Azərbaycan
parlamenti “Azərbaycan” qəzetində
(Professor Şirməmməd
Hüseynovun “Azərbaycan” qəzetində parlament
hesabatları və şərhlər” üçcildliyi barədə
qeydlər)
Gələn ilin mayında Azərbaycan
Xalq Cümhuriyyətinin və ümumiyyətlə, müasir
Azərbaycan dövlətçiliyinin yüz yaşı tamam
olur. Azərbaycan
xalqı bu yüz il ərzində bir neçə min illik zəngin
dövlətçilik ənənələrinə (və təcrübəsinə)
əsaslanaraq milli dövlət quruculuğu uğrunda
bütün varlığı ilə ardıcıl mübarizə
aparmış, qurbanlar vermiş, hər cür müdaxilələrə
- daxildən və xaricdən gələn müxtəlif xarakterli
dağıdıcı təsirlərə, təzyiqlərə
baxmayaraq, öz təbii istiqlal arzularını,
ideallarını təsdiq etmişdir.
Azərbaycan xalqının
ümummilli lideri Heydər Əliyev deyir: “1918-ci ilin mayında
Azərbaycanda, müsəlman aləmində ilk demokratik
respublika - Azərbaycan Xalq Cümhuriyyəti yarandı. Azərbaycan
xalqının həyatında böyük hadisə baş verdi. Xalqımız, millətimiz
müstəqil, sərbəst yaşamaq iradəsini dünyaya
nümayiş etdirdi. Azərbaycan Xalq
Cümhuriyyəti özünün qısa ömrü
dövründə dəyərli fəaliyyət göstərmişdir
və Azərbaycan xalqının müstəqil olmaq iradəsini
nümayiş etdirmişdir”.
Azərbaycan Respublikasının
Prezidenti İlham Əliyevin “Azərbaycan Xalq Cümhuriyyətinin
100 illik yubileyi haqqında” 16 may 2017-ci il
tarixli sərəncamı bir daha təsdiq edir ki, müasir Azərbaycan
dövlətçiliyi öz tarixi köklərinə, mənbələrinə,
istiqlal ənənələrinə həmişə sadiq
olmuş və bu gün də sadiqdir.
Sərəncamda deyilir: “Azərbaycan
Xalq Cümhuriyyəti məhz dünyanın siyasi
nizamının yenidən qurulduğu bir vaxtda, XIX əsrin
axırları və XX əsrin əvvəllərində Azərbaycanın
yaşadığı parlaq mədəni yüksəliş mərhələsinin
məntiqi yekunu kimi meydana çıxmışdır”.
Və milli mentalitetdən irəli gələn
demokratik birgəyaşayış texnologiyalarına əsaslanmasının
nəticəsi idi ki, Azərbaycan Xalq Cümhuriyyəti
özünü yalnız ölkə daxilində deyil, beynəlxalq
aləmdə də tanıda, təmsil etdiyi xalqın tamamilə
təbii, qanuni olan siyasi təsisatı kimi meydana qoya bildi.
Sərəncamda deyilir: “Cümhuriyyət
parlamentinin il yarımlıq fəaliyyəti
boyunca qəbul etdiyi qanunlar milli dövlətin müstəqilliyinin
möhkəmləndirilməsinə, siyasi və iqtisadi
inkişafa, mədəniyyət və maarif sahələrində
sürətli irəliləyişə imkan verdi. Azərbaycan Xalq Cümhuriyyəti daim sülhsevər
siyasət apararaq bütün dövlətlərlə
qarşılıqlı əməkdaşlıq əlaqələri
yaratmağa və bir-birinin hüquqlarına hörmət
prinsipləri əsasında münasibətlər qurmağa cəhd
göstərirdi. Dünya birliyi tərəfindən
tanınmış Xalq Cümhuriyyətinin fəaliyyəti sayəsində
Azərbaycanın beynəlxalq hüququn subyekti olması
1920-ci ilin aprel ayındakı bolşevik işğalından
sonra Azərbaycanın bir dövlət kimi dünyanın
siyasi xəritəsindən silinməsinin
qarşısını aldı”.
