Nəsildən gələn fitrət

İstedad

"Şəfəq” qəzetinin əməkdaşı Məzahir Məmmədovla söhbətimizin birində mənə fitri istedad sahibi olan bir qızdan söz açmışdı. Dəfələrlə Qubaya səfərim olsa da, onun dediyi xanımın barəsində məlumatım şifahi olaraq qalırdı.

Bu günlərdə Məzahir müəllimlə birlikdə gənc qubalı istedadı daha yaxından tanımaq mənə də nəsib oldu.

Bir tarixi xatırlasaq yerinə düşər. "Qızıl Quba” ("Şəfəq” qəzetinin əvvəlki adı) qəzetinin 7 iyun 1959-cu il tarixli sayında dərc olunmuş "Gənc istedad” başlıqlı məqalə hələ o vaxt çoxlarının marağına səbəb olmuşdu. Həmin yazıda Ələsgər Qadaşov adlı bir məktəblinin fitri istedadından, onun qubalı şair Yusif Həsənbəyin sözlərinə bəstələdiyi "Var sənin” mahnısını necə gözəl ifa etməsindən və tamaşaçılar tərəfindən gurultulu alqışlarla qarşılanmasından bəhs edilirdi.

O vaxtdan illər ötsə də, həmin saralmış qəzet parçası hələ də ailə tərəfindən qorunub-saxlanır. Belə ki, musiqiçinin qardaşı qızı Günəş Hacıbalayeva bu ənənəni uğurla davam etdirir, fortepiano müəllimi Solmaz Bədəlovanın etimadını hər vəchlə doğrultmağa çalışır, Azərbaycan və dünya bəstəkarlarının əsərlərini həvəslə öyrənir.

Hazırda o, Quba İncəsənət Məktəbinin VI sinfində oxuyur. Günəş bu illər ərzində bir çox respublika və rayon səviyyəli müsabiqələrdə iştirak edib. Ən yaddaqalanı isə Üzeyir Hacıbəyli adına Bakı Musiqi Akademiyası Orta Musiqi Məktəbində bəstəkar Qara Qarayevin 100 illiyinə həsr olunmuş "Pianoçuların V Respublika Elmi-İfaçılıq müsabiqəsi” olub. Müsabiqədə çıxış edən Günəşin Q.Qarayevin "Altı uşaq pyesi” silsiləsindən "Fikirli”, "Oyun”, eləcə də, İ.S.Baxın, Y.Haydın, P.Çaykovskinin, A. Bartenin əsərlərini fortepianoda xüsusi peşəkarlıqla ifa etməsi münsiflər heyəti tərəfindən yüksək qiymətləndirilib. Elə bu nailiyyətinə görə balaca istedad sahibi həvəsləndirici fəxri fərmanla təltif olunub. Eyni zamanda, Günəş Qubada və qonşu rayonlarda keçirilən müsabiqələrdə iştirak edərək uğurlu nəticələr əldə edib.

Məzahir Məmmədov bizimlə söhbətində bildirdi ki, Günəş təhsil aldığı şəhid Hikmət Hüseynov adına şəhər 4 saylı tam orta məktəbdə dərslərə çalışqanlığı ilə də seçilir. Müəllimlər ondan çox razıdırlar. Onun musiqi istedadı təhsilində də özünü büruzə verir. Dərs əlaçısı olan Günəş VI sinifdə oxumasına baxmayaraq, məktəbin ictimai həyatında yaxından iştirak edir.

Akif ƏLİYEV

Azərbaycan.- 2020.- 20 fevral.- S.10.