Azərbaycan koronavirusun
səbəb olacağı mümkün
faciələrdən sığortalanıb
Prezident İlham Əliyevin rəhbərliyi altında böhrana qarşı həyata keçirilən
sosial-iqtisadi model özünü doğrultdu
Koronavirus pandemiyası (COVID-19) dünyanı alt-üst etməkdə davam edir. Gün keçdikcə, yoluxma və ölüm sayını artırmaqla vahiməsini sürdürür. Statistik rəqəmlərə nəzər saldıqda görürük ki, son sutka ərzində dünyada rekord sayda -106 min yoluxma qeydə alınıb.
Qlobal pandemiya
təkcə insanları sağlıqları ilə təhdid etmir, bütün yaşam sahələrinə zərbə vurur, ölkələri maddi
sıxıntı ilə üz-üzə qoyur.
İndiyə qədər
COVID-19 pandemiyası dünyaya
9 trilyon dollar həcmində
ziyan vurub.
Nə yazıq
ki, bu bəlanın
Yer üzündə nə qədər sürəcəyi, ümumiyyətlə,
nəfəsinin kəsilib-kəsilməyəcəyi
ilə bağlı heç bir dəqiq cavab yoxdur. Xəstəliyə qarşı vaksinin
hazırlanması isə
yaxın bir ildə gözlənilmir.
Bəli, hazırda dünya böhran içərisindədir
və ondan qurtulmaq üçün çırpınır.
Vətəndaşların sağlamlığı
və təhlükəsizliyi
qorunur
Azərbaycanda da koronavirusla mübarizə çərçivəsində
mühüm addımlar
atılır. Zamanında bu virusa qarşı bütün istiqamətlərdə qabaqlayıcı
tədbirlərin görülməsi
ölkəmizi mümkün
faciələrdən sığortaladı.
Azərbaycanda Prezident İlham
Əliyevin rəhbərliyi
altında qlobal böhrana qarşı həyata keçirilən
sosial-iqtisadi model özünü
doğrultdu. Qabaqlayıcı
tədbirlər pandemiyanın
geniş vüsət almasının qarşısını
almağa, onu nəzarətdə saxlamağa
imkan verdi.
Yoluxmanın qarşısının alınması üçün
aparılan testlərin
sayı artırıldı.
Nazirlər Kabineti yanında
Operativ Qərargahın
son açıqlamasına əsasən,
Azərbaycanda koronavirusa
yeni yoluxma hallarının müəyyənləşdirilməsi
ilə əlaqədar
indiyədək 245.609 test aparılıb.
Xəstələrin hamısının xəstəxana
şəraitində müalicə
olunması, tibb işçilərinin səfərbər
olunaraq onların hər birinin həyata qaytarılması
üçün gecə-gündüz
mübarizə aparması
sağalma dinamikasına
müsbət təsir
göstərən başlıca
amillərdən oldu. Bu göstəricilərə görə
ölkəmizdə günbəgün
yoluxma səviyyəsi
və ölüm sayı azaldı.
Digər tərəfdən, dövlət
başçısının tapşırıq və tövsiyələrinə əsasən
həssas təbəqələrə
sosial dəstək verildi, onlara 190 manat birdəfəlik ödənişlər ayrıldı
və bu dəstəyin əhatə
etdiyi insanların sayı xeyli genişləndirildi.
Dövlətimiz hər zaman olduğu kimi, bu çətin dövrdə də bütün səylərini
vətəndaşının sağlamlığı, təhlükəsizliyi
və yaşam şərtlərinin yaxşılaşdırılması
istiqamətinə yönəltdi. Buna görədir
ki, qısa zaman kəsiyində karantin rejiminin yumşaldılmasına nail ola bildik.
Pandemiya
dövründə ölkəmizin
yaratdığı bu
mütərəqqi model Ümumdünya
Səhiyyə Təşkilatı
(ÜST) tərəfindən bütün dünyaya nümunə göstərildi.
