Yaxşı işləyən yaxşı da yaşayacaqdır

Bunu dərk edən ağdaşlılar halal zəhmət sayəsində sosial problemlərinin həllinə nail olurlar

Bu gün Ağdaş pambığı, çəltiyi və müxtəlif növ tərəvəzləri ilə yanaşı, dadına-tamına görə seçilən fərqli meyvələri ilə də məşhurdur. Ağdaş Rayon Kənd Təsərrüfatı İdarəsinin rəisi Elsevər Baxışovun sözlərinə görə, hazırda bu məkanda aqrar sektorun sözün əsl mənasında, çağlayan dövrüdür. Ənənəvi sahələrdən olan baramaçılıqda uğurlar göz önündədir. Taxıl biçini də yekunlaşıb. Hazırda iş gedən əsas sahələr çəltik, pambıq və bağçılıqdır.

Rayon ərazisində 3 min hektara yaxın meyvə bağları var. Bundan 2 min 500 hektarı bar verən bağlardır. Qalan bağların da gələcəkdə bara düşəsi gözlənilir. Son illər yeni salınan bağlar isə təxminən 65 hektardır.

İqlim şəraitinə uyğun olaraq burada alma, armud, nar, göycə alçası yetişdirilir. Bundan əlavə, Ağdaşda daxili bazar təmin olunduqdan sonra qalan meyvələri fermerlər xarici bazarlara çıxarırlar. Bunların arasında xurma, nar, heyva xüsusi çəkiyə malikdir.

Meyvə bağlarının becərilməsinə fermerlər xüsusi qayğı ilə yanaşırlar. Onların hər biri fəaliyyətlərində “bağa baxarsan bağ olar, baxmazsan dağ olar” prinsipini əsas götürür. Aqrotexniki qaydalara əməl olunmaqla lazımi gübrələrdən qaydasında istifadə olunur. Çiçəklərin dərmanlanması, zərərvericilərə qarşı mübarizə tədbirləri yüksək səviyyədə aparılır. Bu tədbirlərin görülməsində dövlət qurumları da köməklərini göstərirlər.

Rayonda bağçılıqla məşğul olan fermerlərin sayı təxminən iki yüz nəfərə yaxındır. Bunlar təxminən 3, 5 və daha çox hektarda məhsul becərən insanlardır. Əlavə olaraq həyətyanı sahələrində analoji fəaliyyətlə məşğul olanlar daha çoxdur.

Fermer Elbrus Cəbrayılovun Gürcüva kəndi ərazisindəki bağ sahəsində olduq. Burada ciddi iş gedirdi. Meyvə ağaclarının bol bəhrəli budaqları yetişmə dövründə sınıb yerə düşməsin deyə, qabaqlayıcı tədbirlər görülür.

Müsahibimizin dediyinə görə, o, Kənd Təsərrüfatı Texnikumunu bitirib və meliorator ixtisasına yiyələnib. Lakin həmin sahədə çalışmayıb. Əsasən, ticarətlə məşğul olub. Sonradan torpaq onu çəkib. Beləliklə də bağçılıqla məşğul olmağı qarşısına məqsəd qoyub. Başlıca istəyi geniş ərazi əldə edərək özünün nəyə qadir olmasını isbatlamaq idi. Göstərilən səylər özünü doğruldub. Nəticədə, Gürcüva və Maşad kəndlərində olmaqla, ümumilikdə, 13 hektara yaxın bağ sahəsi alıb. Bunun da 5 hektarında əkilmiş meyvələr bir neçə ildir bara düşüb və sahibini sevindirib. Əlavə olaraq 5 hektarda da yeni bağ salıb. Təsərrüfatda əsas üstünlük xurmaya verilib. Bununla belə, sahədə müəyyən həcmdə gilas, göycə alçası və digər meyvələr də əkilib.

Ümumilikdə isə fermerin dediyinə görə, bağ bara düşəndən üzü bu yana məhsulun satışında ciddi problem yaşanmayıb. Bu il də hiss olunan odur ki, sahədə yaxşı məhsul var. Bir ağacdan təxminən 80-100 kiloqram məhsul götürmək mümkündür. Sadəcə olaraq, hələlik məhsulu behləyib mövsümündə alası müştərilərdən xəbər yoxdur. Amma fermer çox da qayğılanmır. İnanır ki, məhsul əldə qalmayacaq. Ən azından çətin vəziyyətdə o, dövlət dəstəyindən bəhrələnəcəyinə inanır.

Fermer meyvəçiliklə yanaşı, heyvandarlıqla da məşğuldur. 20 baş damazlıq inəyi var. Heyvanlar yerli cinslərdən olsa da, süni mayalanma yolu ilə onların cins tərkibini daha da yaxşılaşdırmağı qərara alıb.

Göründüyü kimi, Ağdaşın zəhmət adamları təsərrüfatın fərqli sahələrində çalışaraq normal güzəranlarını qurmaq şansı qazanırlar. İqlim şəraitinin əlverişsiz, torpağın münbitliyinin az olmasına baxmayaraq, buradakı uğurları görərkən düşünürsən ki, Ağdaş zəhmətkeşlərindən öyrəniləsi çox şey var.

Əli SƏLİMOV

Azərbaycan.- 2018.- 7 avqust.- S.4.