“Bakı Prosesi” mədəniyyətlərarası dialoq sahəsində təcrübəni bölüşmək üçün əvəzsiz platformadır

Mənim üçün yenidən Azərbaycana gəlmək böyük şərəfdir. Azərbaycan dinamik, inkişaf edən gənc bir dövlətdir. Mən həm Ümumdünya Mədəniyyətlərarası Dialoq Forumunun təşkilinə, həm də “Bakı Prosesi”nə görə Azərbaycan hökumətinə təşəkkür edirəm. Son illərdə Azərbaycan bütün dünyada mədəniyyətlərarası dialoqun inkişafına və təbliğ olunmasına xüsusi töhfə verib. Belə ki, Azərbaycan bir çox irimiqyaslı beynəlxalq mədəniyyət tədbirlərinin təşkilatçısı və tərəfdaşı kimi çıxış edir. Bu isə ölkənin həm mədəni, həm də iqtisadi baxımdan inkişafına təkan verir.

AZƏRTAC xəbər verir ki, bu fikirləri “Ayrı-seçkilik, qeyri-bərabərlik və zorakı münaqişəyə qarşı fəaliyyət naminə dialoq quraq” şüarı altında Bakıda keçirilən V Ümumdünya Mədəniyyətlərarası Dialoq Forumunun iştirakçısı, Avropa Şurası baş katibinin müavini xanım Qabriela Battaini–Draqoni bildirib.

“Mədəniyyətlərarası dialoq sahəsində təcrübələri bölüşmək üçün bu Forum və “Bakı Prosesi” əvəzedilməz platformadır. Dünyada mövcud olan hazırkı vəziyyətdə mədəniyyətlərarası dialoq çox mühüm və vacib bir amildir. 2008-ci ildə Avropa Şurasının “Ağ kağızlar” adlı hesabatını “Bir yerdə, ləyaqət içində yaşamaq” başlığı altında dərc etdik. Demokratiya, bərabərlik və qanunun aliliyi prinsipi Avropa Şurası üçün vacibdir, biz bu yolla inkişaf edirik. 2008-ci ildə Avropa Şurasına üzv dövlətlərin mədəniyyət nazirlərinin konfransına Azərbaycanın təşəbbüsü ilə ilk dəfə olaraq 10 İslam ölkəsi dəvət edildi. Bununla da mədəniyyət nazirlərinin konfransı yeni bir formata transformasiya olundu. Konfrans çərçivəsində Avropa Şurasına və İslam Konfransı Təşkilatına üzv dövlətlər arasında mədəniyyətlərarası dialoqa dair birgə bəyannamə qəbul olundu. Avropa Şurasına üzv dövlətlər bu prinsipləri qəbul ediblər. Biz bu prinsiplər əsasında sülhə nail ola bilərik.

Bizim Şimal-Cənub Mərkəzimiz qlobal vətəndaşlıq konsepsiyası üzərində işləyir. Avropa İnsan Hüquqları Məhkəməsinin qətnamələrində, Avropa Şurası qurumlarının qərarlarında tolerantlıq təşviq olunur. Mədəniyyətlərarası dialoq heç vaxt bitməyən bir çağırışdır. Biz bu Forumun prinsiplərini fəaliyyətə çevirməliyik. Bu, bizdən birgəyaşayışa dair narahatlıqları aradan qaldırmağa və dövlət strukturlarını yenidən qurmağı tələb edir. Mədəniyyətlərarası dialoqda azlıqların hüquqlarının qorunması çox vacibdir. Tərəqqi siyasi iradə əsasında təmin oluna bilər. Çağdaş Avropada ifrat millətçiliyin və populizmin inkişafını görürük. Buna görə bir çox problemlər yaranır. “Bakı Prosesi” məhz bu məsələlərə həsr olunub. Qələbə qazanmaq üçün bu, çox vacibdir”, - deyə Qabriela Battaini–Draqoni qeyd edib.

Azərbaycan.- 2019.-3 may.- S.9.