Şəhid hərbçi Zakir Cəfərov paytaxtın Nizami rayonunda son mənzilə yola salınıb

Fevralın 24-dən 25-nə keçən gecə Ermənistan silahlı qüvvələrinin bütün cəbhə boyu törətdiyi irimiqyaslı təxribatların qarşısını alarkən şəhid olmuş hərbi qulluqçumuz Zakir Cəfərovun fevralın 28-də Bakının Nizami rayonunda son mənzilə yola salınması mərasimi keçirilib.

AZƏRTAC xəbər verir ki, şəhidin cənazəsi son mənzilə izdihamlı dəfn mərasimində iştirak edən minlərlə insanın “Qarabağ bizimdir!”, “Azərbaycan” sədaları altında yola salınıb.

Şəhidin dəfn mərasimində rayon icra hakimiyyətinin rəhbərliyi, Müdafiə Nazirliyinin, Səfərbərlik və Hərbi Xidmətə Çağırış üzrə Dövlət Xidmətinin rəsmiləri, rayonun hüquq mühafizə orqanlarının kollektivləri, şəhidin döyüş yoldaşları, ictimaiyyətin nümayəndələri, minlərlə rayon sakini iştirak edib.

Şəhidin tabutu üzərinə çəkilmiş Azərbaycanın üçrəngli bayrağı atasına təqdim edilib.

İzdihamlı mərasimdə çıxış edənlər şəhidin ailə üzvlərinə və yaxınlarına dərin hüznlə başsağlığı veriblər. Qeyd edilib ki, Azərbaycanın ərazi bütövlüyü uğrunda canından keçən Zakir kimi igidlərin əməlləri, fədakarlığı vətənpərvərliyi torpaqlarımızın tezliklə işğaldan azad olunacağını deməyə əsas verir. Çünki bu torpağı canından artıq sevən cəsarətli, vətənpərvər gənc nəsil yetişir. Elə mərasimdə uca dalğalanan bayrağımız, açılan yaylım atəşləri, hər yanı bürüyən çiçəklər də həm şəhidlərimizin, həm də xalqımızın yenilməz ruhunun, tezliklə Ali Baş Komandanımızın başçılığı ilə qazanılacaq qələbənin müjdəçisidir.

Azərbaycan.- 2017.- 1 mart.- S. 5.