Heydər Əliyev Fondundan koronavirusla mübarizəyə dəstək

"REACT-C19 layihəsi fondun hər zaman səhiyyəmizlə birgə olduğunu bir daha sübut edir”

2020-ci il başlayandan dünyanın demək olar ki, əsas müzakirə mövzusu koronavirusdur. Bir neçə aydır ki, bütün bəşəriyyət gözəgörünməz bu kiçik virusla mübarizəyə atılıb.

İndi bütün ölkələr, bütün insanlar qlobal pandemiyaya qarşı savaş açıb. Amma təəssüf ki, hələ də bu savaşda COVID-19 adlı bəla irəlidədir.

Hazırda dünyada koronavirusdan ölənlərin sayı 135 min nəfərə çatıb.

Planetin 2 083 607 sakini bu infeksiyanın daşıyıcısıdır. 510 666 nəfər isə xəstəlikdən sağalıb.

COVID-19-un ayrı-ayrı ölkələr üzrə yayılması statistikasına nəzər yetirək.

ABŞ birinciliyi saxlayır

ABŞ koronavirusa yoluxanların və ölənlərin sayına görə dünyada birinci yerdə qalmaqda davam edir. Ölkə az qala pandemiyanın əsarəti altındadır. Burada virusa yoluxanların sayı 637 716 nəfər təşkil edir. Ölənlərin sayı isə 31 minə yaxınlaşır. Ölüm hallarından 10 899-u Nyu Yorkda qeydə alınıb. Bu şəhərdə koronavirusdan ölən polis əməkdaşlarının sayı 27 nəfərə çatıb.

Çində koronavirusa 46 yeni yoluxma halı qeydə alınıb. Son sutka ərzində ölən olmayıb, 76 nəfər sağalıb. Ölkədə koronavirusa yoluxanların 94,5 faizi sağalıb. Ümumilikdə, yoluxma hallarının sayı 82,3 mini ötüb, 3,3 mindən artıq insan ölüb.

Fransada COVID-19 ötən sutka ərzində 1,4 mindən artıq insanın canını alıb. Aprelin 15-i axşam saatları üçün ölkədə 106 206 təsdiqlənmiş koronavirusa yoluxma halı var. Ölənlərin sayı isə 17 167 nəfər təşkil edir.

İtaliyada koronavirusa yoluxanların ümumi sayı 165 min nəfərdən çoxdur. Ötən sutka ərzində 578 nəfər infeksiyanın qurbanı olub. Bununla ölənlərin sayı 21 645 nəfərə çatıb. Sağalanların sayı 962 nəfər artaraq 38 min nəfəri ötüb.

İranda daha 92 nəfər koronavirusun qurbanı olub. İnfeksiyadan ölənlərin ümumi sayı 4869-a çatıb. Daha 1606 nəfərdə koronavirus aşkarlanıb və bununla da infeksiya daşıyıcılarının sayı 77995 nəfərə yüksəlib. 52229 nəfər sağalaraq xəstəxanalardan buraxılıb.

Almaniyada son bir gündə 2866 nəfər koronavirusa yoluxub. Beləliklə, ölkədə qeydə alınan koronavirus hallarının sayı 130450 nəfərə çatıb. Ölənlərin sayı daha 315 nəfər artaraq 3569-ə yüksəlib.

İsraildə son sutkada koronavirusdan daha 14 nəfər ölüb, 391 nəfər COVID-19-a yoluxub. Bununla da yoluxanların sayı 12591-ə çatıb. İsraildə koronavirusdan ümumilikdə 140 nəfər ölüb.

Türkiyədə son 24 saat ərzində daha 115 nəfər yeni növ koronavirusdan dünyasını dəyişib. Qardaş ölkədə virus qurbanlarının sayı 1518 nəfərə çatıb. Yoluxanların ümumi sayı 69392 nəfərdir. Sağalanlar 5674 nəfərdir.

