Xalçaçılığın inkişafı yeni dövrə qədəm qoyur

İqtisadiyyatın bir çox ənənəvi sahələrinin yenidən dirçəldilməsi siyasəti özünü doğruldur. Həmin sahələrdən biri də xalçaçılıqdır. Azərbaycanda xalçaçılığın tarixi qədimdir. Ölkəmizdə toxunan qədim xalçalar dünyanın bir sıra məşhur muzeylərində qiymətli eksponat kimi saxlanılır.

Prezident İlham Əliyevin sərəncamı ilə "Azərxalça” ASC-nin yaradılmasından sonra ölkəmizin bir sıra rayonlarında cəmiyyətin filialları açıldı. Artıq Horadiz, Şəmkir, Quba, Xaçmaz və İsmayıllı rayonlarında cəmiyyətin filialları fəaliyyət göstərir. Bununla yanaşı, Naxçıvan şəhərində, Qobustan, Şabran, Sabunçu, Lənkəran, Abşeron, Kürdəmir, Biləsuvar, Goranboy və Tərtər rayonlarında xalça emalatxanalarının tikintisinə başlandı. Cari ildə əlavə olaraq 10 şəhər və rayonda bu cür müəssisələrin tikintisi nəzərdə tutulub.

Hazırda toxunan xalçalarda Ağsu, İsmayıllı, Qobustan, Şamaxı, Ağdaş, Göyçay, Hacıqabul, Kürdəmir, Salyan, Ucar, Zərdab, Qax, Qəbələ, Oğuz, Şəki və Zaqatala rayonlarının kəndlərində toxunan orijinal Şirvan xalça çeşnilərinə üstünlük verilir. Ümumilikdə isə ölkəmizin bütün bölgələrində toxunan qədim çeşnilər yenidən bərpa olunaraq istehsalata tətbiq edilir. Beləliklə, zəngin xalçaçılıq sənətimizi dirçəltməklə yanaşı, qeyri-neft sektorunun inkişafına da öz töhfəsini verir. Ən başlıcası xalçaçılığın inkişafı qadınlar arasında olan işsizliyin aradan qaldırılmasında müəyyən rol oynayır. Məqsəd bu sahədə 50 mindən çox insanı işlə təmin etməkdir.

Azərbaycan.- 2019.-19 may.- S. 5.