Professor Şirməmməd
Hüseynovun böyük istedad, zəhmət və məsuliyyət
ilə hazırladığı üçcildlik “Azərbaycan”
qəzetində parlament hesabatları və şərhlər (noyabr
1918- aprel 1920)” kitabı (I c., 2015; II c., 2016; III c., 2017) Azərbaycan
Xalq Cümhuriyyətinin yüz illiyinə görkəmli
alim-jurnalistin, Azərbaycan ziyalısının dəyərli ərməğanıdır.
Kitabın birinci cildinin
ön sözündə göstərilir ki, “Cümhuriyyət
tarixinin ən mötəbər salnaməsi “Azərbaycan” qəzetidir. Bu möhtəşəm
dövrün 443 gününün tarixi zamanın kollektiv
yaddaşı olan bu qəzetin 443 nömrəsinin səhifələrində
həkk olunmuşdur”.
“Azərbaycan” qəzetinin 17 noyabr
1918-ci il tarixli nömrəsində Azərbaycan
parlamentinin açılışı aşağıdakı
şəkildə təsvir edilir:
“16 təşrini-sani saat 1-də
təyin edilmiş olan iclas saat 2:15 dəqiqədə
açılıyor. Hələ saat 12-dən iclasın intizarında yüzlərlə
adam duruyor. Nəhayət, Məclis
açılıyor. Şurayi-Milli əzası
və nazirlər qabaqca hazırlanmış yerləri
işğal ediyorlar. Əcnəbi məmləkət
nümayəndələrindən Gürcüstan və
Dağıstan hökumətləri nümayəndələri,
erməni və rus Milli şuraları nümayəndələri
və İran general konsulu isbati-vücud ediyorlardı.
Salon tamaşaçılarla
dolu idi.
Rəsulzadə Məhəmməd
Əmin bəy cənabları sədr yerini tutaraq iclası
açıyor”...
Məhəmməd Əminin bu
müxtəsər açılış nitqi, həqiqətən,
tarixi bir çıxışdır:
“Möhtərəm Şura əzası! Bu gün Azərbaycan
Şurayi-Millisi Azərbaycanın baş və ayrılmaz bir əzasını
təşkil edən paytaxtında açılıyor.
Azərbaycanlılar, necə ki hamınıza məlumdur,
heç vəqt hürriyyət və istiqlaliyyət fikrindən
ayrılmayaraq daima bu uğurda çalışmış,
mübarizə eləmişlərdir...
...Bu gün biz azərbaycanlılar
Şuraya yığıldıqda Milli Şura əzaları və
bütün hüquqi-milliyyənin müdafiəsi
üçün firqə nizai, sinif münaqişəsi və
sairəyi kənara ataraq əl-ələ versək, müttəhidən
çalışsaq, əmin olmalıdır ki, vicdani-bəşərdə
yerləşmiş olan hüquqi-milliyyədən məhrum
qalmazız”.
Professor Şirməmməd
Hüseynovun əsas xidməti ondan ibarətdir ki, “Azərbaycan”
qəzetinin, demək olar ki, bütün nömrələrini
araşdırmış, parlamentin fəaliyyətinə dair ən
zəruri materialları seçib təqdim etmiş, bu gün
anlaşıqlı olmayan sözlərin dəqiq
izahını vermişdir.
Qəzetdə gedən
parlament hesabatları, parlament iclaslarının indiyə qədər,
çox yaxşı ki, mühafizə edilmiş stenoqrafik
hesabatlarından onunla fərqlənir ki, qəzet hesabatları
daha dolğun, daha mükəmməl hazırlanmış,
peşəkar (və geniş dünyagörüşlü)
redaktorların zəruri ümumiləşdirmələrilə
çap olunmuşdur. Doğrudur, parlamentin fəaliyyətini daha təfsilatlı,
daha dərindən, hətta belə demək mümkünsə,
hərfi-hərfinə öyrənmək istəyən tədqiqatçıların
stenoqrafik materiallarla işləməsi vacibdir, lakin geniş
oxucu kütləsinin marağını, ehtiyacını
ödəmək baxımından professor Şirməmməd
Hüseynovun üçcildliyi əvəzedilməzdir... Və
elə anlaşılmasın ki, bu sözlərlə
kitabın elmi dəyərini azaltmış oluruq, əksinə,
demək tistəyirik ki, həmin nəşr Cümhuriyyət
parlamentinin “fəaliyyət fəlsəfəsi”ni daha rahat,
mübahisəsiz və tərəfsiz dərk etmək, bu fəaliyyətin
tarixi mahiyyətini düzgün təsəvvür etmək
üçün geniş ideya-metodoloji imkanlar açır.
