Nəcib əməllər və yüksək humanizm nümunəsi

 

Birinci vitse-prezident Mehriban Əliyevanın siyasi-ictimai fəaliyyəti yalnız ölkəmizdə deyil, bütün dünyada Azərbaycan qadınının müsbət obrazının formalaşmasında müstəsna rola malikdir. Onun təşəbbüsü ilə respublikamızda sosial, səhiyyə, elm və təhsil, mədəniyyət və digər sahələrdə həyata keçirilən tədbirlər xalqımız tərəfindən böyük rəğbətlə qarşılanır. Bu tədbirlər həm də dövlət siyasətinin daha böyük uğurlar qazanmasında böyük rol oynayır.

 

Bununla bağlı Milli Məclisin deputatlarının da fikirlərini öyrəndik.

 

Ümidlərin gerçəkləşən ünvanı

 

Bahar MURADOVA,

 

Milli Məclis Sədrinin müavini, İnsan hüquqları komitəsinin sədri,

 

YAP İdarə Heyətinin üzvü:

 

- Bugünkü Azərbaycan qadını haqda danışarkən ilk növbədə Şərqə məxsus milli mənəvi və əxlaqi dəyərlərlə Qərbin mütərəqqi yeniliklərinin uğurlu vəhdətini özündə birləşdirən müasir qadın obrazı təsəvvürə və göz önünə gəlir. Artıq kütlə şüurunda özünə min illərlə kök salmış, qadınların hüquqlarından daha çox vəzifələri barədə düşüncələrə yol açan yanaşmaları özündə ehtiva edən stereotiplər sürətlə aradan qalxmaqdadır. Müstəqilliyimizin bərpasının bizə qazandırdığı əsas nailiyyətlərdən biri qadınlarımızın ictimai fəallığının və siyasi çəkisinin artması, dövlət və cəmiyyət həyatına daha geniş nüfuz etməsi, hüquqi baxımdan daha güclü mövqelər əldə etməsidir.

Tarixin yerini və taleyini müəyyən etdiyi ən görkəmli şəxsiyyətlərdən biri, klassik örnəklərimizin layiqli davamçısı, müasir Azərbaycan qadınlarının ən parlaq nümayəndəsi Mehriban xanım Əliyevadır.

Bu gün onun haqqında hər kəs, bir də hər kəsdən daha çox gördüyü işlər, həyata keçirdiyi çoxsaylı layihələr danışır. Xeyirxahlığı, humanistliyi ilə yanaşı, zərifliyi və tükənməz gücündən... Vətənpərvər və milli olduğu qədər bəşəri və insansevər olmasından... Ehtiyacı olanlara diqqət və qayğısı ilə yanaşı, təhsilə, sağlamlığa, ətraf mühitin qorunmasına verdiyi önəm barədə...

Milli-mənəvi dəyərlərimizin, zəngin mədəni irsimizin qorunmasına, inkişaf etdirilməsinə və tanıdılmasına yönəlmiş fəaliyyəti ilə yanaşı, dünya ölkələri və xalqlarının mədəniyyətinə göstərdiyi xidmətlər haqda... Tolerantlığın və multikulturalizmin qanunlar və siyasi hədəflərə yönəlmiş konsepsiyalarda nəzərdə tutulmuş vəzifələr toplusu halında deyil, bir yaşam tərzi, bir ictimai şüur formasında dərk və qəbul edilməsinə hesablanmış layihələrindən...

Eləcə də dini-etnik bölücülüyə, müharibələrə, insan qırğınına, ayrı-seçkiliyin bütün formalarına qarşı səmərəli və səfərbəredici fəaliyyətindən... Milli və beynəlxalq miqyasda təhsil, səhiyyə, idmana qayğısından... Ailə, qadın və uşaq problemlərinin məişət səviyyəsində deyil, milli və beynəlxalq miqyasda müəyyənləşdirdiyimiz hədəf və öhdəliklərimizə uyğun şəkildə, ictimai-siyasi və iqtisadi parametrlərin balansı gözlənilməklə həllinə çalışmasından... Qarabağ probleminə dair həqiqətlərin beynəlxalq miqyasda çatdırılmasının ən təsirli formalarının müəyyənləşdirilməsi və səmərəli istifadəsinə yönəlmiş yorulmaz fəaliyyəti barədə...

