65
illik dost
Xalq
elçilərimiz
İnsanlar niyə bir-biri ilə dost
olur? Saysız-hesabsız sosial münasibətlər
sırasında dost sözünün arxasındakı
bağlılığı seçib fərqləndirən,
görəsən nədir? Fərqli
ömürləri, bir-birinə bənzəməyən təbləri,
xarakterləri nələr birləşdirir, nələr
bağlayır?!
Bu sətirləri yazır və
uzun-uzadı düşünürəm.
Deyəsən, axı,
cavabı o qədər də asanlıqla tapılası suallar
deyil?!
Dostluq insan taleyinin bir
parçasıdır. Həyat bizi çox insanlarla
rastlaşdırır. Körpə bir uşağın
öz həmyaşıdları ilə ilk oyunlarından
tutmuş, ömrün ixtiyar çağlarında bərabər
əyləşib acılı-şirinli ömür xatirələrini
bölüşən ağsaqqalların-ağbirçəklərin
şirin ixtilatlarına kimi, o qədər adamla
ömrümüzün şərikli anlarını
paylaşırıq ki... Amma həyat bu insanlardan çox az bir qismini bizim üçün dost mənziləsinə
yüksəldir. Zaman ələyir, həyatımızdakı
bütün insanları. Birini məsafələr,
ömrün yol ayrıcları uzaq salır. Başqası vaxtın ağır
sınaqlarından keçə bilmir. Bir
ayrısını yaxından tanımaq fürsətimiz olmur.
Əgər biri ilə dostluq
münasibətlərini orta məktəb partası
arxasından ta ömrün ahıl çağlarına qədər
davam etdirməyi bacarmısansa, deməli, o insan taleyindir. Bilirəm ki,
belələri nadir hadisədir. Bilirəm ki,
bu azlıqda qərar tutmaq, həyatında 50-60 illik bir dostunun
olması, o dostunla həm körpəlik, həm gənclik, həm
də ahıllıq şəkillərindən birgə
boylanmaq insan xoşbəxtliyinin başqa bir adıdır.
Və onu da bilirəm ki, tale bu nadir xoşbəxtliyi
mənə də nəsib edib. Çünki
belə bir dostum var. Hərdən elektron mediada onunla ilk və
Milli Məclis zalında çəkilmiş
axırıncı şəkillərimiz çıxır
rastıma. O, şəkillər arasında 65 ildən
çox fərq var.
Həmin şəkillərdə
yanaşı düşdüyümüz insansa Hüseynbala
Mirələmovdur.
Nə qədər yaşa dolsam da,
xatirələrimdə hər zaman Fazil əmi olaraq qalan
atasının, əllərinin istisini, yeməklərinin
dadını indiyə qədər unutmadığım
Birçək ananın halal ocağında aldığı tərbiyə,
istedadı, çalışqanlığı, gərgin zəhməti,
tutduğu düzgün yol Hüseynbala Mirələmova uzun illər
boyu çox statuslar qazandırıb. Çağdaş
Azərbaycan ədəbiyyatında öz yeri olan görkəmli
yazıçı-publisistdir, Azərbaycan Neft və Sənaye
Universitetinin kafedra müdiridir, texnika elmləri doktoru,
professordur. Müxtəlif
elmi-yaradıcılıq təşkilatlarının
üzvü, nüfuzlu mükafatlar laureatıdır. Uzun illər yüksək vəzifələrdə
çalışıb. Bu gün də Azərbaycan
Respublikası Milli Məclisinin deputatı, Yeni Azərbaycan
Partiyası Xətai rayon təşkilatının sədri,
ARDNŞ prezidentinin müşaviridir.
Bu sətirlərin müəllifi
üçünsə o, illər əvvəl Lənkəranda
eyni bir partanı, bu günsə Azərbaycan Respublikası
Milli Məclisinin iclas salonunda eyni masanı
paylaşdığım tale yoldaşıdır, dost
sözünün bütün ən gözəl mənalarını
aid edə biləcəyim şəxsiyyətdir.
