Azərbaycandan dünyaya açılan beynəlxalq platforma

Mart ayının 15-17-də Azərbaycan növbəti beynəlxalq tədbirə evsahibliyi etdi. Paytaxtımızda keçirilən VI Qlobal Bakı Forumunda çağdaş dünyamızı narahat edən bir sıra mühüm məsələlər ətrafında müzakirələr aparıldı. Diasporla İş üzrə Dövlət Komitəsinin dəstəyi və Nizami Gəncəvi Beynəlxalq Mərkəzinin təşkilatçılığı ilə keçirilən tədbirin iştirakçısı olan siyasətçilər, dövlət xadimləri problemlərdən çıxış yolları barədə təkliflər səsləndirdilər. Ötən dəfələrdə olduğu kimi, VI forumun da gündəliyi zəngin idi.

Ölkəmizə böyük etimad göstərilir

Azərbaycan öz təşəbbüsləri ilə dünyada sülhün və təhlükəsizliyin möhkəmlənməsinə, milli və ümumbəşəri dəyərlərin, dini müxtəlifliyin, multikulturalizm ənənələrinin qorunub saxlanmasına və inkişaf etdirilməsinə, ayrı-ayrı istiqamətlərdə müşahidə olunan problemlərin həllinə dəyərli töhfələr verir. Bunun nəticəsidir ki, ölkəmiz qlobal və regional səviyyəli tədbirlərə evsahibliyi edən, bütün dünyanın diqqət mərkəzində olan mühüm məsələlərin müzakirə olunduğu siyasi, iqtisadi və humanitar mərkəz kimi tanınır. Təsadüfi deyil ki, Bakı Beynəlxalq Humanitar Forumu, Mədəniyyətlərarası Dialoq Forumu və digər beynəlxalq tədbirlər Azərbaycanda keçirilir.

Bu tədbirlərin hər birində fəaliyyətdə olan və keçmiş dövlət və hökumət başçıları, ictimai-siyasi xadimlər, beynəlxalq təşkilatların rəhbərləri, tanınmış ekspertlər, QHT və KİV nümayəndələri iştirak edirlər. Odur ki, Azərbaycanda keçirilən beynəlxalq tədbirlər həm mövzuların aktuallığı, həm də çoxsaylı iştirakçıların yüksək statusu və nüfuz dairəsi baxımından diqqət çəkir.

Qlobal forumun Bakı şəhərində keçirilməsi də dünya ictimaiyyətinin Azərbaycana olan hörmətinin, etimadının, ölkəmizin dünya siyasətində, beynəlxalq münasibətlər sistemində yerinə və roluna, habelə siyasi və humanitar dialoqun inkişafına töhfələrinə görə verilən qiymətin real ifadəsidir. Qlobal Bakı Forumu siyasi, iqtisadi və humanitar sahələrdə dövrümüzün aktual məsələlərinin, dünyada baş verən mühüm hadisələrin və cərəyan edən proseslərin müzakirə olunduğu mühüm platformadır. Belə ki, bu müzakirələrə onlarla ölkədən görkəmli dövlət xadimləri, tanınmış siyasətçilər, diplomatlar qoşularaq diskussiya və dialoq aparırlar. Bu mənada forum keçmiş və indiki liderlərə qlobal problemləri müzakirə etməyə, onların həllini tapmaq yolunda birgə səylərə şərait yaradır. Ona görə də bu forumun dövlətlərarası əməkdaşlığa, siyasi münasibətlərə konstruktiv töhfə verdiyi, qarşılıqlı siyasi anlaşma üçün əlverişli şərait yaratdığı şübhəsizdir.

Sülh üçün dialoqun inkişafına verilən töhfələr

VI Qlobal Bakı Forumunda 50-dən çox ölkədən 500-dən artıq nümayəndə, o cümlədən Nizami Gəncəvi Beynəlxalq Mərkəzinin üzvü olan sabiq dövlət və hökumət başçıları, müasir dünya siyasətinin yönləndirilməsində, bir çox regional proseslərin qiymətləndirilməsində mühüm rolu olan nüfuzlu dövlət xadimləri, siyasətçilər, elm adamları, siyasi ekspertlər iştirak edirdilər. Forumun nüfuzlu qonaqları arasında Albaniya Prezidenti İlir Meta, Makedoniya Prezidenti George İvanov, Moldova Prezidenti İqor Dodon, Bosniya və Herseqovinanın Rəyasət Heyətinin üzvü Mladen İvaniç, Türkiyənin Baş naziri Binəli Yıldırım, xarici işlər naziri Mövlud Çavuşoğlu, xarici işlər nazirinin müavini Əhməd Yıldız, Fələstinin Baş nazirinin müavini Ziad Abu Amr, Bosniya və Herseqovinanın hökumət başçısının müavini Mirko Sarovic, Rumıniya Baş nazirinin müavini Ana Birçall və digər dövlət və ictimai xadimlər var idi. İştirakçıların bir qisminin fəaliyyətdə olan və sabiq prezident, baş nazir, parlament sədrləri olması toplantının yüksək səviyyəsini göstərməklə yanaşı, tədbirdə maraqlı müzakirələrin aparılacağını əvvəlcədən müəyyən edirdi. Və belə də oldu.

