Gənclərin fəallığı artır

Gənclərin İnkişaf və Karyera Mərkəzi (GİKM) 2019-cu ilin 2 fevralında Azərbaycan Respublikasının Gənclər Fondunun maddi-texniki bazası əsasında yaradılıb. Prezident İlham Əliyevin 1 oktyabr 2019-cu il tarixli sərəncamına uyğun olaraq, ölkənin şəhər və rayonlarında fəaliyyət göstərən Heydər Əliyev mərkəzlərində Gənclərin İnkişaf və Karyera Mərkəzinin nümayəndəliklərinin yaradılmasına başlanılıb.

Gənclərin İnkişaf və Karyera Mərkəzinin məqsədi barədə verdiyimiz suala mərkəzin baş direktoru Rəvanə Həşimovanın cavabı belə oldu: "Bizim ali məqsədimiz təbii ki, gənclərdir. Bütün fəaliyyətimizin mərkəzində onlar dayanır. İstəyirik ki, Azərbaycanın şəhər və rayonlarında yaşayan gənc vətəndaşların dövlət gənclər siyasətinin tələblərinə uyğun, hərtərəfli inkişafı təmin edilsin. Çalışırıq ki, nümayəndəliklərimiz vasitəsilə regionda yaşayan gənclərin daim dövlət tərəfindən onlar üçün yaradılan imkanlar barədə məlumat və məsləhət almaq imkanları olsun. Bizim nümayəndəliklərdə təşkil olunan layihələr, tədbirlər və müxtəlif istiqamətli fəaliyyətlər gənclərin fərdi və sosial inkişafına, asudə vaxtlarının səmərəli təşkilinə xidmət edir”.

"Sevindirici haldır ki, gənclər bizə inanır”

Müsahibimiz bildirir ki, GİKM həmçinin öz fəaliyyətində gənclərin karyera və peşə seçimlərini dəstəkləməyi, şəbəkələşmə və sosiallaşma məkanı formalaşdırmağı, peşəkar həyata yönləndirməyi, gənc istedadları üzə çıxarmağı və inkişaf etdirməyi, ictimai fəal gənclər yetişdirməyi əsas məqsədlər kimi qarşısına qoyub. R.Həşimova bu mərkəz və gənclərin məşğulluq, rayonlarda gəncləri işlə təmin etmə məsələlərinə də toxundu. O, bu gün GİKM-in region gəncləri üçün real iş imkanları yaratdığını bildirdi: "Bizim hər bir yeni yaradılan nümayəndəliyimizdə bir qrup gənc işlə təmin olunur. Hətta bir ay qabaq açılışlarını planlaşdırdığımız rayon nümayəndəliklərimizə vakansiya elanı payladıq. Qısa müddətdə bizə yüzlərlə gənc müraciət etdi. Bu, çox sevindirici haldır ki, gənclər bizə inanır və bizimlə çalışmağa can atırlar. Əlimizdən gəldiyi qədər müraciət edən təhsilli, işləməyə həvəsli, ictimai fəallığı ilə seçilənlərlə əməkdaşlıq etməyə çalışırıq. Bizim əsas məqsədlərimiz sırasına, əslində, bu məsələ də daxildir. Gələcəkdə hər bir rayonda hansısa şirkətə, quruma, iş təklif edən şəxsə Gənclərin İnkişaf və Karyera Mərkəzi real işləmək qabiliyyəti olan kadrlar təqdim edə bilsin. Bunun üçün həmin qurumlar aidiyyəti olmayan digər yerlərə yox, məhz Gənclərin İnkişaf və Karyera Mərkəzinə müraciət etsinlər”.

