Səyyar xidmət, vətəndaşa
diqqət, vaxta qənaət
Səhərdir...
Azərbaycanın ucqar cəbhə bölgələrindən biri Qazax rayonundayıq.
Dəmir Yolu Stansiyasına xeyli insan toplaşıb. Hər kəsin
üzündə bir təbəssüm var. Bir qədər
sonra stansiyada dayanmış qatarın qapıları
açılır və minik başlanır.
Növbəlilik prinsipi qorunmaqla insanlar vaqonlara daxil
olurlar. Müəyyən
qədər vaxt keçsə də, qatar
yerindən tərpənmir ki, tərpənmir.
Bir az əvvəl qatara minən vətəndaşlar
isə sevincli şəkildə vaqonlardan düşərək
geri qayıdırlar. Nə baş verir?
Bayaqdan kənardan seyr etdiyimiz mənzərə bizdə
maraq yaradır. Duruma şahidlik etmək üçün
qatara yaxınlaşırıq və bir anlıq hər
şey bəlli olur. Sən demə, bu,
regionlararası dəmir yolu nəqliyyatı vasitəsi yox,
milli brendimiz olan "ASAN xidmət”in səyyar qatarıdır.
Maraqlı gəldiyi üçün qatara daxil olub burada
həyata keçirilən proseslə yaxından
maraqlanırıq.
Səyyar
xidmətə indiyədək 2 milyondan artıq vətəndaş
müraciət edib
Prezident İlham Əliyevin həyata keçirdiyi
islahatların real təzahürü olan "ASAN xidmət” mərkəzlərinin
olmadığı regionlarda vətəndaşların dövlət
xidmətləri ilə təmin edilməsi üçün
müasir texniki avadanlıqla təchiz olunmuş Səyyar
"ASAN Qatar” konsepsiyası reallaşdırılıb.
2016-cı
ildə dövlət başçısının
açılışını etdiyi səyyar qatar
2017-ci il fevral ayının 1-dən fəaliyyətə
başlayıb və bugünədək ümumilikdə 17
rayona 46 dəfə səfər edib.
Bu müddət ərzində səyyar qatara 115 minə
yaxın müraciət daxil olub.
Qeyd edək ki, səyyar xidmətin təşkili məqsədilə
ilk olaraq avtobuslar təşkil edilib. 2013-cü ilin iyun
ayından etibarən iki istiqamət (cənub və şimal-qərb)
üzrə hərəkətə keçib. 2013-cü ildə 2 avtobusla fəaliyyətə
başlayıb, daha sonra Prezident İlham Əliyevin
tapşırığına əsasən avtobusların
sayı 10-a çatdırılıb.
Ümumilikdə
səyyar xidmətə (avtobus, qatar,
kiçik səyyar qruplar, sifarişli əsaslarla həyata
keçirilən xidmət və sosial aksiyalar) 2.126.461 vətəndaş
müraciəti qeydə alınıb.
Gözləmə
və xidmət zalı, əməkdaşların istirahət
kupeləri olmaqla 3 vaqon
"ASAN Qatar”dayıq. Sanki "ASAN xidmət”
mərkəzlərinin kiçildilmiş formasıdır.
Qatar gözləmə zalı, xidmət
zalı, əməkdaşların istirahət kupeləri
olmaqla 3 vaqondan ibarətdir. Səyyar qatar
ölkəmizdə geniş dəmir yolu şəbəkəsi,
mövcud infrastruktur, kommunikasiya xətləri və ən
müasir texnologiyalardan istifadə edərək yerlərdə
vətəndaşların xidmətindədir.
Belə ki, "ASAN Qatar” növbəli qaydada ölkədə
bütün istiqamətlərdə hərəkət edərək
əvvəlcədən təyin olunan yerdə dayanır və
əhaliyə xidmət göstərir.
Xidmətlərə
gəlincə burada - tərcümə xidməti; tibb xidməti;
bank xidməti (dövlət rüsumlarının və xidmət
haqlarının qəbulu); daşınmaz əmlakın təsvirinə,
dövlət qeydiyyatına alınmış hüquqlara və
onların məhdudlaşdırılmasına
(yüklülüyünə) dair dövlət reyestrindən
arayışların verilməsi; mənzillər üzərində
mülkiyyət hüquqlarının dövlət
qeydiyyatına alınması barədə
çıxarışların verilməsi; yaşayış
evləri (fərdi) üzərində mülkiyyət
hüquqlarının dövlət qeydiyyatına
alınması barədə çıxarışların
(ilkin qeydiyyat istisna olmaqla) verilməsi; əmək
pensiyalarının təyin edilməsi; ümumvətəndaş
pasportlarının verilməsi və dəyişdirilməsi; şəxsiyyət vəsiqələrinin verilməsi
və dəyişdirilməsi; vətəndaşlıq vəziyyəti
aktlarının dövlət qeydiyyatı; notariat fəaliyyəti
xidməti həyata keçirilir.
