Vətəndaşların qəbulu keçirilib

Energetika naziri Pərviz Şahbazov nazirlikdə növbəti dəfə vətəndaşları qəbul edib. Qəbulda Bakı şəhəri və Ucar rayonundan olan sakinlər iştirak edib.

Energetika Nazirliyindən AZƏRTAC-a bildirilib ki, vətəndaşlar elektrik enerjisi təminatı, enerji təchizatı şəbəkəsinə qoşulma, neft-qaz istehsalının artırılması, işlə təmin olunma və digər məsələlərlə bağlı təklif və müraciətlərini diqqətə çatdırıblar.

Energetika naziri vətəndaşlar tərəfindən qaldırılan məsələlərin hərtərəfli öyrənilməsi və qanunvericiliyin tələblərinə uyğun həll edilməsi üçün nazirliyin aidiyyəti struktur bölmələrinə müvafiq tapşırıqlar verib.

Qeyd edək ki, dövlət qurumları tərəfindən vətəndaşlara lazımi xidmətin göstərilməsi, onların müraciətlərinə qayğı və həssaslıqla yanaşılması ilə bağlı Prezident İlham Əliyev tərəfindən verilmiş tapşırıqlara uyğun olaraq, Energetika Nazirliyi vətəndaşların qəbulu, onların ərizə və şikayətlərinə baxılaraq həll olunması üçün müvafiq tədbirlər görür və mütəmadi nazirlikdə rəhbər vəzifəli şəxslərin vətəndaş qəbulunu həyata keçirir.

Bununla yanaşı, mərkəzi icra hakimiyyəti orqanları rəhbərlərinin 2019-cu il üzrə şəhər və rayonlarda vətəndaşların qəbulu qrafikinə uyğun olaraq, Energetika naziri və nazir müavinlərinin hər ay müxtəlif regionlarda vətəndaş qəbulu davam edir.

***

Oktyabrın 15-də Vergilər nazirinin birinci müavini Sahir Məmmədxanov Masallı şəhərində yerləşən Vergi ödəyicilərinə xidmət mərkəzinin inzibati binasında vətəndaşları qəbul edib. Qəbulda Masallı, Lənkəran, Astara, Lerik, Cəlilabad və Biləsuvar rayonlarının sakinləri iştirak ediblər.

Vergilər Nazirliyinin Media və kommunikasiya mərkəzindən AZƏRTAC-a bildirilib ki, qəbula gələn vətəndaşların müraciətləri, əsasən, vergi qanunvericiliyi və inzibatçılığının tətbiqi, vergilərin hesablanması və ödənilməsi, məcburi sosial sığorta ödəmələri, vergi nəzarəti tədbirlərinin nəticələri, uçot, vergi orqanlarında işlə təminat və digər məsələlərlə bağlı olub.

Vətəndaşların müraciətləri dinlənilib, bəziləri yerindəcə həll olunub, digər məsələlər barədə nazirliyin struktur bölmələrinə müvafiq tapşırıqlar verilib.

Azərbaycan.- 2019.- 16 oktyabr.- S. 8.