Pakistanın “Election Times” qəzeti: “Qara Yanvar: Şəhidlik Günü”

Pakistanın “Election Times” qəzetində “Qara Yanvar: Şəhidlik Günü” adlı məqalə dərc edilib.

Məqalənin müəllifi 20 Yanvar hadisələrinin region üçün ciddi geosiyasi, sosial-iqtisadi önəminin olduğunu və SSRİ-nin süqutunu tezləşdirdiyini qeyd edir. Dinc əhalinin atəşə tutulduğu, tankların qabağına çıxan hər şeyi əzib keçdiyi bildirilir. Bu qanlı və dəhşətli hadisə nəticəsində aralarında qadın və uşaqların, həmçinin digər millətlərin də nümayəndələrinin olduğu, 140-dan çox insanın qətlə yetirildiyi, 700-dən artıq insanın yaralandığı vurğulanır.

Məqalədə Sovet İttifaqının son dövrlərində Ermənistanda və Azərbaycanın Dağlıq Qarabağ bölgəsində ermənilər tərəfindən azərbaycanlılara qarşı iğtişaşların törədildiyi və yüz minlərlə insanın öz doğma yurdlarını tərk etmək məcburiyyətində qaldığı, keçmiş SSRİ-nin rəhbəri Mixail Qorbaçov rejiminin isə buna qarşı heç bir tədbir görmədiyi və nəticədə Azərbaycan əhalisinin müxtəlif şəhərlərdə etiraz aksiyalarına başladığı qeyd olunur.

Yazıda 20 Yanvar tarixinin həm dəhşətli cinayət, eyni zamanda, qəhrəmanlıq günü, insanların müstəqillik uğrunda etdikləri fədakarlıqlarla xatırlandığı nəzərə çatdırılır. Azərbaycanın müstəqillik əldə etməsində 20 Yanvar şəhidlərinin müstəsna rolunun olduğu vurğulanır. Həmçinin Qara Yanvarın azərbaycanlılar üçün unudulmaz gün olduğu, hər il yüz minlərlə insanın Şəhidlər xiyabanını ziyarət etdiyi bildirilir.

Müəllif ümummilli lider Heydər Əliyevin baş vermiş hadisələrə Moskvada öz qəti etirazını bildirdiyini və Azərbaycan xalqının azadlıq hərəkatının liderinə çevrildiyini vurğulayır. Eyni zamanda, 20 Yanvar hadisələrinin Sovet İttifaqının süqutunu sürətləndirdiyi, müstəqillik hərəkatını gücləndirdiyi nəzərə çatdırılır.

Məqalədə qanlı hadisələrdən sonra on minlərlə kişi və qadın, müsəlman, xristian və yəhudinin həmin gecənin qurbanlarını dəfn etmək üçün küçələrə çıxdığı və bundan sonra Azərbaycanda 40 günlük matəm elan olunduğu diqqətə çatdırılır.

Müəllif 20 Yanvar hadisələrinin Azərbaycan tarixində dönüş nöqtəsi olduğunu bildirir, təzyiqlərə və çətinliklərə baxmayaraq Azərbaycan xalqının əzmlə mübarizə apardığını və nəticədə 1991-ci ildə öz müstəqilliyinə qovuşduğunu vurğulayır.

Onu da qeyd edək ki, 20 Yanvar mövzusuna Pakistanın digər KİV-ləri də yer verib. Faciə ilə bağlı “Lead Pakistan”, “Pakistan in the World” qəzet və saytlarında müxtəlif məqalələr dərc edilib.

AZƏRTAC

Azərbaycan.- 2017.- 20 yanvar.- S. 7.