“Formula-1” tarixinə möhtəşəm Azərbaycan imzası həkk olundu

Ölkəmiz dünyanın bir nömrəli avtomobil yarışında növbəti dəfə nümunə göstərdi

Aprelin 27-29-da Bakı planetin bir nömrəli avtomobil yarışına 3-cü dəfə evsahibliyi etdi. “Formula-1” dünya çempionatının 4-cü mərhələsi olan Azərbaycan Qran-prisində ən məşhur 20 pilot 10 komandanın tərkibində 6 kilometr məsafədən ibarət 51 dövrəlik mərhələnin qalibi uğrunda yarışdı. Gərgin keçən mübarizə sürət həvəskarlarının böyük marağına səbəb oldu. 500 milyondan artıq tamaşaçı kütləsinə malik yarışı 68 ölkədən çoxlu sayda azarkeş paytaxtımızda tribunalardan izlədi.

Bakıdakı qələbə Luis Hamiltonu liderliyə yüksəltdi

Azərbaycan Respublikasının Dövlət himni səsləndikdən sonra “Formula-1” Azərbaycan Qran-prisinin final mərhələsi başladı. Hər birində iki pilot olmaqla komandaların bir gün əvvəl keçirilən sıralama yürüşünün nəticəsinə əsasən start xəttinə ən yaxın məsafədə Sebastian Fettel (“Ferrari”) və Luis Hamilton (“Mercedes”) dayandılar. Digərləri isə Valtteri Bottas (“Mercedes”), Daniel Rikkardo, Maks Ferstappen (hər ikisi “Red Bull Racing”), Kimi Raikonnen (“Ferrari”), Esteban Okon, Serxio Peres (hər ikisi “Force India”), Niko Hulkenberq, Karlos Sainz (hər ikisi “Renault”), Lans Stroll, Sergey Sirotkin (hər ikisi “Williams”), Fernando Alonso (“McLaren”), Çarlz Lekler (“Sauber”), Kevin Maqnussen (“Haas”), Stoffel Vandurn (“McLaren”), Pyer Qasli (“Toro Rosso”), Markus Eriksson (“Sauber”), Brendon Hartli (“Toro Rosso”) və Roman Qrojan (“Haas”) idilər.

Pilotlar ümumu məsafəsi 306 kilometr və 20 çətin döngəsi olan trekdə 51 dövrə vurdular. Təhlükəsizliyin yüksək səviyyədə təmin olunduğu, müasirliyi ilə tarixiliyini özündə birləşdirən Bakı Şəhər Halqası ən sürətli yarışlar kateqoriyasına daxildir. Trekin ən geniş yerinin eni 13, ən dar hissəsinin eni isə İçərişəhər ətrafında, o cümlədən 7-ci və 8-ci döngələrdə 7,6 metr təşkil edirdi. 30 mindən çox tamaşaçının yarışları yerində izləməsi üçün hər cür şərait yaradılmışdı.

Maraqlı və gərgin keçən yarışın yekununda “Mercedes” komandasının üzvü Luis Hamilton 1 saat 43 dəqiqə 44,291 saniyəlik nəticə ilə Azərbaycan Qran-prisinin qalibi oldu.

İkinci yeri “Ferrari” komandasının sürücüsü Kimi Raikkonen, üçüncü yeri isə “Force India” komandasının pilotu Serxio Peres tutdu.

Bakıdakı 4-cü mərhələdən sonra Luis Hamilton xallarının sayını 70-ə çatdıraraq “Ferrari”nin pilotu Sebastian Fetteli (66 xal) qabaqlayıb. Azərbaycan Qran-prisində ikinci yeri tutan “Ferrari”nin pilotu Kimi Raikkonen xal ehtiyatını 48-ə çatdıraraq üçüncü sırada qərarlaşıb. Qran-pridə üçüncü olan “Force India” komandasının pilotu Serxio Peres isə 9-cu sıraya yüksəlib.

Komandaların yarışında isə “Ferrari” komandası 114 xalla birinci sıradadır. “Mercedes” 110 xalla ikinci, “Red Bull Racing” isə 55 xalla üçüncü sırada qərarlaşıb.