Cəmiyyətin bütün təbəqələrinin, xüsusilə həssas qrupların ictimai və sosial maraqlarının nəzərə alınmasına, mövcud problemlərinin həllinə yönəlmiş qanunverici əsasların və yeni icra mexanizmlərinin yaradılmasına dair təşəbbüslərindən... Mülki və cinayət qanunvericiliyi ilə problemi, üzərində məhkəmə hökmü olanlara qarşı humanizm və ədalət prizmasından yanaşmaların bərqərar olması, xəta, hüquqa zidd əməllər törətmiş şəxsləri cəmiyyətə qazandırmaq üçün davamlı təşəbbüslərinin real nəticələrindən... Mədəniyyətlər və dinlər, o cümlədən sivilizasiyalararası dialoqun inkişafına verdiyi töhfələrdən...

Bütün xırdalıqlarına qədər sadalanması mümkün olmayan bu fəaliyyətləri haqda "həyat kitabını” o öz təşəbbüsü ilə yazmaqdadır. Bu kitabın digər səhifələrində o öz valideynlərinin, layiqli davamçısı kimi onları varlığı ilə fəxr etməyə vadar edən layiqli övlad kimi görünür. Eyni zamanda, Azərbaycana üç gözəl övlad, eləcə də dövləti və milli maraqları naminə bütün imkanlarını sərf etməyi özləri üçün bir vəzifə bilən əsl vətəndaş və insan bəxş edən bir ana kimi...

Onun bir qadın olaraq ailə dəyərlərini yüksək tutması, öz həyat yoldaşına bütün hallarda dayaq olmaqla yanaşı, taleyin və zamanın üzərinə qoyduğu statusu nəinki ləyaqətlə daşıması, eləcə də ona yeni məna və məzmun gətirməsi bütün dünya ölkələri birinci xanımları üçün əvəzsiz örnəkdir.

Bütün bu keyfiyyətlərin məcmusunu xarakterizə edən əsas cəhət isə, əlbəttə ki, müstəqil Azərbaycan dövlətinin yaradıcısı, onun ideya əsaslarının proqram sənədlərində və gündəlik fəaliyyətində əksini tapdığı Yeni Azərbaycan Partiyasının qurucusu, Ümummilli Lider Heydər Əliyevin ideyalarının reallaşmasında cənab Prezident İlham Əliyevin ən yaxın silahdaşı olmasıdır.

O, YAP-ın sədr müavini, Heydər Əliyev Fondunun prezidenti və Azərbaycan Respublikasının Birinci vitse-prezidenti kimi "özü tərəfindən dərk edilmiş” və rəsmən üzərinə qoyulmuş xalqın və dövlətin taleyinə cavabdehlik "məsuliyyətini” ləyaqətlə daşımaqdadır.

Bütün bunların rəsmi təsdiqi isə özünü Azərbaycanın, aparıcı dünya ölkələrinin və mötəbər beynəlxalq təşkilatların çoxsaylı titullarına, yüksək mükafatlarına, orden və medallarına layiq olmasında göstərir.

Azərbaycan qadını bir şəxsin timsalında bu qədər çoxşaxəli, konkret nəticələri ilə nəzərə çarpan və elə bununla da dünyanın diqqətini öz ölkəsinə yönəltməyə yalnız Mehriban Əliyevanın sayəsində nail ola bilmişdir. Özü də bu, yalnız Azərbaycanın deyil, dünya qadınlarının məhz onun timsalında qazandığı nailiyyətdir.

