Prezident cəbhə bölgələrinin inkişafına xüsusi önəm verir

Ölkənin hərtərəfli yüksəlişində mühüm rol oynayan sənədlərdən biri də dövlət başçısının təşəbbüsü ilə 2004-cü ildən həyata keçirilən regionların sosial-iqtisadi inkişaf proqramlarıdır. Artıq hər biri beş ili əhatə edən üç Dövlət proqramı icra edilib, dördüncü proqram üzrə işlər isə cədvəl üzrə həyata keçirilir.

Prezident İlham Əliyev respublikanın regionlarının inkişafına xüsusi diqqət yetirir. Bölgələrdə proqram üzrə göprülən işlərin təməlqoyma mərasimində və ya açılışında şəxsən iştirak edir. Bununla yanaşı, hər bir rayona səfər etdikdə qarşıya çıxan problemləri operativ həll etmək üçün tədbirlər görür, lazım gəldikdə müvafiq sərəncam imzalayaraq vəsait ayırır. "Ağcabədi rayonunun Sarıcallı kəndində yeni ümumtəhsil məktəb binasının tikintisi ilə bağlı tədbir haqqında” və "Ağcabədi rayonunun Mingəçevir-Bəhrəmtəpə (109 km) - Avşar-Salmanbəyli-Aşağı Avşar-Xocavənd avtomobil yolunun tikintisi ilə bağlı tədbirlər haqqında” imzalanan sərəncamlar bunu bir daha təsdiqləyir.

Ağcabədi ölkəmizin ən böyük taxılçılıq rayonlarındandır. Ölkə rəhbərinin bu günlərdə rayona səfəri zamanı Hindarx qəsəbəsində fermerlərin əkin sahəsində biçinin başlanması mərasimində iştirakı da bu səbəbdən irəli gəlir. Dövlət başçısına məlumat verildi ki, rayonda cari il 30 min hektarda taxıl əkilib ki, onun da 22 min hektarı buğdadır. Ötən il hər hektardan 35 sentner məhsul götürülüb ki, bu da ölkə üzrə ümumi göstəricidən yüksəkdir.

Regionların sosial-iqtisadi inkişafı ilə bağlı qəbul edilən Dövlət proqramlarının icrası aqrar, o cümlədən qeyri-neft sektorunun inkişafı, ixracyönümlü məhsullar istehsal edən müəssisələrin sayının artması, həmçinin ölkənin hərtərəfli inkişafı istiqamətində mühüm rol oynayır. Bölgələrin inkişafının əsas hədəflərindən biri də ölkənin ərzaq təhlükəsizliyinin təmin edilməsidir. Prezidentin iştirakı ilə açılan Ağcabədi dənli bitki toxumlarının emalı müəssisəsi də ölkəmizin ərzaq təhlükəsizliyinə yüksək töhfə verəcək.

Yaxşı məhsul götürməyin təməlində dayanan əsas faktorlardan biri də yüksək keyfiyyətli toxumdan istifadədir. Emal gücü saatda 5 ton olan bu müəssisə toxum materiallarını 98 faiz təmizləmək gücündədir. Belə toxumlardan istifadə əkin sərfiyyatını 20-30 faiz azaltmaq imkanı verir. Bu, həmçinin əkinə sərf edilən toxumun həcmini, eləcə də fermerin məhsul istehsalına çəkdiyi xərcləri əsaslı şəkildə azaldır.

Rayonda yalnız aqrar sahəyə deyil, digər sosial məsələlərə də diqqət artırılmışdır. Ağcabədidə mövcud kanalizasiya və su sistemləri köhnəlmişdi. Bu isə rayon sakinlərinin su ilə təminatında müəyyən çətinliklər yaratmışdı. Odur ki, Regionların sosial-iqtisadi inkişafı Dövlət proqramı çərçivəsində 2017-ci ildə "Ağcabədi şəhərinin içməli su təchizatı və kanalizasiya sistemlərinin yenidən qurulması layihəsi”nin icrasına başlanılmışdı. Səfər zamanı dövlət başçısına məlumat verildi ki, Ağcabədi şəhərini içməli su ilə təmin etmək məqsədilə 14 subartezian quyusu qazılıb, suyu şəhərə gətirmək üçün 15 kilometr uzunluğunda magistral su xətti çəkilib. Bununla yanaşı, şəhərin dayanıqlı su təminatını yaxşılaşdırmaq məqsədilə hər biri 10 min kubmetr olan 2 su anbarı tikilib, 350 kilometr içməli su xətti çəkilib, 8500 ünvana ev birləşməsi verilərək sayğaclar quraşdırılıb. Görülən işlər sayəsində artıq şəhər əhalisi 24 saat ərzində keyfiyyətli içməli su ilə təmin olunur.