Şirməmməd müəllim
yazır:
“Məlumdur ki, qanunvericilik və
icra orqanının fəaliyyəti ilə əlaqədar qəzetdə
xeyli qiymətli yazılar var. Mən burada millət vəkilləri,
hökumət başçıları və nazirlər,
fraksiya rəhbərləri və üzvlərinin, müxtəlif
komissiyaların fəaliyyətinə dair yazıları nəzərdə
tuturam. Məsələn, mən M.Ə.Rəsulzadənin
parlamentdəki çıxışlarını toplayıb
xüsusi bir cilddə vermək istəyirdim. Ancaq gördüm ki, onları parlament müzakirələrindən
ayırıb nəşr etmək mümkün deyil”.
Bu isə o deməkdir ki,
üçcildliyin müəllifi sadəcə tekstoloq işi
görməmiş, mətnlərin seçilib sistemləşdirilməsini
ideya-metodoloji səviyyədə aparmış, həm parlament
hesabatlarını, həm də parlamentdə müzakirə
olunmuş məsələlər ətrafındakı
mübahisələri, mövqeləri (həmin mövqelər
bir tərəfdən siyasi mənsubiyyətləri əks
etdirirsə, digər tərəfdən ölkənin
düşdüyü mürəkkəb siyasi, sosial-iqtisadi və
mədəni şəraitdən irəli gəlir) miqyaslı,
təfərrüatlı bir şəkildə nəzərə
çatdırmışdır.
M.Ə.Rəsulzadənin
“Bütün Azərbaycan əhalisinə!” başlıqlı
müraciətnaməsi, Üzeyir Hacıbəylinin “Azərbaycan
parlamenti” məqaləsi, “Azərbaycan Parlamanı ətrafında”
məlumatları Fərhad Ağazadənin “Parlamandan nə tələb
olunur?” yazısı, eləcə də ölkənin müxtəlif
guşələrindən - Bakıdan, Gəncədən,
Şəkidən, Qazaxdan, Ağdamdan, Kürdəmirdən,
Qubadan... gəlmiş təbrik məktubları parlamentin ilk
iclası keçirilməmişdən bir-iki gün əvvəl
“Azərbaycan” qəzetində dərc edilərək milli
ictimai şüuru belə bir mühüm məqsəd və
mərama hazırlamaq istəmişdir ki, yeni qurulan parlament
bütünlüklə xalqın iradəsini ifadə edəcək,
ona bəslənən tarixi ümidləri, əlbəttə,
mövcud imkanlar daxilində, layiqincə doğruldacaqdır.
Xüsusi olaraq qeyd etmək lazım gəlir
ki, Şirməmməd müəllimin kitabı parlamentin,
ümumən Cümhuriyyətin (çünki ölkənin
elə bir problemi yox idi ki, burada müzakirə edilməsin)
tarixini əks etdirməklə yanaşı, son dərəcə
maraqlı bir roman kimi oxunur... Və bu romanın
süjet xəttini parlamentin iclasları, detal və təfərrüatları
isə çox mükəmməl bir şəkildə
M.Ə.Rəsulzadənin, Ü.Hacıbəylinin, Xəlil
İbrahimin, F.Ağazadənin, Ö.F.Nemanzadənin, Əhməd
Həmdinin... məqalə-təəssüratları təşkil
edir.
Yeri gəlmişkən, Şirməmməd
Hüseynov Azərbaycan elmi ictimaiyyətinə adı o qədər
də məlum olmayan, ancaq xüsusilə parlamentin fəaliyyətinin
son beş ayında “Azərbaycan” qəzetində
əlliyə qədər yazısı dərc edilmiş
Əhməd Həmdi haqqında ilk dəfə mötəbər
məlumat-materiallar əldə etmişdir ki, buraya M.Ə.Rəsulzadənin
“Əməkdaş haqqında” məqaləsi də daxildir.