Həyatında belə
birinin olması, qocalığı insanın ruhundan uzaq
saxlayır. Hər dəfə Hüseynbalanı görəndə,
onunla eyni masa arxasında əyləşəndə, xoş
söhbətlərini, şirin zarafatlarını eşidəndə
və özüm də bütün bunlara qarşılıq
verəndə adama elə gəlir ki, heç aradan bu qədər
illər ötməyib. Biz yenə də Lənkərandakı
orta məktəbimizin ilk siniflərindəyik.
Biz Hüseynbala ilə lap
kiçik yaşlardan bir yerdə böyümüşük. Həyatımızın
enişli-yoxuşlu anları yanaşı yaşanıb.
Mühitimiz, aldığımız tərbiyə
körpəlikdən hər ikimizi zəhmətə
alışdırıb. Lap erkəndən
anlamışıq ki, həyatda uğur qazanmaqdan ötrü
məqsədə, zəhmətə və müəyyən qədər
də qismətə tapınmalıyıq. Orta məktəbin ilk siniflərindən əlaçı
olub seçilməyə, irəli getməyə, nələrəsə
nail olmağa çalışmışıq.
Hüseynbala məktəb illərindən
bədii yaradıcılıqla məşğul idi. Yaxşı
xatırlayıram, 1961-ci ildə, 7-ci sinifdə oxuyanda Lənkəranın
“Leninçi” qəzetində onun “Bir tikə çörək”
adlı hekayəsi dərc olunmuşdu. Sevincinin
həddi-hüdudu yox idi. Bu sevinci sinif
yoldaşları ilə bölüşürdü. Mənsə bir tikə çörəyi
kağıza büküb sinifin bütün
uşaqlarını belə bir zarafatyana forma ilə o hekayəni
təbliğ etməyə həvəsləndirirdim. Həmin gün sinfimizdəki bütün uşaqlar
o hekayəni oxudu və uşaqlığımızın o
sıxıntılarla dolu, amma xoşbəxt illərində
bir tikə çörəyin qədir-qiyməti haqqında
hamı düşündü.
İkimiz də dərslərimizi
yaxşı oxuyar, ekskursiyalara gedər, idmanı sevərdik. Hərdən
başqa uşaqlarla dava-dalaşlarımız, bir-birimizi
sınaqdan keçirdiyimiz vaxtlar da olurdu, nə gizlədim.
Dram dərnəyində fəal iştirak edir, bəzən
səhnəyə tərəf-müqabili kimi
çıxırdıq. İlk sevgi sirlərimizi
bir-birimizlə bölüşdüyümüz, birinci dəfə
bayram vaxtı içkinin dadına “Tri semyorka”
çaxırı ilə baxdığımız, loto
oynadığımız, hətta ərk eləyib bir-birimizin
paltarını geyindiyimiz vaxtlarımız da olub. Mən
Hüseynbalagildə, o da bizim evdə süfrənin
başında əyləşərdik. Valideynlərimiz
bizi bir-birimizdən ayırmazdılar.
İkimiz də maddi
imkansız, çoxuşaqlı ailələrin
övladları idik. Çox vaxt məktəbdən sonra əlimiz,
gücümüz çatan işlərdə
çalışıb dərsliklərimizi,
paltarlarımızı özümüz almalı olurduq.
O uşaqlardan, o acılı-şirinli günlərdən xəbərsiz
olan hansısa jurnalist indi Hüseynbala haqqında nəsə
yazanda, bundan çox rəncidə oluram. Çünki
onun keçdiyi həyat, yaşadığı əziyyətlər
gözlərim önündən ötüb, həyatda nail
olduğu hər şeyi gərgin zəhmət, inadkarlıq
bahasına zərrə-zərrə əldə etdiyini
görmüşəm.
