Azərbaycan beynəlxalq
ictimaiyyətin etibarlı üzvüdür
İlham Əliyevin rəhbərliyi
ilə ölkəmiz pandemiyaya qarşı qlobal miqyasda
mübarizə aparır
Bəşəriyyət koronavirus - COVID-19 adlı mərəzin əsirinə çevrilib, yarım ildir ki, bu bəladan qurtulmaq üçün yollar axtarır, dərman tapmağa çalışır. Hələliksə bunların heç birinə nail olunmayıb və koronavirus sürətlə yayılaraq dünyada 8 milyondan çox insana yoluxub, 446 mindən artıq can alıb.
Nə yazıq ki, bu statistika artan tendensiya ilə davam
edir. Amma yayıldığı ilk zamanlarda onu ciddiyə
almayan, dərhal təhlükəsizlik tədbirləri
görməyən, sosial izolyasiya qaydalarını tətbiq
etməyən ölkələrə qarşı daha amansız
oldu. Hazırda bütün ölkələrdə
peyvənd hazırlanana qədər bu virusa yoluxmamaq və
ondan qorunmaq üçün çıxış yolları
axtarılır.
Pandemiyanın
ən kəskin günlərində dövlət
başçısı xalqın yanında oldu
Virusun üzə çıxdığı ilk zamanlardan
etibarən Azərbaycan bu gözəgörünməz
düşmənlə mübarizəyə atıldı.
Prezident
İlham Əliyevin birbaşa nəzarəti ilə həyata
keçirilən çevik və effektiv tədbirlər
ölkəmizdə koronavirusla mübarizədə müsbət
nailiyyətlər əldə edilməsinə rəvac verdi. Pandemiyanın ən kəskin günlərində
də dövlət başçısı xalqın yanında
oldu, problemlərinin həlli istiqamətində mühüm
tapşırıqlar verdi. Bu
dövrdə müxtəlif açılışlarda
iştirak etdi, bölgələrə səfərlər edib vətəndaşlarla
görüşdü.
Dövlət başçısı COVID-19 pandemiyası
zamanı böyük fədakarlıq göstərərək,
insanların maddi ehtiyaclarının ödənilməsi, əhalinin
sağlamlığının qorunması istiqamətində
uğurlu işlərə imza atdı. Prezidentin rəhbərliyi
altında nail olduğumuz bütün bu müsbət göstəricilər
qlobal pandemiyaya qarşı digər ölkələrlə
müqayisədə daha yaxşı statistika ortaya
qoymağımıza səbəb oldu.
Azərbaycan vətəndaşının
sağlamlığı və təhlükəsizliyi hər
zaman dövlət siyasətinin əsas prioritetini təşkil
edib.
İyunun 9-da modul tipli xəstəxanaların
açılışı zamanı İlham Əliyev bir daha
vurğulamışdı ki, görülmüş
bütün tədbirlərin mərkəzində məhz Azərbaycan
vətəndaşlarının sağlamlığı
dayanmışdır: "Bizim əsas vəzifəmiz
insanları bu xəstəlikdən qorumaqdır, onların həyatını
xilas etməkdir. Əlbəttə ki, itkilərimiz
də olub, amma bəzi ölkələrlə müqayisədə
Azərbaycandakı vəziyyət qat-qat yaxşıdır.
Bu, onu göstərir ki,
düşünülmüş siyasət, xalqla iqtidar
arasında birlik, dövlətin addımlarına yüksək
inam olan yerdə nəticə də olur. Bu
günə qədər mən hər gün yüzlərlə
vətəndaşdan məktub alıram. Bu
məktublarda görülmüş işlərə yüksək
qiymət verilir. Bu məktubların
çox kiçik bir hissəsi mətbuatda dərc edilir.
Ancaq o məktublar göstərir ki, bütün
rayonlardan, bütün kateqoriyalara aid olan insanlardan bu məktublar
gəlir və insanlar minnətdarlıqlarını bildirirlər.
