Azərbaycan-Türkiyə iqtisadi əlaqələrinin təməlində
uğurlu enerji layihələri
dayanır
Azərbaycan-Türkiyə
iqtisadi əməkdaşlığının
və tərəfdaşlığının təməlində
uğurla gerçəkləşən enerji və nəqliyyat layihələri
dayanır.
Əvvəlcə,
Heydər Əliyev adına Bakı-Tbilisi-Ceyhan əsas ixrac neft kəməri, daha sonra “Şahdəniz”
qazını Türkiyəyə çatdıran Bakı-Tbilisi-Ərzurum
xətti bu iki ölkəni
bir-birinə daha sıx tellərlə
bağlayıb. Bu gün
də nəhəng layihələr icra
edilməkdədir. Bakı-Tbilisi-Qars dəmir yolu
artıq istifadəyə verilib.
TANAP-ın (Transanadolu Qaz
Boru Kəməri)
açılışı təkcə bu
iki ölkənin deyil,
bütün regionun həyatında
mühüm hadisəyə çevrildi. Eləcə də Türkiyədə
Azərbaycanın sərmayələri ilə yaradılan istehsalat sahələri səmərəli tərəfdaşlığın
bəhrəsidir.
Azərbaycan neftinin və qazının Türkiyə ərazisində
boru kəmərləri ilə nəqlini
BOTAŞ şirkəti həyata keçirir.
“Petroleum Pipeline
Corporation BOTAŞ” şirkəti, yaxud sadəcə, BOTAŞ 1974-cü il avqustun 15-də xam neftin
daşınmasını təmin etmək məqsədilə
təsis edilib. 1987-ci ildən bəri
şirkət təbii qazın daşınması və
satışı sahəsində də fəaliyyət göstərir.
Ötən illər ərzində BOTAŞ nəinki
Türkiyənin, hətta bütün regionun neft-qaz sektorunda aparıcı şirkətlərdən
birinə çevrilib və artıq bütün dünyada
tanınır. Hazırda şirkət iki törəmə müəssisəyə - BIL-ə (“BOTAŞ
International Limited Company”) və TPIC-ə
(“Turkish Petroleum International Company”) malikdir. Şirkətin eləcə də
“Turusqaz” və TANAP adlı iki müttəfiq
şirkəti var.
TANAP-dan söz düşmüşkən
qeyd edək ki, BOTAŞ bu boru xəttinin üç əsas səhmdarından biridir və layihədə sanballı iştirak payına malikdir.
Azərbaycanda fəaliyyət göstərən
Türkiyə şirkətlərindən
biri də TP - “Türkiye Petrolleri”dir. TP-nin 60-dan çox yaşı var. Ötən
illər ərzində
TP iqtisadi fəaliyyətini
getdikcə genişləndirərək
karbohidrogenlərin kəşfiyyatı,
qazması, hasilatı
və nəqli sahəsində zəngin təcrübə toplayıb.
Hazırda o, 7 ölkədə
- Türkiyədə, Şimali
Kipr Türk Respublikasında, Azərbaycanda,
Əfqanıstanda, İraqda,
Liviyada və Rusiya Federasiyasında işini davam etdirir. Başqa sözlə, BOTAŞ zəngin karbohidrogen ehtiyatları olan Yaxın Şərq, Afrika və Xəzər regionu kimi bölgələrdə
öz biznes portfelini genişləndirməkdədir.
TP eləcə də qeyri-ənənəvi
kəşfiyyat (şist
qazı), təbii qazın saxlanılması,
dərin su qatlarında kəşfiyyat
işlərində, boru
kəmərləri ilə
daşımalarda iştirak
edir.
TP regionda qabaqcıl, dünyada nümunəvi olmağı
hədəf kimi götürüb. Şirkət daim özünün
“İnsan, cəmiyyət
və ətraf mühitə hörmət”
biznes fəlsəfəsinə
sadiq qalır.
“Türkiye Petrolleri” Azərbaycanda da yaxşı tanınır. Belə ki, TP “Əsrin
müqaviləsi” imzalanandan
sonra ölkəmizdə
fəaliyyətə başlayan
ilk şirkətlərdən biridir və artıq özünü etibarlı tərəfdaş
kimi təsdiqləyib.
Azərbaycanda həyata keçirilən nəhəng
neft, qaz və ixrac layihələrindəki
iştirak payları bu şirkətin nüfuz və səriştəsindən xəbər
verir. TP “Azəri-Çıraq-Günəşli”
yataqlarının tammiqyaslı
işlənməsi layihəsində
5,73 faizlik paya malikdir. “Şahdəniz” qaz-kondensat
yatağının işlənməsi
layihəsində 19 faizlik
payla iştirak edir. Azərbaycan qazını ölkəmizin
və qonşu Gürcüstanın ərazisi
ilə daşıyan Cənubi Qafqaz Boru Kəmərinin də səhmdarlarındandır
və burada payı 19 faizdir. Heydər Əliyev adına Bakı-Tbilisi-Ceyhan əsas ixrac neft kəmərinin
11 səhmdarından biri
də TP-dir. Onun layihədəki payı 6,53 faiz təşkil
edir.