Hüseynbala orta məktəbi
qızıl medalla bitirdi. “Son zəng”imiz indiki
kimi yadımdadır. Fərqli bir
buraxılış gecəsi idi. Sinif
yoldaşlarımızla maraqlı bir pyes səhnələşdirmişdik.
Tamaşada Hüseynbala da oynayırdı. Ali təhsili o vaxt arzularımızın şəhəri
olan Leninqradda - indiki Sankt-Peterburqda almaq istəyirdi. Amma qəbul imtahanı vaxtı müəllimlər
qeyri-obyektivlik göstərərək, rus dili amilini əsas gətirməklə
onu məyus etdilər. Bir illik hərbi xidmətdən
sonra Politexnik İnstitutuna daxil oldu. Orada
oxuya-oxuya da “Pioner” qəzeti ilə əməkdaşlığa
başladı. Qəzetin əməkdaşı
olmaqla yanaşı, hələ 4-cü kursda oxuyanda institutda
“Sopromat” fənnindən dərs deyirdi. Yəni,
müəllimlər Hüseynbalanın istedadına, bu qədər
etibar edirdilər.
Tələbəlik həyatı
partalarımızı ayırsa da, tale yollarımızı
ayıra bilmədi. Bir-birimizə dəstək verdiyimiz,
yeni-yeni uğurlarımıza birgə sevindiyimiz, bir-birimizlə
öyündüyümüz vaxtlar yenə də çox oldu.
Sonrakı dönəmlərdə ikimiz də
bir müddət Lənkəranda işləyəsi olduq.
Burada rayon partiya komitəsinin katibi kimi
çalışdığım illərdə Hüseynbala
tikinti idarəsinin rəisi idi. Özüm
üçün gərgin keçən bütün
iclaslardan, məsuliyyətli çıxışlardan sonra
ikilikdə görüşüb onun rəyini almağa
çalışardım. Bilirdim ki, əsl
həqiqətləri, bütün sərt tənqidləri
ancaq onun dilindən eşidə bilərəm. Fərqində
idim ki, hər nə deyir-desin, Hüseynbala yalnız riyadan,
yalandan kənar həqiqətləri söyləyəcək. Heç bir məqsəd güdmədən yalnız
yaxşılığıma deyilmiş fikirləri səsləndirəcək.
Haqlı olduğum anlarda özümə
inamımı artıracaq, yanlışlığa yol verdiyim məqamlarda
isə yanlışımı düzəltmək
üçün yol göstərəcək. Hüseynbala da bütün düşüncələrini
ərkyana dilə gətirirdi, hətta bir-birimizi
danladığımız, öz aramızda mübahisə
etdiyimiz, amma yenə barışaraq
ayrıldığımız vaxtlarımız olurdu.
Lənkəranda
çalışarkən, elə sonralar da tez-tez bir-birimizin
evində ailəvi qonaq olardıq. Orta məktəb
partası arxasından başlanan dostluq münasibətlərimiz
ailələrimizi də bir-birinə
doğmalaşdırmışdı. Biz həyatın
yüksəlişləri kimi eniş-yoxuşlarını da
gördük. İşsiz qaldığımız, təxribatlarla,
hücumlarla üzləşdiyimiz, vəzifələrdə
olanda özünü dost kimi tanıtmaq istəyənlərin
bir anda qeybə çəkildiklərini sezdiyimiz vaxtlar da
yaşandı həyatımızda. Amma hər dəfə
qayğı və narahatlıqlar içində
başımızı qaldırıb yan-yörəyə
boylananda bir-birimizi hiss etdik. Bir-birimizə həyan
olduq.
Hər dəfə bu insanla bizi birləşdirən
dostluq telləri barədə düşünərkən
şeirlərini İsmi Pünhan təxəllüsü ilə
yazmış Molla Cümənin məşhur misrasını
xatırlayıram: “Dost mehriban ya bir olar, ya iki”. Hüseynbala
bütün həyatını bu misradakı o ya bir, ya ikilərdən
- yəni, ən layiqlilərdən, ən
sınanmışlardan, ən etibarlılardan biri olmaq
üçün yaşamış adamdır. Adam var ki, başqalarının yolunda pul, var-dövlət
xərcləməsi ilə öyünər. Hüseynbala Mirələmov isə insanlar
üçün özünü xərcləyən birisidir.
