Bir millətin iki lideri
İlham Əliyevlə
R.T.Ərdoğanın möhkəm dostluq münasibətləri
Azərbaycan-Türkiyə əlaqələrinin yüksələn
tempinin zəminidir
Türkiyə
Prezidenti Rəcəb Tayyib Ərdoğan seçkilərdən
sonra ilk rəsmi səfərini Azərbaycana etdi. İki
ölkə arasında yaranmış mühüm siyasi ənənəni
davam etdirən R.T.Ərdoğanın bu səfəri ilk
növbədə bir millətin iki dövləti olan Azərbaycanla
Türkiyənin qardaşlığının, müttəfiqliyinin
və strateji tərəfdaşlığının növbəti
gözəl nümunəsi kimi tarixə yazıldı.
Bütün dünyaya bir daha mesaj verildi ki, iki türk dövləti
bütün məsələlərdə bir-birinin
yanındadır.
Müttəfiqliyin və strateji tərəfdaşlığın
ən yüksək səviyyəsi
Ənənəyə
çevrilən bu cür seçkisonrası ilk səfərlər
milli-mənəvi tellərlə bir-birinə bağlı olan
türk xalqlarının və dövlətlərinin
qloballaşan dünyada birlik nümayiş etdirmələri
baxımından olduqca vacibdir. Mətbuata bəyanatında da
Prezident İlham Əliyev qeyd etdi ki, bu səfər bir daha
bizim birliyimizi göstərir: “Biz çox şadıq ki, Siz
seçkilərdən sonra ilk rəsmi səfərinizi Azərbaycana
edirsiniz. Dünən Türkiyədə Sizin andiçmə mərasiminiz
keçirilmişdir və bu gün Siz Azərbaycanda rəsmi
səfərdəsiniz. Bu, bir daha onu göstərir ki,
Türkiyə-Azərbaycan dostluğu, qardaşlığı
sarsılmazdır, əbədidir. Sizin səfəriniz bir daha
Türkiyə-Azərbaycan qardaşlığının
nümunəsidir, bir daha bizim birliyimizi göstərir”.
Möhkəm
təməllər üzərində qurulmuş,
qarşılıqlı inam, etimad və dəstəyə əsaslanan
Azərbaycan-Türkiyə münasibətləri müttəfiqliyin
və strateji tərəfdaşlığın ən yüksək
səviyyəsinə yüksəlib. Təsadüfi deyil ki,
iyulun 10-da prezidentlərin Bakıda keçirdiyi
görüş və mətbuata bəyanatları da bu ruhda
idi. Bu mənada R.T.Ərdoğanın siyasi tərəfləri
ilə yanaşı, həm də mənəvi baxımdan əhəmiyyət
daşıyan bu səfəri dövlətlərarası vacib
məsələlərin müzakirəsi ilə yadda qaldı.
Danışıqların gündəliyinə iqtisadi əlaqələrin
daha da dərinləşməsi, qlobal layihələrin həyata
keçirilməsi, o cümlədən hərbi sahədə
artıq uzun illərdir formalaşmış əməkdaşlığın
uğurla davam etdirilməsi kimi mühüm və strateji məsələlər
daxil idi.
Azərbaycanın
neft strategiyasının uğurları olan və bu gün
ölkəmizə qazanc gətirən Bakı-Tbilisi-Ceyhan və
Bakı-Tbilisi-Ərzurum neft-qaz kəmərləri neçə
ildir ki, Türkiyə dövlətinə mühüm iqtisadi
dividendlər verir. Azərbaycanın dəstəyi və təşəbbüsü
ilə icra olunan TANAP kəmərinin Türkiyə ərazisindən
çəkilməsi bu ölkənin iqtisadi baxımdan dəstəklənməsidir.
Artıq ötən ay kəmər istifadəyə verildi və
bu, hazırkı mərhələdə Azərbaycandan
Türkiyəyə ixrac olunan təbii qazın həcmini
artırmağa, qardaş ölkənin tələbatını
daha yaxşı təmin etməyə imkan verir. “TANAP layihəsi,
- bizim üçün, Azərbaycan üçün həyati
əhəmiyyətli layihədir, - təkcə Azərbaycan-Türkiyə
deyil, eyni zamanda Azərbaycan-Avropa bağlantısını
qurmaq baxımından böyük əhəmiyyət kəsb
edir. Bu layihə bizi ciddi mənada maraqlandırır və bu,
qardaşlığımızın bir təzahürü
olaraq, eyni zamanda strateji investisiya yatırılması
baxımından da əhəmiyyətlidir. TANAP ilə əlaqədar
Əskişəhərdə atdığımız addım həqiqətən
də həyati bir addımdır” - deyə R.T.Ərdoğan
Bakıda bəyan etdi.
Tikintisinə
ölkəmizin təşəbbüsü ilə
başlanılan və ötən il istifadəyə verilən
Bakı-Tbilisi-Qars dəmir yolu xətti də iki ölkə
arasında uğurlu əməkdaşlığın parlaq
nümunələrindən biridir. İndi bu iki türk
dövləti bir-birinə həm də polad tellərlə
bağlanıb.