Rusiyada koronavirusa yoluxma göstəriciləri növbəti dəfə rekord vurub. Ölkədə son sutka ərzində 3448 nəfər koronavirusa yoluxub, daha 34 nəfər virusdan həyatını itirib. Bu günə qədər Rusiyada 27938 nəfər infeksiyaya yoluxub, ölənlərin sayı isə 232 nəfərə çatıb. Ümumilikdə 2304 nəfər sağalıb, 25402 nəfərin müalicəsi davam edir.

Ukraynada daha 8 nəfər koronavirusun qurbanı olub və ölənlərin sayı 116-ya yüksəlib. Ölkədə qeydə alınan koronavirus hallarının sayı 397 nəfər artaraq 4161-ə çatıb. Sağalanların sayı isə 186-dır.

Özbəkistanda daha 47 nəfərdə koronavirus aşkarlanaraq yoluxma hallarının sayı 1349-a çatıb. 4 nəfər virusun qurbanı olub.

Qırğızıstanda son sutkada 17 nəfərə koronavirus diaqnozu qoyulub. Hazırda ölkədə qeydə alınmış yoluxma hallarının sayı 466-ya çatıb. Koronavirusa yoluxmuş həkimlərin sayı isə 104-ə yüksəlib.

Qazaxıstanda koronavirus qurbanlarının sayı 17 nəfərə çatıb. Ölkədə indiyədək qeydə alınmış yoluxma hallarının sayı 1341 nəfərdir.

Ermənistanda koronavirusa yoluxanların sayı 1159, ölənlərin sayı 18-dir. 358 nəfər sağalaraq xəstəxanadan evə buraxılıb.

Gürcüstanda koronavirusa yoluxanların sayı son 24 saat ərzində 30 nəfər artaraq 336 nəfər olub. Hazırda karantində 5000 nəfər, stasionarda isə 494 nəfər var. Bu günədək ölkədə koronavirusa yoluxmuş 74 nəfər sağalıb, 3 nəfər isə dünyasını dəyişib.

Azərbaycanda sağalma faizi yüksəkdir

Azərbaycanda aprelin 14-nə kimi təsdiq edilən yoluxma hallarının yaş qruplarına və cinsiyyətinə görə sayı məlum olub. TƏBİB-in İdarə Heyətinin sədri Ramin Bayramlı Nazirlər Kabineti yanında Operativ Qərargahın keçirdiyi mətbuat konfransında deyib ki, indiyədək Azərbaycanda koronavirusa ən çox yoluxma faktı 50-59 yaşları arasında rast gəlinib. Belə ki, bu yaş qrupunda 248 nəfər koronavirusa yoluxub. Bundan əlavə, ikinci ən çox yoluxma halı 30-39 yaşları arasında qeydə alınıb - 214 nəfər. Doqquz yaşadək uşaqlar arasında 66, 10-19 yaşları arasında 60, 20-29 yaşları arasında 175, 40-49 yaşları arasında 198, 60-69 yaşları arasında 157, 70-79 yaşları arasında 56, 80 yaş və ondan yuxarı isə 23 nəfərdə yoluxma qeydə alınıb. Ölkədə virusa yoluxanlardan 640 nəfəri qadın, 557 nəfəri isə kişidir. Ümumilikdə, indiyədək ölkəmizdə koronavirus infeksiyasının müəyyənləşdirilməsi məqsədi ilə 75 min 397 test icra olunub.

R.Bayramlı bildirib ki, hazırda Azərbaycanda koronavirusa yoluxmuş 836 nəfərin müalicəsi xüsusi rejimli xəstəxanalarda davam etdirilir. Həmin şəxslərdən 17 nəfər reanimasiyadadır, onların da 6-sı süni nəfəs aparatına qoşulub.

Sədrin sözlərinə görə, Azərbaycanda görülən tədbirlər və tibb işçilərinin fədakarlığı nəticəsində sağalma faizi bir sıra ölkələrlə müqayisədə yüksəkdir. Belə ki, hazırda Azərbaycanda koronavirusdan sağalma 25 faiz təşkil edir: "Lakin sağalmış şəxslərin yenidən koronavirusa yoluxması da mümkündür. Sadəcə onlar xəstəliyi yüngül keçirə bilərlər. Ona görə də heç kəsin arxayınlaşmaması lazımdır”.