Mehriban xanım dünyada hamıya və hər kəsə sübut elədi ki, ən çətin və problemli sahələrdə uğur qazanmaq insanların rəğbətindən və sevgisindən elə onların mənafeyi üçün istifadə etməyi öz fəaliyyətinin əsas məzmununa çevirməkdən, humanizm, mərhəmət və mənəviyyata söykənən mövqe sərgiləməkdən keçir. Özü də o halda ki, qazanılan bu uğurlar yenə də insana, insanlığa xidmət eləsin.

O bunu bacardı! Bir azərbaycanlı kimi bacardı. Azərbaycan qadını adına, xalqımız və dövlətimiz adına bacardı. Öz zəhməti, qeyri-adi səfərbəredici gücü, möhkəm xarakteri, prinsipiallığı və bəlli hədəflərə doğru məqsədyönlü fəaliyyətilə... Yeni bir standartda, yeni bir siyasətçi tipi, "mükəmməl qadın” obrazında bacardı!!!

 

Əsl vətəndaşlıq mövqeyi

 

Rafiq MƏMMƏDHƏSƏNOV,

 

Milli Məclisin deputatı, tibb elmləri doktoru, professor:

 

- Hər birimizin qarşısında duran vəzifələrdən ən önəmlisi daim vətəndaşlıq mövqeyindən çıxış etmək, Azərbaycanın daha da inkişafı üçün çalışmaqdır. Bu şərəfli vəzifələrin reallaşması naminə səy göstərmək, əlindən gələni etmək hər bir azərbaycanlının borcudur. Bu yolda öz fəaliyyəti və əməlləri ilə nümunələr yaradan Birinci vitse-prezident xanım Mehriban Əliyevanın həyata keçirdiyi çoxşaxəli fəaliyyət hər bir vətəndaş tərəfindən dərin məmnuniyyət hissi ilə qarşılanır.

Respublikamızın Birinci vitse-prezidenti olmaqla yanaşı, Heydər Əliyev Fonduna, Azərbaycan Mədəniyyətinin Dostları Fonduna, Gimnastika Federasiyasına rəhbərlik edən Mehriban xanım Əliyevanın fəaliyyəti çoxşaxəlidir. Bu fəaliyyət hər addımda Ulu Öndər Heydər Əliyevin xalqımızın işıqlı gələcəyinə yönəlmiş ideallarının reallaşmasına, Prezident İlham Əliyevin həyata keçirdiyi siyasi, sosial-iqtisadi, mədəni-humanitar kursun dəstəklənməsinə və uğur qazanmasına xidmət edir.

Azərbaycan və eləcə də dünya ictimaiyyəti Mehriban Əliyevanı ilk növbədə böyük xeyriyyəçi, qayğıkeş insan kimi tanıyır. Mehriban xanım Əliyevanın təşəbbüsü ilə sosial qayğıya ehtiyacı olan insanların, qaçqınların və məcburi köçkünlərin, talassemiya və diabet xəstəliklərindən əziyyət çəkən vətəndaşların dəstəklənməsinə yönəlmiş müxtəlif proqramlar məhz bu məqsədə xidmət edir. Bu xeyriyyəçilik təbdirləri nəticəsində yüzlərlə insan normal sağlam həyata dönüb.

2004-cü ildən sonra ölkəmizin dörd bir yanında geniş vüsət alan məktəb və xəstəxana tikintisində, müxtəlif xəstəliklərdən əzab çəkən uşaqlar üçün xüsusi tibb müəssisələrinin yaradılmasında, uşaq evlərinin, internat məktəblərinin, uşaq bağçalarının yenidən qurulmasında, tarixi və dini abidələrin bərpasında Mehriban xanım Əliyevanın əzmkarlığını, təhsilimizin inkişafına, milli genofondumuzun qorunmasına xidmət edən əsl vətəndaşlıq missiyasını görürük.

Mehriban xanımın xalq musiqisinin, bənzərsiz muğamlarımızın inkişafındakı xidmətləri günümüzlə səsləşən addımlardır. O, ilk Azərbaycan qadını olaraq UNESKO kimi mötəbər beynəlxalq təşkilatın şifahi ənənələr və musiqi ənənələri sahəsində xoşməramlı səfiri adına layiq görülüb.

