“Tariximizin qəhrəmanlıq salnaməsi” mövzusunda rəsm sərgisi açılıb

Naxçıvan Muxtar Respublikası Rəssamlar Birliyinin Bəhruz Kəngərli adına sərgi salonunda 20 Yanvar faciəsinin 27-ci ildönümü ilə əlaqədar olaraq muxtar respublikada fəaliyyət göstərən rəssamların əsərlərindən ibarət “Tariximizin qəhrəmanlıq salnaməsi” mövzusunda rəsm sərgisi açılıb.

AZƏRTAC xəbər verir ki, tədbirdə Naxçıvan Muxtar Respublikası Rəssamlar Birliyinin sədri, Azərbaycan Respublikasının Əməkdar Rəssamı Ülviyyə Həmzəyeva çıxış edərək 20 Yanvar faciəsini xalqımızın qürur tarixi, qəhrəmanlıq salnaməsi kimi tarixə düşdüyünü deyib.

Ülviyyə Həmzəyeva bildirib ki, 1990-cı il yanvarın 19-dan 20-nə keçən gecə sovet imperiyasının ordusu Bakıya daxil olaraq dinc əhaliyə, əliyalın insanlara qarşı ağlasığmaz vəhşiliklər törədib. Bu tarix Azərbaycan xalqının yaddaşına müstəqilliyin qazanılması uğrunda mübarizənin zirvəsi kimi əbədi həkk olunub.

Tədbirdə Azərbaycan Rəssamlar İttifaqının üzvü, Naxçıvan Muxtar Respublikasının Əməkdar Rəssamı Həmzə Sadiqovun və Naxçıvan Muxtar Respublikası Rəssamlar Birliyinin üzvü Eldar Zeynalovun çıxışları olub. Qeyd edilib ki, 1990-cı il yanvarın 20-də sovet rəhbərliyi Azərbaycan xalqına qarşı qanlı cinayət törədib. Həmin hadisələrə məhz Azərbaycan xalqının ümummilli lideri Heydər Əliyevin təşəbbüsü ilə ilk dəfə siyasi-hüquqi qiymət verilib və sovet rəhbərliyinə qarşı açıq etiraz bildirilib.

Vurğulanıb ki, rəssamlarımız əsərlərində daim bu mövzuya müraciət edir, xalqımızın qəhrəmanlıqlarla zəngin mübarizə tarixini əsərlərində canlandırırlar.

Sonra məktəblilər Emil Kazımlı və Gülsüm Vəlisoy şəhidlərimizə həsr olunan şeirlər səsləndiriblər.

Daha sonra sərgiyə baxış olub.

İsmayıl İsmayıllının “Şəhidlərimiz”, Eldar Bayramovun “20 Yanvar gecəsi”, Həbibə Allahverdiyevanın “Azadlıq”, Səyyad Bayramovun “Şəhid ömrü” və digər rəsm əsərləri sərgi iştirakçıları tərəfindən maraqla qarşılanıb.

Sərgidə 32 rəssamın 40-a yaxın rəsm əsəri nümayiş etdirilib.

Azərbaycan.- 2017.- 13 yanvar.- S.7.