Əsrin
yaşıdı
İsrail kişi cəldliyini, çevikliyini hələ də itirməyib. Əsrin yaşıdı olsa da, işdən-gücdən ayrılmayıb. Özü demişkən, onu gümrah saxlayan halal zəhmətə meyilli olmasıdır. Altı övlad böyüdüb, hamısının əlini çörəyə çatdırıb. Üç oğlu, üç qızı var. Xoşbəxt bir nəslin ağsaqqalıdır. Onun dəyərli məsləhətlərinə, tövsiyələrinə həmişə ehtiyac duyulur. Göyçayın Ərəbşahverdi kəndində İsrail kişi böyük nüfuz, hörmət sahibidir. Çox adama əl tutub. Gücü çatan köməyi əsirgəməyib. Ona görə də bu mahalda İsrail kişiyə ağsaqqal kimi böyük dəyər verirlər, məsləhətlərindən faydalanırlar. Özü demişkən, övlad böyütmək, onları ürəyincə tərbiyə etmək o qədər də asan deyil. Gərək öz davranışına, əməllərinə nəzarət etməyi bacarasan ki, başqalarından da nəsə tələb edəsən. Fəxr edirəm ki, 20 nəvənin, 30 nəticənin babasıyam, hələ 3 kötücəm də var. Onların xoş sorağını eşidəndə o qədər qürurlu oluram ki…
İsrail kişi deyir ki, adam gərək halallığı hər şeydən uca tutsun. Uzun illər kolxozda çalışmışam, yer şumlamışam, əkin əkmişəm... Övladlarımı zəhmətlə böyütmüşəm. Əllərimin qabarı bu gün də halallığın zəmanətidir. Ona görə də el-oba arasında üzüm ağ, sözüm kəsərlidir.
İsrail İsmayıl oğlu Yaqubov öz keçmişindən danışanda zərrə qədər də sıxıntı keçirmir. Ötən günlərini ömrünün mənalı çağları kimi dəyərləndirir. Geriyə baxanda xoş günlərini xatırlayır. Deyir ki, bu yaşımda o qədər hadisələrə, maraqlı günlərə şahidlik etmişəm ki... Nəyə gücüm çatıbsa, heç nəyi el-obadan, övladlarımdan əsirgəməmişəm. Deyə bilərəm ki, insan dəyərli işlərlə məşğul olanda ömrü də uzun olur. Düz bir əsr yaşadım, həyatımda qəbahət işlətmədim. Arxayınlıqla gələcəyə körpü qurdum. Bu gün el-obanın məclislərində, yığıncaqlarında mənə böyük hörmətlə yanaşırlar. Bir ağsaqqal kimi yuxarı başda yer göstərirlər. Bütün bunlar bu günə qazandığım halallığın nişanəsidir. Gərək yaşadığın ömürdə hər şeyi nəzərə alasan. Axı məndən böyük bir nəsil nümunə götürür, əməllərimə qiymət verirlər. Sevinirəm ki, uğurlarım daha çox olub. Belə yaşamaq gələcəyə etibarlı zəmanətdir. Ömrüm boyu bunu qorumuşam...
İsrail kişi mənalı-mənalı üzümə baxıb, sonra "Ay oğul, - dedi, - bizim tərəflərə çox yerlərdən qonaq gəlir. Hərəsinin də öz izi qalır. Bir dəfə yaşadığım bu kəndə xeyli uzaqlardan, Almaniyadan jurnalistlər gəlmişdi. Mənim bir təşəbbüsüm onlarda böyük maraq doğurdu. Kənddə-kəsəkdə qonşuları bir-birindən ayıran çəpərlərin yerinə bizim mühitə uyğun ağaclar əkmişdik. O qədər səliqəli, mənzərəli görünür ki... Bu, alman jurnalistlərin nəzərindən yayınmadı, onlarda ciddi maraq doğurdu. Hər şeyi öyrənəndən sonra öz vətənlərinə qayıdanda bu barədə mətbuatda maraqlı yazı da verdilər. Adını da belə qoymuşdular: "Göyçaylı mister İsrail”. Kəndimizdə başladığımız bu ənənə davam edir. Ağac çəpərlərə daha çox üstünlük verilir. Sevinirəm ki, yeni nəsil də bizim başladığımız bu işi uğurla davam etdirir.