Məhz Mehriban Əliyevanın təşəbbüsü ilə həyata keçirilən tədbirlərlə Azərbaycan həqiqətləri uğurla dünyaya çatdırılır. Bütün bunlar erməni yalanlarının sistemli şəkildə ifşa olunmasına, Xocalı soyqırımının tanınmasına, işğal olunmuş torpaqlarımızın azad edilməsi istiqamətində Prezident İlham Əliyevin həyata keçirdiyi siyasi kursun uğurla reallaşmasına dəstək verir.

2005-2017-ci illərdə Milli Məclisin deputatı kimi də Mehriban Əliyeva çox böyük işlər görüb. Lakin təkcə təmsil etdiyi dairədə deyil, bütün ölkə üzrə sosial-iqtisadi problemlərin yoluna qoyulmasında çox böyük addımlar atıb. Seçicilərlə daim təmasda olub və onun deputat kimi əsas fəaliyyəti seçicilərin problemlərinin həllinə yönəlib. Eyni zamanda, Mehriban Əliyevanın parlamentdə dostluq qrupunun sədri kimi fəaliyyəti nəticəsində müxtəlif ölkələrdə qazandığımız dostların sayı artıb.

Mehriban Əliyevanın mükafatları çoxdur. Ən ali mükafatı isə respublikamızda mədəniyyətin, təhsilin, səhiyyənin və idmanın inkişafında səmərəli fəaliyyətinə, Azərbaycan xalqının mədəni irsinin beynəlxalq miqyasda geniş təbliğinə və I Avropa Oyunlarının təşkilində böyük xidmətlərinə görə Prezident İlham Əliyevin 29 iyun 2015-ci il tarixli sərəncamı ilə verilən "Heydər Əliyev” ordenidir. Bu, Azərbaycan dövlətinin Mehriban xanım Əliyevanın fəaliyyətinə və xalqımız qarşısındakı xidmətlərinə verdiyi yüksək qiymətin göstəricisidir.

Vətənə məhz bu cür layiqli xidmət missiyasının nəticəsində iki il əvvəl Mehriban Əliyeva Birinci vitse-prezident vəzifəsinə təyin olundu. Bu gün Mehriban Əliyeva özünə xas olan yüksək işgüzar və mənəvi keyfiyyətlər, dərin təşkilatçılıq və idarəçlik qabiliyyəti ilə ona həvalə edilən bu vəzifəni layiqincə daşıyır, ölkədə həyata keçirilən siyasi kursun uğur qazanmasına mühüm töhfələr verir.

 

Sərhəd tanımayan xoş məram

 

Novruzəli ASLANOV,

 

Milli Məclisin deputatı, Azərbaycan Qızıl Aypara Cəmiyyətinin prezidenti:

 

- "Həyatda hər bir kəsin yerini və taleyini tarix müəyyən edir. Odur ki, nə böyük, nə də kiçik rollar olmur. Öz həyat kitabını yazmağa ancaq sənin şəxsi, dərk edilmiş məsuliyyətin imkan verir. Bu kitabda hər bir kəs özünü şəxsi həyatının və dünyanın qurub-yaradıcısı, yaxud dağıdıcısı kimi təcəssüm etdirir. Kimsənsə, elə də olmalısan - bax budur bizim həyatımız. Ona görə də özgələrin rollarını və obrazlarını gərək öz üzərinə götürməyəsən. Çünki sən də, dünyada yerin də yeganə və bənzərsizdir”.

Həqiqətən, özünün də vurğuladığı kimi, o, bu dünyada yeri, rolu, üzərinə götürdüyü nəcib missiyalarla yeganə və bənzərsizdir. O, təkcə ölkə daxilində yox, bütün dünya miqyasında məşğul olduğu sahələr üzrə yüksək standart müəyyənləşdirən bir xanımdır.