“Azərbaycan” qəzetinin təqdimatından
(və Şirməmməd müəllimin kitabından)
görünür ki, parlament müzakirələri olduqca
canlı, predmetli və dramatik keçmişdir. Hətta Məclisdə
böyük nüfuz və son söz sahibi olan M.Ə.Rəsulzadə
belə ciddi tənqidə məruz qalmış, iclasa sədrlik
edən Həsən bəy Ağayev firqə təəssübkeşliyi
üstündə məzəmmət olunmuş və nəticə
etibarilə Müsavatın təklifi keçməmişdir:
“Sədr: - Təklif var ki, müzakirə
bitsin.
Səmədağa: - Hər zaman Məhəmməd
Əmin əfəndinin nitqindən sonra təklif varid olur ki, müzakirə
bitsin. Bu bizim Parlamanımızda bir adət
olmuşdur. Bən təklif ediyoram, bu adət
götürülsün. Müzakirə hələ
bitməsin.
...Sədr təklifi səsə qoyur.
Əksəriyyəti ilə təklif
keçmiyor. Müzakirə qət edilməyərək
davam ediyor”.
Kitabı oxuduqca bütün bu dramatik
münasibətlərin, sözgüləşdirmələrin
fövqündə dayanan bir idealın daim mövcud (və
mübahisəsiz) olduğunu təsəvvür etməmək
mümkün deyil ki, o da xalqın
özünün özünəinamının get-gedə
artmasıdır... Məsələn, parlamentin 12 may 1919-cu il tarixli iclasında sədr Nəsib bəy
Yusifbəyli belə bir bəyanat verir:
“Paytaxtımızı
general-qubernatorluq elan edən Tomson, mətəəssüf, ərz
eləməliyəm ki, bütün daxili işlərimizə
müdaxilə ediyordu. Lakin gün-gündən bu münasibət
dəgişildi.
...Bu axır günlərdə onlar
çox diyorlar ki, biz gördük və anladıq ki, siz
özünüzü idarə edə bilirsiniz. Sizin
daxili işlərinizə müdaxilə etmək
artıqdır”.
Və Nəsib bəyin əlavə
etdiyi aşağıdakı sözlər isə
alqışlarla qarşılanır:
“Əlbəttə, biz istəmiyoruz və
istəməyəcəgiz ki, kim olursa-olsun, xahi ingilis və
xahi başqa bir dövlət bizim işlərimizə
müdaxilə eləsin... Özümüz
özümüzü idarə etməyə ləyaqətimiz
vardır. Və idarə də edə biləriz”.
Məlumdur ki, Azərbaycanın ərazi
bütövlüyü ilə bağlı məsələlər
həmişə parlamentin diqqət mərkəzində
olmuş, bu sahədə olduqca gərgin mübarizə
aparılmışdır... Azərbaycanın tarixi ərazisində
yaradılmış qondarma Ermənistan dövləti öz
himayədarlarına arxalanaraq Qərbdən, bir sıra
qüvvələr isə Şimal və Cənubdan gənc
respublikanın yüzillər boyu məhz azərbaycanlılarla
məskun tarixi coğrafiyasını təhdid etdikləri
kimi, ölkənin Xəzər dənizi hüdudlarına da
göz dikmişlər. Və Azərbaycan dövlətinin bu məsələdəki
mövqeyini Üzeyir Hacıbəyli “Əsassız tələb”
məqaləsində obrazlı olduğu qədər də dəqiq
əks etdirir:
“Dabrovol komandası - dünki
nömrəmizdə yazıldığı üzrə - “tələb”
edir ki, bəhri-Xəzərdə Azərbaycanın nə ticarət
və nə də hərbi gəmiləri olmasın.
...Azərbaycan üçün dəniz
məsələsi - can məsələsidir. Bu
məsələyə əl vurmaq - Azərbaycanın
canına toxunmaqdır. Azərbaycan Bakı dənizində
hərbi gəmilər saxlamaqla heç kəsi qorxutmaq və
heç bir kəsin yerinə təərrüz etmək fikrində
deyildir... Azərbaycanın özgələr
yerinə göz dikdigini heç kəs xəyalına belə
gətirməz. Halbuki özgələrin
Azərbaycan torpağı haqqındakı təcavüzkaranə
fikri cümləcə məlumdur”.
