Azərbaycan Avropa Şurasına üzv ölkələrin idman nazirlərinin toplantısında təmsil olunur

Tbilisidə Avropa Şurasının üzvü olan ölkələrin idmana məsul nazirlərinin 15-ci toplantısı işə başlayıb.

AZƏRTAC xəbər verir ki, "İdmanda insan hüquqlarının qorunması: Öhdəliklər və məsuliyyətin bölünməsi” devizi altında keçirilən toplantıya 320-dən çox iştirakçı qatılıb. Tədbirdə Azərbaycanı gənclər və idman naziri Azad Rəhimov təmsil edir.

Toplantıda qeyd edilib ki, əsas məqam idmanda iştirak və mövcudluğun insan hüquqları vasitəsilə təbliğ olunmasıdır. Tədbirdə idmançıların hüquqlarının qorunması, dopinqdən istifadənin qarşısının alınması, ictimaiyyətin hər bir təbəqəsindən olan vətəndaşların idmanla fəal məşğul olmaları üçün daha geniş imkanların yaradılması məsələləri müzakirə edilib. Bununla yanaşı, idmanda insan haqlarının müdafiəsi, məsuliyyət və ümumi öhdəliklər, idmanda korrupsiyaya qarşı mübarizədə fəallığın artırılması da müzakirəyə çıxarılan əsas məsələlərdən olub.

Tədbirin açılışında Avropa Şurası baş katibinin müavini xanım Qabriela Battaini-Draqoni, Gürcüstanın Baş naziri Mamuka Baxtadze, Avropa Şurasının Nazirlər Komitəsinin rəhbərliyini təmsil edən, Xorvatiyanın İdmana dair Mərkəzi Dövlət Ofisinin baş katibi xanım Yaniça Kosteliç, Avropa Olimpiya Komitələrinin prezidenti Yanez Koçiyançiç və digər rəsmilər iştirak ediblər.

Azərbaycan.- 2018.-17 oktyabr.- S.5.