Xocalı qan yaddaşımızdır

Bakıdakı Milli Qəhrəman Cavanşir Rəhimov adına 146 nömrəli tam orta məktəbdə tez-tez xalqımızın tarixindən, qəhrəmanlığından, azadlıq və istiqlaliyyət uğrunda mübarizəsindən bəhs edən tədbirlər keçirilir. Şagirdlər torpaqlarımızı müdafiə edərkən canından keçən şəhidləri daim ehtiramla anırlar, onların keçdiyi döyüş yolunu öyrənirlər. Erməni separatçılarının törətdiyi Xocalı soyqırımının 27-ci ildönümü ərəfəsində keçirilən "Xocalı qan yaddaşımızdır” məzmunlu tədbirlər də bu qəbildəndir.

Məktəblilər Xocalı faciəsi haqqında müəllimlərindən eşitdikləri, kino və tamaşalarda gördükləri, kitablardan oxuduqları acı həqiqətləri bu günlərdə bir daha xatırladılar. Məktəbdə, eləcə də ayrı-ayrı siniflərdə keçirilən tədbirlərdə uşaqlar Xocalı haqqında bildiklərini danışdılar, şeirlər söylədilər.

Birincilər də bu tədbirdən kənarda qalmayıblar. Müəllimləri Gülər Səmədova uşaqlara Xocalı barədə ətraflı məlumat verib. İndi onlar bilirlər ki, düşmən Xocalıda hətta uşaqlara da qıyıb, neçə-neçə körpə işgəncə ilə öldürülüb. Birincilər müvəqqəti işğal altında olan rayonları da bir-bir yada saldılar. Onlar bu bölgələrin adlarını yazıb yaxalarına vurmuşdular.

Xocalı faciəsi böyüməkdə olan nəslin yaddaşından heç vaxt silinməyəcək.

Azərbaycan.- 2019.-26 fevral.- S.9.