Deyirlər, insan yalnız bu həyatdakı əməlləri, xeyirxahlığı, gördüyü savab işlərlə əbədiyaşar olur. Yaddaşlara yazılır, hafizələrdə iz buraxır, adını tarixə qızıl hərflərlə yazdırır. Elə Azərbaycanın Birinci vitse-prezidenti, Heydər Əliyev Fondunun prezidenti, UNESKO və İSESKO-nun xoşməramlı səfiri Mehriban xanım Əliyeva da Tanrının bu dünyaya ərməğan etdiyi seçilmiş insanlardandır.

Mehriban Əliyeva bu gün çarəsiz insanların həyatda durmaqlarına şans verəni, kimsəsiz, valideyn himayəsindən məhrum uşaqların Mənəvi Anası, dərdli şəhid analarının dayağı, qaçqın və məcburi köçkünlərin yurd həsrətinin təsəlliverənidır. Harada yardıma möhtac biri varsa, o, Mehriban xanımın pənahındadır. Birinci xanım xeyirxah qəlbinin səsi ilə bütün qüvvəsini, zamanını təmənnasız olaraq insanların rifahı, xoşbəxt yaşamı uğrunda sərf edir. Təsadüfi deyil ki, bu gün Azərbaycan Prezidentindən sonra insanların ən çox müraciət etdiyi insan da məhz Mehriban Əliyevadır. Bu, bir daha insanların Birinci vitse-prezidentə olan tükənməz sevgisinin, etibarının, inamının göstəricisidir.

"Uşaqlara yaxşılıq nə qədər çox olsa, yenə azdır” devizini rəhbər tutan Mehriban Əliyeva hər zaman valideyn himayəsindən məhrum uşaqların taleyi ilə maraqlanır, onların gələcək həyatda uğur qazanmaları üçün əlindən gələn hər şeyi edir. Xəstə, xüsusi qayğıya ehtiyacı olan, fiziki, əqli qüsurlu, daun, autizmli uşaqlara maddi və mənəvi qayğı göstərir, onlar üçün yaradılmış mərkəzlərin qonağı olur, əldə etdikləri nailiyyətlərə, sağlamlıqlarında müşahidə olunan irəliləyişlərə sevinir. Amma onu da demək yerinə düşər ki, həmin ünvanlardakı çöhrəsi solmuş, xəstə, çarəsiz uşaqların ağrı-acısını paylaşmaq, bir az da olsa azaltmaq, dərdlərinə şərik olmaq üçün dağ boyda ürəyə sahib olmaq lazımdır...

Mehriban Əliyevanın nəciblik və insanpərvərliyi, yüksək mənəvi keyfiyyətləri və tükənməyən yaxşılıq etmək istəyi, hədsiz xeyirxahlıq və həssaslığı onun şəxsiyyətinin zənginliyinin göstəricisidir. Təsadüfi deyil ki, o, ana və uşaq sağlamlığının qorunması işindəki müstəsna xidmətlərinə görə Ümumdünya Səhiyyə Təşkilatının xüsusi mükafatına, genişmiqyaslı xeyriyyəçilik fəaliyyətinə, bəşəriyyətin ali ideallarına xidmət sahəsindəki yüksək nailiyyətlərinə görə "Qızıl ürək” beynəlxalq mükafatına layiq görülüb.

2004-cü ildə Heydər Əliyev Fondunun fəaliyyətə başlaması ilə daim insanlara mərhəmət, şəfqət bəxş edən birinci xanım, tarixən Azərbaycanda var olan xeyriyyəçilik ənənələrinin yenidən dirçəlməsini və davam etdirilməsini təmin etdi. Bu gün ölkəmizdə elə bir sahə yoxdur ki, Mehriban xanımın rəhbərliyi altında fond o sahəyə yardım, kömək etməsin. Elə buna görədir ki, qısa zaman ərzində Heydər Əliyev Fondu yardıma ehtiyacı olan bütün insanların ümid ünvanına çevrildi.

