Bakı “Formula-1”ə hazırdır

Sürət yarışının ən möhtəşəm tribunaları paytaxtımızda qurulub

Çoxsaylı siyasi, mədəni və digər səpkili beynəlxalq tədbirlərə yüksək səviyyədə evsahibliyi edən Azərbaycan növbəti möhtəşəm tədbir ərəfəsindədir. Belə ki, paytaxtımızda sayca 4-cü dəfə "Formula-1” Azərbaycan Qran-prisi keçiriləcək.

Sürət və adrenalin sevən "F1” azarkeşləri Bakı Şəhər Halqasında təşkil olunacaq möhtəşəm yarışdan zövq alacaqlar. Son 3 ildəki yarışlardan sonra yüksək təşkilatçılıqla nümunə göstərən Azərbaycan növbəti dəfə dünyanın ən güclü pilotlarını qarşılamağa hazırdır.

Əminliklə söyləmək olar ki, cari mövsümün 4-cü mərhələsi olan Azərbaycan Qran-prisində sürət həvəskarlarını möhtəşəm yarış gözləyir. Yarışların keçirildiyi şəhər treki Bakı Şəhər Halqası (BŞH) adlanır və uzunluğuna görə dünyada ikincidir. Yarış 20 müxtəlif çətinlikli döngəsi və 6 kilometrlik uzunluğu ilə 51 dövrədə tamamlanacaq.

"Formula-1” Azərbaycan Qran-prisi "Azadlıq” meydanından start götürəcək və burada da başa çatacaq. Trekdə yarış avtomobillərinin hərəkəti saat əqrəbinin əks istiqamətində olacaq.

Bakı trekini əhatə edən asfalt örtüyünün yarışa hazır vəziyyətə gətirilməsi məqsədilə təmir-bərpa işləri yekunlaşmaq üzrədir. Hazırlıq işləri ilə yaxından tanış olmaq üçün Bakı Şəhər Halqasına yollandıq. Trekə daxil olan yolların kənarlarına artıq beton bəndlər yerləşdirilib və setkalar çəkilib. Asfalt örtüyündə kiçik bərpa işləri də tamamlanıb.

Tamaşaçı tribunalarının bəziləri hazırdır, digərlərində isə tamamlama işləri gedir. Trek boyunca müxtəlif "Formula-1” lövhələrinin və piyada keçidlərinin quraşdırılması işləri aparılır.

Ümumilikdə isə Bakı Şəhər Halqasında 9 yerdə tribuna quraşdırılır. Bunlar aşağıdakılardır:

Abşeron - əsas tribuna

Abşeron tribunası yarışı dəqiq və yaxından izləyə bilmək baxımından ən üstün mövqedə yerləşib. Komandaların avtoqarajları ilə üzbəüz yerləşən Abşeron tribunasına bilet alanlar yarışın yüksək adrenalin dolu başlanğıcına şahid olacaqlar.

Həmçinin həyəcanlı pit-stop əməliyyatlarını izləmək üçün ən yaxşı mövqeyə sahib olacaqlar. Bu tribunada olan yarış həvəskarları pit yolunu, start düzülüşünü və finiş xəttini yaxından izləyə biləcəklər. Bu tribunaların ən böyüyü olmaqla 5 sektordan ibarətdir.

Xəzər tribunası

Muzey Mərkəzinin qarşısında və Bulvar tribunası ilə üzbəüz yerləşən Xəzər tribunasından izləyicilər bolidlərin start-finiş xəttinə doğru saatda 300 kilometri aşan sürət hərəkətini yaxından müşahidə edə biləcəklər.

Bulvar tribunası

Dənizkənarı parkın Muzey Mərkəzi və Xəzər tribunası ilə üzbəüz hissəsində yerləşən Bulvar tribunasından da bolidlərin start-finiş xəttinə doğru saatda 300 kilometri aşan sürət hərəkətini izləmək imkanı olacaq.

Sahil tribunası

Dənizkənarı park boyunca davam edən sürət xətti üzərində 20-ci döngədə yerləşən Sahil tribunasından tamaşaçılar yolun iki müxtəlif hissəsini eyni anda izləmək imkanına malik olacaqlar. Trekin bu tribunadan görünən hissəsində bolidlər həm soldan sağa doğru start-finiş istiqamətində tam sürətlə, həm də trekin digər tərəfində 5-ci və 6-cı döngələri asan keçmək üçün aşağı sürətlə hərəkət edəcəklər. Bu da, öz növbəsində, tamaşaçılara avtomobil və sürücüləri yaxından izləmək üstünlüyü verəcək.

