Macar jurnalisti “Qara Yanvarı” necə işıqlandırmışdı?

Peter Dunai müasir macar jurnalistikasının tanınmış simalarından biridir. Yaşı yetmişi keçsə də, yaradıcı fəaliyyətini davam etdirir. Siyasi-hərbi icmallar hazırlayan analitik mərkəzin rəhbəridir. Rusiyada, eləcə də digər keçmiş sovet respublikalarında cərəyan edən proseslərlə yaxından maraqlanır. Cənubi Qafqaz və Mərkəzi Asiya bu maraq dairəsinin fokusunda dayanır. SSRİ-nin süqutu ərəfəsində aparıcı macar qəzetinin - “Nepsabadşaq”ın Moskva müxbiri vəzifəsində çalışması onun hazırlıqlı və obyektiv bir “sovetoloq” kimi yetişməsinə təsirsiz ötüşməyib.

Cənab Dunai ilə bir neçə ildir ki, əməkdaşlıq edirik. Hələlik maliyyə çətinliyi üzündən nəşrinə nail ola bilmədiyimiz “Budapeşt, 1956 - Bakı, 1990: Sovet imperiyası. Sonun başlanğıcı və başlanğıcın sonu” adlı maraqlı sənədlər məcmuəsi tərtib etmişik. Xalqımız üçün faciə və qəhrəmanlıqla dolu 1990-cı ilin yanvar günlərində Peter Dunai aparıcı macar qəzetinin xüsusi müxbiri kimi Moskvada çalışıb. Sovet bürokratiyasının yaratdığı maneələr ucbatından dramatik hadisələrin yaşandığı Bakıya gələ bilməsə də, cərəyan edən prosesləri, ordunun xalqa qarşı törətdiyi cinayətləri obyektivliklə işıqlandırmağa çalışıb.

20 Yanvar faciəsinin növbəti ildönümü ərəfəsində Peter Dunai ilə görüşüb 1990-cı ilin yanvarında Moskvadan “Nepsabadşaq” qəzetinə göndərdiyi məqalə və müxbir məktublarını nəzərdən keçirməyi, qələmə aldığı yazıların məzmununu, habelə bizim hər birimiz üçün son dərəcə məsul, həyəcanlı olan həmin günlərdən yaddaşında qalanları həmvətənlərimizlə bölüşməyi xahiş etdim. Nəticədə “Azərbaycan” qəzetinin oxucularına çatdırmaq istədiyim yazı ərsəyə gəldi.

Vilayət QULİYEV,

Azərbaycan Respublikasının Macarıstandakı səfiri

Azərbaycan.- 2017.- 20 yanvar.- S. 5.