Yeni Azərbaycan Partiyası ölkəmizin alternativsiz siyasi gücüdür

Ötən əsrin 90-cı illərinin əvvəllərində ölkədə yaranmış ağır siyasi-iqtisadi durum, dövlətin idarəçiliyində olan dərin boşluqlar, vətəndaşların gündən-günə daha da pisləşən sosial vəziyyəti o dövrü yaşamış hər kəsin yadındadır. Məhz belə məqamda ulu öndər Heydər Əliyevin rəhbərliyi ilə Yeni Azərbaycan Partiyasının yaranması cəmiyyətin haqlı siyasi və sosial sifarişi idi.

Xalqın arzularının təcəssümü, yekdil iradəsinin ifadəsi kimi tarixi reallıqdan irəli gələrək vətənpərvərlik, əqidə birliyi, dövlət müstəqilliyi və azərbaycançılıq ideyalarının möhkəm təməli üzərində yaranan YAP Azərbaycanın siyasi həyatına yeni nəfəs verdi. Elə buna görə də YAP müxalifət partiyası kimi yaransa da, müxalifətdə cəmi bir neçə ay qaldı. Milli mənafe və amalları, dövlətçilik maraqlarının təmsilçisi olmaq kimi müqəddəs amalı özünün siyasi idealı, əsas strateji xətti seçdiyi üçün YAP tezliklə ən demokratik yollarla hakimiyyətə gəldi.

1993-cü ilin iyununda Bakıya gələn Heydər Əliyevin Prezident seçilməsindən sonra YAP-ın statusu yeni şəraitə uyğun dəyişdi, ölkənin siyasi həyatında tutduğu mövqe möhkəmləndi, kütləvi siyasi qüvvəyə çevrilərək ictimai həyatın bütün sahələrində tərəqqiyə nail olmaq məqsədilə yüksək fəallıq nümayiş etdirməyə başladı. Həmin vaxtdan etibarən YAP Azərbaycanı düçar olduğu təhlükə və böhranlardan qurtarmaq üçün özünün məqsədyönlü fəaliyyətinə başladı. Ölkənin milli maraqlarının qorunması, təhlükəsizliyinin təmin edilməsi, vətəndaş sülhünün bərqərar olması, problemlərin aradan qaldırılması, dövlət quruculuğu, bir sözlə, bütün sahələrdə islahatların aparılması Heydər Əliyevin yürütdüyü siyasi kursun ana xəttini təşkil edirdi. Öz parlaq zəkası, zəngin dövlətçilik təcrübəsi, yenilməzliyi və cəsarəti ilə müstəqil Azərbaycanı dağılıb məhv olmaq təhlükəsindən qoruyub saxlayan və bu dövlətin bütün atributlarını yaşadan Yeni Azərbaycan Partiyasının banisi Heydər Əliyev Azərbaycan tarixinə həm də demokratik cəmiyyət qurucusu kimi yeni bir imza ataraq müstəqillik yoluna yenicə qədəm qoymuş dövlətimizi məqsədyönlü şəkildə addım-addım irəli apardı. Və o dövrdən başlayaraq bugünkü inkişafın, bugünkü güclü Azərbaycanın təməli qoyuldu.

Yeni Azərbaycan Partiyası bu gün Prezident İlham Əliyevin rəhbərliyi ilə ulu öndərin ideyalarını layiqincə yaşadır, ölkənin ictimai-siyasi həyatında iştirakını əzmlə davam etdirir. Bu mənada hər kəsin haqlı olaraq vurğuladığı odur ki, Heydər Əliyev siyasəti Prezident İlham Əliyev tərəfindən uğurla davam etdirilir. 2003, 2008 və 2013-cü ilin oktyabr aylarında Heydər Əliyev siyasi kursunun layiqli davamçısı kimi prezident seçkilərinə qatılan cənab İlham Əliyevin qələbəsi həm də YAP-ın zəfəri, nailiyyətidir. Xüsusilə qeyd etməliyik ki, ümummilli lider Heydər Əliyevin qurub-yaratdığı, onun ölməz ideyalarından güc alan Yeni Azərbaycan Partiyasının bütün seçkilərdə mütləq qələbə qazanaraq cəmiyyətdəki lider statusunu qoruyub saxlaması təbii qanunauyğunluq kimi nəzərdən keçirilməlidir. Hər bir seçki Azərbaycan xalqının Heydər Əliyev ideallarına sədaqətini, ulu öndərin müəyyən etdiyi strateji inkişaf kursunu bu gün də əzmlə həyata keçirən möhtərəm Prezident İlham Əliyevin apardığı siyasətin uğurlarına ümumxalq inamını təcəssüm etdirmişdir. Xalqımız bu siyasətin həyatımıza gətirdiyi nailiyyətlərə, uğurlu sabahına doğru inamla irəliləyən Azərbaycana səs vermişdir.

