Turistlərin Azərbaycana marağı artıb

Dünyanın 139 ölkəsindən 1,2 milyondan çox əcnəbi ölkəmizə səfər edib

Əsrarəngiz təbiətli vətənimiz tarix boyu əcnəbi səyyahların diqqətini cəlb edib. İlk səyahətlər isə əsasən ticarət, dini, siyasi məqsəd daşıyıb. Qədim Azərbaycan ərazisindən keçən ticarət karvanlarının hərəkətini ilk səyahətlər hesab etmək olar. Bu da əslində, turizmin “rüşeyimləri” hesab edilir.

Bu ilin arxada qalan dövründə dünyanın 139 ölkəsindən bir milyon 203 min 700 nəfər əcnəbi və vətəndaşlığı olmayan şəxsin Azərbaycana gəlməsinin əsas səbəbləri də məhz bu yerlərin özəllikləri, qədim tarixə malik maddi-mədəniyyət abidələri ilə zənginliyi, xalqımızın qonaqpərvərliyi, eləcə də burada son illər bir-birinin ardınca yüksək səviyyədə keçirilən beynəlxalq idman və mədəniyyət tədbirləridir. Ölkəmizə gələnlərin sayı ötən ilin eyni dövrü ilə müqayisədə 24,5 faiz çoxdur. Körfəz ölkələrindən gələnlərin daha çox olması isə heç də təsadüfi deyil. Bu ölkələrdən ümumilikdə Azərbaycana 263,5 min nəfər turist səfər edib. Onların arasında Küveyt vətəndaşlarının sayı 8,7 dəfə artıb. Paytaxt Bakının gəzməli-görməli yerləri ilə yanaşı, turizm sənayesinin inkişaf etdiyi digər şəhərlərimizə də üz tutan küveytli turistlər ölkəmizi ən yaxşı səyahət fürsətləri olan məkan kimi dəyərləndirir.

İşgüzar turizm bazarının liderlərini müəyyən edən Rusiyanın “Aeroklub” şirkətlər qrupu Azərbaycanı rusiyalıların yaxın xarici ölkələr arasında biznes məqsədilə ən çox səfər etdiyi 5 ölkə siyahısına daxil edib. Bu il rusiyalılar biznes əlaqələri ilə bağlı səfərlər üçün Qazaxıstan, Özbəkistan, Gürcüstan, Belarus və Azərbaycanı seçiblər. Maraqlıdır ki, son bir neçə il ərzində Gürcüstan ilk dəfə olaraq lider üçlüyə daxil olub. Rusiyadan bu ölkəyə biznes-uçuşların sayı 2,5 dəfə artıb. Ukrayna siyahıda 6-cı mövqeyə enib. İki ölkə arasında birbaşa aviauçuşlar ləğv edildiyindən, Rusiya iş adamlarının 70 faizi Belarusdan, 17 faizi Azərbaycandan, 4 faizi Latviyadan tranzit yolla Ukraynaya gedir.

Azərbaycan Turizm və Menecment Universitetinin rektorunun səlahiyyətlərini icra edən Eldar Aslanov bizimlə söhbətində bildirdi ki, zaman keçdikcə bu sahədə də günün tələbləri ilə səsləşən xidmət mədəniyyəti özünü göstərməyə başladı. XXI əsrin başlanğıcında Bakı, Gəncə, Naxçıvan və ölkənin digər şəhərlərində xarici qonaqları qəbul edə bilən müasir mehmanxana və hotellər fəaliyyət göstərdi: “Respublikamızın əksər bölgələrini əhatə edən 100-dən artıq turizm firması xarici turistlərin qəbulu və xidməti ilə məşğul oldu, 149 mehmanxana rəsmi qeydiyyatdan keçdi ki, orada yerlərin ümumi sayı 5000-dən artıqdır.

Turizm üçün əlverişli regionlarda müasir səviyyəli özəl müalicə və istirahət mərkəzləri istifadəyə verilib. Daha diqqətçəkən faktlardan biri də odur ki, artıq respublikamıza gələn xarici qonaqların sayı bir milyondan artıqdır”.

Dövlət müstəqilliyinin bərpasından sonra turizmin inkişaf tendensiyası ölkənin ali qanunvericilik aktlarında öz əksini tapıb. 1999-cu ildə Milli Məclisdə “Turizm haqqında” qanun qəbul edilib. 27 iyul 1999-cu il tarixində ulu öndər Heydər Əliyev “Turizm haqqında” Azərbaycan Respublikası Qanununun tətbiq edilməsi haqqında” fərman imzalayıb.

Həmsöbətimiz onu da vurğuladı ki, “2009-2018-ci illərdə Azərbaycan Respublikasında kurortların inkişafı üzrə Dövlət Proqramı” ölkəmizdə yaxın gələcəkdə turizm-kurort sahələrinin planlı surətdə inkişaf etdirilməsinə və səmərəli istifadəsinə zəmin yaratdı: “Zəngin tariximiz, mədəni və təbii irs dünyanın hər yerindən qonaqları ölkəmizə cəlb edir. “Vəhşi təbiət”- fauna və flora, mineral su qaynaqları, dünyada yeganə müalicə nefti olan naftalan, nadir qədim memarlıq abidələri, özünəməxsus mədəniyyət, milli mətbəx və bir çox digər amillər Azərbaycanda turizmin bütün növlərinin: işgüzar, idman, müalicəvi, tanışlıq, ovçuluq, ekzotik, çimərlik və hətta qastronomik turizmin inkişafı üçün şərait yaradır.