Azərbaycan
həm də Türkiyəyə ən çox sərmayə
yatıran ölkədir. Bu günə qədər Azərbaycan
Türkiyə iqtisadiyyatına 13,9 milyard dollar sərmayə
qoyub. Türkiyə şirkətləri isə Azərbaycana 12
milyard dollardan çox vəsait yatırıblar. Bu
böyük rəqəmlər, əslində, Azərbaycan-Türkiyə
əlaqələrinin yüksələn xəttini göstərir.
Prezident İlham Əliyevin qeyd etdiyi kimi, ancaq qardaş ölkələrə
bu qədər böyük sərmayə qoyula bilər.
Hər iki dövlət ümumi
maraqlara sadiqdir
Azərbaycanla
Türkiyə arasında münasibətlərin əsas istiqamətlərindən
biri də hərbi sahədə əməkdaşlıqdır.
Artıq uzun illərdir ki, iki ölkə arasında strateji səviyyəyə
yüksəlmiş hərbi əlaqələr mövcuddur.
Türkiyə hərbçiləri və mütəxəssisləri
ölkəmizdə həyata keçirilən ordu
quruculuğunda, zabit kadrların hazırlanmasında
yaxından iştirak edərək öz təcrübələrini
əsirgəməyiblər. Bu gün Türkiyə Azərbaycanın
həm də silah aldığı əsas ölkələrdən
biridir. Bu gün Silahlı Qüvvələrimizin
arsenalında Türkiyə müdafiə sənayesinin məhsulu
olan mühüm hərbi texnika və silah-sursat yer alır.
Onların bir qismi iyunun 26-da keçirilən hərbi paradda
nümayiş olundu.
Azərbaycana
hərbi dəstəyini əsirgəməyən Türkiyənin
Dağlıq Qarabağ məsələsində də
mövqeyi prinsipialdır. Bu münaqişənin həllində
Türkiyə qədər Azərbaycana dəstək verən
ölkə olmayıb. Məlumdur ki, Türkiyə Ermənistanla
sərhədlərini bu ölkənin Azərbaycanın 20 faiz
ərazisini işğal etdiyi üçün bağlayıb.
İndiyədək
Türkiyədə hakimiyyətdə olan bütün siyasi
dairələr birmənalı olaraq bəyan ediblər ki, Ermənistanla
sərhədlərin açılmasının əsas şərti
Azərbaycan ərazilərinin işğaldan azad edilməsidir.
Türkiyə rəsmiləri dəfələrlə bildiriblər
ki, Azərbaycanla həmrəyliyi bundan sonrakı müddətdə
də eyni qətiyyətlə davam etdirəcəklər.
Azərbaycan
və Türkiyə dostluq və qardaşlıq münasibətlərindən
irəli gələrək bölgədə və dünyada
gedən proseslərə münasibətdə həmişə
eyni mövqe sərgiləyib, ortaq maraqlardan
çıxış edirlər. Dünya siyasi düzəninin
indiki şəraitində isə hər iki ölkənin
bölgədə və dünyada gedən proseslərə
vahid prizmadan yanaşmaları, xüsusən ərazi
bütövlüyü, terrorçuluqla mübarizə kimi həssas
məsələlərdə bir-birlərinin maraqlarını
müdafiə etmələri daha mühüm əhəmiyyət
kəsb edir. Təqdirəlayiq haldır ki, hər iki ölkənin
siyasi rəhbərliyi indiki şəraitdə daha prinsipial
mövqe nümayiş etdirir. Azərbaycan həmişə ən
çətin anlarda Türkiyənin yanında olub, ona öz səmimi
və əməli dəstəyini ifadə edib. Xüsusilə,
2016-cı ilin iyulunda qardaş ölkədə baş verən
dövlət çevrilişi cəhdi zamanı və ondan sonrakı
gərgin günlərdə Türkiyə dövləti,
xalqı və siyasi hakimiyyəti Azərbaycandan əsl
qardaşlıq və dostluq gördü. Qardaş ölkədə
hakimiyyət dəyişikliyinə edilmiş cəhd Azərbaycan
ictimaiyyəti tərəfindən böyük narahatlıqla
qarşılandı. Bu hadisəyə ilk reaksiya verən və
öz dəstəyini təklif edən dövlət
başçısı isə Prezident İlham Əliyev idi.
Buna görə R.T.Ərdoğan Bakıda bir daha Prezident
İlham Əliyevə təsəkkürünü bildirdi.
Bütövlükdə,
Türkiyə Prezidenti R.T.Ərdoğanın Azərbaycana səfəri
iki ölkə arasındakı dərin münasibətlərə
bir daha nəzər salınması baxımından xüsusi əhəmiyyət
kəsb etdi. Bir çox məsələlər haqqında
fikir mübadiləsi aparıldı, görülmüş
işlər təhlil edildi, gələcək planlar
haqqında müzakirələr aparıldı. Bu səfər
bir daha göstərdi ki, Türkiyə və Azərbaycan
bundan sonra da nümayiş etdirdikləri vahid mövqeyə və
ümumi maraqlara daim sadiq qalacaqlar.
Rəşad
CƏFƏRLİ
Azərbaycan.- 2018.-12 iyul.- S.1; 8.