İllərdə qalan izlər
İnsanların uşaqlıq, cavanlıq, ahıllıq, qocalıq dövrləri olduğu kimi, illərin də fəsilləri var. Deyirlər, insan həyatdan köçdükdən sonra onu üç əsas yadigarı yaşadır: yaxşı əməli, yaxşı əsəri, bir də yaxşı övladı. İllər isə insanların yaddaşında baş verən mühüm, əlamətdar hadisələrlə qalır, tarixə düşür, dillərdə gəzir, yaddaşlarda yaşayır, nəsildən-nəslə ötürülür. İllər öncə yazdığım bir şeirimdə belə demişdim:
İllər də insantək gəlir dünyaya,
İllər də insantək qocalıb gedir.
İllər
var zəfəri gəlməyir saya,
İl də var dünyadan borc alıb gedir.
Bu mənada insan və zaman, təbiət və cəmiyyət
həmahəngdir, onlar biri-birini tamamlayır, mənalandırır. Xoşbəxt
o kəsdir ki, Tanrının ona bəxş etdiyi ömür
payını mənalı, məramlı yaşayır. Ötüb-keçən anın, günün bir daha
geri dönməyəcəyini, təkrar
olunmayacağını dərk edərək
çalışır, qurub yaradır. Gördüyü
işlərə nəzər salanda onlara baxıb sevinir,
qürur hissi keçirir.
İlləri uğurla, zəfərlə yola salmaq Azərbaycanda
ənənə halını almışdır. Bu da
1994-cü ildə Ulu Öndər Heydər Əliyevin
dünyanın böyük dövlətlərinin, nəhəng
şirkətlərinin rəhbərlərini Bakıda bir araya
gətirməsi, "Əsrin müqaviləsi” adlanan neft
kontraktının imzalanmasının nəticəsində
mümkün olmuşdur. Bu müqavilə
2003-cü ilin sonlarından etibarən öz bəhrəsini verməyə
başladı. Onu da qeyd edək ki, bu nəhəng
layihənin reallaşmasına xaricdən və daxildən nə
qədər təzyiqlər olsa da, Heydər Əliyevin
uzaqgörənliyi, qətiyyətli siyasəti və polad iradəsi
qarşısında həmin cəhdlər qar kimi əriyib yox
oldu. Ulu Öndər Azərbaycanın
inkişafı yolundakı bütün cəhdləri dəf
edərək sonrakı mərhələdə mühüm
islahatları həyata keçirdi. Zamanında
dediyi "İqtisadiyyatı güclü olan dövlət hər
şeyə qadirdir” sözləri xalq arasında zərb-məsələ
çevrildi.
2003-cü ildə İlham Əliyev Prezident seçildiyi
andan siyasi varislik missiyasını üzərinə
götürərək düzgün təməl üzərində
işləri davam etdirdi, neftdən gələn gəlirləri
ən mühüm, ən vacib məsələlərin həllinə
yönəltdi. Bunlar əsasən iqtisadiyyatı dirçəltmək,
ölkənin müdafiə qabiliyyətini gücləndirmək,
ordunu müasir silah və sursatlarla təchiz etmək, öz dədə-baba
torpaqlarından didərgin düşən
soydaşlarımızın həyat şəraitini
yaxşılaşdırmaq, onları qamışdan, çiy
kərpicdən tikilmiş daxmalardan, yayda istidən yanan,
qışda soyuqdan donan dəmir vaqonlardan çıxarmaqdan
ibarət idi. Eyni zamanda regionlarda
yığılıb qalmış, illərlə bir-birinin
üstünə qalaqlanmış problemləri aradan
qaldırmağa başladı.