"Su təchizatı və kanalizasiya investisiya proqramı” çərçivəsində Ağcabədi şəhərində həmçinin tullantı suların idarə edilməsi üçün tullantı su şəbəkəsi, 4 kanalizasiya-nasos stansiyası, 9 kilometr kanalizasiya kollektoru inşa edilib. Sutkada 10 min kubmetr olan təmizləyici qurğunun tikintisində isə son tamamlama işləri aparılır.

Səfər çərçivəsində dövlət başçısının iştirakı ilə "Ağcabədi-2” elektrik yarımstansiyası da istifadəyə verildi. Yarımstansiyanın istismara verilməsi cəbhəyanı rayon üçün xüsusi əhəmiyyət daşıyır. Belə ki, yarımstansiya Ağcabədi şəhərində sosial-iqtisadi təyinatlı obyektlərin, meliorasiya və suvarma sistemlərinin, ətraf kənd və qəsəbələrin, həmçinin Taxtakörpü ərazisində məskunlaşmış Laçından olan məcburi köçkünlərin, eləcə də hərbi hissələrin fasiləsiz elektrik enerjisi ilə təmin edilməsində mühüm rol oynayacaq. Yarımstansiyanın istifadəyə vetilməsi 5262-si əhali, 831-i qeyri-əhali olmaqla, ümumilikdə, 6093 abonentin elektrik enerjisinin təchizatını daha da yaxşılaşdıracaq.

Prezident İlham Əliyev rayonda "ASAN Həyat” kompleksinin açılışında da iştirak etdi. "ASAN xidmət”, "ASAN Kommunal” mərkəzləri, "ASAN Vəkillik” bürosu, Uşaq Psixoloji Sosial İnkişaf Mərkəzi və vətəndaşların istirahəti və əylənməsi üçün bir sıra sahələrin daxil olduğu kompleks Ağcabədi, Ağdam, Beyləqan, Cəbrayıl, Füzuli, Xocalı, Xocavənd, Şuşa və Zərdab rayonlarında qeydiyyatda olan 815 mindən çox vətəndaşa xidmət göstərəcək. Burada 207 əməkdaş və 45 könüllü çalışacaq.

Dövlət başçısı kompleksin açılışında rayonda görülən işlərə yüksək qiymət verərək demişdir: "Ağcabədidə infrastruktur tamamilə təzələnib. Elektrik enerjisi ilə bağlı əvvəlki illərdə problemlər var idi. İndi bu problemlər aradan qaldırılır. Bu gün Ağcabədidə açılacaq yeni yarımstansiya rayonu dayanıqlı enerji ilə təchiz edəcək. Ağcabədidə qazlaşdırmanın səviyyəsi 90 faizdən çoxdur. Cəmi bir neçə il bundan əvvəl burada insanlar, ümumiyyətlə, qazın nə olduğunu unutmuşdular... Mənim növbəti sərəncamlarımda yeni yol infrastrukturunun yaradılmasına əlavə vəsait ayrılması nəzərdə tutulub. Mənə verilən məlumata görə, Ağcabədi rayonunun şəhər və kənd yollarının 60 faizi yenidən qurulur, qalan 40 faizi üçün də bizim proqramlarımız var. Regionların sosial-iqtisadi inkişafı Dövlət proqramında onlar təsbit edilib. Biz bütün yolları abadlaşdıracağıq”.

Rüstəm KAMAL

Azərbaycan.-2020.- 10 iyun.- S.6.