Qabaqlayıcı tədbirlərin görülməsi
bizi böyük bəladan xilas etdi
Prezident İlham Əliyev mayın 19-da 3 saylı DOST mərkəzinin açılışında iştirakı zamanı vurğuladı ki, koronavirusla bağlı işlər əvvəldən Azərbaycanda çox düzgün istiqamətdə aparıldı və bunu həm Azərbaycan xalqı görür və təqdir edir, həm də beynəlxalq təşkilatlar: "Bu günə qədər mən vətəndaşlardan gündə yüzlərlə məktub alıram. Yəni pandemiyanın ilk günlərindən minlərlə məktub almışam və bütün bu məktublar təşəkkür xarakterli məktublardır. Çünki doğrudan da, qabaqlayıcı tədbirlərin görülməsi bizi böyük bəladan xilas etdi. Yenə də hər şey müqayisədə ölçülür. Əhalisinin sayı Azərbaycanla eyni olan inkişaf etmiş ölkələrdə vəziyyət necədir, Azərbaycanda vəziyyət necədir? O ölkələrin bəzilərində bu günə qədər 10 minə yaxın insan vəfat etdi. Azərbaycanda vəfat edənlərin sayı kifayət qədər azdır. Eyni zamanda qabaqlayıcı, məhdudlaşdırıcı tədbirlər imkan verdi ki, biz pandemiyanın geniş vüsət almasının qarşısını alaq və buna nail olduq. Təsadüfi deyil ki, Ümumdünya Səhiyyə Təşkilatı bizim bu sahədə gördüyümüz işləri yüksək qiymətləndirir və Azərbaycanı nümunəvi ölkə adlandırır. Bu, bizim gördüyümüz işlərə verilən böyük qiymətdir. Mən bilmirəm başqa bir ölkəyə belə bir ad verilib, yoxsa yox. Bu, doğrudan da görülmüş işlərin məntiqi nəticəsidir. Çünki bəri başdan bizim əsas məqsədimiz xalqımızı, vətəndaşlarımızı bu xəstəlikdən qorumaq idi. Bütün digər iqtisadi məsələlər, iqtisadiyyatın tənəzzülə uğraması, iqtisadiyyatda yarana biləcək problemlər arxa plana keçdi. Halbuki biz bu məsələlərlə də ciddi məşğul olmuşuq. Amma birinci məsələ insanların sağlamlığı, ikinci məsələ insanların sosial təminatı idi ki, biz hər ikisini də təşkil etdik”.
Yeni zamanın diktə və şərtləri
Amma təəssüf ki, koronavirus təhlükəsi hələ bitməyib və ölkə daxilində bu xəstəliyi ram etdiyimiz bir ərəfədə qətiyyən arxayınlaşmaq olmaz. Məqsəd bu bəladan birdəfəlik qurtulmaqdır. Dövlətimizin gördüyü effektiv tədbirlər sayəsində qısa zaman ərzində karantin rejiminin yumşaldılmasına nail olduq. Əksər iş yerlərinin fəaliyyəti bərpa olundu, SMS icazə sistemi ləğv olundu, parklar, muzeylər, sərgi salonları açıldı, metro fəaliyyətini davam etdirdi, restoran-kafelər müştərilərə xidmət göstərməyə başladı. Bir sözlə, Azərbaycanda həyat yavaş-yavaş normal məcraya istiqamətləndi. Amma koronavirusun diktə və tələb etdiyi yeni qayda və şərtlərlə. Bu ərəfədə gigiyena qaydalarına, sosial izolyasiyaya əməl etmək, ictimai yerlərdə maska taxmaq həyatımızın ən əhəmiyyətli parçasına çevrilməlidir. Hazırda bu sadalananlara əməl etməyimiz həm özümüzün, həm də ümumilikdə toplumumuzun təhlükəsizliyində vacib rol oynayacaq.
Virusla birgə necə yaşayaq?
Çox təəssüf ki, bəzən əməl olunması vacib qaydalara zidd hallarla da rastlaşırıq. Məsələn, maskanı aksesuar kimi cibində, çantasında saxlayan və sadəcə ondan tələb olunduqda çıxarıb taxan məsuliyyətsiz şəxslərə də rast gəlirik.
O cümlədən qaydaları pozaraq saat 18:00-dan sonra gizli kafe və restoran işlədənlər aşkarlanır. Karantini pozan yol hərəkəti iştirakçıları da xeyli saydadır.
Elə sadalanan və daha bu kimi bir çox qayda pozuntuları və məsuliyyətsiz davranışlar ölkəmizdə son zamanlar yoluxma sayının artmasına səbəb olub. Neçə aylıq gərgin əməyin, aparılan ciddi mübarizənin nəticəsi olaraq qazanılan nailiyyət bəzi vətəndaşların məsuliyyətsizliyi sayəsində əldən verilə bilər. Daha ciddi və acı nəticələrlə üzləşə bilərik.
Bu bir reallıqdır ki, koronavirus həyatımızın bir parçasına çevrilib. Onu yox kimi saymaq, ondan qorxmamaq əvəzinə ona qarşı davranışları, mübarizə qaydalarını öyrənmək mütləqdir.
Tibbi Ərazi Bölmələrini İdarəetmə Birliyinin (TƏBİB) İdarə Heyətinin sədri Ramin Bayramlı söyləyib ki, bütün dünya ölkələri əhalini sərt karantin rejimindən çox bu virusla birgə yaşamağa alışdırır. Onun sözlərinə görə, biz virusla birgə yaşamalıyıq: "Bütün tədbirlərə baxmayaraq, virus bizimlə qalacaq. Yaxın bir il ərzində vaksinin əldə edilməsi gözlənilmir. Antivirus dərman da yoxdur. Bu baxımdan biz qaydalar çərçivəsində yaşamağa alışmalıyıq”.
Yasəmən
MUSAYEVA
Azərbaycan.-2020.- 22 may.- S.6.