Azərbaycanda yeni və
müasir neft-qaz infrastrukturunun yaradılmasında
isə “Tekfen İnşaat ve Tesisat” A.Ş. şirkətinin
dəst-xətti görünür. “Tekfen”
1956-cı ildə qurulan
mühəndislik-məsləhətləşmə
şirkətinin əsasında
ildən-ilə böyüyüb
və səriştəsini
artırıb. İşin aparılmasında
keyfiyyət standartlarını
ən mühüm amil hesab edən
şirkət 60 ildən
çoxdur sabitliyini və inkişafını
təmin edir.
“Tekfen Holdinq”in
tərkibində olan “Tekfen İnşaat” hazırda Azərbaycan, Türkiyə, Orta Şərq, Şimali Afrika, Mərkəzi Asiya, Şərqi və Mərkəzi Avropada böyük nailiyyətlər əldə
edir. Bu şirkət
adından da göründüyü kimi,
tikinti işləri ilə məşğul olur. Boru kəmərləri, sənaye müəssisələri,
enerji obyektləri tikir, çənlər quraşdırır, avtomobil
yolları çəkir
və digər infrastrukturun yaradılmasında
aparıcı qüvvə
kimi iştirak edir.
“Tekfen” və SOCAR 1996-cı ildə Azərbaycanda
birgə müəssisə də yaradıblar. Bu
“Tekfen-Azfen” müəssisəsidir. “Tekfen-Azfen” və “AMEK-Tekfen-Azfen”
alyansları Azərbaycanda neft-qaz infrastrukturunun qurulmasında önəmli
işlər yerinə yetiriblər. O cümlədən, son dövrlərdə “Şahdəniz-2”də
quraşdırılmış hər iki
platformanın üst hissələrini və
onları birləşdirən körpünü
inşa ediblər. Bakı-Supsa
kəmərinin seksiyalarının dəyişdirilməsi, Səngəçal
terminalında “Şahdəniz-2” qazını qəbul edən
qurğuların tikilməsi, Cənubi Qafqaz
Boru Kəmərinin genişləndirilməsi
və s. keyfiyyətlə başa
çatdırılan işlərdir.
Əməkdaşlıq
və tərəfdaşlıq Türkiyədə də öz müsbət nəticələrini
göstərir. Son illər ərzində
ölkəmiz tərəfindən Türkiyə
iqtisadiyyatına 13 milyard dollardan
çox sərmayə qoyulub.
Növbəti illərdə bu rəqəm
20 milyard dollara çatacaq. Məsələn, Azərbaycan
Türkiyədə mühüm neft-kimya layihələri həyata keçirir. Qardaş
ölkənin bu sektorda
yeganə istehsalçısı olan “Petkim” ildən-ilə uğurlarını
artırır.
Türkiyənin
dinamik inkişafda olan neft-kimya bazarında “Petkim”in payını
artırmaq məqsədilə SOCAR neft
emalı-neft kimyası - enerji - logistika-distribusiya zəncirindən ibarət geniş bir inteqrasiya layihəsinə start
verib. Layihə 2023-cü ildə başa çatmalıdır. İnteqrasiya
şəbəkəsinin əsas elementini illik emal gücü
10 milyon ton həcmində
nəzərdə tutulan “STAR” neft emalı zavodu təşkil
edir. Müəssisə ilk
növbədə, “Petkim”i
xammalla (yüngül
və ağır nafta ilə) təmin edəcək.
Adı
çəkilən layihələr Azərbaycanın və
Türkiyənin iqtisadi əlaqələrinin
yalnız bir hissəsinin göstəricisidir.
Ümumilikdə isə bu layihələr
hər iki ölkənin iqtisadi
gücünü artırır. Bu il iyunun
12-də TANAP-ın istifadəyə verilməsi münasibətilə
keçirilən təntənəli mərasimindəki
çıxışında Prezident İlham Əliyevin dediyi kimi: “Türkiyənin gücü
bizim gücümüzdür
və bizim gücümüz
birliyimizdədir. Biz uzun
illərdir ki, bu birliyi nümayiş etdiririk. Bu gün
dünyada bir-birinə bu
qədər yaxın olan, bir-birini
bu qədər dəstəkləyən ikinci ölkələr tapmaq
çox çətindir. Türkiyə-Azərbaycan
birliyi, qardaşlığı həm
ölkələrimiz üçün, həm
xalqlarımız üçün,
bölgəmiz üçün, Avrasiya üçün
önəmli amildir”.
Flora SADIQLI
Azərbaycan.-
2018.-7 iyul.- S.1; 4.