Qohum-əqrəba, dost-tanış öz yerində,
yaxından-uzaqdan tanıyan bütün insanların xeyrində-şərində
onu görərsən. Bəzən bir
gündə 4 toya getdiyini eşidəndə hərdən
uşaqlıq dostumu ərkyana tənbeh eləmək istəyirəm,
deyirəm, pul göndər də, vaxtına heyfin gəlmir?!
Cavab verir ki, “yaxşı deyil axı, sayıb
çağırıblar, getməsəm, olmaz”.
Dilimizin ən xoş, milli enerjili,
parlaq incilərindən olan “Kara gələn adam”
ifadəsi sanki onun şəxsiyyəti üçün
düşünülüb. Son dərəcə zəhmətkeş,
zirək kişi olan atası Fazil əminin
çox ibrətamiz bir sözü vardı. İndi
də böyük maddi imkanlar arzusunda olan, fikrində-zikrində
ancaq onun-bunun pullarını sayan, di gəl ki, özü
heç bir zəhmətə qatlaşmaq istəməyən tənbəl,
ərincək adamlarla rastlaşanda bu sözü tez-tez
xatırlayıram. Deyərdi ki, “kişinin
gərək yorğan-döşəkdə üstünə
gün düşməsin”. Belə bir tərbiyənin
övladı olan Hüseynbalanın yeniyetməliyindən
sinninin indiki çağlarına qədər iş dalınca
çıxdığı erkən səhərlərin,
yazı masası üzərinə sərilmiş layihələr,
çertyojlar arxasında keçirdiyi, əsərlərini qələmə
aldığı yuxusuz gecələrin bərəkəti,
qazandırdığı həm mənəvi, həm də
maddi imkanlar çox olub. Hüseynbalanı bir
çoxlarından fərqləndirən əsas cəhətlərdən
biri də bu imkanları başqaları ilə paylaşacaq qədər
böyük ürəyə, yüksək səxavət hissinə
sahibliyidir. O, böyük bir nəslin
ağsaqqalıdır. Bu nəslin, eləcə
də hər hansısa probleminin həlli üçün ona
ünü yetən istənilən insanın
qayğıları Hüseynbalanın üzərindədir.
Uşaqlıq dostum bu qayğıların həllindən
zövq alır, başqalarına kiçicik də olsa
yaxşılıq etmək onun xoşbəxtliyi
üçün yetir.
Hüseynbala müsbət
auraya malik, çox pozitiv və səmimi adamdır. Üzdə
olan şəxslər haqqında fikirlər, təbii ki, birmənalı
olmur, mətbuatda, ictimai çevrələrdə hər
birimiz haqqında müsbət fikirlər qədər, tənqidi
rəylər də eşidirik. Qəribəsi
budur ki, ona qarşı hətta ən qərəzli
yazılarda, fikirlərdə belə Hüseynbala Mirələmov
şəxsiyyətindəki pozitivliyi, səmimiyyəti,
müsbət enerjini yenə duya bilirsən. Qərəzin ən tünd rəngi də onun şəxsiyyətindəki
işığa kölgə sala bilmir.
Hüseynbala kifayət qədər
prinsipial adamdır, sözü üzə deməyi, yeri gələndə
sərt olmağı bacarır. Amma yaşı 65 ildən
də çox olan dostluğumuzda hələ indiyə kimi onun
kiminsə qəlbinə dəydiyinə, başqalarına
yuxarıdan aşağı baxdığına,
Tanrının əta elədyi təvazökarlıq hədiyyəsinin
sərhədlərindən kənara adladığına
şahid olmamışam.