Səyyar "ASAN xidmət”in qatar və avtobuslarında
göstərilən xidmətlərlə bağlı ödənişlərin
qəbulu daxildə fəaliyyət göstərən
poçt xidməti vasitəsilə reallaşır.
Dövlət
xidmətləri vətəndaşlara yeni və innovativ
üsullarla təqdim olunur
"ASAN Qatar”da ümumilikdə 21 nəfər əməkdaş
vətəndaşlara xidmət göstərir. Vaqona daxil olan
şəxs məlumat mərkəzinə yaxınlaşıb
müraciət edir və könüllülər tərəfindən
istiqamətləndirilir.
Azərbaycan
Respublikasının Prezidenti yanında Vətəndaşlara
Xidmət və Sosial İnnovasiyalar üzrə Dövlət
Agentliyinin İctimaiyyətlə əlaqələr şöbəsinin
müdiri Elnur Niftəliyev deyir ki, Səyyar "ASAN xidmət”in
həyata keçirilməsinin əsas məqsədləri
dövlət xidmətlərinin vətəndaşlara daha
rahat, yeni və innovativ üsullarla təqdim edilməsi, vətəndaşlar
üçün əlçatanlığın təmin edilməsi
və vətəndaş məmnunluğuna nail
olunmasıdır. Qatarda vətəndaşlara
yüksək səviyyədə xidmət göstərilməsi
üçün hər cür şərait yaradılıb.
Səyyar "ASAN xidmət” həftənin bazar
ertəsi - şənbə günləri saat 10:00-dan 18:00-dək
fəaliyyət göstərir.
2017-ci ildə
fəaliyyətə başlayan səyyar qatar
artıq 4-cü dəfədir ki, Qazax rayonuna səfər edir.
Elnur Niftəliyevin sözlərinə görə,
indiyədək "ASAN Qatar” vasitəsilə Qazaxda 17.872 nəfər
vətəndaş müraciətindən 16.957-si xidmətlə
təmin olunub. Səyyar qatar fevral
ayının 29-dək Qazax rayonunda vətəndaşlara xidmət
göstərəcək.
Hansı
sənədi düzəltmək istəyirsən gəl,
asanlıqla nail ol
Burada ən çox müraciət edilən sahələr
ümumvətəndaşlıq pasportu, notariat və şəxsiyyət
vəsiqəsinin alınması, dəyişdirilməsi xidmətləridir.
Rayonun Sofulu kəndindən olan məcburi
köçkün Qurbanovlar ailəsi yenicə dünyaya gəlmiş
körpələri Uğur Qurbanova şəxsiyyət vəsiqəsi
almaq üçün səyyar xidmətə təşrif
buyurub. Anası Aygün Qurbanova deyir ki, xeyli vaxtdı
"ASAN Qatar”ın Qazaxda olması barədə məlumat
alıblar. Amma ilk günlər gəlmək
mümkün olmayıb: "Rayon yeridir, hər kəsin
işi-gücü olur. Biz də
imkanlaşdırıb bu gün gəldik. Çox
rahat şəkildə sənədlərimizi təqdim etdik.
Körpə uşaqla gələnlərə
daha çox diqqət göstərilir. Belə xidmətdən
kim inciyər ki?!”
Rayonun
birinci Şıxlı kəndindən gələn Abdullayev
Teymur da 5 yaşlı qızı Nuray üçün yeni nəsil
şəxsiyyət vəsiqəsi almaq üçün səyyar
xidmətə müraciət edib: "Çox əla bir xidmətdir.
Allah Prezident İlham Əliyevin canını
sağ eləsin. Əvvəllər necə idi, indi necə...
Uşaqlarımızın doğum haqqında
şəhadətnamələrini belə güc-bəla ilə
alırdıq. İndi hər şey
asanlaşıb. Rahat şəkildə nə istəyirsən,
hansı sənədi düzəltmək fikirin var, gəl,
asanlıqla həll et”.
75 yaşlı rayon sakini Minayə Hacıyeva isə
ümumvətəndaş pasportunu dəyişdirmək
üçün xidmətə müraciət etdiyini deyir. Sevincli şəkildə
bzimlə həmsöhbət olan ağbirçək ananın
sözlərinə görə, bəlkə də
dünyanın heç bir ölkəsində ucqar rayonlarda, kəndlərdə
yaşayan insanlara belə xidmət göstərilmir: "Bunun
hamısını edən Prezidentimiz İlham Əliyevdir. Allah dövlətimizin başçısını
qorusun. Əlindən gələni edir ki, heç kim narazı olmasın, heç kim
başqasına rüşvət verməsin. Əvvəllər
pasport almaq, dəyişdirmək zülm idi. Baxın, görün, indi necədir? Hamı çox rahat şəkildə gəlib
pasportunu dəyişdirir, yenisini alır”.