Eyni zamanda məhdudlaşdırıcı
dövr ərzində çətin vəziyyətə
düşmüş vətəndaşların maddi məsələləri
də həll olunubdur və Azərbaycan burada da liderlik
göstəribdir”.
Qlobal səviyyədə
liderlik təşəbbüsü
Azərbaycan beynəlxalq səviyyədə də
koronavirusla mübarizəyə dəstək verən ilk
ölkələrdən oldu. Dövlətimiz qlobal
böhranın aradan qaldırılması istiqamətində
ehtiyacı olan xeyli ölkəyə maddi-texniki yardım edib,
kömək əlini uzadıb, pandemiya ilə mübarizəyə
qarşı dünya birliklərinin səylərinin birləşdirilməsinin
təşəbbüskarı olub.
Azərbaycan liderlik təşəbbüsü göstərərək,
dünyanı COVID-19-la mübarizədə birləşməyə
səslədi.
Belə ki, ölkə daxilində və beynəlxalq
arenada ölkəmizin təşəbbüsü ilə zirvə
görüşləri keçirildi. Eyni
zamanda ölkəmiz bu aylar ərzində beynəlxalq
işgüzar videokonfranslardan da kənarda qalmadı,
dünyanın nüfuzlu şirkətləri ilə əməkdaşlıq
görüşlərini davam etdirdi.
"Ölkənizdə
pandemiyanın təsirinin kifayət qədər nəzarət
altında olduğunu eşitdiyimə şad oldum”
Belə
videokonfranslardan biri də iyunun 16-da "Microsoft” şirkətinin
təşəbbüsü ilə Prezident İlham Əliyevin
şirkətin vitse-prezidenti Filip Roq, Mərkəzi və Şərqi
Avropa bölgəsinin korporativ əlaqələr və
hüquqi məsələlər üzrə rəhbəri Nanna-Luize
Linde və "Microsoft” şirkətinin digər nümayəndələri
ilə keçirildi.
Görüş
zamanı şirkətin vitse-prezidenti Filip Roq pandemiya zamanı
hər kəsin sağlamlığının qorunması
üçün gördüyü işlərə görə
İlham Əliyevi və hökumətimizi təbrik etdi:
"İlk növbədə, deyərdim ki, ölkənizdə
pandemiyanın təsirinin kifayət qədər nəzarət
altında olduğunu eşitdiyimə şad oldum. Mən dünya liderləri ilə əlaqə
saxladığımdan bu, heç də həmişə belə
olmur. Nəhayət, bilirsiniz ki, texnologiya və
gördüyümüz bütün işlərdən
başqa, insan sağlamlığı və insan həyatı
bizim üçün prioritet təşkil edir. Hər kəsin sağlamlığının
qorunması üçün gördüyünüz işlərə
görə Sizi və hökumətinizi təbrik edirik. Lakin pandemiya heç də fərq qoymur. Ona görə də biz ehtiyatlı olmalıyıq”.
"Vəziyyət
nəzarət altındadır”
Prezident
İlham Əliyev Filip Roqun pandemiyanın öhdəsindən
gəlməyimizlə bağlı dediyi sözlərə
görə ona təşəkkür edərək söylədi
ki, həqiqətən də, Azərbaycan bu mühüm məsələnin
həllində Ümumdünya Səhiyyə Təşkilatı
tərəfindən nümunə adlandırılıb: "Vəziyyət
nəzarət altındadır. Eyni zamanda biz nəinki
təkcə daxili məsələlərə diqqət
yetiririk, həmçinin qlobal miqyasda da fəaliyyət
göstəririk. Azərbaycan artıq 29 ölkəyə
humanitar yardım göstərib və bu proses davam edir. Biz özümüzü beynəlxalq ictimaiyyətin
etibarlı üzvü kimi nümayiş etdiririk”.
