YAP-ın 25-ci ildönümü münasibətilə başlanan ağacəkmə kampaniyası başa çatıb

Kampaniya müddətində ümumilikdə 700 mindən çox ağac əkilib

Yeni Azərbaycan Partiyasının (YAP) yaradılmasının 25-ci ildönümü münasibətilə başlanan ağacəkmə kampaniyası mayın 12-də başa çatıb.

AZƏRTAC xəbər verir ki, kampaniya Ekologiya və Təbii Sərvətlər Nazirliyi ilə birgə layihələndirilib.

Tədbirdə Baş nazirin müavini, Yeni Azərbaycan Partiyasının sədr müavini - icra katibi Əli Əhmədov və Baş nazirin müavini, Yeni Azərbaycan Partiyası sədrinin müavini Əli Həsənov, Yeni Azərbaycan Partiyası İdarə Heyətinin üzvü, Milli Məclisin sədr müavini Bahar Muradova, ekologiya və təbii sərvətlər naziri Muxtar Babayev, Türkiyənin Azərbaycandakı səfiri Erkan Özoral, YAP-ın çoxsaylı üzvləri, deputatlar, ictimaiyyətin nümayəndələri, o cümlədən fəal gənclər iştirak ediblər.

Türkan qəsəbəsində keçirilən genişmiqyaslı iməcilikdə müxtəlif növ ağac və kollar əkilib.

Əli Əhmədov jurnalistlərə müsahibəsində bildirib ki, bu aksiya çərçivəsində partiya üzvlərinin sayı qədər - 700 min ağac əkmək təşəbbüsü irəli sürülüb. Bu günə qədər Yeni Azərbaycan Partiyasının üzvləri tərəfindən bütün regionlarımızda, kənd və qəsəbələrimizdə 700 mindən çox ağac əkilib. Bu aksiya ekologiyamızın təmizliyinə və ölkəmizdə yaşıllaşdırma kampaniyasına öz töhfəsini verəcək. Yeni Azərbaycan Partiyasının yaradıcısı, Ümummilli Liderimiz həmişə yaşıllaşdırmaya, ağac əkilməsinə, ağaclara qulluq edilməsinə böyük önəm verirdi. Prezident İlham Əliyev də Azərbaycanda yaşıllaşdırma kampaniyasına böyük önəm verir. Mayın 10-da dövlətimizin başçısı burada ağacəkmə mərasimində iştirak edib. Yeni Azərbaycan Partiyası bu kampaniyalarla, eyni zamanda, nə qədər mütəşəkkil və böyük bir güc olduğunu nümayiş etdirir.

Azərbaycan.- 2018.- 13 may.- S.4.