Biləsuvar-Bəhrəmtəpə
şose yolunun 4-cü kilometrliyində Cəbrayıl rayonundan
olan məcburi köçkünlər üçün 4 min
456 evdən, 11 qəsəbədən ibarət hər cür
infrastrukturu olan şəhərcik salındı. Ardınca Bakı ətrafında, Sumqayıtda, habelə
digər rayonların ərazilərində onlarca belə şəhərciklər
tikildi. Keçən ilin sonunda uşaq
bağçası, tibb məntəqəsi, poçtu, su xətti,
işığı, rahat yolu olan daha bir yaşayış sahəsi
Şirvan şəhərində məskunlaşan
qaçqınlar üçün tikilib istifadəyə
verildi. Cari ilin sonunadək daha çox
sayda qaçqın və məcburi köçkün
soydaşlarımız yeni mənzillərə
köçürüləcək. Böyük
Vətən müharibəsi, Qarabağ müharibəsi əlillərinin
və şəhidlərinin, 20 Yanvar faciəsi
qurbanlarının və əlillərinin, Çernobıl qəzası
və Əfqanıstan müharibəsi
iştirakçılarının özləri və ailələri
də daim dövlətimizin diqqət mərkəzindədir.
Onların həyat şəraitinin
yaxşılaşdırılması, pensiya və müavinətlərinin
artırılması, müalicəsi, reabilitasiyası ilə
bağlı ardıcıl tədbirlər görülür.
Heç kəsə sirr deyil ki, Dağlıq Qarabağ
münaqişəsi başlayanda bizim formalaşmış
ordumuz yox idi.
Ermənilər isə havadarlarının
köməyi ilə bizdən qat-qat irəlidə idilər.
Müttəfiqləri onlara silah-sursat və
canlı qüvvə sarıdan yaxından kömək göstərirdilər.
O vaxt, demək olar ki, Azərbaycana qardaş Türkiyədən
başqa heç bir dövlət dəstək vermir,
yaxasını kənara çəkirdi. Bizi istəməyən
qüvvələr çalışırdılar ki, müstəqil
Azərbaycan 1918-ci ildəki taleyini yenidən yaşasın, gənc
dövlətimiz beşikdəcə boğulsun.
Amma onların bəd niyyətləri ürəklərində
qaldı.
1993-cü il iyun ayının 15-də
xalqın təkidli tələbi ilə hakimiyyətə
qayıdan Heydər Əliyevin böyük siyasəti, polad
iradəsi, gərgin əməyi sayəsində bütün
işlər addım-addım yoluna qoyuldu. Cəbhədə
atəşkəs elan edildi, ölkə daxilində sabitlik
yaradıldı, xarici ölkələrlə diplomatik əlaqələr
genişləndirildi. Yüksək
hazırlıqlı ordumuz yarandı və 2016-cı ilin aprel
ayındakı döyüş zamanı nəyə qadir
olduğunu göstərdi.
Regionlardakı vəziyyət də dövləti qane
etmirdi. Sovet dövründə nə tikilib-qurulmuşdusa,
hamısı tarmar edilmişdi. Onu da qeyd
etmək lazımdır ki, belə dağıntı,
söküntü M.Qorbaçovun SSRİ-də hakimiyyətə
gəlməsindən sonra başlamışdı. Təkcə bir faktı xatırladaq. Alkoqolizmin ləğv edilməsi ilə əlaqədar
verilən qərar o zaman sovetlər məkanında, eləcə
də respublikamızda, xüsusən Cəlilabad rayonunda minlərlə
hektar üzüm bağlarının, onlarca şərab
zavodunun məhvinə səbəb oldu. İnsanlar iş
yerlərini itirdilər, gəlirləri kəsildiyindən
ehtiyac içində yaşamağa başladılar. Digər sahələr də bunun kimi. Astarada, Lənkəranda,
Masallıda sitrus meyvə bağları, tərəvəz sahələri
buraxıldı, çay plantasiyaları otlaq sahəsinə
çevrildi.