Cümhuriyyət parlamentinin fəaliyyətinin
bir mühüm cəhəti də o olmuşdur ki, xalqa, cəmiyyətə
tamamilə açıq idi və “Azərbaycan” qəzeti də
çalışırdı ki, bu fəaliyyət
mümkün qədər geniş (və obyektiv)
işıqlandırılsın... Məsələn, qəzetin
9 dekabr 1919-cu il tarixli nömrəsində Əhməd Həmdinin
“Azərbaycan Parlamanının birinci illiyi” adlı o qədər
də həcmli olmayan bir məqaləsi getmişdir, lakin həmin
məqalədə hətta bugünkü ictimai-siyasi
jurnalistikamızın, xüsusilə parlament müxbirlərimizin
nümunə götürəcəyi bir səviyyədə
mükəmməl ümumiləşdirmə ilə
rastlaşırıq.
Müəllif göstərir ki,
ötən bir il Azərbaycan parlamenti
üçün o dövr oldu ki, “fövqəladə bir surətdə
vicdan təzahüratını meydana çıxar”dı... Və
məqalədə maraqlı bir müqayisə verilir... Bir
vaxtlar Napoleon Prussiyanın paytaxtını tutanda almanlar
azadlıq ümidlərini tamam itirib pərişan olurlar və
bu ağır günlərdə “millətinin hiss və fikirlərinə
tərcüman olan professor Fixte bütün Berlin cəmaətini
Berlin darülfünununun zalına toplayaraq demiş idi:
“Almanlar! Bugünki
uğradığımız fəlakət, nə fəsadlarda
şədid və faş olsa da, bizi almanca düşünməkdən,
almanca dərdlərimizi söyləməkdən kimsə mən
edəmməz...”
Azərbaycan Parlamanı da o
fəlakətli dəmlərdə, o mütərəddid və
mübhəm zamanlarda bir şeyə müvəffəq
olmuş idi ki, o da lisani-milli ilə hər təsirini, hər
fikrini söyləmiş, millətin həyəcan və
hissiyyati-ümumiyyəsini bir mərkəzə toplayaraq tərcüman
olmuş idi”.
Bundan sonra müəllif bir il ərzində müxtəlif nazirliklərdən
neçə qanun layihəsi təqdim olunduğu, Məclisdə
neçəsinin təsdiq edildiyi, neçəsinin isə geri
qaytarıldığı barədə məlumat verir; məsələn:
“Hərbiyyə nəzarətindən 9 qanun layihəsi gəlmiş,
7- si qəbul, 2-si də rədd edilmişdir.
Hərbiyyə nəzarətinin
əhəmiyyətini tərifə hacət varmı? Əlbəttə,
bütün qüvvət və gücümüzün mərkəzi
oradadır.
Onun üçün də hərbiyyə
nəzarətinin yeni-yeni qanun layihələri məmləkətimizin
qüvvayi-hərbiyyəsi cəhətilə böyük əhəmiyyəti
olacağından bütün azərbaycanlılar bundan
müstəfid olacaqdır.
Hərbiyyə nazirimizin qeyrət
və əzmi məlumdur.
Binaənileyh: ümidimiz də
qüvvətlidir”.
Göründüyü kimi, bu
hesabat-icmalda həm konkret faktlar, həm nəticə-ümumiləşdirmələr
var, həm də təklif-ümidlər...
Cümhuriyyət parlament
respublikası olduğundan bütün dövlət məsələləri
məhz burada həll edilirdi.
Və Şirməmmməd müəllimin
Cümhuriyyət lideri M.Ə.Rəsulzadədən verdiyi
aşağıdakı epiqraf bunu bir daha (və bütün
siyasi emosionallığı ilə) təsdiq edir:
“Millət Məclisi məmləkətin
bütün sinif və millətlərini təmsil edib,
dövlətin tamamən taleyinə hakim idi. Onsuz heç
bir əmr keçməz, heç bir məsrəf yapılmaz,
heç bir müharibə başlamaz, heç bir
barışıq imzalanmazdı. Hökumət
Məclisin etimadını qazananda qalır, itirəndə
düşürdü. Ortada hakim olacaq vasitə-vəzifə
yox idi. Parlament hakimi- mütləq idi”.
