Ali Baş Komandan və bayraqdarları

Dənizkənarı Milli Parkda ölkənin göylərdə üzən Baş bayrağının altında dayanmışıq. Elə düşünəcəksiniz ki, bu bayraq sakit dalğalanır, səmalarda səssiz-səmirsiz üzüb gedir. Yanılırsınız. Ağlınıza belə gəlməz ki, bayraq da dil açıb danışa, oxuya bilərmiş. Ancaq bu, doğrudan da belədir. Xəzərin çılğın küləkləri ölkənin Baş bayrağını dalğalandırdıqca onun ayağında duran hər bir kəs küləklərin və bayrağın göylərdən gələn qoşa bəstəsini eşidəcək. Əgər siz də buna cəhd etsəniz, dənizin, şəlalələrin səsi bir-birinə qarışacaq, səmalardan ruhunuza yağan suların pıçıltısını, nəğməyə dönən gur səsini eşidəcəksiniz. Vətən və bayraq haqqında ən gözəl musiqini dinləyirmiş kimi, səmaların səsinə heyran qalacaqsınız.

Ölkədə başa çatan İslamiadaya da elə bu bayrağın altından, ya da onun dalğalandığı ucalıqlardan baxanda elə düşünürsən ki, sanki Oyunlara qatılan 54 dövlətin bayraqlarını əziz qonaq kimi qəbul edib qanadının altına alan, onlara evsahibliyi edən də ölkənin Baş bayrağıdır.

Oyunlar boyu 54 dövlətdən yarışa qatılan qalib idmançıların təmsil etdikləri ölkələrin bayraqlarını göyə qaldıran 100-ə yaxın əsgər, gizir və zabit isə Dövlət Sərhəd Xidmətinin hərbçiləri idi. Yalnız bir neçə kəlmə ilə onu qeyd edək ki, dövlət sərhədlərinin qorunma tarixi əsrlərin dərinliyinə gedib çıxır. Lakin ilk sərhəd postu Azərbaycan hökumətinin qərarı ilə 1918-ci il iyun ayının 22-də Poylu stansiyasında yaradılmışdır. Bu postun ardınca Azərbaycan Respublikasının əksər sərhəd ərazilərində Daxili İşlər Nazirliyinin tabeliyində olan sərhəd mühafizə qüvvələri təşkil edildi. Bu gün ölkəmizin sərhədlərini qoruyan qoşunları isə ulu öndər Heydər Əliyev Milli Təhlükəsizlik Nazirliyinin tabeçiliyindən çıxararaq 2002-ci il 31 iyul tarixli fərmanı ilə Dövlət Sərhəd Xidmətinı yaratdı, yeni quruma mərkəzi icra hakimiyyəti orqanı statusu verdi. İslamiada bayraqdarları da bu xidmətın tabeçeliyindəki hərbi hissələrdən seçilmişlər idi.

Sərhəd Xidmətinin Şüvəlandakı Təlim Mərkəzində bizə danışdılar ki, medal mərasimi üçün bayraqdarları seçmək o qədər də asan olmayıb. Hərbçilərin xarici görkəmlərinə, bioqrafiyasına, sağlamlıqlarına və döyüş qabiliyyətlərinə xüsusi fikir verilib. Bir sözlə, sərhəd xidmətinin müxtəlif hərbi hissələrinin qaymağı yığılıb, məğrurların məğruru, cəsurların cəsuru seçilib. Əsgər, gizir və zabitlərdən ibarət bu tərkib hələ Oyunlardan bir neçə ay əvvəl - təlim mərkəzinə ezam edildikləri gündən ciddi hazırlıqlara start verilib. Onlar qarda, yağışda, qızmar istilərdə belə gözlərini qırpmadan günlərlə pusquda dura bilən, cəsarətlə sərhəd pozucularının qarşısını alan, onlarla hətta əlbəyaxa savaşa cəsarətlə atılmağı bacaran sərhədçilərdir. Nağıllarımızın dili ilə desək, dəyirmanın gözündən diri çıxmağı bacaran qəhrəmanlar. Lakin Təlim Mərkəzində tələblər fərqli, sadə göründükləri qədər də çətin idi. Burada nə pusquya, nə də əlbəyaxa döyüşə ehtiyac vardı, sadəcə, medal mərasimini mükəmməl başlamaq və qüsursuz başa çatdırmaq lazım idi.

Bütün bayraqdarlar 54 ölkənin bayraqlarını gözü yumulu tanımalı, səhv buraxmalı deyildi. Medal mərasimində bayraqların düzgün bükülməsi, açılması, taxılmasında, trapesiyada qaldırıldıqdan sonra yığılmasında səhv buraxmaq olmazdı. Sıra yürüşındə başların düzgün baxılması, çənələrin yuxarı düzgün qalxması, sırada gedərkən yandakı, qarşıdakı bayraqdarla ara məsafələrin santimetrinə qədər dəyişməməsi təmin edilməli idi. “Yerində addımla”, “Addımla marş” və “Yerində dur” komandaları mükəmməl yerinə yetirilməli idi. Bayraqların daşınması zamanı liderin - sırada birinci bayraqdarın digərlərini arxasınca cəsarətlə aparması, bayrağa salam verməsi məşqlərin ən çətini idi. Bayrağı çıxarıb sağa və sola dönərək “Addımla marş” komandası altında iki kolondan birinə keçməyə də alışmaq lazım idi.