Ümumiyyətlə, 1990-cı illərdə
respublikamız, sözün həqiqi mənasında, tənəzzül
dövrünü yaşayırdı. Zavod-fabriklər,
tikinti təşkilatları öz fəaliyyətlərini
dayandırmışdılar. Ölkənin
hər yerində çörək qıtlığı
yaranmışdı. Yollar bərbad hala
düşdüyündən Bakıya, digər yerlərə
gedib-gəlmək müşkülə çevrilmişdi.
Günün yalnız bir neçə saatı ərzində
əhaliyə elektrik enerjisi verilirdi. Nəticədə
evlərdə elektrik-məişət avadanlıqları da
sıradan çıxmışdı. Normal
təbii qazdan, içməli su təchizatından isə
söhbət gedə bilməzdi. Bir
sözlə, region əhalisi ümidsizliyə
qapanmışdı.
Deyirlər, ən ədalətli hakim zamandır. Onu da
görmüşük ki, ən çətin vaxtlarda
böyük Yaradanın nəzərləri həmişə Vətənimizin,
xalqımızın üstündə olub. Ulu Öndər Heydər Əliyev ölkəmizi məhv
olmaq, dünya xəritəsindən silinmək təhlükəsindən
xilas etdi, geniş islahatlar həyata keçirdi, ordumuzu
yaratdı - bir sözlə, ömrünü Vətənimiz
naminə şam kimi əritdi. Qədirbilən
xalqımız Heydər Əliyevin başladığı
işləri kimin davam etdirməyə qadir olduğunu
yaxşı bilirdi. Bu işləri xalq
İlham Əliyevə etibar etdi. İlham Əliyev ölkə
rəhbəri seçildikdən sonra 2004-cü il
fevral ayının 11-də imzaladığı regionların
sosial-iqtisadi inkişafına dair I Dövlət Proqramı
dönüş nöqtəsinə çevrildi. Bu proqram çərçivəsində regionlarda həlli
vacib olan məsələlər icra olundu.
Astara rayonu ərazisində inşa olunan 90 meqavoltluq modul
tipli elektrik stansiyası və qaz-kompressor qurğusu nəinki
Astaranın, bütövlükdə cənub bölgəsinin
elektrik enerjisi, habelə təbii qaz təchizatında
mühüm rol oynadı. Proqramda nəzərdə
tutulan tədbirlərin icrası nəticəsində
tikinti-quruculuq, abadlıq işləri geniş vüsət
aldı. Onların ilkləri
sırasında ucqar dağ rayonları olan Lerik və
Yardımlı yollarının yenidən qurulmasını
göstərmək olar. 2008-ci ilin payız günlərində
bu rayonların tarixində o vaxta qədər görünməmiş
hadisə baş verdi. Həmin
rayonların mərkəzlərinə - şəhər statusu
almış Lerik və Yardımlıya təbii qaz verildi.
Bu, əsl bayrama, el şənliyinə
çevrildi. O vaxt ən ucqar kəndlərin sakinləri
təntənəni görmək üçün Prezidentin də
iştirak etdiyi açılış mərasiminə gəlmişdilər.
Cənub
bölgəsinin qeyri-rəsmi paytaxtı sayılan Lənkəranda,
ölkəmizin cənub qapısı olan Astarada, habelə
Masallıda, Cəlilabadda, Biləsuvarda, Salyanda, Neftçalada
və digər rayonlarımızda da qaynar quruculuq işləri
başladı. Hər ay, hər il
bir-birinin ardınca yeni sənaye müəssisələri,
yaşayış evləri, ictimai binalar tikilib istifadəyə
verildi. Onların sıralarında məktəblər,
təhsil müəssisələri mühüm yer tuturdu.
Səbəbi aydın idi. Ulu Öndər
"Təhsil millətin gələcəyidir” kəlamını
əbəs yerə deməmişdir. Yaxşı
təhsil sabahın vətəndaşını, savadlı,
bilikli, istedadlı kadrlarını yetişdirir. Məktəblərin tikintisi regional inkişaf
proqramlarında prioritet sahə kimi götürüldü.