Üçcildliyin ikinci cildinin əvvəlində
Şirməmməd müəllim Cümhuriyyət parlamentinin
fəaliyyətini, eləcə də ümumən ölkənin
iqtisadi, ictimai-siyasi və mədəni vəziyyətini
işıqlandırmaqda “Azərbaycan” qəzetinin tarixi rolunu təsəvvür
etmək üçün bir neçə mötəbər sənəd
vermişdir ki, bunlardan ən mühümü “Azərbaycan” qəzetinin
9 oktyabr 1919-cu il tarixli nömrəsində dərc olunmuş
“Azərbaycan”ın birinci səneyi-davamiyyəsi” adlı
redaksiya məqaləsidir. Həmin məqalədə (kitab
müəllifi tutarlı dəlillərlə sübut edir ki,
bu məqaləni M.Ə.Rəsulzadə yazmışdır)
deyilir:
“Azərbaycan” mühərrirləri
böyük bir xülus və safiyyətlə əllərində
tutduqları qələm ilə ancaq bir hədəf və bir
qayəyi gözlərinin önündə
bulundurmuşlardır ki, o da məmləkətin səlaməti,
millətin hürriyyəti-siyasiyyəsi, fikri-istiqlaliyyətin
qüvvətlənməsidir. Bu üç
şüar bittəb bu gün ümum əfradi-millət
arasında söylənib təkrar edilməkdə və mətbuat
isə bunu təqviyə eləməkdədir”.
M.Ə.Rəsulzadə milli azadlıq
hərəkatında mətbuatın, ilk növbədə “Azərbaycan”
qəzetinin tarixi rolunu yüksək qiymətləndirmişdir:
“İştə “Azərbaycan”ın
birinci səneyi-davamiyyəsini biz bu gün qeyd edər ikən
bütün mühərrirlər və mütəfəkkirlərimizin
də ülvi və həqiqətpərvər bir qayə ilə
həyati-təhriyyələrinə davam edərək cəmaətimiz
üçün görəcəkləri fikri xidmətin mənəvi
mükafat və qədri də, əlbəttə, yaddan
çıxmaz”.
Gələn il Azərbaycan
Cümhuriyyəti (və onun parlamenti) ilə birlikdə “Azərbaycan”
qəzetinin də yüz yaşı tamam olur.
Şirməmməd müəllim
üçcildliyin üçüncü cildinin əvvəllərində
Cümhuriyyət “Azərbaycan”ının varisi olan
bugünkü “Azərbaycan” qəzetinin baş redaktoru, millət
vəkili Bəxtiyar Sadıqovun “Azərbaycan - 100:
istiqlalımızın yadigarı, həmyaşıdı və
tərənnümçüsü” məqaləsini də
vermişdir.
Bəxtiyar müəllim bu səmimi
məqaləsində professor Şirməmməd Hüseynovun
kitabını yüksək qiymətləndirdikdən sonra
yazır:
“Təəssüf ki, “Azərbaycan”ın
Cümhuriyyət dövründə nəşr edilmiş 443
nömrəsi bu gün də hamı üçün əlçatan
deyildir. Hətta
redaksiyamızın bütün cəhdlərində - Azərbaycandakı
bütün arxivlərə, respublika Mədəniyyət
Nazirliyinə, M.F.Axundov adına Milli Kitabxanaya, Rusiyadakı Azərbaycan
diasporunun bəzi tanınmış üzvlərinə
(eşitdiyimizə görə, Moskva və Sankt-Peterburq şəhərlərindəki
mərkəzi kitabxanalarda “Azərbaycan” qəzetinin
bütün nüsxələri tam halda saxlanılır)
dönə-dönə müraciətlərinə baxmayaraq,
indiyədək həmin 443 nömrənin ksero-surətini əldə
edə bilməmişik...
Yenə ümidimiz qalıb sevimli
müəllimimiz Şirməmməd Hüseynova!..”
Əlbəttə, keçən il 25
illiyini təntənə ilə qeyd etdiyimiz bugünkü
müstəqil Azərbaycan dövləti nə daxili, nə də
xarici (beynəlxalq) vəziyyətinə görə öz sələfi
ilə müqayisə oluna bilmədiyi kimi, bugünkü “Azərbaycan”
qəzeti də Cümhuriyyət “Azərbaycan”ı ilə
müqayisəyə gəlmir. Kifayət qədər zəngin,
hətta demək olar ki, inqilabi bir inkişaf yolu
keçilmiş, həm Azərbaycan cəmiyyəti, həm də
Azərbaycan jurnalistikası böyük uğurlar əldə
etmişdir... Bununla belə, heç zaman unutmaq olmaz ki, ölkəmiz,
xalqımız, ictimai- mənəvi varlığımız
hansı dövrlərdən, mərhələlərdən (və
mübarizələrdən!) keçərək bu günə
gəlib çıxmışdır...