Mərkəzin baş direktoru diqqətə çatdırdı ki, Gənclərin İnkişaf və Karyera Mərkəzinin artıq 20 rayonda nümayəndəliyi fəaliyyət göstərir. Bu rayonlar sırasında Cəlilabad, Masallı, Quba, Qusar, Zaqatala, Qax, Biləsuvar, Qazax, İsmayıllı, Şəmkir, Bərdə, Ağcabədi, Xaçmaz, Goranboy, Yevlax, Lənkəran, Samux, Göygöl, Şamaxı, Göyçay var. Gənclərin İnkişaf və Karyera Mərkəzinin bu ilin aprelində digər rayonlarda da nümayəndəliklərinin açılması planlaşdırılır. R.Həşimova bildirdi ki, misal üçün fevral ayında bizim Ağdam, Şəki, Qəbələ, Tərtər, Balakən, Gədəbəy, Saatlı, Xızı, Siyəzən, Şabran kimi rayonlarda açılışlarımız planlaşdırılıb. Ümumi olaraq 56 mərkəzdə nümayəndəliklərimiz fəaliyyət göstərəcək.

"Könüllülər ili” və GİKM

GİKM-in baş direktoru dedi ki, dövlət başçısı tərəfindən 2020-ci ilin "Könüllülər ili” elan olunması bizim təşkilatı bu sahədə yeni və daha geniş auditoriyanı əhatə edəcək layihələr icra etməyə ruhlandırıb. R.Həşimova vurğuladı: "Regiondakı mərkəzlərimizin hər birinin kifayət qədər gənc könüllüləri var. Bizim regional könüllülər həm Gənclər Fondu, həm də GİKM-in regionlarda aparılan işlərində, layihələrin həyata keçirilməsində ən böyük dayağıdır. Buna misal olaraq deyə bilərik ki, Azərbaycan Respublikasının Gənclər Fondu və ASAN-nın birgə təşkilatçılığı, bütün könüllü təşkilatlar və hərəkatların iştirakı ilə həyata keçirilən "Azərbaycan Könüllülük Həftəsi”ndə Gənclərin İnkişaf və Karyera Mərkəzinin yerli nümayəndəliklərinin könüllüləri də fəal iştirak etdilər. Həftə çərçivəsində həyata keçirilən "Şəhidimiz”, "Vətənimiz”, "Könüllülük sərhəd tanımır!”, "Təbiətimiz” kampaniyalarında GİKM-in könüllüləri öz rayon və şəhərlərini layiqli şəkildə təmsil etdilər. Bundan əlavə, 2020-ci ilin "Könüllülər ili” elan olunması münasibəti ilə regionda gənclərimiz "Könüllü qonaq” adlanan təşəbbüs irəli sürüb. Bu çox geniş təşəbbüsdür. "Könüllü qonaq” hər bir gəncdə, könüllüdə qarşılığı olmadan yaxşılıq etmək, həmin yaxşılıqdan sözün əsl mənasında həzz almaq, paylaşdıqca artmaq, artdıqca daha çox yaxşılıq etmək kimi hissləri aşılayır. Biz şadıq ki, regionlarda gənclərimiz sevə-sevə bu təşəbbüsün bir hissəsi olmağı qəbul edirlər”.

Xatırladaq ki, adıçəkilən təşəbbüs qayğıya xüsusi ehtiyacı olan ailələrin və tənha şəxslərin evlərinə baş çəkərək təmizlik işlərinin aparılması, evlərdə, həyətlərdə və bağlarda səliqə-sahman yaradılmasını nəzərdə tutur. Gənclər məişətlə bağlı ev sahibinə kömək göstərdikdən sonra onlarla birlikdə xoş və maraqlı vaxt keçirirlər. Onlar ölkəmizin digər şəhər və kəndlərində yaşayan gəncləri də könüllü qonaq təşəbbüsünə qoşulmağa çağırırlar.

"Könüllülər ilində hansı tədbirlər görüləcək?” sualımıza cavabında mərkəzin baş direktoru görəcəkləri işlərdən söz açdı. Tədbirlər planının geniş olduğunu söylədi: "Nəzərə alsaq ki, GİKM-in ətrafında həm mərkəzdən, həm də regiondan müxtəlif, parlaq ideyalı, fərqli fikirli, daima yaradan gənclər toplaşıb, demək bu il bizdən gözləniləcək işlərin siyahısı çox maraqlı və rəngarəng olacaq”.

Zöhrə FƏRƏCOVA

Azərbaycan.- 2020.- 7 fevral.- S.10.