“Formula-1” həyəcanı başlayır

Pilotlar yarışa, bolidlər trekə hazırdır

Bu gün paytaxtımız daha bir möhtəşəm idman tədbirinə - “Formula-1” Azərbaycan Qran-prisinə evsahibliyi edir.

Sayca 3-cü dəfə paytaxtımızda təşkil olunacaq yarışda sürətsevərlər planetin ən güclü 20 pilotunun əzmkar mübarizəsinin şahidi olacaqlar. Yarışın keçiriləcəyi Bakı Şəhər Halqası bəzi özəlliyinə görə digər “Formula-1” treklərindən seçilir.

Şəhərin müasirliyi ilə tarixiliyini özündə birləşdirən Bakı Şəhər Halqası şəhər trekidir və digərləri ilə müqayisədə burada maksimal sürətin qeydə alınacağı gözlənilir. Pilotların yarışacağı avtomobillər - bolidlər də tam hazır vəziyyətdədir. Pilotların yarışacaqları trekdən qalib ayrılmaq üçün bütün güclərini səfərbər edəcəkləri şübhəsizdir.

Bu gün trasla tanışlıq olacaq

Digər qran-prilərdə olduğu kimi, paytaxtımızda yarışacaq komandalar da reqlamentə əsasən, bu gün hər biri 1,5 saat davam edəcək iki sərbəst yürüşdə trasla tanış olacaq, maşınları yarışa hazır vəziyyətə gətirəcəklər.

Şənbə günü səhər sürücülər bir saatlıq məşq keçəcəklər. Adətən, nahardan sonra sıralanma turu və təsnifat mərhələsi təşkil olunur. Bu turun yekun nəticəsinə görə, sürücülərin bazar günü keçiriləcək yarışda start düzümü formalaşır.

Azərbaycan Qran-prisinin əsas yarış günü

Aprelin 29-da Azərbaycan Qran-prisinin yarış günüdür. Sürücülər bir gün əvvəlki sıralanma turunun nəticələrinə görə startda yerlərini tuturlar.

Əvvəlcə sürücülər trasda bir dövrə vuraraq təkərləri və əyləcləri qızdırırlar, dövrənin tamamında isə yenidən start yerlərini tuturlar. Yarışın direktoru Çarli Uaytinqin xüsusi işarəsindən, yəni, 5 qırmızı işığın sönməsindən sonra yarış başlayır. Dövrənin uzunluğundan asılı olaraq sürücülər müxtəlif traslarda müxtəlif sayda dövrələr vururlar.

Daniel Rikkardo qalib ayrıldığı Bakıya qələbə ilə qayıdır

“Formula-1”də yeni mövsüm Avstraliya Qran-prisi ilə start götürüb. 2018-ci il mövsümünə isə noyabr ayında Əbu Dabidə yekun vurulacaq. Bakıdan əvvəl Çində keçirilən “Formula-1” üzrə dünya çempionatının 3-cü mərhələsinin təfsilatı ilə tanış olaq.

“Formula-1” üzrə dünya çempionatının aprelin 13-15-də keçirilən 3-cü yarışında - Çin Qran-prisində “Red Bull Racing”in pilotu Daniel Rikkardo qalib olub. Pilotlar Şanxayda 5451 metrlik trasda 56 dövrə vurublar.

Daniel Rikkardo 1 saat 35 dəqiqə 36,38 saniyəlik nəticə ilə aktivinə 25 xal yazdırıb. Liderdən 8,894 saniyə geri qalan Valtteri Bottas (“Mercedes”) yarışı 18 xalla ikinci pillədə yekunlaşdırıb. İlk üçlüyü liderdən 9,637 saniyə sonra finişə çatan Kimi Raykonen (“Ferrari”, 15 xal) tamamlayıb.

Xatırladaq ki, ötən il Bakıda keçirilən Azərbaycan Qran-prisinin də qalibi Daniel Rikkardo olmuşdu. Yəni, Rikkardo sonuncu dəfə qalib ayrıldığı Azərbaycana qalibiyyətlə qayıdıb.

Pilotların yarış cədvəlinə 54 xalla Sebastian Fettel başçılıq edir. Luis Hamilton 45 xalla ikinci, Valtteri Bottas 40 xalla üçüncü pillədə qərarlaşıblar.

Konstruktorlar kubokunda isə “Mercedes” 85 xalla birinci, “Ferrari” 84 xalla ikinci, “Red Bull Racing” isə 55 xalla üçüncü pillədə yer alıb.

Təkcə Cənubi Qafqazın deyil, Avropanın tolerantlıq, sülh və inkişaf mərkəzlərindən biri kimi tanınan Azərbaycan “Formula-1” ilə uğur estafetini növbəti dəfə davam etdirəcək. Ölkəmizin bu mötəbər idman tədbirini yüksək səviyyədə keçirmək iddiası ilə imkanlarının üst-üstə düşdüyünü isə xüsusi vurğulamağa ehtiyac yoxdur. Bu gün start götürəcək möhtəşəm idman tədbirində bütün dünya bunun bir daha əyani şahidi olacaq.

“Ferrari” zirvədədir

Dünyanın bir nömrəli avtomobil yarışı 1950-ci ildən təşkil edilir və bu müddətdə 7 dəfə dünya çempionu olan almaniyalı Mixael Şumaxer ən yaxşı göstəriciyə malikdir. Bu göstəricidə argentinalı Xuan Manuel Fanxio 2-ci (5 dəfə), fransalı Alen Prost və almaniyalı Sebastyan Fettel 3-cüdür (hərəyə 4 dəfə). Komandalarda isə “Ferrari” zirvədə qərarlaşıb. 16 dəfə çempion adını qazanan komanda, hələ ki, rəqibləri üçün əlçatmazdır.

Elçin CƏFƏROV

Azərbaycan.- 2018.- 27 aprel.- S.1; 8.