Dəstədə olan bütün bayraqdarların düzgün addımlaması, qolların düzgün və sərt fiksasiyası, medal mərasiminin döngələrində, bayraq nöqtəsində düzgün dönmələrə təlimlərdə həftələr, aylarla vaxt sərf edildi. Bu məşqlərin heç birini heç kim görməyib. Lakin idman saraylarındakı, teleekranların qarşısındakı milyarddan yuxarı tamaşaçı Oyunlar zamanı Azərbaycan əsgərinin mükəmməl və cilalanmış simasını gördü. Bayraqdarların qürurlu sıra ilə meydana daxil olmalarını, şəstlə yerimələrini hamı gördü. 6-8 nəfərdən ibarət dəstələr bütün idman zallarında bir nəfər kimi addımlayırdı. Hərbçilərimiz yüz milyonlarla tamaşaçıya virtuoz qənirsiz medal mərasimlərini nümayış etdirdilər! Ayaqlar yerdən eyni vaxtda qalxıb döyüş təbili kimi eyni zamanda yerə zərblə dəyirdi, bütün döngələrdə dönüşlər səlis və qüsursuz olmaqdan savayı gözəl görünürdü. Qollar dümdüz irəli atılır, bircə an göydə donaraq aşağı gedirdilər. Oyunlar boyu sərt təlimlərin sınaqlarından keçən bayraqdarlar heç bir səhv buraxmadılar, gərgin məşqlərə yüksək nəticələrlə yekun vurdular. Ona görə ki, bayraqdarların təlimləri heç də Kreml kursantlarının hazırlıqlarından geri qalmırdı.

Teleekranlarda izlədiyimiz medal mərasimləri bir şou qədər təntənəli görünsə də, yaxşı bilirik ki, düşmən də bunları izlədikcə içi didim-didim didilir, dişi bağırsağını kəsir, müzəffər ordumuzun əzəməti qarşısındakı əbədi acizliyini dərk edirdi. Və qorxusundan müəmmalı himayədarlarının qucağına daha dərin sığınmağa çalışırdı. Aldığımız qızıl medalların şərəfinə 75 dəfə göylərə millənən Azərbaycan bayrağının əzəməti düşməni sıxdı, türk bayrağının 71 uçuşu xoflandırdı, hətta qonşu dost İranın İslam Həmrəyliyi Oyunlarında 26 dəfə göylərə yüksələn bayraqlarına da qısqandılar. Düşmənə bizim kiminləsə dostluğumuz lazım deyil, bizi hamı ilə qarşı-qarşıya qoymaq, yaratdığı çaxnaşmalardan, müharibələrdən xal qazanmaq əsas məqsədləridir.

Amma İslamiadanın Azərbaycanda keçirilməsi Qafqazdan bütün dünyaya edilən barış çağırışı, sülh mesajı idi. Bakıda sülhə qanadlanan bayraqların sayı artdıqca tərəfdaşlarımız çoxalır, sülh məramımız barış rəmzi kimi yaddaşlara həkk edilir. “Yenilməz” qiyafəsində təlxəkliyindən qalmayan düşmən acizliyini anlayır. Mənəvi məğlubiyyətin arxasınca gələn cismani məhvinin qaçılmaz olduğunu dərk edir.

Heydər Əliyevin adını daşıyan idman arenasında bayraqdarların səhnəarxası həyatını bir neçə dəfə izləyə bildik. Şən, sevinc içində idilər, sanki toy-bayram idi. Amma diqqətli idilər, bayraqların yerini əzbər bilir, sehirbaz kimi cəld tərpənirdilər. Biz göydə bayrağın ütülənməsini də gördük. Sərhədçilərdən birinə əlinə aldığı bayraq ütüsüz gələn kimi iki hərbçi hərəsi bir tərəfdən bayrağı dartıb göydə tarıma çəkir, o birisi də ütünü əlinə alıb göyə “sərilən” bayrağı rahatlıqla ütüləyir və medal mərasiminə yola salırdı.

- Sizin üçün bu Oyunlarda yadda qalan və qeyri-adi görünən nələrdir - deyə soruşduq.

- Azərbaycan bayrağını dəfələrlə daşımağımız, hər çıxışımız unudulmaz bir xatirə oldu.

Adını soruşanda isə üzr istəyir ki, deyə bilməyəcək, komandiri indicə gələcək, 4-5 dəqiqə gözləmək lazımdır.

Başqa bir bayraqdar söhbətə qoşuldu:

- Dövlətimizin himni. Valeh olurdum. Heç vaxt onu bu qədər çox dinləməmişdim. Bütün himnlər çalınırdı, amma ən yaddaqalanı Azərbaycan himnini zalın bütünlükdə ayağa durub oxuması idi.