Prezident
onu da qeyd etdi ki, fəaliyyətimiz və gələcək
planlarımıza gəlincə, əlbəttə ki, əsas diqqəti insanların koronavirusdan qorunmasına
yönəltdik və bunun bizim iqtisadi artımımıza
çox mənfi təsir göstərəcəyini aydın
şəkildə başa düşürük: "Bizim bu il
üçün çox böyük perspektivlərimiz var idi
və ilin birinci rübü çox ümidverici idi. Lakin indi
beş ayın nəticələri ümumi daxili məhsulda
kiçik azalmanın - təxminən 1,7
faiz azalmanın olduğunu göstərir. Lakin,
eyni zamanda iqtisadiyyatın bəzi sektorlarında, xüsusilə
neft və qazla əlaqəli olmayan sektorlarda artım qeydə
alınıb. Bu səbəbdən bu
gün biz məhdudiyyət tədbirlərini
uzlaşdırırıq, çünki COVID-19 hələ də
mövcuddur. Eyni zamanda biz ölkəmizi
açmağa və həyatımızın müxtəlif sahələrinin
fəaliyyətini bərpa etməyə başlayırıq.
Beləliklə, ümidvaram ki, bu
balanslaşdırılmış yanaşma bizə, ilk
növbədə, pandemiyaya qarşı uğurlu mübarizəni
davam etdirməyə kömək edəcək. Eyni zamanda biz özəl sektora, xüsusilə
pandemiyadan əziyyət çəkən sahələrə,
turizm və onunla əlaqəli sahələrin bərpasına
yardım edəcəyik”.
"Ümidvarıq
ki, bu məsələdə "Microsoft”la yaxşı əməkdaşlıq
edə biləcəyik”
Dövlət başçısı "Microsoft”
şirkəti ilə gələcək əməkdaşlığa
dair fikirlərini də bildirdi: "İki il bundan əvvəl
Bakıda keçirdiyimiz görüşdən sonra əməkdaşlığımıza
gəlincə, bildiyiniz kimi, biz razılaşma
imzalamışdıq. Görüşümüzdən əvvəl
mənə məlumat verildi ki, on minlərlə lisenziya verilib
və bu məsələ hazırda uğurla davam etdirilir.
Bizim piratçılığa qarşı birgə
səylərimiz yaxşı nəticələr verir. Gələcək planlarımıza gəlincə, bəlkə
də bilirsiniz ki, hazırda biz rəqəmsal transformasiya
üzrə hökumət strategiyası üzərində
işləyirik. Ümidvarıq ki, bu məsələdə
"Microsoft”la yaxşı əməkdaşlıq edə biləcəyik.
Bu proqram növbəti 5 il
üçün planlaşdırılır. Eyni
zamanda süni intellekt üzrə strategiyanın ətraflı
işlənib hazırlanması ilə bağlı məsələlər
də bizim gündəliyimizdədir. Kibertəhlükəsizlik
hər zaman gündəlikdədir, çünki bu,
bütün ölkələrin hazırlıqlı olmalı
olduğu məsələdir. İndiyədək bizdə
belə böyük hallar olmayıb, lakin heç kim sığortalanmayıb. Ona
görə də bu da bizim gələcəyimiz
üçün prioritetlər sırasında qalır. Əlbəttə, mən icra olunmuş layihələrin
siyahısına baxdım. Aramızdakı
əməkdaşlıq çox təsirləndiricidir və əminəm
ki, bu, qarşıdakı illərdə tərəfdaşlığımızı
gücləndirəcək. Həmçinin
pandemiya ilə əlaqədar bu vəziyyət bizi məcbur
edir ki, təhsil, distant təhsil məsələlərinə
yeni bucaqdan baxaq. Baxmayaraq ki, mövcud vəziyyətə
özümüzü uyğunlaşdırmaq üçün
bizim çox vaxtımız olmadı, lakin müəyyən
addımlar atılmışdır. Çünki
bizim məktəb və universitetlərimiz mart ayından bəri
bağlanıb. Biz sentyabrın 15-dən
başlayacaq yeni tədris ilinə
hazırlaşmalıyıq. Həmin zaman
pandemiya ilə bağlı vəziyyətin necə
olacağını bilmirik, məktəb və universitetləri
aça biləcəyimizi bilmirik, ona görə də biz ən
pis ssenariyə hazırlıqlı olmalıyıq. Əgər problem davam edirsə və getdikcə pisləşirsə,
o zaman biz bu barədə düşünməli
olacağıq. Lakin indi bu barədə
düşünmək lazımdır. Həmçinin distant
işlə bağlı məsələlər... Bu da ölkə üçün olduqca vacibdir.