Ümumiyyətlə, 1993-cü ildən indiyədək ölkədə 5 prezident, 5 parlament, 4 bələdiyyə seçkisi, 3 referendum keçirilmişdir. Hər bir qələbənin məhz YAP-ın namizədlərinin qələbəsi ilə başa çatması, həmçinin referendumların nəticələri YAP yüksək reytinqinin və ən əsası, xalqın partiyası olmasının nəticəsi kimi tarixə düşmüşdür. Ona görə seçkilərin ortaya qoyduğu reallıqları nəzərdən keçirsək, belə bir amili qeyd etməliyik ki, hər bir seçkinin nəticəsi YAP-ın ölkəmizin həyatında alternativsiz siyasi güc olduğunu göstərib.

YAP-ın Azərbaycan cəmiyyətində dayaqları ilk gündən çox möhkəmdir. Sıralarında 710 min nəfərdən artıq insanı birləşdirən partiyamız xalqın bütün nümyəndələrinin maraqlarını təmin edir. Elə bir bölgə, rayon yoxdur ki, orada YAP yerli təşkilatları fəaliyyət göstərməsin. Yeni Azərbaycan Partiyasının ümumi məqsədlər və amallar naminə uğurlu fəaliyyətində partiyanın rayon təşkilatlarının da rolu danılmazdır.

Yanvarın 29-da yaranmasının 23-cü ili tamam olan YAP Ağdaş rayon təşkilatı da partiyanın yerli təşkilatı kimi ildən-ilə böyük inkişaf yolu keçmiş, öz sıralarını daim genişləndirmiş, partiyamızın proqram və prinsiplərinə uyğun olaraq qarşıya qoyulan vəzifələrin icrasını ləyaqətlə yerinə yetirmişdir. Hazırda YAP Ağdaş rayon təşkilatı partiyanın proqram vəzifələrinin həyata keçirilməsində, rayonun siyasi-ictimai həyatında fəal iştirak edir.

Hazırda təşkilatımızda birləşən YAP üzvlərinin sayı 17 min 227 nəfərdir. Ərazi ilk partiya təşkilatlarının sayı isə 77-dir. Müqayisə üçün əminliklə qeyd etmək istərdim ki, bu gün radlikal müxalifət partiyalarının ümumilikdə üzvlərinin sayı YAP-ın bir rayon təşkilatının üzvlərinin sayına çata bilməz. Üzvlərimizdən 8962 nəfərini, yəni 52 faizini qadınlar, 7287 nəfərini, yəni 42,3 faizini gənclər təşkil edir. YAP Ağdaş rayon təşkilatı şurasının tərkibi 35 nəfər, idarə heyətinin tərkibi 17 nəfərdən ibarətdir. Təşkilatımızın hər bir üzvü rayonun ictimai-siyasi, iqtisadi, mədəni həyatında və s. sferalarda fəal iştirak edir, öz əməlləri ilə dövlətimizin inkişafına xidmət edir.

