“Azərbaycan” dövlətçilik ideyalarına sədaqəti ilə müasir jurnalistikamız üçün əsl örnəkdir

Azərbaycan Respublikası Milli Məclisinin deputatı,

"Azərbaycan” qəzetinin baş redaktoru

cənab Bəxtiyar Sadıqova

Hörmətli Bəxtiyar müəllim!

Sizi və rəhbərlik etdiyiniz kollektivi əlamətdar hadisə - "Azərbaycan” qəzetinin 100 illik yubileyi münasibətilə dərin səmimiyyətlə təbrik edirəm!

İlk nömrəsi 15 sentyabr 1918-ci ildə işıq üzü görən "Azərbaycan” qəzeti milli məfkurənin və azadlıq ideyalarının yayılmasında, xalqımızın müstəqil dövlətçilik ənənələrinin formalaşdırılmasında, qorunmasında və təbliğində tarixən mühüm rol oynamışdır.

Ulu öndər Heydər Əliyevin Azərbaycanda həyata keçirdiyi müstəqil dövlət quruculuğu və hərtərəfli tərəqqi, möhtərəm Prezident cənab İlham Əliyevin rəhbərliyi ilə aparılan islahatlar və sürətli inkişaf dövrünün salnaməçisi olan bugünkü "Azərbaycan” Xalq Cümhuriyyəti zamanında çıxan "Azərbaycan”ın layiqli varisi kimi cəmiyyətimizdə böyük nüfuz və rəğbət qazanmışdır.

Söz və mətbuat azadlığının tam təmin olunduğu ölkəmizdə "Azərbaycan” qəzeti özünün yaradıcılıq mövqeyi və peşəkarlıq xüsusiyyətləri, milli-mənəvi dəyərlərə və dövlətçilik ideyalarına sədaqəti ilə müasir jurnalistikamız üçün əsl örnəkdir.

Sizi bir daha yubiley münasibətilə təbrik edir, şəxsən Sizə və kollektivinizin hər bir üzvünə möhkəm cansağlığı, uzun ömür, şərəfli yaradıcılıq fəaliyyətinizdə yeni-yeni uğurlar arzulayıram!

Rövşən RZAYEV,

Azərbaycan Respublikası Qaçqınların və Məcburi

Köçkünlərin İşləri üzrə Dövlət Komitəsinin sədri

Azərbaycan.-2018.- 15 sentyabr.- S.9.