Mehriban xanım Əliyeva Milli Məclisin deputatı kimi fəaliyyət göstərdiyi müddətdə də digər deputat həmkarlarına öz davranışı, xeyirxah missiyası ilə örnək, təkrarlanması vacib nümunə göstərdi. Məhz Mehriban xanımın təşəbbüsü ilə 4 (2007, 2009, 2013 və 2016-cı illərdə) amnistiya aktı qəbul edildi. Hər dəfə on minlərlə insana şamil edilən bu amnistiyalar insanpərvərliyin, vətəndaş həmrəyliyinin bariz göstəricisi idi.

Mehriban Əliyeva məramı xoş və təkrarolunmaz şəxsiyyətdir. O, UNESKO və İSESKO-nun xoşməramlı səfiridir və dünyada ikinci belə şəxsiyyət yoxdur ki, bu iki mötəbər təşkilatın üzvü olsun.

Mehriban xanımın humanistliyi, xeyirxahlığı heç bir çərçivə, sərhəd tanımır. Dünyanın harasında uşaqlara məktəb lazımdırsa, tikdirir, xəstələrə dayaq durur, dağılan tarixi, dini abidələri bərpa etdirir, gücü çatdığı qədər dünyanın, insanlığın var olması üçün əzmlə çalışır. Həmçinin xalqının haqq səsinin dünyaya çatdırılmasında, Azərbaycanın milli-mənəvi dəyərlərinin təbliği istiqamətində həyata keçirdiyi layihələr, təşkil etdiyi konfranslarla vətənpərvərlik missiyasını layiqincə yerinə yetirir.

2017-ci ildə cənab Prezident İlham Əliyevin sərəncamı ilə Birinci vitse-prezident təyin olunması isə Mehriban xanımın həyatında yeni bir dönəm başlatdı.

Birinci xanımın ölkənin ictimai həyatında göstərdiyi xidmətlərin müstəsnalığı Prezident İlham Əliyevin fikirlərində də öz əksini tapır: "Mehriban Əliyeva uzun illərdir ki, ölkəmizin ictimai-siyasi həyatında, mədəni həyatımızda mühüm və fəal rol oynayır... Çox peşəkar, bilikli, təcrübəli, prinsipial bir insandır, eyni zamanda çox xeyirxah bir insandır və təsadüfi deyil ki, Azərbaycan xalqı ona çox böyük rəğbətlə, sevgi ilə yanaşır. Bütün bu sadaladığım amilləri nəzərə alaraq mən bu qərara gəldim. Bu gün Mehriban Əliyevanın həyatında yeni bir dövr başlayır və əminəm ki, ölkəmizin inkişafında bundan sonra da öz dəyərli töhfəsini verəcək”.

Bəli, Mehriban Əliyeva öz əməlləri ilə insanların dərin rəğbətini qazanıb, Heydər Əliyev Fondu isə haqlı olaraq mərhəmət ünvanı kimi tanınır. İctimai və siyasi fəaliyyətlə yanaşı yaradıcılıq sahəsinə bağlı olduğumdan bütün bunları bəstələdiyim musiqilərdə canlandırmışam. Bu baxımdan hələ illər öncə bəstələdiyim "Öndər Fondu”, "Mehriban insan” kimi mahnılar məhz cəmiyyətin sosial sifarişi olaraq ərsəyə gəlib.

Mehriban xanım insanların nümunə götürəcəyi, bəhrələnəcəyi etalondur. Hər birimiz Mehriban Əliyevaya seçim etdiyi bu müqəddəs və şərəfli yolda uğurlar arzulayır, cansağlığı diləyirik.