İndiyə kimi respublikamızda 1600-dən
çox yeni məktəb binaları tikilmiş, köhnələri
əsaslı təmir olunmuşdur. Bu sahədə
Heydər Əliyev Fondunun fəaliyyətini xüsusi qeyd etmək
lazımdır. Müasir üslubda inşa
edilən həmin məktəblər hər cür inventarlar və
avadanlıqlarla təchiz edilmişdir.
Ötən zaman kəsiyində ölkəmizdə həmçinin
650-dən çox səhiyyə ocağı tikilmişdir. Hər biri də
yüksək zövqlə, keyfiyyətlə, Avropa
standartları səviyyəsində. Tikilən,
əsaslı surətdə təmir edilən rayon mərkəzi
xəstəxanaları, tibb məntəqələri müasir
avadanlıq və cihazlarla təchiz edilmişdir. İndi ölkəmizin əksər rayonlarında
Müalicə Diaqnostika mərkəzi fəaliyyət göstərir.
Yeri gəlmişkən, qeyd edək ki, rayonlar üzrə ilk dəfə
3 nəfər üzərində açıq ürək əməliyyatı
14 il öncə Lənkəran Müalicə
Diaqnostika Mərkəzində aparılmışdır.
İndi Azərbaycan dünyada həm də idman ölkəsi
kimi tanınır. Bakı ardıcıl olaraq beynəlxalq
idman yarışlarına evsahibliyi edir. 2015-ci
ildə I Avropa Oyunlarının Bakıda keçirilməsi Azərbaycanı
dünyaya bir daha idman ölkəsi kimi təqdim etdi. 50 ölkənin iştirak etdiyi yarışlarda Azərbaycan
23 medal qazanaraq 2-ci yerə sahib oldu. Bu tədbir,
qazanılan parlaq qələbə bir vətəndaş kimi mənim
də ürəyimi qürur hissi ilə
döyündürdü:
...Bakı
qucaq açdı əlli ölkəyə,
Mehriban-mehriban köksünə sıxdı.
Dedi:
"Xoş gəlmisiz Azərbaycana!”
Hamı bu gəlişin seyrinə çıxdı.
...Sağ
olsun yaradan, quran əməllər,
Gör
necə yüksəldik, necə dəyişdik!
Dünya
heyran oldu belə büsata,
Biz belə
təntənə heç görməmişdik!
Regionların sosial-iqtisadi inkişafı ilə
bağlı qəbul olunan ikinci və üçüncü
dövlət proqramları çərçivəsində
mövcud problemlər mərhələli şəkildə
öz həllini tapdı. İş yerlərinin
açılması üçün müxtəlif sahələri
əhatə edən yeni müəssisələr, istehsalat sahələri
yaradıldı. Azərbaycan brendi kimi
şöhrət qazanan "ASAN xidmət”lər əhalinin
işini xeyli asanlaşdırdı. Bundan əlavə,
əhalini keyfiyyətli və dayanıqlı elektrik enerjisi ilə
təmin etmək üçün müasir elektrik
stansiyaları, yarımstansiyalar tikildi. İcra
olunan layihələr nəticəsində ölkədə
qazlaşma 96 faizə çatdı. Bəzi
rayonlarımızda isə bu rəqəm daha yüksəkdir.
Məsələn, Biləsuvar rayonunda
qazlaşma tam başa çatıb.
İçməli su ilə bağlı silsilə tədbirlər
bu gün də davam etdirilir. Kanalizasiya sisteminin
çəkilişi və təmiri işləri paralel
aparılır. Bu və digər işlər
hesabına şəhər, qəsəbə və kəndlərimiz
simasını dəyişib ildən-ilə abadlaşır,
gözəlləşir. Salınan parklar,
xiyabanlar bu gözəlliyə rəng qatır.
