Mərhəmət və sülh marafonu

Leyla Əliyevanın təşəbbüsü ilə keçirilən və 13 mindən artıq insanın iştirak etdiyi “Bakı Marafonu-2017” İslamiada ərəfəsində möhtəşəm idman tədbiri oldu

Azərbaycanın dünyada təbliği və zəngin dəyərlərimizin tanıdılması baxımından Heydər Əliyev Fondunun xüsusi rolu var. Fond respublikamızın beynəlxalq nüfuzunun artırılması ilə bağlı tədbirlərin həyata keçirilməsini, ölkə həqiqətlərinin dünya ictimaiyyətinə çatdırılmasını, elm, təhsil, mədəniyyət, səhiyyə, idman, ekoloji sahələrə aid proqram və layihələrin hazırlanıb gerçəkləşməsini qarşıya məqsəd qoyub.

Belə layihələrdən biri də fondun təşəbbüsü ilə bu il növbəti dəfə təşkil edilən marafon yarışıdır. İdmanın inkişafına dəstək göstərmək, sağlam həyat tərzini təbliğ etmək, insanları xeyirxah amallarla bir araya gətirmək məqsədi daşıyan belə tədbir artıq ikinci ildir ölkəmizdə təşkil olunur. Budəfəki yarışda iştirak üçün ümumilikdə 13 mindən çox şəxs qeydiyyatdan keçmişdi.

Məlumat üçün qeyd edək ki, marafon qaçışı idman yarışlarının kütləvi növlərindən biridir. Bu yarış növü 1896-cı ildən olimpiya oyunlarında kişilər, 1984-cü ildən etibarən isə qadınlar arasında yüngül atletika proqramına daxil edilib. Bu qaçışın təşkil edilməsi ideyasını ilk dəfə 1896-cı ildə fransız filoloq Mişel Breal irəli sürüb. Təşəbbüsü müasir olimpiya oyunlarının əsasını qoyan Pyer de Kuberten və digər yunan təşkilatçılar da dəstəkləyiblər. İlk marafon qaçışında məsafəni 3 saat 18 dəqiqəyə qət edən Harilaos Vasilakos qalib olub. Marafon qaçışını idman azarkeşləri çox sevirlər. Ona görə də yüngül atletika üzrə yarışlar məhz marafon qaçışının keçirilməsi ilə bitir.

Bu gün dünyanın hər yerində keçirilən məşhur marafon yarışları müxtəlif yaş kateqoriyalarından olan insanları start xəttinə toplayır. Bu cür marafonlar indiyədək London, Paris, Boston, Nyu York, Çikaqo, Berlin, Barselona, İstanbul və digər şəhərlərdə təşkil olunub. Tam marafon yarışının məsafəsi 42 kilometr, yarımarafonun məsafəsi isə 21 kilometrdir. Marafon yarışları idman tədbiri olmaqla yanaşı, həm də xeyriyyə məqsədi daşıyır.

Paytaxtımızda ilk marafon yarışı ötən il mayın 1-də təşkil edilib. Yarışın başlandığını bildirən atəşi olimpiya çempionu, stend atıcılığı üzrə dünya çempionu Zemfira Meftahətdinova açıb. Yarımarafon məsafəsinin - 21 kilometrin qət edilməsinə maksimum 4 saat 30 dəqiqə vaxt verilib.

Aprelin 30-da isə sayca ikinci dəfə “Küləyə qalib gəl” şüarı altında növbəti “Bakı Marafonu-2017” təşkil edilib. Heydər Əliyev Fondunun vitse-prezidenti Leyla Əliyevanın və Arzu Əliyevanın da iştirak etdikləri yarımarafon Dövlət Bayrağı meydanından start götürüb və Bakı Olimpiya Stadionunda başa çatıb. Marafonun məsafəsi 21 kilometr təşkil edib.

Dövlət rəsmiləri, ictimai-siyasi xadimlər, tanınmış mədəniyyət və incəsənət adamlarının, idmançılar, ictimaiyyət nümayəndələri və tələbələrin də qoşulduğu marafondan toplanan vəsait valideyn himayəsindən məhrum olan uşaqlarla bağlı layihəyə yönəldiləcək.

Marafonda Azərbaycan vətəndaşları ilə yanaşı, 1000-dən çox xarici vətəndaş da iştirak edib. Eləcə də İsveçrə, Hindistan, Çex Respublikası, Meksika, Braziliya, Birləşmiş Ərəb Əmirlikləri, Ukrayna və Malayziyanın Azərbaycandakı səfirləri, Koreya, İraq, Belarus, Özbəkistan, Qazaxıstan, Tacikistan və Türkmənistanın ölkəmizdəki səfirliklərinin, Avropa İttifaqının Azərbaycandakı nümayəndəliyinin, Böyük Britaniyanın Azərbaycana Birgə Yardım (UAFA) təşkilatının və “BP Azərbaycan” şirkətinin təmsilçiləri yarışa qoşulub. Marafonda həmçinin ABŞ, Böyük Britaniya, Almaniya, Polşa, Türkiyə, Rusiya, İran, Gürcüstan, Ukrayna və digər ölkələrin vətəndaşları da iştirak ediblər.

Yarış Dənizkənarı Milli Park, Yusif Səfərov küçəsi, daha sonra Heydər Əliyev Mərkəzinin yanından keçərək Heydər Əliyev prospekti boyunca Bakı Olimpiya Stadionunadək marşrutu əhatə edib. Marşrut boyu hər iki kilometrdən bir yaradılmış yardım məntəqələri marafonçuları su, sanitar qovşağı və ilkin tibbi yardımla təmin edib.

Marafonu davam etdirə bilməyənlər, iştirakçıları dəstəkləməyə gələnlər və digərləri finiş xəttinə xüsusi avtobuslarla çatdırılıblar. Marşrut boyu ümumilikdə dörd avtobus dayanacağı fəaliyyət göstərib.

Yekunda kişilər arasında Türkiyə vətəndaşları Veysi Aslan 1-ci, Üzeyir Söyləməz 2-ci, rusiyalı Vladislav Demyanov isə 3-cü yerə layiq görülüblər. Qadınlar arasında isə finişə Türkiyə vətəndaşı Yayla Kılıc birinci, ukraynalı Valentina Poltovska ikinci və iranlı Parisa Arab üçüncü çatıb.

Sonda Bakı Olimpiya Stadionunda “Bakı Marafonu-2017”nin qaliblərinin mükafatlandırılması mərasimi olub.

Elçin CƏFƏROV,

Azərbaycan.- 2017.- 2 may.- S. 7.