Bakı “Formula-1” üçün unikal yerdir

Planetin ən güclü pilotları Azərbaycan Qran-prisini səbirsizliklə gözləyirlər

Dünyanın sürət həvəskarları Bakıdakı “Formula-1” yarışının həyəcanı ilə yaşayır. Növbəti dəfə Bakıda dünyanın bir nömrəli avtomobil yarışının Qran-pri mərhələsi keçirilir. Bu günlərdə planetimizdə avtomobil idmanına maraq göstərən hər kəsin diqqəti paytaxtımıza yönəlib. Bakı Şəhər Halqasında dünyanın ən məşhur pilotları - Luis Hamilton, Fernando Alonso, Sebastian Fettel, Valteri Bottas, Roman Qrojan, Karlos Saynz və digərləri yarışırlar. Onlardan bir neçəsi ümumilikdə cari mövsüm və Azərbaycan Qran-prisi haqqında fikirlərini bölüşüblər.

“Daha böyük əzmlə yarışacağıq”

“McLaren Honda” komandasının sürücüsü Fernando Alonso qeyd edib ki, keçən il Bakıdakı debüt yarışı uğurla keçdi. Azərbaycanda yarışacağım günü səbirsizliklə gözləyirəm: “Mən ötən il yarışın səfiri olduğum üçün, həmkarlarımla müqayisədə, Bakıda daha çox vaxt keçirmişəm. Bakı “Formula-1” üçün əla yerdir. Biz tarixi şəhərin mərkəzində yarışırıq. Qədim qala divarları unikal atmosfer yaradır. Kanadada komanda olaraq xala yaxın idik, lakin son anda əldən verdik. Bakıda daha böyük əzmlə yarışacağıq. Amma başa düşürük ki, komanda üçün çətin həftəsonu olacaq. Mən güc qurğusuna görə startda xeyli yer itirməli olacağam. Nəzərə alsaq ki, tras dar və sürətlidir, döngələr çox çətindir, mənim üçün heç də asan olmayacaq. Amma mümkün olmayan heç nə yoxdur. Mübarizə aparmaq lazımdır. Buna görə də biz cümə günündən etibarən yaxşı işləyəcəyik ki, sıralanmada qənaətbəxş nəticə əldə edək”.

“Bəxt amili çox vacibdir”

“Haas” komandasının sürücüsü Roman Qrojan bildirib ki, orta qrupdakı komandalar bir-birlərinə çox yaxındırlar və buna görə də hər xal dəyərlidir: “Bu mübarizə həyəcanvericidir. Əgər öndəki 3 komanda olmasaydı, hər yarışda fərqli komandalar qalib gələrdi. Hər komandanın güclü olduğu traslar var və sabit olan komanda 5-ci yeri tutacaq. Xal almaq üçün hər yarışda maksimum performansla çıxış etməliyik. Ancaq belə olanda rəqabətədavamlı ola bilərik. Bəzən bu da bizə kömək etməyəcək. Bəxt amili çox vacibdir. Keçən ilə nisbətən tərəqqimiz davam edir. Keçən ildən daha çox xal toplamışıq və bu bizə motivasiya verir. Ümid edirəm ki, Bakıda uğurla çıxış edərək daha yaxşı xallar qazanarıq”.

“Bakıda yarışmaq çox çətindir”

“Scuderia Toro Rosso” komandasının sürücüsü Karlos Saynz isə bildirib ki, dünyada yeganə iki tras var ki, onlar arasında müqayisə aparmaq düzgün deyil: “Bakı və Monako şəhər traslarıdır, lakin onları müqayisə etmək olmaz. Məsələ onların birinin yaxşı, digərinin pis olmasında deyil - sadəcə çox fərqlidirlər. Bakıda sürmək çətindir. Monakodan çətin olduğunu deyə bilmərəm, amma buna yaxındır. Kiçik bir səhv baha başa gələ bilər və bir an belə olsun, diqqətsizlik etmək olmaz. 2016-cı ildəki yarışdan zövq almışdım. Hər şey xoşuma gəlmişdi, lakin təəssüf ki, yarışı başa vura bilməmişdik. 300 km/saat sürətlə gedərkən çox da zövq ala bilmirsən, amma orta əsrlərə aid qala divarlarının yanından keçmək insanı valeh edir. Orada çəkilən şəkillər də unikallığı ilə seçilir”.

“Ancaq çalışmaq lazımdır”

“Sauber F1 Team” komandasının sürücüsü Markus Eriksson isə yenidən Bakıda yarışacaqları üçün səbirlərinin tükəndiyini bildirib: “Biz ikinci dəfə çox maraqlı bir şəhərdə- Bakıda yarışacağıq. Bakı Şəhər Halqası maraqlı döngələrlə bir-birinə bağlanmış uzun düzlüklərdən ibarət unikal trasdır. Keçən il asfaltın yüksək temperaturu təkərlərə təsir etmişdi, bu il də oxşar şərait gözləyirəm. Komandamızın məqsədi dəyişməyib. Uğurlu nəticə qazanmaq üçün ancaq çalışmaq lazımdır”.

“Maksimal sürət həyəcanlı olacaq”

“Sauber F1 Team” komandasının sürücüsü Paskal Verlayn isə Bakıdan yalnız uğurlu nəticə ilə ayrılmağı qarşısına məqsəd qoyub: “Mən səbirsizliklə Bakıya qayıtmağı və orada sükan arxasına keçməyi gözləyirəm. Azərbaycanda keçənilki həftəsonu maraqlı alınmışdı. Çünki yarış ilk dəfə keçirilirdi. Yolun konfiqurasiyasını nəzərə alsaq, effektiv sürətlənmə və maksimal sürət mühüm rol oynayacaq”.

Elçin CƏFƏROV,

Azərbaycan.- 2017.-22 iyun.- S. 7.