Ermənistanın Azərbaycan
şəhərlərinə raket
hücumları münaqişəyə üçüncü
ölkələri cəlb etmək məqsədi güdür
Azərbaycan
Respublikasına qarşı yeni təcavüzü çərçivəsində
Ermənistan silahlı qüvvələri beynəlxalq
hüququn, o cümlədən beynəlxalq humanitar hüququn əsas
norma və prinsiplərini, habelə Ermənistanın
müvafiq beynəlxalq öhdəliklərini pozaraq, Azərbaycanın
mülki əhalisini və infrastrukturunu qəsdən hədəfə
alır.
Ermənistan tərəfinin məqsədyönlü atəşləri nəticəsində bu günədək 24 nəfər azərbaycanlı mülki şəxs qətlə yetirilib, 121 nəfər yaralanıb, 300-dən çox yaşayış binası və mülki obyektlər dağıdılıb.
NUHÇIXAN İnformasiya Agentliyi xəbər verir ki, bu fikirlər Azərbaycan Respublikası Xarici İşlər Nazirliyinin Mətbuat xidməti idarəsinin açıqlamasında yer alıb. Açıqlamada, həmçinin deyilir: “Azərbaycanın ikinci ən böyük şəhəri olan Gəncə, sənaye şəhəri olan Mingəçevir, habelə Xızı və Abşeron rayonlarında əhalinin sıx məskunlaşdığı yaşayış məntəqələri və müstəsna əhəmiyyətli infrastrukturunun Ermənistan ərazisindən məqsədyönlü şəkildə raket hücumlarına tutulması hərbi əməliyyatlar zonasını genişləndirmək və münaqişəyə üçüncü ölkələri cəlb etmək məqsədi güdən təxribatdır.
Azərbaycan tərəfində Azərbaycanın mülki əhalisi və infrastruktur obyektlərinin məhz Ermənistan ərazisindən, o cümlədən Gorus, Sisyan, Cermuk və Berd şəhərlərindən raket atəşinə tutması barədə tutarlı faktlar var.
Bütün dəlillər yerli və xarici mütəxəssislərin, o cümlədən yerlərdə olan xarici jurnalistlərin iştirakı ilə toplanaraq müvafiq beynəlxalq təşkilatlara təqdim ediləcək.
Ermənistanı beynəlxalq hüququn normaları və prinsiplərinə, o cümlədən beynəlxalq humanitar hüquq çərçivəsində öhdəliklərinə tabe olmağa, BMT Təhlükəsizlik Şurasının qətnamələrinin Azərbaycanın işğal olunmuş ərazilərindən dərhal, tam və qeyd-şərtsiz çəkilməsinə dair tələblərini yerinə yetirməyə çağırırıq.
Bir
daha təkrar edirik ki, Ermənistan Silahlı Qüvvələri
tərəfindən mülki şəxslərin və Azərbaycanın
beynəlxalq səviyyədə tanınmış ərazilərinin
dərinliyindəki yaşayış məntəqələrinin
təhlükəsizliyini təmin etmək üçün həyata
keçirəcəyi əks-hücum tədbirlərinin nəticələrinə
görə tam məsuliyyət məhz Ermənistan rəhbərliyinin
üzərinə düşür”.
Azərbaycan.-2020.- 6 oktyabr.- S.6.