25 yaşlı doktorant

Azərbaycanda uğurlu təşəbbüslərin müəllifi kimi tanınan Təbriz Cəfərov indi də Türkiyədə təhsil diasporumuzu təşkilatlandırır

Gənclik millətin yaşaması, inkişafı üçün təməl daşıdır, deyirlər. Bir millətin mövcudluğu üçün sağlam gəncliyin olması vacib şərtdir. Hər bir ölkədə dövlətçiliyin, müstəqilliyin daha da möhkəmləndirilməsi, gələcəyin etibarlı təminatı intellektual səviyyəli potensial kadrların yetişdirilməsindən asılıdır. Bu baxımdan Azərbaycanda gənclərlə iş sahəsində görülən tədbirlər gəncliyin inkişafına hər zaman təkan verib, onların cəmiyyətdə özlərini təsdiq etməsində böyük rol oynayıb.

Prezident təqaüdçüsü və gənc "Qlobal səfir”

Son illər Azərbaycanda gənclərin intellektual və yaradıcı potensialının üzə çıxarılması, gənclərin fəallığının artırılması istiqamətində məqsədyönlü layihə və proqramlar həyata keçirilir. Səsi dünyanın müxtəlif ölkələrindən, nüfuzlu universitetlərindən gələn gənclərimiz öz istedadları, bacarıqları ilə ölkəmizi layiqincə təmsil edir, Azərbaycan həqiqətlərinin dünyaya çatdırılması prosesində fəallıq nümayiş etdirirlər.

Belə gənclərimizdən biri də Türkiyənin Ankara Universitetinin 25 yaşlı doktorantı Təbriz Cəfərovdur. 1994-cü ildə Naxçıvan Muxtar Respublikasının Şərur rayonunda ziyalı ailəsində anadan olan Təbriz 2011-ci ildə test imtahanlarından yüksək bal toplayaraq Prezident təqaüdçüsü adına layiq görülüb.

Ali təhsilini isə Prezident yanında Dövlət İdarəçilik Akademiyasında alan Təbriz 2014-cü ildə Tailand Krallığının paytaxtı Banqkok şəhərində keçirilən Beynəlxalq Gənc Liderlərin 5-ci Assambleyasında ölkəmizi təmsil edib. Burada o, Qlobal Sülh Fondu, UNESCAP və Qlobal Gənc Liderlər Akademiyasının birgə təsdiqi ilə "Qlobal səfir” statusuna layiq görülüb.

2015-ci ildə akademiyanın Siyasi idarəetmə fakültəsinin hüquqşünaslıq ixtisası üzrə təhsilini başa vuraraq ali təhsilin magistratura pilləsini Türkiyə Cümhuriyyətində davam etdirmək qərarına gəlib və Türkiyə Baş nazirinin yanında Xarici Ölkələrdə Yaşayan Türklər və Dost Xalqlar Başqanlığı tərəfindən elan edilən təqaüd proqramı əsasında qardaş ölkənin Səlcuq Universitetində publik hüququ üzrə magistratura təhsilini davam etdirməyə başlayıb.

23 yaşında Ankara Universitetinin doktorantı

2017-ci ildə üzərində çalışdığı elmi işi - "Türkiyə və Azərbaycan Açısından Publik Hüquqi Şəxslər Anlayışının İncələnməsi” adlı magistr dissertasiyasını yekunlaşdıraraq hüquq üzrə magistr elmi dərəcəsinə yiyələnib.

Bundan sonra Təbriz təhsilin doktorantura pilləsini də oxumaq üçün yenidən Türkiyə Baş nazirinin yanında Xarici Ölkələrdə Yaşayan Türklər və Dost Xalqlar Başqanlığına müraciət edib. Gənc hüquqşünasın bu müraciəti də müsbət qiymətləndirilib və Türkiyə dövləti bütün xərcləri öz üzərinə götürməklə "Hüquq üzrə fəlsəfə doktoru” proqramı üzrə onun doktorantura təhsilini Ankara Universitetində almağına dair qərar verib. 2017-ci il sentyabrın 21-dən Təbriz Türkiyənin ən nüfuzlu universitetində elmi araşdırmalarını davam etdirməyə başlayıb.

Sosial şəbəkənin imkanlarından yararlanmaqla hazırda qardaş ölkədə olan Təbriz Cəfərovla söhbətləşib həm təhsili, həm də ictimai fəaliyyəti ilə maraqlandıq.

Ankara Universitetinin hüquq elmləri üzrə doktorantı bildirdi ki, Azərbaycan dövləti hər zaman gənclərə həssas münasibət göstərib. Gənclərlə düzgün iş strategiyasının müəyyənləşdirilməsi və bu istiqamətdən irəli gələn vəzifələrin dəqiqliklə yerinə yetirilməsi nəticəsində hazırda Azərbaycan gənci elm, idman, mədəniyyət, incəsənət və s. sahələrdə böyük nailiyyətlər əldə edir, dövlətçilik ənənələrini uca tutur, çoxşaxəli islahatların həyata keçirilməsində yaxından iştirak edir.