Təşkilatımız Ağdaş şəhərində salınan yeni inzibati mərkəzdə inşa olunan müasir standartlara cavab verən inzibati binada fəaliyyət göstərir. 2014-cü il may ayının 1-də Prezident İlham Əliyevin Ağdaşa səfəri zamanı Heydər Əliyev Mərkəzinin, Ağdaş Rayon İcra Hakimiyyətinin yeni inzibati binasının, meyvə emalı zavodunun, Gilan Yem Emalı Zavodunun, elektrik stansiyasının, Ləki-Pirəzə-Xınaxlı avtomobil yolunun açılışlarında iştirak etmiş, Bayraq meydanında yaradılan şəraitlə tanış olmuşdur. Cənab Prezidentin rayonumuza səfəri zamanı bu yeni ünvanlarla yanaşı YAP Ağdaş rayon təşkilatının yeni inzibati binası da istifadəyə verildi. İkimərtəbəli, 17 otaqlı binanın inşasına 2012-ci ilin avqust ayında başlanılmış və vaxtında başa çatdırılmışdır. Bina müasir inventar və avadanlıqla təchiz edilmiş, foyedə ulu öndər, Yeni Azərbaycan Partiyasının yaradıcısı Heydər Əliyevin büstü qoyulmuş, müxtəlif tədbirlərin keçirilməsi üçün böyük akt zalı yaradılmışdır. İnzibati otaqlar binanın ikinci mərtəbəsində yerləşir.

Respublikanın bütün bölgələrində inşa olunan YAP rayon təşkilatlarının inzibati binaları müasirliyi ilə seçilməklə yanaşı, həm də inşa olunduğu şəhərin gözəlliyini artırır. Bu binalarda ən yüksək səviyyədə işləmək üçün hər cür şərait yaradılıb. YAP Ağdaş rayon təşkilatının yeni inzibati binası da bu baxımdan mühüm əhəmiyyətə malikdir. Bina orijinal layihə, maraqlı memarlıq quruluşu ilə Ağdaş şəhərinin görkəminə yeni çalarlar qatır.

Yanvarın 29-da inzibati binamızda keçirilən tədbirdə YAP-ın və partiyanın Ağdaş rayon təşkilatının keçdiyi inkişaf yolundan söz açıldı. Çıxış edənlər bir fikri ümumiləşdirərək bildirdilər ki, tarixi zərurətdən yaranan YAP ilk gündən ölkəmizin müstəqilliyinin qorunması, dövlətçiliyinin möhkəmləndirilməsi, iqtisadiyyatın inkişaf etdirilməsi, demokratik təsisatların bərqərar olunmasında siyasi flaqman rolunu öhdəsinə götürmüş və bu vəzifələrin yerinə yetirilməsində möhtəşəm uğurlara imza atmışdır. Qeyd olundu ki, bu gün YAP Azərbaycanın əsas aparıcı siyasi qüvvəsidir. YAP bundan sonra da Prezident İlham Əliyevin siyasətinə uyğun olaraq Azərbaycanın qüdrətlənməsinə, dövlətçiliyimizin inkişafına xidmət edəcək.

Çıxışlarda bildirildi ki, YAP Ağdaş rayon təşkilatı ildən-ilə fəaliyyətini daha da canlandırmış və hər seçkidə fəal olmuşdur. Həm seçicilər arasında maarifləndirmə işlərinin aparılmasında, həm də YAP-ın təbliğatının həyata keçirilməsində partiyanın Ağdaş rayon təşkilatı tərəfindən mühüm tədbirlər həyata keçirilmişdir. Bütün bunlar hər seçkidə Ağdaş rayonu üzrə YAP-ın qələbəsinin təmin edilməsində mühüm rol oynamışdır.

Bu gün YAP Azərbaycanın əsas aparıcı siyasi qüvvəsidir. Partiyamız bundan sonra da Prezident İlham Əliyevin siyasətini müdafiə edərək Azərbaycanın qüdrətlənməsinə, dövlətçiliyimizin inkişafına xidmət göstərəcək. Əminliklə qeyd etmək istəyirəm ki, YAP Ağdaş rayon təşkilatı da partiyanın proqram və nizamnaməsinə uyğun olaraq qarşısında dayanan vəzifələri hər zaman layiqincə yerinə yetirəcək.

Cavid OSMANOV,

Milli Məclisin deputatı,

YAP Ağdaş rayon təşkilatının sədri

Azərbaycan.- 2018.- 31 yanvar.- S.3.