Unudulmaz sənətkar

 

Mehdi Məmmədov - 100

 

Amiranə səsi, ağayana duruşu, əzəmətli görünüşü ilə o, səhnəyə yaraşırdı. Elə sənət yolunda fəaliyyətə də aktyorluqla başladı.

Müxtəlif teatrlarda səhnələşdirilən "Qaçaqlarda Karl Moor, "Almazda Hacı Əhməd, "Yanğın”da Gənc aqronom, "Kölgə”də Bəxtiyar, "Vaqif”də Eldar, "Alovda Kamalov, "Canlı meyit”də Protasov, "Xəyyam”da Xəyyam, "Meşşanlarda Terenti Teterovbaşqa tamaşalarda bir-birindən maraqlı, fərqli rollar ifa etdi. Radio teatrı onun ifası ilə zənginləşdi.

Azərbaycan kino sənətinə də Mehdi Məmmədovun adı kinoaktyor kimi yazıldı. "Azərbaycanfilm”in 1959-cu ildə istehsal etdiyi "Onu bağışlamaq olarmı?” filmində çəkildiyi Qaya rolu ona kino sənətində də sevgi qazandırdı.

Mehdi Məmmədov nadir istedada malik rejissor idi. O, Gəncə Dövlət Dram Teatrında (1942-1945), Opera Balet Teatrında (1956-1960), Akademik Milli Dram Teatrında (1960-1963), Rus Dram Teatrında (1978-1982) baş rejissor oldu. Azərbaycan dünya dramaturqlarının dərin məzmunlu, fərqli janrlı bir çox əsərinə quruluş verdi. Neçə-neçə istedadlı aktyor Mehdi Məmmədov məktəbini keçdi.

O həm sevilən, heyranlıq duyulan müəllim idi. Mehdi Məmmədovun qarşısında qabiliyyət imtahanı verib ali məktəbə daxil olmaq, onun kursunda oxumaq xoşbəxtlik sayılırdı.

Altmış altı illik ömrünə o qədər işlər sığdıra bildi ki, saymaqla bitməz. Azərbaycanın görkəmli teatr rejissoru, tanınmış aktyor, teatrşünas alim, pedaqoq, SSRİ xalq artisti, SSRİ Dövlət mükafatı laureatı, sənətşünaslıq doktoru, professor Mehdi Məmmədovun adı sənət dünyamıza əbədi həkk olunub.

 

Azərbaycan.- 2019.-1 fevral.- S.10.