Mübarizəni erkən dayandıranlar

“Formula-1” Azərbaycan Qran-prisi eyni zamanda favorit göstərilən pilotların yarışı erkən başa vurması ilə də yadda qalıb. Belə ki, “Red Bull Racing” komandasının iki pilotu eyni anda yarışla vidalaşıb. Daniel Rikkardonun bolidi Maks Ferstappenin bolidinə arxadan çırpılıb. M.Ferstappen düzgün manevr etmədiyinə görə D.Rikkardo əyləcə bassa da, sürəti nizamlaya bilməyib və bolidlər toqquşub.

“Renault” komandasının pilotu Niko Hulkenberq də Azərbaycan Qran-prisində çıxışını erkən başa vurmalı olub. O, bolidinin təkərinin partlamasından sonra divara çırpılması nəticəsində yarışı dayandırmalı olub.

“Force India” komandasının pilotu Esteban Okon və “Williams” komandasının pilotu Sergey Sirotkin qəza törətdikləri üçün elə birinci dövrədəcə mübarizəni dayandırmalı olublar. Nəticədə hər iki pilotun bolidi yararsız hala düşüb. Hər iki pilot birinci döngəni tamamlamadan yarışda mübarizəni dayandırıb.

“Formula-2”də qalib müəyyənləşdi

Aprelin 29-da Bakıda “Formula-2” üzrə ikinci yarışa da yekun vurulub. “ART Grand Prix” komandasının pilotu George Russel 1 dəqiqə 56,891 saniyəlik nəticə ilə yarışın qalibi olub.

“Carlin” komandasının pilotu Serjio Sette Kamara finiş xəttinə ikinci, “Pertamina Prema Theodore Racing”in sürücüsü Nik De Vries üçüncü çatıblar.

“Formula-2”də isə ilk yarış günündə “Dams” komandasının pilotu Aleksander Albon qalib gəlmişdi. “ART Grand Prix” komandasının pilotu Cek Aitken ikinci, “Charouz Racing System”in sürücüsü Antonio Fuoko üçüncü olmuşlar.

Sürətsevərlərin pilotlarla görüşləri

“Formula-1”in Azərbaycan nümunəsi yüksək səviyyədə hazırlıq, qonaqpərvərlik ilə dünyanı heyran etməklə yanaşı, paytaxtımızda yarışan ən məşhur pilotların qəlbində dostluq, anlaşma, sevgi məşəli yandırıb. Yarış müddətində sürətsevərlər öz qəhrəmanları - “Ferrari”, “Haas”, “Williams”, “Toro Rosso”, “Mercedes”, “Renault” və s. komandaların pilotları ilə avtoqraf sessiyalarında görüşdülər. Bu, azarkeşlər üçün əsl hədiyyə oldu.

Beləliklə, Azərbaycan bu yarışa yüksək səviyyədə evsahibliyi etməklə bir daha sübut etdi ki, beynəlxalq tədbirlərin keçirilməsi üçün əsas ünvanlardan biridir.

Dünya ulduzlarının ifasında konsertlər

“Formula-1” Azərbaycan Qran-prisinin həyəcanlı və maraqlı yarışlarından sonra azarkeşlər axşam saatlarında “Baku Crystal Hall”a toplaşdılar. Dünya ulduzlarının enerjili və coşqulu ifaları konserti dinləməyə gələnlərə unudulmaz gecələr yaşadıb.

“Formula-1” Azərbaycan Qran-prisinin ilk musiqili qonaqları “Jamiroquai” qrupu və DJ Afrojack azarkeşlərə unudulmaz anlar bəxş edib.

Aprelin 28-də isə dünya ulduzlarından Kristina Aquilera avtoidman azarkeşlərinin qarşısında səhnəyə çıxıb. O, “Baku Crystall Hall”da “Formula-1” həvəskarları üçün ən məşhur ifalarını səsləndirib.

Yarışın son günü isə dünyanın ən tanınmış müğənnilərindən olan Dua Lipa konsert verib. Biletləri tamamilə satılan konsertləri və hit mahnıları ilə 2017-ci ili başa vuran, 8,5 milyon sinql və 1,5 milyon albom sataraq ötən il “Spotify”da ən çox dinlənilən britaniyalı qadın ifaçı böyük səhnədə ən çox sevilən ifalarını səsləndirib.

Bununla da Azərbaycan Qran-prisi göstərdi ki, “Formula-1” təkcə yarış deyil, həm də istirahət üçün unudulmaz möhtəşəm tədbirdir.

Elçin CƏFƏROV

Azərbaycan.- 2018.- 1 may.- S.10.