COVID-19-a qarşı REACT-C19 layihəsi

Ümumdünya Səhiyyə Təşkilatının təşəbbüsü, Heydər Əliyev Fondu, İcbari Tibbi Sığorta üzrə Dövlət Agentliyi, TƏBİB və Səhiyyə Nazirliyinin dəstəyi ilə ölkəmizdəki xəstəxanalarda COVID-19-a qarşı mübarizə tədbirləri ilə əlaqədar olaraq əsas bacarıqları gücləndirmək üçün REACT-C19 layihəsinə start verilir. Layihədə Türkiyədə çalışan 19 azərbaycanlı həkim iştirak edəcək. Layihənin məqsədi hazırda COVID-19-a yoluxmuş xəstələrin müalicə edilməsi üçün bölgələrdəki seçilmiş xəstəxanalarda virusla bağlı əsas bacarıqları sürətlə inkişaf etdirməkdir.

Layihə çərçivəsində bölgələrdə yerləşən xəstəxanalarda çeşidləmə "triaj” sisteminin tətbiqi, infeksiyaların qarşısının alınması və nəzarət, xəstəlik hallarının idarə olunması, reanimasiya sistemlərinin qurulması, xəstəxanalardakı heyətə lazımi sistemlərin yaradılması və uzunmüddətli saxlanılması ilə bağlı sürətli təlimlər keçmək, bu xəstəxanalarda yeni təlim keçmiş kadrları dəstəkləmək üçün onlayn, mobil və ya rəqəmsal texnologiyalar yaratmaq nəzərdə tutulur.

Türkiyədən gəlmiş azərbaycanlı həkimlərdən formalaşdırılmış dörd heyətin hər birində infeksiyanın qarşısının alınması və nəzarət, triaj, yoluxma hallarının idarə olunması və Ağır Kəskin Tənəffüs Sindromu (SARS) üzrə mütəxəssislər təmsil olunur. Bu həkimlər Bakıda fəaliyyət göstərən 4 tibb müəssisəsində - "Yeni klinika”, Mərkəzi Neftçilər Xəstəxanası, Azərbaycan Tibb Universitetinin Tədris Terapevtik və Cərrahiyyə klinikalarında, eləcə də bölgələrdə karantin üçün ayrılan xəstəxanalarda fəaliyyət göstərəcəklər.

Qeyd edək ki, bu mütəxəssislər Türkiyənin seçilmiş universitetlərində təlimlər keçib, sözügedən sahələr üzrə praktiki təcrübələr əldə edib və müvafiq təlimat alıblar. Bununla yanaşı, onlar dəyişikliklərin idarə olunması və streslə mübarizə ilə bağlı biliklərə də yiyələniblər.

Xəstəxana hazırlıq heyətləri seçilmiş xəstəxanaların direktorları və baş həkimlərinin rəhbərliyi altında hər xəstəxanada 2 həftə ərzində təlim keçəcəklər. Hər komanda növbəti xəstəxanada fəaliyyətə başlamazdan öncə cari xəstəxanadakı heyətə sistemi idarəetmə məsuliyyətini təhvil verəcək.

Layihə çərçivəsində tibb işçiləri üçün onlayn platforma da istifadəyə veriləcək və bu platforma vasitəsilə onlar təlimlər və təqdimatlar, mentorlardan video dərslər və statistik məlumatlar əldə edə biləcəklər.

"Heydər Əliyev Fondu hər bir vətəndaşa lazımi yardım göstərməyə hazırdır”

"Heydər Əliyev Fondunun Prezidenti Mehriban xanım Əliyevanın tapşırığı ilə Ümumdünya Səhiyyə Təşkilatı ilə sıx əməkdaşlıq edirik. Koronavirus epidemiyası ilə mübarizənin ilk günlərindən TƏBİB və Səhiyyə Nazirliyinə dəstək göstərməyə başlamışıq”.

