Şəkini sevən və şəkililərin rəğbətini qazanan rəhbər

Ümummilli lider Heydər Əliyev rəhbər vəzifələrdə çalışarkən daim xalqın arasında olub və insanlarla isti münasibət qurub. Bölgə əhalisinin uğurlarına sevinib və problemlərinin həllinə dəstək olub. Bu baxımdan xalqımızın tarixində özünəməxsusluğu ilə tanınan Şəki də xüsusi nəsibini alıb.

Ümumilikdə Şəki rayonunun inkişafında ümummilli lider Heydər Əliyevin çox böyük əməyi olub. Ulu öndər siyasi fəaliyyəti dövründə dəfələrlə Şəki şəhərinə səfər edib. Dahi rəhbərlə keçirilən görüşlər şəkililərin qəlbində silinməz izlər buraxıb.

Ümummilli liderin Şəkiyə ilk səfəri 1974-cü ilə təsadüf edib. O vaxt rayonda ümumrespublika müşavirəsi keçirilirdi. Tədbirə qatılan Heydər Əliyevin birbaşa göstərişi ilə rayonda köklü dəyişikliklər, xüsusən də maldarlığın inkişafında böyük təkan baş verib. Ölkəyə maldarlığın inkişafı üçün ayrılan vəsaitin təxminən üçdəbiri - 51 milyondan 17 milyonu Şəkiyə yönəldilib. Ümummilli lider Heydər Əliyevin birbaşa göstərişi ilə Şəkinin sel sularından mühafizəsi üçün bəndlərin, Kiş çayı üzərində nəhəng körpünün və Əyriçay su anbarının tikintisinə başlanılıb. Daşüz Atçılıq İdman Mərkəzinin istifadəyə verilməsi, konserv zavodunun tikilməsi də həmin dövrə təsadüf edib.

Bu səfərdən sonra Şəkidə inkişaf sürətlə davam etdirilib. Səfərdən bir il sonra 1975-ci ildə Şəkidə ilk dəfə təbii qazın məşəli yandırılıb. 70-ci illərin sonunda isə rayon ərazisinə 71 kilometr uzunluğunda dəmiryol xətti çəkilib.

Belə səfərlərdən biri də 2002-ci ildə baş tutub. Həmin səfər əvvəldən məhz Şəki rayonu üçün planlaşdırılsa da, ulu öndər yolboyu onu salamlamağa çıxmış insanlara sevgisini çatdırmaq üçün maşın karvanını yolüstü saxladaraq İsmayıllı və Qəbələ rayonları ərazisində də sakinlərlə görüşüb və onları narahat edən problemləri dinləyib.

Ulu öndərin Şəki səfəri ilə bağlı o zaman Azərbaycan Müəllimlər İnstitutunun Şəki filialında direktor müavini olan, hazırda şəhər icra hakimiyyəti başçısının mavini, ictimai-siyasi işlər və humanitar məsələlər şöbəsinin müdiri Zərinə Cavadova məlumat verir. Onun dedikləri: "2002-ci ilin noyabrında ulu öndər Şəkiyə gəldi. Bu səfər tarixi əhəmiyyətə malik idi. Ölkənin bütün kütləvi informasiya vasitələri də bu səfəri izləyirdi”.

Müsahibimizin dediyinə görə, Heydər Əliyev Şəkidə olduqca yüksək səviyyədə qarşılanıb. Maraqlı məqamlardan biri də o olub ki, şəhərdə işləyən daxili marşrutlar səmtlərini dəyişərək olimpiya kompleksi tərəfə yön alıblar. İnsanlar məhz həmin istiqamətə, özü də ödənişsiz daşınırdı. Eyni zamanda, sakinlərin böyük bir qismi kütləvi şəkildə payi-piyada rəhbərin görüşünə tələsirdi.

Noyabrın 8-də Şəkiyə gələn Heydər Əliyev olimpiya kompleksində gecələyir. Növbəti gün isə həmin obyektin açılış mərasimi olur. Zərinə xanım tribunaya qalxaraq ziyalılar adından çıxış edir.

Zərinə xanım xatirələrini danışmaqda davam edir: "Şəki Olimpiya İdman Kompleksinin rəsmi açılış mərasimi yekunlaşdı. Prezidentin olacağı məkanlar arasında əvvəldən elan olunmayanları da var idi. Sabit Rəhman adına Şəki Dövlət Dram Teatrının qarşısına minlərlə adam çıxmışdı. Bunun üçün heç bir təşkilatçılıq olmamışdı. İnsanlar Prezident kortecinin Şəki İpək Kombinatına oradan gedəcəyindən xəbərdar idilər. Bunu görən ulu öndər bir daha səmimiyyətini sərgilədi. Maşını saxladıb düşərək orada toplaşan insanlarla görüşdü və çıxış etdi. Çıxışı zamanı Şəki haqqında xoş sözlər dedi. Şəhər camaatının da onu bu cür qarşılamalarına görə razılığını bildirdi. İpək kombinatında olarkən burada vəziyyətin ürəkaçan olmadığını gördü və müəssisənin fəaliyyətinin bərpası ilə bağlı dərhal göstəriş verdi”.

Ulu öndər kompleksdən çıxıb növbəti obyektin açılışına gedərkən yollarda insan axını ilə bağlı sıxlıq səbəbindən maşından düşüb xeyli məsafəni piyada qət edir. Yolboyu insanlarla görüşərək onlarla birlikdə hərəkətdə olur. Hər kəs onu sevgi ilə salamlayıb şəhər ictimaiyyətinin orada olan nümayəndələri ilə ayrı-ayrılıqda görüşür.

Heydər Əliyevin "Xan sarayı”na ziyarəti də yaddaqalan olub. Məhz onun bu səfərindən sonra saray bərpa olunub.

Həmin səfərdən sonra Şəkinin inkişafında yeni bir dövrün, mərhələnin əsası qoyulur. İpək kombinatının işə düşməsi, "Xan sarayı”nın bərpası, çoxsaylı sosial obyektlərin tikintisinə başlanması deyilənlərə nümunə göstərilə bilər.

Vacib məqamlardan biri də ümummilli liderin layiqli davamçısı, Prezident İlham Əliyevin onun yolunu davam etdirməsidir. Məhz elə bunun sayəsində Şəki bu gün də ölkəmizin ən inkişaf etməkdə olan bölgələri arasında seçilməkdədir. Bu da özünü sözsüz ki, sosial-iqtisadi və mədəni həyatın bütün sahələrində göstərir.

Əli SƏLİMOV

Azərbaycan.- 2019.- 7 may.- S.7.