Və heç zaman
unutmamışıq!.. Hətta yasaqlar, təzyiqlər,
repressiyalar vasitəsilə buna nail olmaq istəsələr belə!..
“Azərbaycan Xalq Cumhuriyyətinin 100
illik yubileyi haqqında” Azərbaycan Respublikası Prezidentinin sərəncamında
deyilir:
“Azərbaycan Xalq Cümhuriyyəti təcavüzə məruz qaldığı üçün qarşıya qoyduğu məqsədlərə tam müvəffəq ola bilmədən süquta uğrasa da, onun şüurlarda bərqərar etdiyi müstəqillik ideyası unudulmadı. Azərbaycan xalqı ötən dövr ərzində milli dövlətçilik atributlarının bir çoxunu qoruyub saxlaya bildi. Ümummilli lider Heydər Əliyevin respublikada uğurla gerçəkləşdirdiyi siyasət xalqımızın tarixi-mədəni yaddaşını özünə qaytararaq milli mənlik şüurunu inkişaf etdirdi, azərbaycançılıq məfkurəsi işığında müstəqillik arzularının güclənməsi və yaxın gələcəkdə yenidən həqiqətə çevrilməsinə zəmin yaratdı”.
Əlbəttə, sərəncamda bu müddəanın özünə yer tapması tamamilə təbiidir; hər şeydən əvvəl ona görə ki, Heydər Əliyev 60-cı illərin sonlarında respublikanın rəhbəri təyin edildikdən sonra milli tarixi dəyərlərin ümumxalq təfəkkürü miqyasında yenidən mənimsənilməsi, milli ictimai şüurun üzvi tərkib hissəsinə (və əslində, ideya generatoruna) çevrilməsi prosesi başladı və Azərbaycan Xalq Cümhuriyyəti barədə illərlə qadağan olunmuş, unutdurulmuş, tarixin qaranlıq bir küncünə sıxışdırılmış məlumatların (həqiqətlərin!) şüurlarda bərpası hərəkatı geniş meydan aldı... Cəsarətlə demək olar ki, Şirməmməd müəllimin Cümhuriyyətin (və onun de-fakto mətbuat orqanı olan “Azərbaycan” qəzetinin) 100 illiyi ərəfəsində nəşr edilən üçcildliyi kimi fundamental əsərlərin meydana çıxmasının ideoloji-mənəvi təməli də həmin dövrdən - Heydər Əliyevin Azərbaycana (və Azərbaycan xalqına) rəhbərlik etməyə başladığı ilk illərdən qoyuldu.
Prezident sərəncamında göstərildiyi kimi, “1991-ci ildə müstəqilliyinin bərpasına nail olarkən müasir Azərbaycan Respublikası özünün qədim dövlətçilik ənənələrinə sadiq qaldığını göstərdi, Xalq Cümhuriyyətinin siyasi və mənəvi varisi olmaqla onun üçrəngli bayrağını, gerbini, himnini qəbul etdi. Xalqımız Cümhuriyyətin istiqlalını dünyaya yaydığı 28 May gününü həmin vaxtdan Respublika Günü olaraq qeyd edir”.
Və gələn il Azərbaycan Cümhuriyyətinin 100 illiyini qeyd edərkən professor Şirməmməd Hüseynovun Cümhuriyyət tarixşünaslığı üçün gördüyü böyük işlərin, xüsusilə həmin yüzilliyə həsr etdiyi “Azərbaycan” qəzetində parlament hesabatları və şərhlər” üçcildliyinin də ən dəyərli hədiyyələrdən biri kimi qəbul olunacağına qətiyyən şübhə etmirik.
Nizami CƏFƏROV,
AMEA-nın həqiqi üzvü,
Milli Məclisin deputatı
Azərbaycan.-
2017.- 23 iyun.- S. 7.