2016-cı ilin yekunlarına görə, il ərzində Azərbaycan ərazisində fəaliyyət göstərən turizm müəssisələrinin sayı 544, mehmanxanaların sayı 536, yerləşdirmə vasitələrində yerlərin ümumi sayı isə 38 min olub. Ötən il eyni zamanda, ölkəmizdə 35 mehmanxana tikilib, 25-i isə tikilməkdədir. Turizm və aidiyyəti sahələr üzrə çalışanların sayı 49 min nəfərə çatıb. Turizm üçün əlverişli regionlarda müasir səviyyəli özəl müalicə və istirahət mərkəzləri istifadəyə verilib. Daha diqqətçəkən faktlardan biri də odur ki, keçən ilin eyni dövrü ilə müqayisədə ölkəyə gələn turistlərin sayında 25 faiz artım müşahidə edilib”.

Azərbaycanda turizm sahəsinin iqtisadiyyatın gəlir gətirən ən mühüm sahələrindən birinə çevriləcəyi artıq şübhə doğurmur. Regionlarda fəaliyyət göstərən Qafqaz mehmanxanalar şəbəkəsi, Qəbələdəki Gabaland attraksionlar parkı, Qusardakı “Şahdağ” qış-yay turist kompleksi həm idmanla məşğul olmaq, həm də turistləri qəbul etmək üçün müvafiq infrastruktura malikdir. 15-dən çox olimpiya idman kompleksini də bura əlavə etsək, daha real mənzərə yarada bilərik. Çünki həmin komplekslərdə də mehmanxanalar, istirahət zonaları, əyləncə və idman mərkəzləri fəaliyyət göstərir. Bütün bunlar, təbii ki, turizmin dövlət siyasətinin prioritetlərindən birinə çevrilməsi, eyni zamanda, ölkənin iqtisadi inkişafı üçün də böyük perspektiv deməkdir.

Azərbaycan Respublikasının Nazirlər Kabinetinin 29 iyun 2015-ci il tarixli qərarı ilə “Turistlərə elektron viza almaq hüququnu əldə etmək üçün Azərbaycan Respublikasında fəaliyyət göstərən turizm şirkətlərinin akkreditasiyadan keçməsi Qaydası”na uyğun olaraq, 50-yə yaxın turist şirkəti qeydiyyatdan keçib.

Azərbaycanın turizm potensialının Almaniyanın eyni sahənin bazarında təbliğ və təşviq edilməsi məqsədilə Mədəniyyət və Turizm Nazirliyi ilə “Aviareps Tourism” şirkəti arasında əməkdaşlıq uğurla davam etdirilir. Azərbaycan Konqreslər Bürosunun 4-cü hesabat iclasında mədəniyyət və turizm naziri Əbülfəs Qarayev bildirdi ki, ölkəmizdə işgüzar turizmin inkişaf etdirilməsi, respublikamızın beynəlxalq tədbirlər məkanı kimi tanıdılması istiqamətində atılan addımlar mühüm əhəmiyyət daşıyır: “Azərbaycanın turizm sənayesində müsbət meyillərlə yanaşı, son zamanlar regionda baş verən proseslər fonunda müəyyən təsirlər də özünü göstərir: Azərbaycan elə bir regionda yerləşir ki, bölgədə baş verən hər hansı müsbət və ya mənfi hadisə öz təsirini bütün sahələrdə hiss etdirir, o cümlədən turizm sahəsində. Bu baxımdan turizm sənayesi, xüsusilə Azərbaycan Konqreslər Bürosu bu məsələlərə günün reallıqları baxımından yanaşmalı, yeni şəraitə və şərtlərə uyğun fəaliyyətini qurmalıdır”.

Nazir diqqətə çatdırdı ki, Azərbaycanın turizm üçün əsas müştəri bazarı qonşu Rusiya və qardaş Türkiyədən formalaşmalıdır və biz bu bazarlarda kifayət qədər fəal təmsil olunmalıyıq: “Yay və dəniz turizmi baxımından Türkiyənin təkliflərini əvəzləyə bilməsək də, mədəni turizm, regionların turizmi, xüsusilə Qusar, Qəbələ və digər bölgələrdə yerləşən turizm komplekslərinin potensialı dəyərləndirilməlidir. Çünki Azərbaycanın bu baxımdan kifayət qədər imkanları var”.

İslam Əməkdaşlıq Təşkilatının dəstəyi ilə Birləşmiş Ərəb Əmirliklərinin təşkilatçılığı ilə keçirilən “Turizm səyahət bazarı: ailəvi turizmin təbliğatı” adlı beynəlxalq sərgidə də Mədəniyyət və Turizm Nazirliyi ölkəmizi təmsil edib. Həmçinin Almaniyanın ölkəmizdəki səfiri xanım Heindrun Tempelin Azərbaycan Turizm və Menecment Universiteti ilə tanışlığı zamanı turizmin müasir vəziyyəti, inkişaf istiqamətləri, problemləri, eyni zamanda, nəzərdə tutulan ikitərəfli əməkdaşlıq əlaqələrinin perspektivləri müzakirə edilib ki, bu da adı çəkilən sahənin inkişafı və təbliğində mühüm amillərdən sayılır. Ötən ilin yanvar ayından Almaniyanın 200 turoperatoru üçün onlayn seminarlarının keçirilməsi də ölkəmizin turizm potensialından daha səmərəli istifadədə, onun şəbəkələrinin genişləndirilməsində mühüm amil hesab edilir. Çünki turizm yalnız iqtisadi inkişaf baxımdan deyil, eyni zamanda, xalqımızın milli-mənəvi dəyərlərinin təbliğində də mühüm vasitələrdən biri kimi diqqət mərkəzindədir.

Məhəmməd NƏRİMANOĞLU

Azərbaycan.- 2017.- 7 sentyabr.- S.7.