Bunu REACT-C19 layihəsinin təqdimatında Heydər Əliyev Fondunun Beynəlxalq Əlaqələr Departamentinin rəhbəri, millət vəkili Soltan Məmmədov bildirib. O bildirib ki, bu istiqamətdə ölkədə laboratoriya sisteminin gücləndirilməsi üçün Bakı, Cəlilabad və Gəncə şəhərlərində Almaniya istehsalı olan 4, Sumqayıt və Şəki şəhərlərində 2 tam avtomat laboratoriya qurularaq istifadəyə verilib. Yüksək keyfiyyətli müayinələrin aparılması üçün Almaniya və İngiltərə istehsalı olan test kitləri ilə təmin edilib. Xəstəxanalarda çalışan tibb personalının təhlükəsizliyini təmin etmək məqsədi ilə maska, tibbi geyim, eynək, əlcək və digər qoruyucu vasitələr alınıb. Tibb müəssisələrinin maddi-texniki bazasının gücləndirilməsi üçün süni nəfəs aparatları, tibbi monitorlar və hemofiltrasiya cihazları təmin olunub: "Fondun Prezidenti Mehriban xanımın tapşırığı ilə beynəlxalq təşkilatlarla əməkdaşlıq çərçivəsində əhalinin maarifləndirilməsi üçün birgə kommunikasiya planı hazırlanıb və bu istiqamətdə mətbuat, ictimaiyyət və dövlət qurumları ilə əlaqələndirici iş aparılır. Koronavirusla mübarizədə həkimlərimizə dəstək məqsədi ilə digər ölkələrlə təcrübə mübadiləsi üçün virtual təlimlərin təşkili və bu gün də Ümumdünya Səhiyyə Təşkilatı ilə birgə 3 ay müddətində bizim həkimlərlə birgə çalışacaq 20 nəfərdən ibarət müxtəlif ixtisaslı mütəxəssislərdən ibarət qrupun Azərbaycana səfərinin təşkil olunmasına dəstək vermişik”.

S. Məmmədov Heydər Əliyev Fondu tərəfindən ölkədə uğurla həyata keçirilən sosial siyasətə dəstək olaraq ehtiyacı olan ailələrə ərzaq dəstəyi də göstərildiyini əlavə edib: "Ölkədə fəaliyyət göstərən uşaq evləri, körpələr evi, internat məktəbləri, qocalar evi, sağlamlıq imkanları məhdud uşaqlar üçün sosial xidmət müəssisələrində tələb olunan profilaktik tədbirlər görülüb, lazımi qoruyucu vasitələr təmin olunub”.

Deputatın sözlərinə görə, Heydər Əliyev Fondu öz sosial missiyası çərçivəsində hər zaman ölkədə səhiyyənin inkişafına dəstək göstərib. Səhiyyə sahəsində illər boyu qazanılan təcrübə və beynəlxalq təşkilatlarla əməkdaşlıq çərçivəsində əldə edilən uğurlar bu mübarizədə səhiyyəmizə lazım olan dəstəyi göstərməyə imkan yaradır: "Fondun rəhbərliyinin dəstəyi ilə biz uzun illərdir ki, ÜST ilə sıx və uğurlu əməkdaşlıq edirik. Bu gün başlanmasını elan etdiyimiz bu layihə Heydər Əliyev Fondunun hər zaman səhiyyəmizlə birgə olduğunu bir daha sübut edir. Fondumuz bu çətin günlərdə 24 saat ərzində bütün səhiyyəmizə və hər bir vətəndaşımıza lazımi yardım göstərməyə hazırdır”.

22 859 hərəkət iştirakçısı inzibati məsuliyyətə cəlb edilib

Dövlət koronavirusun Azərbaycanda geniş vüsət almasına imkan verməmək, infeksiyaya yoluxmanın sürətini azaltmaq, vətəndaşının sağlamlığını qorumaq üçün lazımi tədbirlər həyata keçirsə də, bəzi vətəndaşlar hələ də qaydalara riayət etmirlər. Nəticədə xüsusi karantin rejiminin tələblərini pozaraq məsuliyyətsiz davranış sərgiləyən, həmçinin icazə sistemindən sui-istifadə edən şəxslər müəyyən olunaraq barələrində qanunvericiliyə uyğun tədbirlər davam etdirilir.

