İlham Əliyev erməni faşizmini növbəti dəfə ifşa etdi

Dünya miqyasında ən böyük təhdidlərdən biri də bu gün neofaşizmin yenidən təşəkkül tapmasıdır. Hazırda neofaşist ideyaları bəşəriyyətə qarşı yönəlmiş qanlı siyasət kimi qiymətləndirilir və onunla qətiyyətli mübarizə mühüm vəzifəyə çevrilir. Çünki beynəlxalq ictimaiyyət belə düşmənçilik yaradan təbliğatın yenidən dünyanı böyük fəlakətlərə sürükləyə biləcəyini yaxşı dərk edir. Lakin bəşəriyyətin daha böyük inkişafa doğru irəlilədiyi bir vaxtda elə ölkələr də tapılır ki, neofaşizmi dövlət siyasəti səviyyəsinə yüksəldirlər.

Bu xüsusda neofaşizm ideyalarını dirçəltməyə və yaymağa can atan Ermənistan indi daha çox seçilməkdədir. Neofaşizm bu gün Ermənistanda yeni intibah mərhələsini yaşamaqda, çoxsaylı tərəfdarlar toplamaqdadır. Ermənistanda hitlerçilərlə çiyin-çiyinə insanlığa qarşı saysız-hesabsız cinayətlər törətmiş erməni caniləri qəhrəman kimi təqdim olunur, onların nifrətamiz xatirəsi əbədiləşdirilir, abidələri ucaldılır. Belə mənfur "qəhrəman”lardan biri Njde ləqəbli cinayətkar general Qaregin Yegişeviç Ter-Arutyunyandır.

İkinci Dünya müharibəsində nasistlərin tabeliyində olan hərbi birləşməyə başçılıq edən erməni əsilli Qaregin Ter-Arutyunyana (Njdeyə) Yerevanın mərkəzində abidə ucaldılıb.

Kütləvi insan qırğınlarında fəal iştirak edən Njdenin adına Yerevanda bir prospekt, böyük meydan, onun ətrafındakı metro stansiyası, bir kənd verilib. Nə qədər qəribə olsa da, nasizmi qəhrəmanlaşdıranlar Avropada yox, dünyanın başqa bir regionunda - MDB məkanında çoxdandır fəaliyyət göstərirlər və onlara "gözün üstə qaşın var” deyən də yoxdur.

Söhbət, ilk növbədə, Ermənistandan gedir. Rəsmi Yerevan nasizmin məşhurlaşdırılmasında artıq lider mövqeyindədir.

Bu günlərdə ilin yekunları ilə bağlı yerli jurnalistlərə verdiyi müsahibəsində Azərbaycan Prezidenti İlham Əliyevin Ermənistanda faşistlərin qəhrəmanlaşdırılması ilə bağlı tutarlı fikirləri növbəti dəfə geniş ictimaiyyətin diqqətini çəkib. Dövlət başçısı deyib ki, MDB məkanında faşizmin qəhrəmanlıq kimi qələmə verilməsinə yer yoxdur: "...Rəsmi bəyanatlarda müharibənin tarixi nəticələri və Sovet İttifaqının qələbənin əldə edilməsində əsas rolu haqqında fikir ayrılığı yoxdur. Eyni zamanda, faşistlərin qəhrəmanlaşdırılması ilə bağlı fikirlər də üst-üstə düşür. Belə olan halda necə ola bilər ki, İrəvanda, şəhərin mərkəzində faşist cəlladı Njdeyə altı metrlik abidə ucaldılır və bu abidənin açılışında Ermənistanın prezidenti və bütün rəhbərlik iştirak edir. Bu, nə deməkdir?! ...Sadəcə olaraq, MDB Zirvə görüşünün gündəliyindəki məsələlərdən biri də Qələbənin 75 illiyinə hazırlıq idi. Mən bu məsələni açıq və arqumentlərlə dilə gətirdim, tarixi sənədlərə istinad etməklə Njdenin faşist və cəllad sifətini ifşa etdim. Njdenin cinayətləri təkcə İkinci Dünya müharibəsi illərində törətdiyi cinayətlərlə məhdudlaşmır. O, dinc Azərbaycan əhalisinə qarşı qəddarlıq, soyqırımı törətmişdir, minlərlə günahsız azərbaycanlını qətlə yetirmişdir. Bütün bunlar tarixi faktlardır”.