O, tanınmış
yazıçıdır. Kitabları 5 milyon
tirajdan çox nüsxədə çıxıb. 40-a yaxın dilə tərcümə edilib. Əsərləri teatrlarda səhnələşdirilib.
Yazdığı ssenarilərə filmlər
çəkilib. Yaradıcılığı
ədəbiyyatın, publisistikanın ən müxtəlif
janrlarını əhatə edir. Bütün
bu əsərləri yaratmağa ömrün illəri həsr
olunub. Bunların hamısını bir qəpik
də olsun, maddi qazanc götürmədən edib. Kitablarının bircə nüsxəsini də
satmamaq, yalnız oxuculara pulsuz hədiyyə etmək əvvəldən
qarşıya qoyduğu prinsipdir. Dindirsən,
ədəbi aləmdə heç bir umacağının
olmadığını görəcəksən. Hətta həmişəki təvazökarlığı
ilə özünü hələ də yazıçı
saymadığını, amma kağız-qələmdən,
yazı masasından da aralı yaşaya bilmədiyini deyəcək.
Bu, çoxdan indiki günün dar çevrəsindən
çıxıb, artıq tarixin hüdudsuzluğunda
yaşayan, tarix üçün yaşayan bir insanın
ömür prinsipidir.
Bu tarixin hüdudsuzluğunda
Hüseynbala Mirələmovun müstəqil Azərbaycan
dövlətinin çətin sınaqlarla dolu anlarında
ortaya qoyduğu əsl ziyalı və vətəndaş
mövqeyi, dönməz əqidə sahibliyi də var.
Hüseynbala Mirələmov
Yeni Azərbaycan Partiyasının Xətai rayon təşkilatının
qurucularındandır. Bu partiya təsis olunanda o, komitə sədrini
əvəz edirdi, nazir statusu daşıyırdı. O,
çətin vaxtlarda xalqımızın ümummilli lideri
Heydər Əliyevlə görüşmək
üçün Naxçıvan Muxtar Respublikasına gedən
az sayda vətəndaş
ziyalılarımızdan idi. Yeni Azərbaycan
Partiyasına yaxınlığına görə də vəzifəsindən
kənarlaşdırdılar. Amma o, məsləkindən,
doğru bildiyi yoldan dönmədi.
Hüseynbala Mirələmov bu gün də eyni yoldadır. Möhtərəm Prezident İlham Əliyevin həyata keçirdiyi siyasət sayəsində tarixinin ən qüdrətli çağlarını yaşayan Azərbaycan dövlətinin tərəqqisinə ictimai nüfuzu, vətəndaş mövqeyi, əsərləri ilə töhfə verən ziyalılarımızın ön cərgəsindədir.
Bu sətirləri qələmə alanda pəncərə önündə aram-aram 24 iyun gününün səhəri açılır. Sabahsa (Qəzet dərc olunduğu gün) iyunun 25-dir - orta məktəb illərindən bizə doğma olan tarix, imkan düşəndə həmişə birgə qeyd etdiyimiz gün, uşaqlıq dostumun doğum günü.
Bu yazı işıq üzü görəndə düz 72 yaşı tamam olacaq.
Arzu edirəm ki, o nurlu çöhrəsinə hələ bundan sonra neçə-neçə illərin bahar çiçəklərinin rayihəsinə bürünmüş doğum günü sabahları açılsın. O sabahı, o baharı, o rayihəni bir zamanlar məktəbimizin həyətində qaçdı-tutdu oynadığımız uşaqlıq illərinin sağlamlığı, şövqü, enerjisi ilə içinə çəksin və əlindəki qələm qarşısındakı ağ vərəqə onu sevən bütün insanların dilindən beləcə yazsın: “Hələ yaşamağa, yaratmağa dəyər, əziz dost!”
Hadi RƏCƏBLİ,
Milli Məclisin Əmək və sosial siyasət komitəsinin
sədri
Azərbaycan.-
2017.- 25 iyun.- S.4.