COVID-19 infeksiyasının yayılmasının qarşısının alınması məqsədi ilə tətbiq edilən xüsusi karantin rejiminin pozulmasına görə, 15.04.2020-ci il saat 00:00-dan 16.04.2020-ci il 00:00-dək olan müddət ərzində respublikanın avtomobil yollarında nəqliyyat vasitələri ilə hərəkətdə olan 2923 nəfər Azərbaycan Respublikası İnzibati Xətalar Məcəlləsinin 211-ci maddəsi ilə inzibati məsuliyyətə cəlb edilib.

Baş Dövlət Yol Polisi İdarəsinin məlumatına görə, ümumilikdə 01.04.2020-ci il tarixindən bu günədək respublikanın, o cümlədən paytaxtın avtomobil yollarında xüsusi karantin rejiminin pozulmasına görə 22859 hərəkət iştirakçısı inzibati məsuliyyətə cəlb edilib.

Bundan başqa, 8103 nömrəsinə həqiqətə uyğun olmayan müraciətlər edərək epidemiya əleyhinə rejimin qaydalarını pozan 6 nəfər Lənkəran şəhər sakininin futbol oyunu təşkil etdikləri aşkarlanıb. Həmin şəxslər Lənkəran Şəhər Polis Şöbəsinə gətirilib və hər biri barəsində İnzibati Xətalar Məcəlləsinin müvafiq maddəsi ilə protokol tərtib edilərək 100 manat məbləğində cərimə olunublar.

"Karantin tədbirlərində laqeydliyə yol verilməməlidir”

Nazirlər Kabinetinin Mətbuat xidmətinin rəhbəri İbrahim Məmmədov koronavirus infeksiyasının yayılması ilə bağlı ilk dəfə olaraq aprelin 12-də müsbət statistika qeydə alındığını bildirib. Həmin gün sağalma yoluxmanı üstələyib. Aprelin 14-də də müsbət nəticə əldə olunub: "Amma biz deyə bilmərik ki, belə davam edəcək. Son 5 gündə müsbət statistika mənfi statistikanı əvəzləyir. Bu vaxta qədər əksinə idi. Bu, o deməkdir ki, karantin rejiminin nəticələri artıq var. Bu durum bizi ruhlandırır ki, karantin qaydalarına əməl edək”.

İbrahim Məmmədovun sözlərinə görə, sabitləşmənin davam etməsi istiqamətin müsbətə doğru yönəlməsi deməkdir. Lakin karantin müddətinin yaxın vaxtlarda başa çatması və tədrisin bərpa olunması hələlik müzakirə mövzusu deyil. Məktəblərin başlanması yalnız karantin rejimindən çıxdıqdan sonra mümkündür: "Karantin müddətinin yaxın vaxtlarda bitməsi və tədrisin bərpa olunması hələ ki, müzakirə mövzusu deyil”.

TƏBİB-in İdarə Heyətinin sədri Ramin Bayramlı da qeyd edib ki, karantin tədbirlərini tədricən və nəzarətdə saxlamaqla yumşaltmaq olar. Karantin rejiminin tədricən yumşaldılması növbəti uzadılmadan sonra mümkündür: "Ancaq karantin rejiminə əməl edilməməsi ikinci dalğanı yarada bilər. Araşdırmaların nəticələri göstərir ki, karantin tədbirlərində laqeydliyə yol verilməməlidir. Bu müddət ərzində zəruri bütün addımlar atılıb, ancaq heç kim arxayınlaşmamalıdır. 20 apreldən sonra karantin rejimindən tədricən çıxmaqla bağlı müraciət edəcəyik. Bununla bağlı xüsusi qaydalar hazırlanır. Onlar Nazirlər Kabinetinə təqdim ediləcək və qəbul edildikdən sonra ictimaiyyətə açıqlanacaq”.

Xəyalə MURADLI

Azərbaycan.-2020.- 17 aprel.- S.1;6.