Tennisçilərin
yarışına start verildi
Dünən
“Bakı-2017” IV İslam Həmrəyliyi Oyunlarının
tennis yarışlarına start verildi. Bakı Tennis
Akademiyasında keçirilən turnirin ilk günündə
kişi və qadın komandaları mübarizə
apardılar.
Pakistan,
Özbəkistan və Türkmənistan milliləri ilə
qrupda yer alan Azərbaycanın qadınlardan ibarət
yığma komandası ilk qarşılaşmada uğursuz nəticə
göstərdi. Belə ki, Alina Qavriş özbəkistanlı
tennisçi Sabina Şaripovaya, Umayra Həşimova isə
Komola Umarovaya məğlub olduqdan sonra görüşün
müqəddəratı həll olundu. Formal xarakter
daşıyan cütlüklərin
yarışında Umayra Həşimova-Züleyxa Səfərova
Komola Umarova-Polina Merenkovaya uduzdular və Özbəkistan
yığması 3:0 hesabı ilə qələbə
qazandı.
Qadın
komandaların digər görüşündə Türkmənistan
millisi Pakistan komandasından güclü oldu - 3:0.
Kişilərdən
ibarət Azərbaycan yığması üçün də
start görüşü uğursuz alınmışdır.
Pakistan millisinə qarşı keçirilmiş ilk oyunda
komandamızın üzvü Rəsul Qocayev Aqil Xana məğlub olmuşdur.
Lakin növbəti qarşılaşmada tennisçimiz Filip
Nikoliç rəqibi Məhəmməd Abidə qalib gəlməklə
hesabı bərabərləşdirmiş və azarkeşlərimizi
ümidləndirmişdi. Təəssüf ki, gərgin
mübarizə şəraitində keçən həlledici
görüşdə Filip Nikoliç-Orxan Manaflı
cütlüyü pakistanlı Aqil Xan-Məhəmməd Abid
cütlüyünə uduzmuşdur. Beləliklə, Pakistan
komandası 2:1 hesablı qələbə əldə
etmişdir.
Digər
görüşlərdə İordaniya komandası Qətər
millisi, Türkmənistan tennisçiləri isə Özbəkistan
yığması ilə qarşılaşmışlar. Hər
iki görüşdə hesab 1:1 olarkən əlverişsiz
hava şəraitinə görə mübarizə təxirə
salınmışdır. Bu komandalar arasında həlledici
qarşılaşmalar bu gün keçiriləcək.
Mayın
13-də, yarışların ikinci günü qadınlardan
ibarət milli komandamız Türkmənistan
yığması, kişi tennisçilərimiz isə Qətər
komandası ilə qarşılaşacaqlar.
Rizvan CƏFƏROV,