Bundan əvvəl keçirilmiş beş forum mövzuların genişliyi və aktuallığı, yüksəksəviyyəli təmsilçilik və tədbirdə iştirak edən nümayəndələrin fəallığı baxımından dünya ictimaiyyətinin və beynəlxalq medianın diqqətini cəlb edib. “İnklüziv cəmiyyətlərin qurulması üçün fərqliliklərin aradan qaldırılması” mövzusuna həsr olunmuş budəfəki forum çərçivəsində beynəlxalq münasibətlərdə güc anlayışı və meydana çıxan yeni güclər, çoxluqlar milli azlıqlara qarşı, Yaxın Şərq regionunda sülh və təhlükəsizlik, Balkan regionunda hazırkı və gələcək vəziyyət - regional təhlükəsizlik məsələlərinin proqramı və ya yeni geosiyasi şahmat lövhəsi, Çinin xarici siyasəti, kapitalizmdə iqtisadi inkişaf və ətraf mühitin deqradasiyası məsələləri, nəsillər arasındakı bağların qırılması, dini-mədəni müxtəlifliyin siyasi liderlik uğrunda rolu kimi mövzular müzakirə edildi, problemlərin həlli yolları barədə təkliflər səsləndirildi.

Forumun “Güc anlayışı: böyük güclər və digərləri”, “Çoxluqlar azlıqlara qarşı”, “Regional təhlükəsizlik, regional sülh: Orta Şərq”, “Çinin xarici siyasətini necə başa düşmək olar” mövzularında keçirilən panel iclasları maraqlı diskussiyalarla yadda qaldı. Çünki gündəlikdə olan məsələlərə münasibət bildirənlər sıradan olan siyasətçilər deyil, indiki və keçmiş dövlət və hökumət başçıları, tanınmış dövlət xadimləri idilər. Məhz onların iştirakı ilə gündəlikdəki məsələlər ətrafında olduqca səmərəli müzakirələr aparıldı. Bu mənada VI Qlobal Bakı Forumu beynəlxalq əməkdaşlığın möhkəmləndirilməsinə, sülh üçün dialoqun inkişafına layiqli töhfələr verəcək.

Bu cür forumlar Azərbaycan həqiqətlərini dünyaya çatdırır

Qeyd etdiyimiz kimi, bu tədbirin məhz Bakıda keçirilməsi Azərbaycana dünya miqyasında verilən böyük önəmin bariz nümunəsidir. Coğrafi baxımdan Şərq ilə Qərbin kəsişməsində yerləşən Azərbaycanın belə mötəbər forumlara evsahibliyi etməsi ölkəmizin dünyada dialoqun qurulmasında mühüm rol oynadığını göstərir. O cümlədən, xalqımızın qədim tarixi, zəngin mədəniyyəti, tolerantlığı barədə vaxtilə yetərincə məlumatı olmayan dünya Azərbaycanı ildən-ilə daha yaxından tanıyır və onun artan gücünün, beynəlxalq nüfuzunun şahidinə çevrilir.

Eyni zamanda, bu cür forumlar Azərbaycanın üzləşdiyi haqsızlıqları, ölkəmizə qarşı beynəlxalq ikili standartları dünyaya çatdırır. Ola bilsin ki, hansısa tədbir iştirakçısı Azərbaycanla bağlı məsələlərlə məlumatlıdır. Lakin Bakıya gəlməyi onun təsəvvürlərini tamamilə yeniləyir. Və nəzərə alsaq ki, bu cür forumların iştirakçıları əsasən ictimai rəyə təsir etmək iqtidarında olan insanlardır, o zaman onların əhəmiyyəti daha aydın görünər. Bu mənada Qlobal Bakı Forumu bütün parametrləri ilə yanaşı, Azərbaycan həqiqətlərinin dünyaya çatdırılması baxımından da ölkəmiz üçün olduqca mühüm platformadır.

Beləliklə, üç gün davam edən VI Qlobal Bakı Forumu göstərdi ki, ölkəmiz artıq öz əhəmiyyətinə görə lokal və regional münaqişələrin müzakirəsi çərçivəsindən çıxaraq bütün dünyada gedən proseslərə münasibət bildirən, qlobal problemlərin həlli yollarının müzakirəsinə yol açan bir mərkəzə çevrilib. Ən əsası, bu forum Azərbaycan həqiqətlərinin təbliğində və ölkəmizə yeni dostlar qazandırmaqda əhəmiyyətli rola malikdir. Reallıq ondan ibarətdir ki, Azərbaycanın təşəbbüsü ilə Qlobal Bakı Forumunun nümunəsində ölkəmizi tanıtmaq, onun həqiqətlərini dünyaya çatdırmaq üçün çox əlverişli bir platforma yaradılıb.

Rəşad CƏFƏRLİ

Azərbaycan.- 2018.-23 mart.- S.1-2.