Göründüyü kimi, on minlərlə insanın, dinc sakinin öldürülməsində iştirak edən, Ukrayna və Polşada çoxsaylı qətllər, qarətlər törədən, yəhudilərə və nasist ideologiyasına nifrət edən xalqların nümayəndələrinə qarşı amansızlığı ilə fərqlənən Njdeyə İrəvanda abidə ucaldılması Ermənistan hakimiyyətinin nasizmə, zülmə, qəddarlığa məhəbbətindən xəbər verir. Bunu qəhrəmanlıq sayan Ermənistan hakimiyyətinin nasistlərə satılan, minlərlə insanın qanını axıdan bir cəllada abidə qoyması faşizmə qarşı mübarizə aparmış bütün xalqlara və millətlərə ən böyük hörmətsizlik, təhqir, xəyanətdir.

İndi Ermənistan iqtidarı əli minlərlə günahsız adamın qanına batmış bu hərbi caniyə yeni don biçməyə çalışır - guya Njde əsl erməni vətənpərvəridir, onun "ideya”ları hələ də aktualdır və s. Ancaq erməni millətçiləri Njde və Dronun vermaxtla əlaqələrinin üstündən sükutla keçirlər, çünki bu "qəhrəman”ların alman nasistləri ilə sıx işbirliyi danılmaz faktdır. Bu məsələyə toxunan İlham Əliyev qeyd edib: "...Əgər yadınızdadırsa, mən o çıxışda bildirdim ki, bunu Ermənistanın əvvəlki rəhbərliyi edib. Yəni mən baş nazir Paşinyana bir növ imkan verdim ki, o, bu çirkin əməli öz boynuna almasın. Çünki onun bu abidənin ucaldılmasında iştirakı olmayıb.

Ancaq əfsuslar olsun ki, düzgün yanaşma göstərməkdənsə, o, çox qeyri-adekvat bəyanatlarla Njdeyə bəraət qazandırmağa çalışdı. Arqumentlərin biri də o olmuşdur ki, - çünki mən dedim ki, o, "SMERŞ” tərəfindən həbs olundu, "SMERŞ” də abreviaturadır, "Smertğ Şpionam” - "Casuslara ölüm”, - və 25 il müddətinə məhkum edildi, öz həyatını Vladimir həbsxanasında bitirdi. Onun da arqumenti o oldu ki, Soljenitsın da sovet rejimi tərəfindən həbs olunmuşdur. Mən ondan sonra bir daha söz alıb dedim ki, cəlladı, faşisti Soljenitsın ilə eyniləşdirmək olmaz.

Bu, qətiyyən qəbuledilməzdir. Mən gözləyirdim ki, bundan sonra artıq sakit bir şəraitdə öz müşavirlərinin köməyi ilə Ermənistan bir çıxış yolu axtaracaq, hər hansı bir məqbul formada bunu təkzib edəcək. Amma biz bunun tam əksini gördük... Njdenin məşhur şüarı o idi ki, "Almaniya uğrunda ölən Ermənistan uğrunda ölür”. Yəni o, faşistdir və bunu İkinci Dünya müharibəsi zamanı demişdir. Ona görə əlbəttə ki, Ermənistan rəhbərliyinin belə cəfəng sözləri ciddi qəbul oluna bilməz”.

Beləliklə, faşistə və terrorçuya ehtiram göstərmək Ermənistanın ictimai-siyasi həyatında heç də yeni bir hal deyil. Belələrini qəhrəmanlaşdırmaq Ermənistanın dövlət siyasətinin əsas prioritetlərindəndir. Njde ləqəbli faşizmə xidmət etmiş terrorçuya Yerevanda heykəl qoyulması hitlerçiliyin açıq-aşkar təbliğatıdır. Bu cür hadisələr erməni cəmiyyətində ancaq faşizm prinsiplərini formalaşdıra bilər ki, Ermənistan rəhbərliyinin də hədəfi məhz bundan ibarətdir.

Elçin CƏFƏROV

Azərbaycan.- 2019.- 30 dekabr.- S. 1; 5.