Təxminən bunlar bizim planlarımızda diqqətimizi
cəmlədiyimiz sahələrdir”.
Azərbaycan
artıq sənaye inqilabı üzrə regional mərkəzə
çevrilir
Prezident
İlham Əliyev onu da qeyd etdi ki, Azərbaycan artıq sənaye
inqilabı üzrə regional mərkəzə çevrilir:
"Bu dəfə Davos İqtisadi Forumu zamanı cənab Borge
Brende və mən Davosun Dördüncü Sənaye
İnqilabı üzrə Regional Mərkəzinin Bakıda
yaradılması ilə bağlı sənədi imzaladıq.
Beləliklə, bu mərkəz nəinki təkcə
Azərbaycanı, region ölkələrini də əhatə
edəcək. Buna görə
düşünürəm ki, bizim üçün daha da irəliləmək
və sizinlə innovasiya mərkəzi üzərində
çalışmaq təbii olardı. Bizim
əsas strategiyamız sizin də bildiyiniz kimi, karbohidrogen
ehtiyatlarından asılılığı azaltmaq və
innovasiyalar, yeni texnologiyalar və müasir idarəçilik əsasında
dayanıqlı inkişafa nail olmaqdır. Buna
görə düşünürəm ki, bu məsələ
üzərində birgə çalışmağımız
əməkdaşlığımızı gücləndirə
bilər”.
Filip Roq
isə, öz növbəsində, bildirdi ki, Bakıya
qayıtmağı səbirsizliklə gözləyirlər:
"Biz hamımız gələcək imkanları səbirsizliklə
gözləyirik və işi davam etdirmək əzmində
olan komanda kimi bilirik ki, çoxlu imkanlar var. Hər şeydən
əvvəl, biz Bakıya qayıtmağı həqiqətən
də səbirsizliklə gözləyirik”.
Şirkətin
vitse-prezidenti onu da vurğuladı ki, investisiya
yatırılmasının davam etdirilməsində və
sabahın transformasiyası üçün yol xəritəsinin
yaradılmasında şirkətin yardımına hər zaman
arxalanmaq olar: "Biz Sizin sərəncamınızdayıq və
bizim imkanlardan məqsədəuyğun
saydığınız kimi istifadə edin. Biz Sizin
üçün buradayıq”.
Elə bu videokonfrans əsnasında səsləndirilən
fikirlər də onu deməyə əsas verir ki, Azərbaycan
dövləti qlobal pandemiya dövründə də
genişmiqyaslı və bütün sahələrin
inkişafı üzrə həyata keçirdiyi işlərini
davam etdirməkdədir. Əminliklə demək olar ki, dövlət
başçısının rəhbərliyi altında
reallaşan bütün bu effektiv tədbirlər, gələcəyə
yönəlik planlar və irimiqyaslı layihələr sayəsində
ölkəmiz postpandemiya dövründə də sosial-iqtisadi
cəhətdən böyük problemlərlə üzləşməyəcək.
Yasəmən MUSAYEVA
Azərbaycan.-2020.-
18 iyun.- S.6.