“Qarabağ şikəstəsi” vətənpərvərlik duyğularına köklənib

 

Yeni nəşrlər

 

Şairə və dramaturq, Çexiyada yaşayan həmvətənimiz Leyla Bəyimin (Cəfərovanın) "Qarabağ şikəstəsi” adlı miniatür kitabı işıq üzü görüb. Kitabda müəllifin eyniadlı poeması rus və Azərbaycan dillərində tədqim edilib.

"Qarabağ şikəstəsi” miniatür kitabı 65x50 millimetr ölçüdə, 168 səhifədən ibarətdir. Kitab Miniatür Kitab Muzeyinin sifarişi ilə "İndiqo” nəşriyyatında dörd dildə - Azərbaycan, rus, ingilis və alman dillərində 100 nüsxə tirajla nəşr olunub. Miniatür kitabın üz qabığında rus rəssamı Nikolay Sverçkovun "Qarabağ atı” (1865) əsəri təsvir edilib.

Kitabda yer alan "Qarabağ şikəstəsi” poeması Qarabağ ağrısı, səmimi vətənpərvərlik hisləri ilə dolu olan bir əsərdir.

Miniatür kitabın müəllifi Leyla Bəyim Bakıda anadan olub, hazırda Praqada yaşayır. Azərbaycan Yazıçılar Birliyinin, Avropa Ədibləri Konqresinin və Çexiyanın Rusdilli Yazıçılar İttifaqının üzvüdür, 4 şeirlər toplusunun müəllifidir. Yefim Abramovla birlikdə bir neçə pyes qələmə alıb. Onlardan biri - "Xəyalpərəst oğlanlar” Azərbaycan Gənc Tamaşaçılar Teatrında səhnələşdirilib. Əsərlərini rusca yazan Leyla Bəyimin şeir və pyesləri çex dilində də dərc edilir.

 

Azərbaycan.- 2019.- 7 aprel.- S. 7.