Başqa bir bayraqdar əlavə edir:

- Oyunlar başa çatandan sonra buranı tərk edib geri qayıdacağıq. Şahidi olduğumuz səhnələr isə yaddaşımıza ən əziz xatirə kimi həkk olunacaq. Oyunlarda ən müqəddəs vəzifəni yerinə yetirdik, 40 dövlətin bayrağını qaldırdıq. 14 dövlətin də bayraqlarını hər gün hörmətlə ütüləyib yerindən asdıq. Onlardan qalib gələn olmadı.

Digər hərbçi isə adlarını qeyd edə bilmədiyimizdən keçirdiyimiz narahatlığı başa düşdü və zarafatla gülümsəyib dedi ki, sizə ad çəkəcəyəm:

- Qızım Gülünün 4 yaşı var, bilir ki, bayraqdaram. Evdə hər dəfə televizorda medal mərasimini görən kimi hay-küy salır ki, baba, ata gəlir, baba, bayraqlar gəlir!!!

“Oyunlar iç dünyanızda, daxilinizdə nəyisə dəyişdimi” - sualına hərə bir cümlə ilə cavab verməyə çalışdı:

- Nə dəyişmədi ki? Ağlımıza sığmayan qürur sahibiyik bu gün.

- Göyə ucalan bayraqlar bizə Vətənin ucalıqlarını bəxş etdi. Hər şey möhtəşəm və unudulmaz oldu. Ölkəmizlə, gördüyümüz işlə fəxr edirik.

- Dövlət Sərhəd Xidmətinin rəisi hamımızın valideynlərinə təşəkkür məktubu göndərəcək. Anam oxuyub sevinəcək, kövrələcək.

O biri bayraqdar əlini dostunun çiyninə qoyub gülümsədi:

- Məzuniyyətin var, anana generalımızın məktubundan tez çatacaqsan.

Xaricdən dəvət olunan mütəxəssislərdən biri medal mərasiminin supervayzeri Jayme Alsopdan bayraqdarlarımızı bir hərbçi kimi qiymətləndirməsini, digər ölkələrinki ilə müqayisə etməsini xahiş etdik. Jayme məmnuniyyətlə cavab verdi:

- Şəxsən mən Azərbaycan əsgərinə heyran olduğumu gizlətmirəm. Bayraqdarlar çox sərbəst idilər, bu vacibdir. Medal mərasimindəki bütün hərəkətləri əsgər mətinliyi və zərgər dəqiqliyi ilə icra etdilər. Mən fəaliyyətlərindən zövq aldığım üçün onları alqışlamağı özümə borc bilirəm. Onlarla fəxr etməmək mümkün deyil. Elə peşəkardırlar ki, sanki çiyinlərində bayraqla anadan olublar. Müqayisəyə gəldikdə isə bilirsinizmi, mənim tədbirlərimin hamısında hərbçilər iştirak etmir. Amma bayraqdarları olan tədbirləri də müqayisə etməzdim. Ona görə ki, onlar tez yorulur və ciddi gərginliklər yaradırdılar. Azərbaycan bayraqdarları ilə müqayisədə onlara hərbçi deməyə də dilim gəlmir. İslamiadanın bayraqdarları peşəkar idilər, yorulmaq nədir bilmədilər. Hətta günün sonunda belə, üzlərində təbəssüm gəzirdi.

Sərhəd Xidmətinin rəhbər heyətindən zabitlərdən biri ilə görüşdük, heç olmasa, bir bayraqdarın adını çəkməsini xahiş etdik.

- Bilirsinizmi - dedi - məsuliyyətli bir tapşırığı uğurla başa vurduq. Ad çəkilməsinə gəldikdə isə yüz nəfərə yaxın sərhədçinin hamısının adı çəkilməlidir. Lakin məşqlər və yüksək məsuliyyətlə başa vurduğumuz Oyunlarda hamı bir nəfər idi, bir nəfər də özünü 100 nəfər kimi saya bilirdi. Hamının adı çəkilməlidir, ona görə də birinin adını çəkib, o birisini deməmək mümkün deyil.

Dövlət Sərhəd Xidmətinin rəisi - Sərhəd Qoşunlarının komandanı general-polkovnik Elçin Quliyevin isə fikri belə oldu: “Əlbəttə, vacibdir. Biz dövlət başçısının xüsusi tapşırığını şərəf və ləyaqətlə, qüsursuz yerinə yetirdik. Medal mərasimində iştirak edən hərbçilərimizlə öyünə bilərik. Bayraqdarlarımızın hamısının IV İslam Həmrəyliyi Oyunlarında bir adı vardı. Biz hamımız Ali Baş Komandanın bayraqdarları idik və bu missiyadan şərəf duyduq. Bayraqdarlarımızın adını belə də qeyd edin - Ali Baş Komandanın bayraqdarları”.

Bahadur İMANQULİYEV,

Azərbaycan.- 2017.-28 may.- S.5.