İsrail
kişi çox həssas adamdır. Öz həmsöhbətini tez duyur. Nə istədiyini asanlıqla anlayır. Bir sözlə, maraqlı
həmsöhbətdir. Uşaqlarından danışanda
dedi ki, övladlarım uzaqlarda yaşasalar da,
məni unutmurlar. Bəzən təklif edirlər ki, bu yaşımda
kənddən-kəsəkdən ayrılıb şəhərə
köçüm, onların
yanına gedim. Bu təklifi qətiyyən
qəbul edə bilmirəm. Axı mən gözümü
bu yerlərdə açmışam, vələs
narının kölgəsində
böyümüşəm, barını-bəhərini dadmışam.
Əcdadlarımın ruhu bu yerlərdədir. Məni
bu kəndlə o qədər müqəddəs
şeylər bağlayır
ki... Yaşımın bu çağında
bütün bunları
unudub heç yerə gedə bilmərəm.
Əsrin yaşıdı özünü
doğmaları əhatəsində
çox gümrah və xoşbəxt sayır. Elə bilirəm ki,
bu kənddən-kəsəkdən
ayrılsam, ömrüm
qısalar, doğmaların
ruhundan uzaq düşərəm. Əcdadlarımı, öz keçmişimi nəvələrimə, nəticələrimə
də tanıdıram.
Belə olanda dünənlə bugün arasında aydın əlaqə yaranır. Elə övladlarım da
öz nəslini dərindən öyrənmək
üçün məni
sorğu-suala tuturlar.
Hər şeyi olduğu kimi öyrənmək istəyirlər.
İsrail
kişi yaşadığı kənddə
səliqəli bir bağ-bağat yaradıb.
Hər gün əkdiyi ağacların nazını
çəkir, onlara qulluq etməkdən böyük zövq alır. Deyir ki, gülöyşəni
küsdürmək olmaz,
zərrə qədər
incidisə, barından
əlini çək.
Çox
zərif ağacdır.
Hər şeydən əvvəl dilini bilməlisən.
Yoxsa istədiyin məhsulu ala bilməzsən. Bizim əsas
dolanışıq yerimiz
bu bağ-bağatdır.
Hər il
xeyli məhsul götürürük. Yaşımın bu çağında əlimin zəhməti ilə ərsəyə gətirdiyim hər bir ağaca körpə uşaq kimi qulluq edirəm.
Açığını deyim ki, torpaq da bəhrəsiz
deyil. Nə qədər çox
əziyyət çəksən,
əvəzində bol
məhsul götürürsən.
Hər dəfə yetişdirdiyim
meyvələrdən övladlarıma,
nəvələrimə pay çıxıram. Baba sovqatı şirin olur. Bütün bunlar ömrümə
bir ömür calayır. Həm də yaşamağın
mənasını artırır.
Bu gün mənim
əməllərimi davam
etdirənlər çoxdur.
Onlar da çörəklərini
torpaqdan çıxarır,
əkin-biçinə meyillidirlər.
Sevinirəm ki, övladlarımı
zəhmətə öyrədə
bildim. Faydasını özləri görür.
Doğrudur, mənim övladlarımın çoxu
ali təhsil
alıb, müxtəlif
müəssisələrdə çalışırlar. Elmi işlə
məşğul olanları
da var. Hərəsinin
xoş sorağı bir tərəfdən gəlir. Çoxu torpaqlarımızın düşməndən azad
olunması uğrunda döyüşlərdə iştirak
edib. Hərbi işə meyilli
olanı da var. Bir sözlə, müxtəlif sahələrdə
işləsələr də,
elə-obaya xeyir verməyə çalışırlar.
Hərəsi xoşbəxt bir
ailənin başçısıdır.
Elə məni gümrah saxlayan da onların doğru yolda olmasıdır...
Alman jurnalistlərinin
yazdığı kimi,
göyçaylı mister İsrailin
söhbətlərindən doymadıq. Dedi ki, sağlıq olsun, ay oğul, bir də görüşərik...
Bəşir ŞƏRİFLİ
Azərbaycan.- 2019.- 27 sentyabr.- S. 7.