Muğam tribunası

Dənizkənarı parkda yerləşən Kukla Teatrının qarşısındakı Muğam tribunasından insanlar yolun çarpaz hissəsində görüşən bolidləri eyni anda müşahidə edə biləcəklər. Trekin Muğam tribunasının düz qarşısında yerləşən qismində bolidlər həm soldan sağa doğru start-finiş istiqamətində, həm də buna əks istiqamətdə, sağdan sola doğru 7-ci döngəyə tərəf, şəhərin tarixi hissəsinə dönənədək tam sürətlə hərəkət edəcəklər.

İçərişəhər tribunası

Qala qapılarının yanında yerləşən İçərişəhər tribunası yarışı izləməklə yanaşı, qədim şəhərin gözəlliklərinə tamaşa etmək baxımından da unikal mövqeyə malikdir. Bu tribunada tamaşaçılar yarışı trekin İçərişəhər divarları boyu uzanan yoxuş yolunun ən hündür nöqtəsindən izləyəcəklər.

Qız qalası tribunası

Qız qalası ilə üzbəüz yerləşən tribunada UNESCO-nun mədəni irsinə daxil edilmiş bu tarixi abidənin nadir mənzərəsi fonunda "F1” bolidlərinin yürüşünü seyr etmək imkanı yaranacaq. Bu tribunada olan yarış həvəskarları bolidlərin buradan 18-ci döngəyə tərəf son sürətlə hərəkətini və onların Qız qalasının tam qarşısından keçməklə sürət zolağı boyunca davam edəcək gərgin mübarizəsini izləyə biləcəklər.

Azneft tribunası

Bu tribuna Azneft dairəsi ətrafında yarışı yaxından izləməyə imkan verən mükəmməl mövqedə yerləşir. Buraya bilet alan tamaşaçılar Dənizkənarı parkın Bakı tennis və yaxt klublarına yaxın olan hissəsində qərarlaşmış nəfəsçəkici 16-cı döngəni ən yaxşı yerdən müşahidə etmək imkanına malik olacaqlar. Trekin eniş hissəsinin düz qurtaracağında yerləşən Azneft tribunasında tamaşaçılar bolidlərin 16-cı döngəyə qədər amansız rəqabətini, kəskin dönüşlərini və döngənin ardınca sahil boyu uzanan sürət zolağında ötüşməsini əvəzolunmaz mövqedə izləyəcəklər. Tribuna aşağı və yuxarı hissələrdən ibarətdir.

Filarmoniya tribunası

Filarmoniya tribunasında tamaşaçılar Filarmoniya bağının qarşısında, trekdəki kəskin enişin 16-cı döngəyə keçdiyi hissədə davam edən gərgin mübarizəni izləmək imkanına malik olacaqlar.

Yeniliklərin tətbiq edildiyi Bakı trası

"Formula-1” yarışlarında Bakı yeniliyin tətbiqi ilə də yaddaşlara həkk olunub. Xatırladaq ki, 2016-cı ildəki dünya çempionatında "F1” Bakı mərhələsində sıralama turları ilə bağlı yenilik etmişdi. Belə ki, əvvəlki qaydalara görə, 18 dəqiqə davam edən birinci və 15 dəqiqəlik ikinci seansların nəticələrinə əsasən ən pis nəticə göstərən 6 pilot mübarizədən kənarlaşdırılmışdı. 10 pilot isə 12 dəqiqəlik üçüncü seansdakı göstəricilərə görə yarışa start vermişdi. Bakı mərhələsində tətbiq edilən yeni qaydalarda isə seansın sonunda yox, 90 saniyədən bir ən yavaş pilotun mübarizəni dayandırması nəzərdə tutulmuşdu.

Məhz Bakıdakı yenilik son 3 mövsümdür "Formula-1” mütəxəssislərinin rəylərinə görə, yarışlarda həyəcanı bir qədər də artırıb.

"Formula-1” yarışlarında mübarizə aparan ən məşhur pilotlar da Bakıda bu yarışın ən yeni və ən sürətli şəhər treki sayılan Bakı Şəhər Halqasında növbəti dəfə yarışmağı həyəcanla və səbirsizliklə gözləyirlər. Pilotların trekdən qalib ayrılmaq üçün bütün güclərini səfərbər edəcəkləri hiss olunur.

Valteri Bottas, Daniel Rikkardo, Maks Ferstappen, Felipe Massa, Serxio Perez və digər pilotları gözoxşayan mənzərəyə sahib olan Bakıda həyəcanlı və çətin yarış gözləyir. "Formula-1” təqvimində Bakı Şəhər Halqasını özünəməxsus edən ensiz hissələr, 90 dərəcəli döngələr, yoxuşlar və uzun sürətlənmə hissələri enli təkərli bolidlər üçün mübarizə şərtlərini ötən illərlə müqayisədə daha da maraqlı edəcək.

Elçin CƏFƏROV

Azərbaycan.- 2019.- 5 aprel.- S.1; 4.