Canda, qanda və qəlbdə xeyirxahlıq

Mehriban xanım Əliyevanın humanizmə çağırışı irsi qan xəstəliklərindən əziyyət çəkənlərə yaşam şansı oldu

Dünya indi üzərindən "Damokl qılıncı” kimi asılmış koronavirus adlı bir bəlayla yaşam savaşı verir. Bəşəriyyəti canı ilə imtahana çəkən COVID-19-a qarşı mübarizə aparmağa çalışır, bütün enerjisini, qüvvəsini, gücünü də ona qarşı yönəldib. Düşmən gözəgörünməz və amansızdır, azacıq bir ehtiyatsızlıq, kiçicik bir yanlışlıq yetər ki, arxasınca böyük təhlükələr, insanlıq tragediyası gətirsin.

Koronavirus təkcə yoluxduğu, hətta ölümünə səbəb olduğu insanların faciəsinə çevrilmir. Demək olar ki, bütün həyatı iflic edir, birbaşa və ya dolayı yolla hər kəsə, hər sahəyə dağıdıcı təsir göstərir. Qorxuya, təşvişə, çarəsizliyə, ümidsizliyə, psixoloji travmalara yol açır.

Amma elə qisim insanlar da var ki, bu çətin və ağır günlərdə köməyə, dəstəyə, qayğıya digərlərindən daha çox ehtiyac duyurlar.

Qan xəstələri kimi...

Qan ver, yaşat

Məlum olduğu kimi, ölkəmizdə koronavirus pandemiyasının yayılmasının qarşısının alınması məqsədi ilə xüsusi karantin rejimi elan edildi. Amma bu müddətdə talassemiya və hemofiliya, həmçinin leykoz xəstəliyindən əziyyət çəkən uşaqlar üçün qan ehtiyatı azaldı. Lakin onlar köməksiz, dəstəksiz qalmadılar, problemləri ilə baş-başa buraxılmadılar...

Hər zaman olduğu kimi, indi də Birinci vitse-prezident, Heydər Əliyev Fondunun prezidenti, UNESCO və ICESCO-nun xoşməramlı səfiri Mehriban xanım Əliyevanın xüsusi diqqət və nəzarəti altında, dünyada, ölkəmizdə yaşanan bu çətin, sınaqlarla dolu günlərdə birinci xanımın himayəsində oldular.

Qan bankında ehtiyatın azalma ehtimalı ortaya çıxan andan dərhal problemin aradan qaldırılması istiqamətində lazımi addımlar atıldı. Aprelin 11-də Heydər Əliyev Fondu və Heydər Əliyev Mərkəzinin əməkdaşları qanvermə aksiyasında iştirak etdilər.

Qan xəstəliklərindən əziyyət çəkən uşaqlara yardım göstərmək və cəmiyyətin diqqətini bu sosial məsələyə cəlb etmək üçün humanist bir addım atdılar, "Qan ver, yaşat” - deyərək cəmiyyətin digər üzvlərinə də nümunə oldular.

Bu nəcib əməlinizlə bir insan həyatının xilaskarı olursunuz

Birinci vitse-prezident Mehriban Əliyeva da həyata keçirilən bu xeyirxah təşəbbüsü alqışladı və "Facebook” səhifəsində bununla bağlı paylaşım etdi: "Şəfqət, mərhəmət, humanizm, səxavət, xoş əməllər etmək, köməyə ehtiyacı olanın yanında olmaq kimi keyfiyyətlər həmişə bizim ən mühüm həyati dəyərlərimiz olmuşdur və bu gün də belədir.

Bütün dünyanı sarsıtmış koronavirus pandemiyası ilə bağlı ölkəmizdə xüsusi karantin rejiminin tətbiq olunduğu bir vaxtda xalqımızın həmrəy olmaq, insansevərlik nümayiş etdirmək, diqqət və qayğı göstərmək bacarığı hər birimizə ancaq qürur hissi yaşadır. İrsi qan xəstəliklərindən, xüsusilə də talassemiyadan əziyyət çəkən insanlara dəstək məqsədilə Milli Hematologiya və Transfuziologiya Mərkəzinin Qan Bankı tərəfindən keçirilmiş qanvermə aksiyasında könüllü olaraq iştirak edən Heydər Əliyev Fondunun və Heydər Əliyev Mərkəzinin əməkdaşlarına təşəkkürümü bildirirəm. Siz bu nəcib əməlinizlə bir insan həyatının xilaskarı olursunuz. Bu, ən yüksək qiymətə layiqdir! Əminəm ki, sizin təşəbbüsünüz bu məsələyə laqeyd yanaşmayan və ölkəmizin yaxşılıq etməyə hazır olan bütün vətəndaşları tərəfindən dəstəklənəcəkdir! Çox sağ olun!”

