Azərbaycan Londonda keçirilən beynəlxalq turizm sərgisində iştirak edir

Londonun "Excel London” arenasında "World travel market-2018” beynəlxalq turizm sərgisi açılıb. Beynəlxalq sərgidə Azərbaycan da iştirak edir. Sərgi çərçivəsində Azərbaycan Turizm Bürosu ölkənin yeni turizm brendi olan "Take another look” ("Yenidən fərqli baxışla bax”) marketinq kompaniyasının təqdimatını keçirib.

Müxtəlif ölkələrin dövlət nümayəndələri, dünyanın aparıcı turizm şirkətləri və mütəxəssislərinin, eləcə də media nümayəndələrinin iştirak etdiyi təqdimatda Azərbaycan Turizm Bürosunun icraçı direktoru Florian Zenqstşmid çıxış edərək yeni turizm brendi haqqında ətraflı məlumat verib. Bildirib ki, beynəlxalq bazara daha çox turizm təklifləri çıxarmaq, dünyanın məşhur destinasiya brendi olmaq, əsrarəngiz maddi və mənəvi irsimizi dünya ilə bölüşmək əsas məqsədlər sırasındadır.

Büronun brend və marketinq üzrə direktoru Fidan Əliyeva isə Azərbaycanın mədəniyyətindən və tarixindən danışıb: "Ölkəmiz bir çox imkanlara malikdir. Mədəniyyətimiz, insanlarımız, qədim tarixi keçmişimiz, təbii gözəlliklərimiz turistləri hər zaman özünə cəlb edir. Bizim yeni brendi yaratmaqda məqsədimiz Azərbaycanın daha bir gözəlliyini üzə çıxarmaqdır”.

Təqdimatdan sonra Azərbaycanın turizm brendi və potensialı haqqında beynəlxalq media üçün mətbuat konfransı keçirilib. Azərbaycan Turizm Bürosunun baş icraçı direktorunun müavini Bəhruz Əsgərov media və turizm şirkətlərinin nümayəndələrinə Şəki, Şamaxı və digər turizm şəhərləri, eləcə də ölkəmizdə keçirilən beynəlxalq yarışlar haqqında məlumat verərək bildirib ki, qarşıdakı illərdə Azərbaycan Turizm Bürosunun Almaniya, Rusiya, Birləşmiş Ərəb Əmirlikləri, Səudiyyə Ərəbistanı, Hindistan, Çin, Böyük Britaniya, Koreya Respublikası və Fransada nümayəndəliklərini açmağı planlaşdırırıq.

Sonra Azərbaycan Turizm Bürosunun nümayəndələri ölkəmizin turizm potensialı, marketinq strategiyası və yeni turizm siyasəti barəsində sualları cavablandırıblar.

Yeni kompaniyanın məqsədi xarici turistləri Azərbaycana dəvət etmək, bütün səyahətçilərə ölkəmizin özünəməxsusluğunu göstərmək və onlara unudulmaz xoş təəssüratlar bəxş etməkdir. Azərbaycanın yeni turizm imicinin, ölkəmizin turistlər üçün cəlbedici məkanlardan biri olması faktının dünya ictimaiyyətinə çatdırılması üçün qeyd olunun təqdimat xüsusi önəm kəsb edir.

Turizmi ölkənin ikinci ən böyük inkişaf istiqamətinə çevirmək və 2023-cü ilədək Azərbaycana gələn turistlərin sayının iki dəfə artırılmasına nail olmaq kompaniyanın strateji hədəfləri sırasındadır.

Azərbaycan.- 2018.- 8 noyabr.- S.7.