“Heydər Əliyev: multikulturalizm və tolerantlıq ideologiyası”

Azərbaycan Dillər Universitetində I Beynəlxalq elmi konfrans işinə başlayıb

Aprelin 9-da Azərbaycan Dillər Universitetinin (ADU) Yeni Azərbaycan Partiyası (YAP) və Bakı Beynəlxalq Multikulturalizm Mərkəzinin (BBMM) dəstəyi ilə təşkil etdiyi ümummilli lider Heydər Əliyevin anadan olmasının 95 illiyinə həsr olunmuş “Heydər Əliyev: multikulturalizm və tolerantlıq ideologiyası” mövzusunda I Beynəlxalq elmi konfransın açılış mərasimi keçirilib.

Azərbaycanda multikulturalizm və tolerantlıq ideologiyasının dövlət siyasəti səviyyəsinə yüksəldiyini bildirən ADU-nun rektoru akademik K.Abdulla respublikada bu sahədə görülən işlərdən danışıb. Rektor qeyd edib ki, ADU-nun tarixində ilk dəfə gerçəkləşən belə bir mötəbər konfransın məqsədi ümummilli lider Heydər Əliyevin multikulturalizm sahəsində gördüyü işlərin təbliğ edilməsidir.

K.Abdulla 9 aprel - 5 may tarixlərini əhatə edəcək konfransın plenar və yekun iclaslarının Azərbaycan Dillər Universitetində, bölmə iclaslarının isə müxtəlif ölkələrin müvafiq qabaqcıl universitetlərinin bazalarında keçiriləcəyini diqqətə çatdırıb. Bölmələr Rusiyanın Boris Yeltsin adına Ural Federal Universiteti, Moskva Dövlət Linqvistika Universiteti, Moskva Şəhər Pedaqoji Universitetinin Samara filialı, A.S.Puşkin adına Dövlət Rus Dili İnstitutunda, Ukraynanın Kiyev Milli Linqvistika Universiteti, Türkiyənin Ərzurum və Ərciyəs universitetləri, İtaliyanın Kassino Cənubi Latsio Universiteti, (Sülh və Təhlükəsizlik Fondu, Üçüncü Roma Universiteti, Genuya Universiteti, Link Kampus Universiteti, Nim Universiteti (Fransa), Beynəlxalq Menecment Universiteti (Moldova) iştirakı ilə), Gürcüstanın Tbilisi Dövlət Universiteti (Batumi, Kutaisi, Qori, Telavi universitetləri, Gürcüstan EA müvafiq institutları və “Bilik” cəmiyyətinin iştirakı ilə), Çin Xalq Respublikasının Xucjou Universiteti, Belarusun Minsk Dövlət Linqvistik Universiteti, Serbiyanın Belqrad Universiteti və Almaniyanın Ausburq Universitetində keçiriləcək.

Adıkeçən xarici universitetlərlə danışıqlar aparıldığını və birgə fəaliyyət proqramının hazırlandığını söyləyən rektor vurğulayıb ki, hər bölmədə Azərbaycan alimlərinin və Bakıda yekun plenar iclasda xarici universitet rektorlarının, nümayəndələrinin iştirakı nəzərdə tutulub. Rektorun sözlərinə görə, bu proyekt öz unikallığı ilə həm universitetlərarası münasibətlərin formalaşmasına, həm ulu öndərin ideyalarının Avropa və Asiyada bir daha yayılmasına, həm də azərbaycançılıq ideologiyasının yeni formatda inkişafına təkan verəcək.

Mərasimdə çıxış edən Azərbaycan Respublikası Prezidenti Administrasiyasının Millətlərarası münasibətlər, multikulturalizm və dini məsələlər şöbəsinin müdiri Etibar Nəcəfov, Dini Qurumlarla İş üzrə Dövlət komitəsinin sədri Mübariz Qurbanlı, AMEA-nın vitse-prezidenti, Milli Məclisin Elm və təhsil komitəsinin sədri, akademik İsa Həbibbəyli, təhsil nazirinin müavini Firudin Qurbanov, Bakı Beynəlxalq Multikulturalizm Mərkəzinin icraçı direktor əvəzi Rəvan Həsənov, Nəsimi Rayon İcra Hakimiyyətinin başçısı Asif Əsgərov, Hindistanın Azərbaycandakı fövqəladə və səlahiyyətli səfiri Sancay Rana Azərbaycanın multikulturalizm və tolerantlıq dəyərləri, ümummilli lider Heydər Əliyevin Azərbaycan xalqının digər millətlərlə birgə yaşayışının təmin edilməsi, millətlərarası münasibətlərin tənzimlənməsi yönündə oynadığı vacib rolundan söz açıblar. Konfransın bu dəyərlərin genişmiqyaslı vüsət alması istiqamətində mühüm əhəmiyyətə malik olduğunu qeyd edən qonaqlar konfrans haqqında dəyərli fikirlərini bölüşüb və uğurlar arzulayıblar.

Konfransın bölmə iclaslarının keçiriləcəyi universitetlərin rəhbərlərinin yazılı təbrikləri də qonaqların diqqətinə çatdırılıb.

Sonda ümummilli liderin həyat və fəaliyyətindən bəhs edən videoçarx nümayiş olunub.

Rəşad BAXŞƏLİYEV

Azərbaycan.- 2018.- 10 aprel.- S.7.