 

Xalqın adamı

 

Cavid OSMANOV,

 

Milli Məclisin deputatı, YAP Ağdaş rayon təşkilatının sədri:

 

- Azərbaycan qadınları həmişə cəmiyyətdə, xalqın siyasi və ictimai həyatında fəallıq göstərib. Bu gün də qadınlar müxtəlif sferalardakı fəaliyyətləri ilə ölkəmizdə gedən inkişaf proseslərinə layiqli töhfələr verirlər. Birinci vitse-prezident Mehriban Əliyevanın timsalında isə Azərbaycan qadınının cəmiyyət həyatındakı layiqli yeri, nüfuzu, dövlətə və xalqa xidmət missiyası və işgüzarlığı daha yaxından görünür.

Ümumiyyətlə, Mehriban Əliyevanın fəaliyyətindən söz açarkən ilk yada düşən onun insanlara təmənnasız yaxşılığı, qayğısı, mərhəməti, ehtiyacı olanlara əl tutması və xeyriyyəçiliyidir. Bu yüksək insani keyfiyyətlər isə xalqımızın milli-mənəvi və mental-əxlaqi dəyərlər sisteminin mühüm elementləridir. Mehriban Əliyeva həmişə öz diqqətini əhalinin sosial baxımdan ehtiyacı olan təbəqələrinə, xəstə və valideyn himayəsindən məhrum olmuş uşaqlara kömək göstərilməsinə yönəldir. Eyni zamanda, xalqımızın genetik fondunun qorunub saxlanmasına cəmiyyətin diqqətini cəlb etməyi özünün vətəndaşlıq borcu hesab edir, talassemiya və diabet xəstəliklərindən əziyyət çəkən uşaqların dəstəklənməsinə yönəlmiş müxtəlif proqramların həyata keçirilməsini dəstəkləyir. Təsadüfi deyil ki, 2004-cü ildə yaranan və Mehriban Əliyevanın rəhbərlik etdiyi Heydər Əliyev Fondu müxtəlif sosial proqramlar həyata keçirən xeyirxahlıq ünvanı kimi tanınır. Dahi liderin yaradıcılıq irsinin təbliği və öyrənilməsi ilə yanaşı, bu fond xeyriyyəçiliyi, uşaqlara kömək etməyi, müxtəlif humanitar aksiyalar keçirməyi öz fəaliyyətinin prioritet istiqamətlərindən hesab edir.

Bu yaxınlarda xalqımız müqəddəs Qurban bayramını qeyd etdi. Hər yerdə qurbanlar kəsildi, dualar oxundu. Birinci vitse-prezident bu baryamda da aztəminatlı ailələri unutmadı. Onun təşəbbüsü ilə Heydər Əliyev Fondu tərəfindən 70 minə yaxın aztəminatlı ailəyə qurban payları verildi. Bu da bir daha təsdiq etdi ki, sosial-iqtisadi inkişafa yönəlik dövlət proqramlarına dəstək verən Heydər Əliyev Fondu aztəminatlı ailələri, xüsusi qayğıya ehtiyacı olan şəxsləri daim diqqətdə saxlayır, müxtəlif bayramlar və əlamətdar günləri onlarla birlikdə qeyd edir.

Heydər Əliyev ideyaları ilə silahlanmış, hər zaman peşəkarlığı, işgüzarlığı və prinsipiallığı ilə seçilən Mehriban Əliyevanı xarakterizə edən digər mühüm göstəricilərdən biri milli-mənəvi dəyərlərimizin qorunmasına və dünyada təbliğinə böyük önəm verməsidir. İstər Heydər Əliyev Fondunun prezidenti, istər Azərbaycan Mədəniyyətinin Dostları Fondunun rəhbəri kimi fəaliyyətinin təhlili göstərir ki, milli mədəniyyətimizin qorunması və dünyada təbliği Mehriban Əliyevanın xalqa xidmət missiyasının əsas istiqamətlərindəndir. Belə ki, bunlar son nəticədə nəcib məqsədə - Azərbaycanın dünyada tanıdılmasına xidmət edir. Ötən illər ərzində neçə-neçə tarixi-mədəniyyət abidələrinin yenidən qurulması, muğam musiqi müsabiqələrinin və dünya şöhrətli musiqiçilərin yubileylərinə həsr edilmiş beynəlxalq festivalların keçirilməsi, xarici ölkələrdə müxtəlif sərgilərin təşkili bu ali məramın intişarına yönəlib.

