143 ölkədən 191,6 min turist

Bu, yalnız yanvar ayının statistikasıdır

Dövlət Sərhəd Xidmətinin məlumatına görə, yanvar ayında Azərbaycana dünyanın 143 ölkəsindən 191,6 min və ya 2018-ci ilin eyni ayı ilə müqayisədə 2,9 faiz çox əcnəbi və vətəndaşlığı olmayan şəxs gəlmişdir. Gələnlərin 29,4 faizi Rusiya Federasiyası, 29,1 faizi Gürcüstan, 11,2 faizi Türkiyə, 5,4 faizi İran, 4,5 faizi Birləşmiş Ərəb Əmirlikləri, 1,7 faizi Ukrayna, 1,3 faizi İraq, 17,3 faizi digər ölkələrin vətəndaşları, 0,1 faizi vətəndaşlığı olmayan şəxslər olmuşdur.

Dövlət Statistika Komitəsinin bu barədə yaydığı məlumatda daha sonra bildirilir ki, ölkəmizə yanvar ayında gələnlərin sayında daha çox artım Misir (4,5 dəfə), Pakistan (2 dəfə), Türkmənistan (1,7 dəfə), Hindistan (1,4 dəfə), Çin (26,5 faiz), Gürcüstan (21,9 faiz), Cənubi Koreya (15,2 faiz) vətəndaşları arasında qeydə alınmışdır. Körfəz ölkələrindən gələnlərin sayı isə əvvəlki ilin eyni dövrü ilə müqayisədə 13,3 faiz azalaraq 28,5 min nəfər olmuşdur. Əvəzində ilin ilk ayında Avropa İttifaqına üzv ölkələrdən gələnlərin sayı 0,9 faiz artaraq 5,8 min nəfərə çatmışdır. Amma bu artım MDB ölkələrindən gələnlərin sayında müşahidə edilməmişdir. Keçmiş ittifaq respublikalarından Azərbaycana səfər edənlərin sayı 0,2 faiz azalaraq 67,2 min nəfər olmuşdur.

Xarici ölkələrə gedən Azərbaycan vətəndaşlarına gəldikdə, yanvarda əvvəlki ilin müvafiq dövrü ilə müqayisədə onların sayı 19,3 faiz artaraq 357,1 min nəfərə çatmışdır. Vətəndaşlarımızın 35 faizi İrana, 28 faizi Gürcüstana, 20,9 faizi Rusiya Federasiyasına, 10,2 faizi Türkiyəyə, 1,2 faizi Ukraynaya, 1,1 faizi Birləşmiş Ərəb Əmirliklərinə, 3,6 faizi digər ölkələrə səfər etmişdir. Bu dövrdə İrana gedən Azərbaycan vətəndaşlarının sayı 75,2, Rusiya Federasiyasına gedənlərin sayı 6,5, Gürcüstana səfər edənlərin sayı 2,5 faiz artmış, Türkiyəyə üz tutanların sayı isə 2,6 faiz azalmışdır.

Azərbaycan.- 2019.- 5 mart.- S.6.