Milli maraqların müdafiəsi, pulsuz hüquqi yardım

Keçirdiyi görüşlərdə, iştirak etdiyi toplantılarda Azərbaycan həqiqətləri barədə geniş məlumat verən gənc doktorant həm də yeni təşəbbüslərlə çıxış edir. Bir müddət öncə Təbriz Türkiyədə təhsil alan Azərbaycan gənclərinin vahid şəbəkəsinin yaradılması ilə bağlı maraqlı ideya irəli sürmüşdü.

Söhbət zamanı bəlli oldu ki, artıq Təbrizin bu istəyi reallaşıb. Türkiyədə, xüsusi ilə Ankarada yaşayan azərbaycanlı gənclərin təşkilatlanması yönündə "Azərbaycan Gənclərinin Ankara Həmrəyliyi” (AGAH) Gənclər Təşkilatı təsis edilərək qeydiyyatdan keçirilib. Təşkilatın ümumi yığıncağında açıq səsvermə yolu ilə keçirilən seçkidə Təbriz Cəfərov idarə heyətinin sədri seçilib.

Gənc hüquqşünas dedi ki, istəkləri öncə paytaxt Ankarada yaşayan azərbaycanlı gənclərin ortaq platformasını formalaşdırmaq, onların Türkiyə toplumuna daha sağlam bir şəkildə adaptasiyasını təmin etməkdir. Təşkilatın qarşısına qoyduğu ən başlıca məqsəd isə Azərbaycanın milli maraqlarının müdafiəsidir. AGAH-in fəaliyyəti istiqamətində həmçinin gənclər arasında birlik, bərabərlik prinsipləri əsasında dostluq əlaqələrinin qurulması, Türkiyənin müxtəlif dövlət təsisatları ilə ictimai əhəmiyyətli əlaqələrin yaradılması əsas yer tutur.

AGAH həm də pulsuz hüquqi yardım işləri ilə məşğul olur. Türkiyədə, xüsusi ilə Ankarada məskunlaşan həmvətənlərimizə qarşılaşdıqları inzibati-hüquqi çətinliklərlə bağlı təmənnasız və könüllü əsaslarla məsləhətlər verilməsi üçün təşkilatın nəzdində hüquq işçi qrupu yaradılıb. Məsləhətlərin peşəkarlığını təmin etmək məqsədi ilə Türkiyədə fəaliyyət göstərən vəkillər və təcrübəli hüquqşünaslarla ictimai əsaslarla əməkdaşlıq edilir.

Hər zaman Azərbaycanın adı yüksək tutulmalıdır

Hüquq təhsilini uğurla davam etdirən Təbriz Cəfərov Azərbaycan həqiqətlərinin yayılması prosesində hər zaman ativlik nümayiş etdirib. Ötən il Xocalı faciəsinin 26-cı ildönümü, bu il 20 Yanvar ümumxalq hüzn günü ilə əlaqədar toplantılara qatılıb, bir neçə televiziya kanalının qonağı olub və mərasimlərdə iştirak edib. Bu tədbirlərdə, mərasimlərdə, TV-lərə müsahibələrdə Təbriz Azərbaycan həqiqətlərini bir daha Türkiyə ictimaiyyətinə çatdırıb. Türkiyənin siyasi dairələrində, dövlət strukturlarında keçirdiyi görüşlərdə isə AGAH-ın fəaliyyət və əməkdaşlıq istiqamətləri müzakirə mövzusu olub.

Daim yeni hədəflərə doğru irəliləyən Təbriz Cəfərov müxtəlif kreativ təşəbbüslərlə çıxış edərək daha böyük uğurlar qazanmaq üçün çalışır. Gənc hüquqşünas hesab edir ki, xaricdə təhsil alan və təhsilini başa vuraraq müxtəlif sahələrdə çalışan gənclər müasir dövrün tələblərinə və reallıqlarına uyğun olaraq ölkəsinin təbliğatını da aparmalıdır: "Xaricdə təhsil alan və yaşayan hər bir gənc ayrı-ayrılıqda bir səfirdir. Çünki elə ölkələr var ki, orda Azərbaycanın rəsmi diplomatik nümayəndəliyi yoxdur, amma tələbələri var. Bu tələbələrin hər biri öz ətrafında, oxuduğu, yaşadığı yerdə, dostları arasında, təhsil aldığı ali məktəbdə və s. Azərbaycan adını yüksək tutmalı, ölkəmizin təbliği və sevilməsi məqsədilə durmadan fəallıq göstərməlidir. Hər kəsin fərd olaraq bu işdə əldə edəcəyi kiçik bir nailiyyət Azərbaycan adına böyük uğur deməkdir”.

Bütün bunlar göstərir ki, Azərbaycan gəncliyi sözün əsl mənasında, inkişaf dövrünü yaşayır və dövlətin gənclər siyasəti bəhrəsini verir. İnanırıq ki, ölkəmizin Türkiyədə layiqincə təmsilçiliyi ilə məşğul olan gənc doktorant Təbriz Cəfərov da yeni-yeni layihələri ilə Azərbaycan adına böyük uğurlara imza atacaq.

Rəşad BAXŞƏLİYEV

Azərbaycan.- 2019.-2 fevral.- S.10.