Mehriban Əliyeva həm də Yeni Azərbaycan Partiyası sədrinin müavinidir. Öz fəaliyyəti ilə partiyanın möhkəmlənməsi, sıralarının artması üçün çox böyük əmək sərf edir. 2005, 2010 və 2015-ci illərdə Milli Məclisin deputatı seçilən Mehriban Əliyevanın deputatlıq fəaliyyəti isə parlament tariximizin şərəfli səhifəsidir. Seçicilərə diqqət və qayğısı, təmsil etdiyi ərazilərin sosial problemlərinin həlli yönündə gördüyü misilsiz işlərlə əsl millət vəkilliyinin nümunəsini yaradan Mehriban Əliyeva Milli Məclisin müzakirəsinə təqdim etdiyi layihələrlə qanunvericiliyimizin təkmilləşməsinə böyük töhfələr verib. Cəmiyyət üçün ciddi təhlükə törətməyən minlərlə insanın onun təşəbbüskarı olduğu amnistiya aktı layihələri əsasında həbs yerlərindən buraxılması Mehriban Əliyevanın deputatlıq fəaliyyətinin xoş məqamı kimi hər zaman böyük rəğbətlə xatırlanacaq.

Mehriban Əliyeva bütün cəhətləri ilə xalqın adamıdır, vətəndaşlarımızın birmənalı dəstəyini qazanmış dövlət xadimidir. Ona görə onun 2017-ci ildə ölkəmizin Birinci vitse-prezidenti vəzifəsinə təyin olunması xalqın ürəyindən xəbər verən hadisə kimi tarixə düşdü. Mehriban Əliyevanın Birinci vitse-prezident - Prezident İlham Əliyevin ən yaxın silahdaşı kimi dövlətimizə və xalqımıza layiqincə xidmət edəcəyi, Azərbaycanın daha da çiçəklənməsinə layiqli töhfələrini verəcəyi, xüsusən yenə də sosial qayğıya ehtiyacı olan insanların yanında olacağı fəaliyyətə başladığı ilk günlərdən aydın idi. Təsadüfi deyil ki, Mehriban Əliyevanın Birinci vitse-prezident kimi ilk diqqət yetirdiyi məsələlər Bakı və Sumqayıt şəhərlərinin yataqxanalarında müvəqqəti məskunlaşmış qaçqın və məcburi köçkün ailələrinin yeni mənzillərə köçürülməsi, 2016-cı ilin Aprel döyüşlərində yaralanmış əsgər və zabitlərin yüksək texnologiyalı protezlərlə təmin edilməsi, əlilliyi olan şəxslərin sosial müdafiəsi, reabilitasiyası və cəmiyyətə inteqrasiya məsələləri olmuşdu. Bir neçə gün əvvəl isə Ali Hərbi Məktəbin bir qrup məzunu ilə şəhidlərin xatirəsini yad etməsi isə bir daha göstərdi ki, Mehriban Əliyeva vətənpərvər xanım kimi daim xalqın içindədir.

Bütövlükdə Mehriban Əliyevanın Birinci vitse-prezident kimi fəaliyyəti göstərir ki, görülən bütün işlər, atılan addımlar yalnız bir məqsədə - Prezident İlham Əliyevin inkişaf strategiyasının uğurla reallaşmasına, Azərbaycanın beynəlxalq nüfuzunun daha da yüksəlməsinə xidmət edir. Bu mənada Mehriban Əliyevanın fəaliyyəti Prezident İlham Əliyevin həyata keçirdiyi siyasi xətti uğurla və layiqincə tamamlayır.

 

Rəşad BAXŞƏLİYEV,

 

Rəşad CƏFƏRLİ

 

Azərbaycan.- 2019.- 30 avqust.- S. 3.