ADA Universitetində 44 ölkənin milli mədəniyyət nümunələri sərgilənib

Aprelin 18-də ADA Universitetinin Tələbə Mərkəzində təşkil olunmuş sərgidə əcnəbi tələbələr və xarici dövlətlərin səfirlikləri stendlər quraraq ölkələrinin milli mədəniyyətlərini, kulinariyasını, incəsənət nümunələrini nümayiş etdiriblər.

AZƏRTAC xəbər verir ki, sərgi VIII Beynəlxalq Festival çərçivəsində təşkil olunub. Artıq ənənəyə çevrilmiş festivalda bu il 44 ölkə və Avropa İttifaqının Azərbaycandakı nümayəndəliyi iştirak edib.

ADA Universitetinin prorektoru Fariz İsmayılzadə hazırda bu ali təhsil ocağında 40 ölkədən yüzə yaxın xarici tələbənin təhsil aldığını deyib. Qeyd edib ki, onların bir hissəsi Xarici İşlər Nazirliyi tərəfindən maliyyələşdirilən Əlimərdan bəy Topçubaşov adına beynəlxalq təqaüd proqramını qazananlardır. Bugünkü festivalda xarici dövlətlərin ölkəmizdə akkreditə olunmuş səfirliklərinin nümayəndələri, beynəlxalq təşkilatların əməkdaşları, habelə azərbaycanlı və əcnəbi tələbələr iştirak edirlər. Əvvəlki festivallarla müqayisədə bu festivalda daha çox qonaq iştirak edir.

Azərbaycan.- 2019.- 19 aprel.- S.7.