Paytaxtın “Formula-1” günləri

Azərbaycan bir nömrəli sürət yarışının ən mükəmməl təşkilatçılıq modelini yaradıb

Bakı indiyədək bir sıra nüfuzlu idman yarışlarına evsahibliyi edib. Ölkəmiz son 3 ildə "Formula-1” yarışlarını keçirməklə nümunəvi təşkilatçılığı və qonaqpərvərliyi ilə dünyanı heyran edib. Sayca 4-cü dəfə ölkəmizdə keçirilən bu idman yarışı da Bakı sakinləri tərəfindən böyük maraqla qarşılanır. Bunu bilet alışında yerli azarkeşlərin üstünlük təşkil etməsi də göstərir.

Ümumiyyətlə isə "Formula-1” SOCAR Azərbaycan Qran-prisinə dünyanın 67 ölkəsindən bilet alınıb. İndiyədək satılan biletlərin 39 faizi Azərbaycandan, qalan hissəsi isə xaricdən - ən çox isə Rusiya və Böyük Britaniyadan alınıb. Sonrakı sıralarda Avstriya, Gürcüstan və Niderland yer tutur. İlk onluqda isə Türkiyə, Birləşmiş Ərəb Əmirlikləri, Ukrayna və ABŞ qərarlaşıb.

Azarkeşlər pilotlarla görüşür

Bakıda keçirilən Azərbaycan Qran-prisinin digər maraqlı tərəfi tamaşaçıların əyləncəsi və mənalı istirahəti üçün təşkil edilən tədbirlərdir. Bunlardan biri "Formula-1” pilotları ilə tanışlıqdır. Aprelin 26-dan etibarən "Formula-1” azarkeşləri sevdikləri pilotlarla görüşərək onlardan avtoqraf almaq imkanı qazanıblar.

Azarkeşlər avtoqraf sessiyasının ilk günündə "Red bull Racing”, "Ferrari” və "Renault” komandalarının pilotları ilə görüşüblər. Dünən isə "Racing Point”, "Alfa Romeo” və "Mercedes” komandalarının ən məşhur pilotları ilə görüşüb, onlardan avtoqraflar alıblar.

Salam, Bakı

Bir neçə gündür Azneft meydanından Dəniz Vağzalına qədər bütün Dənizkənarı Milli Park ərazisində əyləncə zonaları fəaliyyətə başlayıb. Həmçinin azarkeşlər üçün pit yolu gəzintisi təşkil olunub. Bununla da onlar "Formula-1” aləminə daha da yaxınlaşıblar. Gəzinti zamanı azarkeşlər pit yolunu keçərək komandaların yarışa hazırlığına şahidlik edir, pit-stop əməliyyatlarını öz gözləri ilə görə bilirlər. İzləyicilər komandaların qarajlarında dünyanın ən innovativ yarış avtomobillərinin mühəndis və mexaniklər tərəfindən necə sazlanması prosesinin şahidi olurlar.

Tamaşaçılar üçün ən maraqlı oyun zonası da qurulub. Bayram ab-havasına bürünmüş Bakıda sürət və adrenalin həvəskarları məhz bu məkana toplaşırlar. Çünki burada sürət sevən fanatlar simulyatorlarda test edərək özlərini əsl "F1” sürücüsü kimi hiss edirlər. Azarkeşlər bu oyunlarda sanki Azərbaycan Qran-prisinin bir hissəsinə çevrilərək bu mötəbər yarışın həyəcanını yaşayır, onun adrenalinindən zövq alırlar. Uşaqlar üçün əyləncəli yarışların təşkili də unudulmayıb. Burada uşaqlar üçün əyləncəli və təhlükəsiz mühitdə yol hərəkəti qaydalarını öyrədən sürücülük məktəbi yaradılıb. Bundan əlavə, uşaqlar müvəqqəti kartinq halqasında dövrələri daha tez başa vurmaq üçün yarışırlar.

Dünya ulduzunun ifasında möhtəşəm konsert

"Formula-1” SOCAR Azərbaycan Qran-prisinin ikinci gününün həyəcanlı və maraqlı yarışlarından sonra azarkeşlər axşam saatlarında "Baku Crystal Hall”a toplaşıblar. Britaniyalı müğənni Cessi Cey Bakıda avtoidman azarkeşlərinin qarşısında səhnəyə çıxıb. O, "Formula-1” həvəskarları üçün ən məşhur ifalarını səsləndirib.

Qeyd edək ki, müğənninin "Who You Are” albomu ona "BRITS Critics' Choice” mükafatını qazandırıb. Bundan sonra sənət fəaliyyətinə bir qədər fasilə verən Cessi Cey yalnız altı il sonra öz etiraflarını bölüşdüyü "R.O.S.E” albomunu çıxarıb.

Xatırladaq ki, daha öncə 27 aprel konsertində britaniyalı müğənni Sem Smitin çıxış edəcəyi nəzərdə tutulmuşdu. Lakin Cənubi Afrika turu zamanı müğənninin səhhətində problem yaranıb və həkimlər konsert proqramlarının ləğvini məqbul hesab ediblər. Odur ki, Bakıya onun həmyerlisi Cessi Ceyi dəvət etmək qərara alınıb. Enerjili və coşqulu ifalar konserti dinləməyə gələnlərə unudulmaz gecə yaşadıb.

Beləliklə, Bakıda bu gün yekunlaşacaq Azərbaycan Qran-prisi göstərir ki, "Formula-1” təkcə yarış deyil, həm də yaddaşlarda iz buraxacaq istirahət üçün möhtəşəm bir tədbirdir.

Elçin CƏFƏROV

Azərbaycan.- 2019.- 28 aprel.- S.7.