Davos Ümumdünya İqtisadi Forumunun hesabatları da
sübut edir ki, Azərbaycan iqtisadiyyatı yüksək templə
irəliləməkdədir. Bu da səbəbsiz
deyil. Görülən işlərin, həyata
keçirilən layihələrin hər birinin
düşünülmüş planı və elmi əsasları
var. Neftdən asılılığı azaltmaq,
iqtisadiyyatı şaxələndirmək, xaricə gedən
valyuta axınının qarşısını almaq, rəqabətədavamlı,
ixracyönümlü məhsullar istehsal etmək, əhalini
ekoloji cəhətdən təmiz, keyfiyyətli ərzaqla təmin
etmək, yeni iş yerləri yaratmaq, digər bu kimi
mühüm məsələlər ölkədə
aparılan iqtisadi siyasətin başlıca istiqamətləridir.
Son illər bu sahələrin hər birində
qazanılan uğurlar göz qabağındadır. Meyvəçilik, çayçılıq,
baramaçılıq, çəltikçilik,
pambıqçılıq, heyvandarlıq sahəsində məhsuldarlıq
ildən-ilə artır. Görülən
tədbirlər deməyə əsas verir ki, yaxın gələcəkdə
ölkəmiz nəinki əsas ərzaq məhsulları
sarıdan idxaldan azad olacaq, hətta biz böyük
ixracatçıya çevriləcəyik.
Ayrı-ayrı sahələrdə, o cümlədən
pambıqçılıqda keçmiş şöhrət
geri qaytarılır. Keçən il ölkə üzrə rekord göstərici
əldə olunub - 294 min ton "ağ qızıl” yığılıb
və hər hektarın məhsuldarlığı 29,4 sentnerə yüksəlib. Aqrar
sahədəki belə uğurlar dövlətin göstərdiyi
diqqət və qayğının, o cümlədən
subsidiyaların vaxtında ödənilməsinin,
sahibkarların texnika, mineral gübrələr, kimyəvi maddələr,
suvarma suyu, yüksək reproduksiyalı toxumla təmin edilməsi
nəticəsində mümkün olmuşdur.
Bu gün turizm ölkəmizdə sürətlə
inkişaf edir.
Dünyanın müxtəlif yerlərindən hər il milyonlarla turist istirahət etmək, gəzmək
üçün Azərbaycanı seçir. Bu
üzdən ölkəmizdə dünya standartları səviyyəsində
hotellər, istirahət mərkəzləri tikilir və
infrastruktur layihələri həyata keçirilir. Turizm
sahəsində davamlı surətdə uğura nail olmaq
üçün Azərbaycanda qış turizmi bazası da
yaradılıb. Bu mənada "Şahdağ”
Turizm Kompleksi dünyadakı bu tipli komplekslərdən
müasirliyi və universallığı ilə fərqlənir.
Qəbələ rayonundakı "Tufandağ”
Xizək Kompleksi də turistlərin sevdikləri məkanlardandır.
Turizmin inkişafında, ümumiyyətlə, ölkənin
həyatında yolların rolu danılmazdır. Bu gün
ölkəmizdə daxili yolların uzunluğu 16 min kilometrdən
çoxdur və onların əksər hissəsi yenidən
qurulub. Bütün yollar boyu körpülər,
keçidlər, suötürücüləri, yol
ayırıcıları və s. tikilib. Rahat, təhlükəsiz,
üstəlik vaxt itkisinin qarşısını alan bu yollar təkcə əhalini
rahatlığa çıxarmayıb, həm də ölkənin
iqtisadi inkişafını sürətləndirib. Bunları görüb sevinirsən, fərəhlənirsən,
duyğulanırsan. "Yollar, körpülər”
şeirimdə olduğu kimi:
Yollar
rişə-rişə, damar-damardır,
Yollarda qoşadır xeyir ilə şər.
Yollar
dağ-dərəli, həndirhamardır,
Onlar körpülərdə gəlib birləşər.
...Günəş
xislətində yaşar körpülər,
Yaxşılıq etməkdən usanmaz, doymaz.