"Talassemiyasız həyat naminə”

Onu da vurğulamaq yerinə düşər ki, Mehriban Əliyevanın bu sahəyə diqqəti, problemlərin aradan qaldırılması istiqamətində görülən işlər illər öncəyə dayanır.

Hələ 2005-ci ildə Heydər Əliyev Fondunun təşəbbüsü ilə talassemiya problemlərinə həsr olunmuş "Talassemiyasız həyat naminə” mövzusunda keçirilən tədbirdə Birinci vitse-prezident Mehriban Əliyeva bu sahə üzrə ixtisaslaşdırılmış mərkəzin və qan bankının yaradılmasının vacibliyini vurğulamışdı: "Talassemiyadan ən çox uşaqlar əzab çəkir. Xəstəlik böyük-kiçik tanımasa da, uşaqların əzabı daha ağrıdıcıdır. Amma dünyada bu xəstəlikdən tamamilə sağalan insanlar var. Ona görə çox böyük iş görmək lazımdır və bunun öhdəsindən yalnız birlikdə gəlmək olar. Həm dövlət, həm də ictimaiyyət, fondlar, imkanlı insanlar birlikdə bu bəlanın qarşısını ala bilərlər. Heydər Əliyev Fondu üçün isə əsas məsələ ixtisaslaşdırılmış mərkəzin və qan bankının yaradılmasıdır.

Beləliklə, biz bu gün bu problemin həlli yolunda birinci addımı birlikdə atdıq. Heydər Əliyev Fondu bu istiqamətdə hər bir yardımı dəstəkləyir və təklifləri gözləyir”.

Bəli, artıq bu gün həmin tədbirdə qarşıya qoyulan xeyli hədəflərə çatılıb və ən əsası da xəstəliyin artmasının qarşısının alınması istiqamətində aparılan işlər uğurla həyata keçirilib və proses bu gün də müvəffəqiyyətlə davam edir.

Qeyd edək ki, 2009-cu ildə uşaqların sağlamlığının qorunması prioritet istiqamətlərindən biri olan Heydər Əliyev Fondunun proqramı çərçivəsində tikilən Talassemiya Mərkəzinin açılışında Prezident İlham Əliyev və Birinci vitse-prezident Mehriban Əliyeva iştirak ediblər.

Talassemiyalı xəstələr bu mərkəzdə daimi müalicə alır, həmçinin müvafiq tədbirlər nəticəsində qan və onun komponentləri ilə təmin olunurlar.

Eyni zamanda ölkə başçısının sərəncamları əsasında genetik xəstəliklər olan hemofiliya və talassemiyaya dair dövlət proqramı qəbul olunub. Həmin proqramın icrasına 2005-ci ildən başlanılıb və bu proqrama əsasən bu günə qədər bütün irsi qan xəstəliyindən əziyyət çəkən, o cümlədən də talassemiya və hemofiliyalı xəstələrin dərman təminatı və müalicəsi pulsuz həyata keçirilir.

İllərdir ki, ölkəmizdə qanvermə aksiyaları keçirilir

Hazırda Azərbaycanda təxminən 1500-ə yaxın irsi qan xəstəliyindən əziyyət çəkən xəstə var. Milli Hematologiya və Transfuziologiya Mərkəzinin bölgələrdə 8 regional qan mərkəzi var və mərkəz regional qan mərkəzlərinə də öz yardım və dəstəyini göstərir.

Onu da qeyd etmək lazımdır ki, ölkəmizdə 10 ildən artıqdır ki, talassemiya, eləcə də irsi qan xəstəliklərindən əziyyət çəkənlər üçün qanvermə aksiyaları keçirilir və ictimaiyyətimiz bu xeyriyyə aksiyalarında fəal iştirak edir.

Elə indi, koronavirus pandemiyasının tüğyan etdiyi bir zamanda da qana ehtiyacı olanlara yardım edən xeyli sayda mərhəmətli vətəndaşımız var. Genetik yaddaşında humanistlik, köməyə ehtiyacı olana əl tutmaq kimi nəcib hissləri qoruyan Vətən övladları Azərbaycanın hər bölgəsindən, şəhərindən və kəndindən Mehriban xanımın xeyirxahlığa dəvətinə səs verdilər. Qan verib yaşatmaq üçün candan, qəlbdən və könüldən gələn bu insanpərvər çağırışa qoşuldular...

Yasəmən MUSAYEVA

Azərbaycan.-2020.- 29 aprel.- S.1;7.