İndi mərdlik vaxtı, qeyrət çağıdır

Ana xeyir-duası döyüşən oğullara güc-qüvvət verir

Dünyada ana qədər incə qəlbli, ana qədər kövrək bir məxluq varmı, görəsən?! Yer üzünün ən ucqar bir guşəsində atılan güllənin səsi də sanki ona gəlib çatır. Üzünü belə görmədiyi əsgərlər, haqq işi uğrunda vuruşan döyüşçülər üçün dua edir. Bu top-tüfəng öz yurdumuzda,öz torpağımızda səslənəndə analarımızın yüzqat incələnən qəlbi şir, aslan ürəyinə də dönə bilir ("Aslanın erkəyi, dişisi olmaz” deyib xalqımız).

Vətən, torpaq uğrunda haqq savaşına qalxan oğullarımıza xeyir-dua verər analar, qələbə dilər. Ulu nənələrimizin bayatı dili ilə oğullara sağ-salamatlıq arzulayar:

Sən igidlər nəslisən,

Dəyməz heç güllə sənə!..

Oğullar da qəlblərindəki ana sevgisi ilə atılar döyüşə. Ana Vətən, ana torpaq, ana yurd, ana qeyrəti uğrunda vuruşar və... Lazım gələndə həyatından keçər igidlərimiz. Çünki torpaq əgər uğrunda ölən varsa, Vətəndir!

Belə olduğu halda Azərbaycan anası qəlbini polada da döndərə bilir. "Bağrına daş bağlayıb” ifadəsi dilimizdə əbəs yerə yaranmayıb ki...

"Şəhid anası” deyə çağırıldığı andan ağır oturub batman gələn xanım-xatın Azərbaycan qadınlarının gözü önünə üç onillikdən çoxdur erməni faşistləri tərəfindən xalqımızın başına gətirilən faciələr, müsibətlər, soyqırımıları gələr. Oğlunun torpaq, xalq, haqq işi uğrunda şəhid olduğunu düşünərək başını uca tutar. Dərin kədər qarışıq bir ülvi hiss də keçirər, fəxarət duyar, qürurlu duyğular yaşayar. "Oğulu böyütmüşəm - Vətən üçün!” deyən analarımız azdırmı?

Dünən oğlu orduda zabit kimi xidmət edən bir anaya ürək-dirək, təsəlli verdik, səbir dilədik. O isə bütün döyüşçülərimizə uğur, qələbə arzuladı, hamısının sağ-salamat olması üçün dua etdi. O ana bilir ki, oğlu odlu döyüşlərdədir. O ana hətta belə düşünməyə də özündə güc tapır: "Nə oğlum indiyə qədərki şəhidlərimizdən artıqdır, nə də özüm onların analarından...”

Dünən bir zabit xanımı ilə həbsöhbət olduq. O da anadır, iki körpəsi var, üçüncüsünün yolunu gözləyir. Ömür-gün yoldaşı odlu cəbhədə düşmənlə üz-üzə olan bu gənc qadın çox təmkinlidir: "Demişəm, evdən, uşaqlardan nigaran qalmasın. Fikri işində, xidmətində olsun, Vətən qarşısında müqəddəs borcunu yerinə yetirsin”.

İstər-istəməz yadımıza vaxtilə radio dalğalarında "Müharibə illərinin mahnıları” silsilə verilişlərində səslənən bir nəğmə düşür:

Gəl, ana yurdumun qızı, gəlini,

İndi namus vaxtı, qeyrət dəmidir.

Sən də əsirgəmə kömək əlini,

Hər sözün, söhbətin can məlhəmidir.

Bu gün yüzlərlə Azərbaycan qızının qəlbindən silaha sarılmaq keçir. Ancaq güclü dövlət olan Azərbaycanın güclü Ordusu buna ehtiyac duymur. Azərbaycan oğulları yağı düşmənə necə lazımdırsa, elə də cavab verir. Ancaq bu gün də, böyük şairimiz Səməd Vurğunun zamanında dediyi kimi, "Hər sözün, söhbətin can məlhəmidir”, Azərbaycan qızı, Azərbaycan anası!

Bütün müharibələrdə döyüşən ordu, vuruşan əsgər və zabitlər arxa cəbhədən güc alır. Həm də təkcə maddi mənada yox. Bəlkə ondan az əhəmiyyət daşımayan mənəvi dəstəkdən söhbət gedir.

Bu gün Azərbaycan Ordusunun arxasında Azərbaycan dövləti, xalqımız dayanıb. Döyüşən hər oğul, eyni zamanda, öz evindən, ailəsindən mənəvi güc alır. Anasından, bacısından, ömür-gün yoldaşından eşitdiyi hər söz onun qolunun qüvvətini, gözünün işığını artırır. Əgər yarası olsa, o sözlər məlhəmə çevrilir. Ana xeyir-duası, qadın sədaqəti, bacı sevgisi düşmən üstünə şığıyan oğullarımızın qələbəyə inamını artırır.

Flora SADIQLI

Azərbaycan.-2020.- 3 oktyabr.- S.8.