Deyirəm,
bəlkə də, buna görədir,
Heç vaxt körpülərə qapı qoyulmaz.
Sinəsi
qürurdan qabarar onun,
Çiynində həm sevinc, kədər daşıyar.
Mənası,
məqsədi, məramı aydın,
Körpülər ömrünü belə yaşayar.
Sürətli inkişafın, qarşılıqlı
anlaşmanın, xarici ölkələrlə səmərəli
dialoqun, xalqlar arasında sülh, əmin-amanlıq
ideyalarının təbliğ edilməsi üçün
görülən işlərin nəticəsidir ki, bu gün
Azərbaycan müxtəlif beynəlxalq tədbirlərin,
müzakirələrin keçirildiyi mərkəzə
çevrilmişdir. Biz dünyanın sülh və
barış içində olmasını istəyirik və bu
məsələlərdə çoxlarına nümunəyik.
Bəli, 30 ilə yaxın yaşı olan müstəqilliyimizin
nailiyyətləri saysız-hesabsızdır. Muğamımız,
aşıq sənətimiz, bir çox mədəniyyət və
tarixi abidələrimiz UNESKO-nun qeyri-maddi mədəni irs siyahısına daxil edilmişdir. Dövlət bayrağımız xarici ölkələrdəki
diplomatik korpuslarımızın, beynəlxalq təşkilatların
binaları qarşısında dalğalanır. Səmadakı 3 peykimizlə dünya kosmik ailəsinin
üzvüyük. Qazanılan
uğurların, qələbələrin hansını deyəsən,
hansından yazasan?!
Dünəninə,
bu gününə
nəzər salıb
Oğlun,
qızın fərəhlənir,
dost
sevinir.
Hər
birinin sinəsində
çırpınaraq
Pöhrələnən
neçə-neçə
arzu, istək,
dilək
dinir.
Qaranlığa
işıq saçan
Xoş, mehriban gözlər gülür.
Ağ bənizli,
qara xallı
üzlər gülür.
Sevincindən
dilə gələn
Milyon-milyon
ürəklər də
belə
deyir:
-Yüksəlişin
mübarəkdir,
Azərbaycan!
Azərbaycan beləcə inamlı addımlarla irəliləyir. İqtisadi
qüdrəti artdıqca beynəlxalq aləmdə hörməti,
nüfuzu yüksəlir. Bütün bunlar
xalqımızı hədsiz dərəcədə sevindirir,
ruhlandırır. Lakin istər xaricdə,
istərsə də daxildəki bəzi bədxah, xain, xəbis
qüvvələr bu tərəqqini, yüksəlişi sanki
görmür, əldə olunan uğurlarımızın
üstünə kölgə salmağa
çalışır, bunun üçün hər cür
çirkin yollardan istifadə etməyə cəhd göstərirlər.
Amma əbəs! "Karvan gedir” adlı şeirdə
yazmışam:
...Öz
yolunu, düz
yolunu
seçib gedir bu
karvan.
Fəqət,
fəqət zaman-zaman
gah bu
yandan,
gah o
yandan,
gah
uzaqdan,
gah
yaxından,
bu
dünyanın
gərdişini,
yaxşısını, həm
pisini
baxar
kortək görməyənlər,
bilməyənlər
bu
karvanın arxasınca
kölgə kimi sürünənlər
Hey
hürürlər.
Hürə-hürə
günlərini
keçirirlər.
Qoy hürsünlər.
Onların da peşələri,
sənətləri bu hürməkdir.
Buna görə aldıqları
qrantlardır, yağlı-yağlı
dürməklərdir.
Bu məqamda, bu arada
ataların: "Hürən hürər,
Karvan keçər”, -
Bir məsəli düşür yada.
Deyirlər ki, yaxşı-pisdən
əməl qalır bu dünyada.
Seyran CAVADOV
Azərbaycan.-2020.- 3 mart.- S.6.