərbaycan.- 2017.-20 iyun.- S.1-3.