Çaylı kəndinin 92 yaşlı ağsaqqalı
Nofəl Hüseynəliyev notariat xidmətinə müraciət
etmək üçün səyyar qatara təşrif buyurub. Ancaq növbəsi
hələ çatmadığı üçün
bayırda maraqlı söhbət edir. Biz də
ağsaqqalın söhbətinə qulaq müsafirliyi edirik:
"Ay sənin qadan alım, əvvəllər belə
işlər görərdin?! Görün
Prezidentimiz xalq üçün nələr yaradır. Saatlarla idarə-müəssisələrin
qapılarında növbələrdə qalırdıq.
Hərdən dava-dalaş düşürdü, rüşvət
alan kim, verən kim... Görün,
bunların biri qalıbmı, əlbəttə ki, yox!”
Səyyar
qatarın könüllüləri gün ərzində 60-70 nəfərə
xidmət göstərirlər
Səyyar qatarda müxtəlif sahələrlə
bağlı xidmətə müraciət edənlərə
könüllülər yardımçı olurlar. Əslində
elə Azərbaycanda könüllülər hərəkatı
"ASAN xidmət”dən başlanıb. "ASAN
Könüllüləri”nin sayı ildən-ilə getdikcə
artır. Hazırda bütün mərkəzlərdə
yüzlərlə könüllü fəaliyyət göstərir.
Ümumiyyətlə, könüllü olmaq insanların
xoş niyyətini göstərir. İnsanlar təmənnasız
olaraq kiməsə kömək etmək üçün xidmətə
müraciət edirlər. Bu mərkəzdə
də gənclərin yaradıcılıq potensialının
inkişaf etdirilməsi üçün şərait və
imkanların yaradılması, onların bilik və
bacarıqlarının artırılması məqsədilə
könüllülük fəaliyyəti həyata
keçirilir. Könüllülər 2 ay
müddətində fəaliyyət göstərirlər.
Göstərilən öhdəliklərlə 2
ay müddətində çalışan könüllülərə
Vətəndaşlara Xidmət və Sosial İnnovasiyalar
üzrə Dövlət Agentliyi tərəfindən rəsmi
sertifikat verilir.
Qatarda
könüllü kimi fəaliyyət göstərən Turanə
Mustafayeva, Məmmədqasım Bayramov, Murad Hüseynovla
söhbətimiz zamanı gənclər dedilər ki, Prezident
İlham Əliyev tərəfindən 2020-ci il
ölkəmizdə "Könüllülər ili” elan edilib.
Onlar da uğurlu karyeralarının ilk
addımlarını məhz səyyar xidmətdə
könüllü olmaqla atmış olublar.
Turanə deyir ki, burada insanlara yardım, kömək etmək
xoş bir hissdir. Yaşlı nəslin nümayəndələri,
nənə-babalarımz gəlir buraya. Onlara
kömək etmək, qocalara əl tutmaq böyük
savabdır. Qazaxda 3-cü dəfədir (2 dəfə səyyar
qatar, 1 dəfə səyyar avtobus) bu
prosesdə könüllü kimi çalışır. Murad gün ərzində 60-70 nəfər vətəndaşa
xidmət göstərdiyini də söylədi.
Bu il "ASAN Qatar” 11 şəhər və rayona
səfər edəcək
Beləliklə, fevralın 3-dən cəbhə bölgəsinə gələn "ASAN Qatar” bu ayın 29-dək, yəni 27 gün müddətində Qazaxda vətəndaşların xidmətində olacaq. Elnur Niftəliyevin sözlərinə görə, növbəti marşrut Ağdaş rayonunun Ləki qəsəbəsi olacaq. Martın 4-dən 18-dək aran bölgəsində olacaq səyyar qatar 15 gün müddətində vətəndaşlara xidmət göstərəcək. Martın 30-dan aprelin 28-dək (30 gün) Xaçmazda, mayın 4-dən iyunun 2-dək isə Şirvan şəhərində olacaq.
Bu il Qazaxdan başlayan səyyar qatarın son duracağı Hacıqabul rayonu olacaq. Ümumilikdə bu il "ASAN Qatar” ölkənin 11 rayonunda - Qazax, Ağdaş, Xaçmaz, Şirvan, Salyan, Astara, Lənkəran, Şəmkir, Ağstafa, Füzuli və Hacıqabulda ölkə əhalisinə operativlik, şəffaflıq, nəzakətlilik, məsuliyyət və rahatlıq prinsipləri əsasında xidmət edəcək.
Bir sözlə, Dövlət Agentliyinin səyyar xidmətləri, xüsusən də "ASAN Qatar”da yaradılan şərait bir daha təsdiq edir ki, Prezident İlham Əliyevin icra orqanlarına vətəndaşlara daim diqqət və qayğı göstərilməsi ilə bağlı tapşırığı, habelə bir sıra tövsiyələri effektiv üsullarla yerinə yetirilir. Milli brendimiz olan "ASAN xidmət” fəaliyyətini getdikcə daha da şaxələndirir.
Elçin
CƏFƏROV,
Rəşad
BAXŞƏLİYEV
Azərbaycan.-2020.- 23 fevral.- S.1;4.